អ្នកស្រី រ៉ូណា ស្មីត ទស្សនកិច្ច​នៅ​មណ្ឌល​ព្រៃ​ស្ពឺ

ដោយ មាន ឫទ្ធិ
2019-05-07
អ៊ីម៉ែល
មតិ
Share
បោះពុម្ព
សាច់​ញាតិ​អ្នក​នៅ​មជ្ឈមណ្ឌល​សំចត​សង្គមកិច្ច​រាជធានី​ភ្នំពេញ ហៅ​មណ្ឌល​ព្រៃស្ពឺ នៅ​ភូមិ​ស្រែជម្រៅ សង្កាត់​ចោមចៅ ខណ្ឌ​ពោធិ៍សែនជ័យ យក​ម្ហូប​អាហារ​មក​អោយ​អ្នក​ជាប់​ឃុំ។ រូបថត​ថ្ងៃ​ទី​២៥ ខែ​សីហា ឆ្នាំ​២០១៦
សាច់​ញាតិ​អ្នក​នៅ​មជ្ឈមណ្ឌល​សំចត​សង្គមកិច្ច​រាជធានី​ភ្នំពេញ ហៅ​មណ្ឌល​ព្រៃស្ពឺ នៅ​ភូមិ​ស្រែជម្រៅ សង្កាត់​ចោមចៅ ខណ្ឌ​ពោធិ៍សែនជ័យ យក​ម្ហូប​អាហារ​មក​អោយ​អ្នក​ជាប់​ឃុំ។ រូបថត​ថ្ងៃ​ទី​២៥ ខែ​សីហា ឆ្នាំ​២០១៦
RFA/Uon Chhin

អ្នក​រាយការណ៍​ពិសេស​របស់​អង្គការ​សហប្រជាជាតិ (..) ទទួល​បន្ទុក​សិទ្ធិ​មនុស្ស​ប្រចាំ​កម្ពុជា អ្នកស្រី រ៉ូណា ស្មីត នៅ​ថ្ងៃ​ទី៦ ខែ​ឧសភា បាន​ធ្វើ​ទស្សនកិច្ច​នៅ​មណ្ឌល​សង្គមកិច្ច​រាជធានី​ភ្នំពេញ ឬ​ហៅ​ថា​ មណ្ឌល​អប់រំ​វិជ្ជាជីវៈ​ព្រៃ​ស្ពឺ ស្ថិត​នៅ​សង្កាត់​ចោមចៅ ខណ្ឌ​ពោធិ៍សែនជ័យ ដែល​ជា​កន្លែង​​អាជ្ញាធរ​បាន​ចាប់​ប្រមូល​មនុស្ស​ចាស់ និង​កុមារ​នៅ​តាម​ចិញ្ចើម​ផ្លូវ អ្នក​គ្មាន​ទីជម្រក អ្នក​ប្រើប្រាស់​គ្រឿង​ញៀន ស្ត្រី​រក​ស៊ី​ផ្លូវ​ភេទ និង​ជន​វិកល​ចរិត​ជា​ដើម យក​ទៅ​អប់រំ​កែប្រែ និង​បណ្ដុះបណ្ដាល​វិជ្ជាជីវៈ នៅ​ទី​នោះ។

អ្នកស្រី រ៉ូណា ស្មីត បាន​សរសេរ​នៅ​លើ​ទំព័រ​ហ្វេសប៊ុក​ថា ដំណើរ​ទៅ​កាន់​មណ្ឌល​សង្គមកិច្ច​ព្រៃស្ពឺ​នេះ មិន​ត្រូវ​បាន​ប្រកាស​ឲ្យ​ដឹង​ជា​មុន​នោះ​ទេ ដូច្នេះ​អ្នកស្រី​បាន​មើល​ឃើញ​ជាក់​ស្ដែង​អំពី ស្ថានភាព​បច្ចុប្បន្ន​នៅ​មណ្ឌល​នេះ។ អ្នកស្រី​ទទួល​បាន​របាយការណ៍​ថា បច្ចុប្បន្ន​មាន​មនុស្ស ១៣២នាក់ កំពុង​ស្នាក់​នៅ​ទីនោះ ប៉ុន្តែ​អ្នកស្រី មិន​ទាន់​វាយ​តម្លៃ​ថា ស្ថានភាព​មណ្ឌល​នេះ​មាន ស្ថានភាព​ល្អ ឬ​អាក្រក់​ជាង​