សាច់ញាតិរបស់លោក ពេជ្រ ធារ៉េត ដែលស្លាប់ក្នុងពេលប៉ូលិសឃុំខ្លួននៅស្រុកសង្កែនោះ ថ្លែងថា វិធានការរបស់គណៈកម្មាធិការជាតិប្រឆាំងទារុណកម្មនេះ គឺមិនបានជួយរកយុត្តិធម៌ជូនដល់ប្រជាពលរដ្ឋនោះទេ ព្រោះធ្វើឱ្យជនល្មើសនៅតែបន្តរស់នៅក្រៅសំណាញ់ច្បាប់ដដែល។
បងស្រីបង្កើតរបស់ជនរងគ្រោះគឺលោកស្រី ពេជ្រ លីណា ប្រាប់វិទ្យុអាស៊ីសេរីនៅព្រឹកថ្ងៃទី២០ ខែមិថុនាថា គណៈកម្មាធិការជាតិប្រឆាំងទារុណកម្មបំពេញការងារលំអៀងទៅខាងសមត្ថកិច្ច ពីព្រោះប្អូនប្រុសរបស់គាត់ត្រូវបានប៉ូលិសវាយធ្វើទារុណកម្មធ្ងន់ធ្ងរក្នុងពេលឃុំខ្លួនសួរចម្លើយនៅអធិការនគរបាលស្រុកសង្កែយ៉ាងពិតប្រាកដ។ ប៉ុន្តែស្ថាប័ននេះបែររុញទៅអង្គភាពផ្សេងទៀត ដើម្បីចាត់វិធានការបន្តទៅវិញ។ លោកស្រីចាត់ទុកចំណាត់ការរបស់ស្ថាប័នថ្នាក់ជាតិមួយនេះថា ជាការធ្វើរួមដៃគ្នាឱ្យប៉ូលិសដែលជាជនល្មើសបានរួចផុតពីការចោទប្រកាន់៖ «ខ្ញុំមិនអាចទទួលយកបានទេ ព្រោះគណៈកម្មការលោកបានចុះស៊ើបអង្កេតតាំងពីថ្ងៃទី៨ ខែមេសា ហើយបានបញ្ចប់តាំងពីថ្ងៃទី១៣ ខែមេសា។ ប៉ុន្តែគណៈកម្មាធិការមិនបង្ហាញរបាយការណ៍ជាឯករាជ្យសូម្បីតែខ្ញុំជាសាច់ញាតិក៏មិនបានដឹងដែរ។សូមលោកហ៊ានចាត់វិធានការតាមផ្លូវច្បាប់ ទោះបីអ្នកប្រព្រឹត្តជាសមត្ថកិច្ចក៏ដោយ សូមលោកផ្ដល់យុត្តិធម៌ឱ្យប្អូនខ្ញុំដែលស្លាប់ដោយទារុណកម្មយ៉ាងធ្ងន់ធ្ងរបែបនេះ សូមលោកផ្ដល់យុត្តិធម៌ឱ្យប្អូនខ្ញុំផងមក » ។
ប្រតិកម្មរបស់សាច់ញាតិជនរងគ្រោះនេះ ធ្វើឡើងក្រោយពេលគណៈកម្មាធិការជាតិប្រឆាំងទារុណកម្ម ចេញរបាយការណ៍ស្រាវជ្រាវនៅថ្ងៃទី១៦ ខែមិថុនា ដោយសន្និដ្ឋានថា ជនរងគ្រោះអាចស្លាប់បណ្ដាលមកពីការវាយធ្វើទារុកម្មស្រាលឬធ្ងន់ ក្នុងពេលប៉ូលិសឃុំខ្លួននៅអធិការនគរបាលស្រុកសង្កែ ប៉ុន្តែមិនបានចាប់ជនល្មើសផ្ដន្ទាទោសតាមច្បាប់ឡើយ។ បន្ថែមពីនេះគណៈកម្មាធិការជាតិប្រឆាំងទារុណកម្ម បែរជារុញសំណុំរឿងនេះទៅអាជ្ញាធរពាក់ព័ន្ធ ជាពិសេសអគ្គស្នងការនគរបាលជាតិ ដើម្បីស៊ើបអង្កេតបន្ថែមទៅវិញ។
វិទ្យុអាស៊ីសេរីមិនអាចទាក់ទងប្រធានគណៈកម្មាធិការជាតិប្រឆាំងទារុណកម្មលោក នុត សាអាន ដើម្បីសុំអត្ថាធិប្បាយជុំវិញបញ្ហានេះបានទេនៅថ្ងៃទី២០ ខែមិថុនា ដោយទូរស័ព្ទចូលពុំមានអ្នកទទួល។
បុរសឈ្មោះ ពេជ្រ ធារ៉េត អាយុ ៣១ ឆ្នាំ និងប្រពន្ធ ឈ្មោះ ជា ច័ន្ទរចនា អាយុ ៣០ ឆ្នាំ បានស្លាប់ក្នុងថ្ងៃជាមួយគ្នា កាលពីថ្ងៃទី៣ ខែមេសា ហើយបានបន្សល់ទុកកូនស្រីតូចៗចំនួន ២ នាក់។ ពួកគាត់រស់នៅក្នុងភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង។ លោក ពេជ្រ ធារ៉េត បានស្លាប់ក្នុងពេលប៉ូលិសចាប់ឃុំខ្លួនសួរចម្លើយនៅក្នុងអធិការដ្ឋាននគរបាលស្រុកសង្កែ អស់រយៈពេលជាង ៣ ម៉ោង ពាក់ព័ន្ធនឹងការចោទប្រកាន់ថា លោករាយខ្សែភ្លើងអគ្គិសនី ដើម្បីឆក់សម្លាប់ប្រពន្ធនៅក្នុងផ្ទះដោយសារភ្លើងប្រច័ណ្ឌ។ ប៉ុន្តែសាក្សីអះអាងថា ក្នុងពេលកើតហេតុ បុរសជាប្តីរូបនេះ មិនបាននៅផ្ទះឡើយ។ ប៉ូលិសខេត្តបាត់ដំបង បកស្រាយថា លោក ពេជ្រ ធារ៉េត ស្លាប់ដោយសារគាំងបេះដូង ព្រោះប្រើថ្នាំញៀនហួសកម្រិត។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា ការដែលគណៈកម្មាធិការជាតិប្រឆាំងទារុណកម្មសន្និដ្ឋានបែបនេះ សបញ្ជាក់ថា មន្ត្រីប៉ូលិសថ្នាក់ក្រោមបានឃុបឃិតគ្នាធ្វើរបាយការណ៍ដាក់បន្ទុកទៅលើជនរងគ្រោះខុសពីការពិត។ ដូច្នេះលោកថា ពួកគេត្រូវតែទទួលខុសត្រូវចំពោះមុខច្បាប់។ ទោះជាយ៉ាងណា លោកយល់ថា ពន្លឺយុត្តិធម៌ហាក់នៅវែងឆ្ងាយទៅមុខទៀត ពីព្រោះរឿងនេះ ពុំថា អគ្គស្នងការនគរបាលជាតិនឹងចាត់វិធានការបែបណានោះទេ៖ «ត្រូវតែមានការអត់ធ្មត់ទៀត គ្រាន់តែវាយូរ ពីព្រោះលើកមុនយើងទន្ទឹងឱ្យគណៈកម្មការនេះបង្ហាញរបាយការណ៍ ឥឡូវគណៈកម្មការបានបង្ហាញហើយ ជាសាធារណៈហើយ ពាក់ព័ន្ធទៅនឹងបញ្ហានៃការធ្វើទារុណកម្ម ហើយគណៈកម្មាធិការបានសន្និដ្ឋានថែមទៀត ថាការធ្វើទារុណកម្មកម្រិតធ្ងន់និងកម្រិតស្រាល។ អីចឹងគ្រាន់តែថា ទម្រាំតែអគ្គស្នងការនគរបាលលោកបង្កើតគណៈកម្មការបន្ថែមទៀតនឹងកាន់តែយូរបន្ថែមទៀត។ តែអានេះមិនដឹងថា តួនាទី ឬ អំណាចរបស់គណៈកម្មការប្រឆាំងទារុណកម្មគាត់អាចធ្វើបានតែប៉ុណ្ណឹង ឬក៏យ៉ាងម៉េច »។
លោក យិន ម៉េងលី បញ្ជាក់ទៀតថា អាជ្ញាធរពាក់ព័ន្ធគួរតែចាត់វិធានការលើរឿងនេះឱ្យបានឆាប់ ដើម្បីផ្ដល់យុត្តិធម៌ជូនដល់គ្រួសាររបស់ជនរងគ្រោះផង និងជាការព្រមានដល់សមត្ថកិច្ចផ្សេងទៀតកុំឱ្យតែចេះតែវាយធ្វើទារុណកម្មមកលើប្រជាពលរដ្ឋស្លូតត្រង់តាមអំពើចិត្តបន្តទៀត។
ក្នុងរយៈពេលជាង ១ ឆ្នាំកន្លងមកនេះ នៅខេត្តបាត់ដំបងមានជនជាប់ឃុំចំនួន ៣ នាក់ហើយ ដែលបានស្លាប់ក្នុងពេលសមត្ថកិច្ចឃុំខ្លួន។ ការស្លាប់ទាំង៣ ករណីនេះ សាកសពសុទ្ធតែមានស្នាមជាំនៅដងខ្លួន ដៃ និងជើង ហើយករបស់ជនរងគ្រោះភាគច្រើនទន់ខុសប្រក្រតីប្រៀបដូចគេវាយបាក់ឆ្អឹងក។ ក្រសួងការបរទេសអាមេរិក រកឃើញថា ក្នុងឆ្នាំ២០២០ កន្លងទៅ មានករណីរំលោភបំពានសិទ្ធិមនុស្សគួរឲ្យកត់សម្គាល់ ដែលប្រព្រឹត្តដោយអាជ្ញាធររដ្ឋាភិបាលកម្ពុជា ពាក់ព័ន្ធទៅនឹងករណីធ្វើទារុណកម្មក្នុងពេលឃុំខ្លួន ការដាក់ទោសទណ្ឌ ការឃុំឃាំងមនុស្សតាមទំនើងចិត្ត និងការប្រព្រឹត្តប្រឆាំងនឹងអ្នកទោសនយោបាយ ជាដើម ស្របពេលដែលកម្ពុជានៅតែគ្មានប្រព័ន្ធតុលាការឯករាជ្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។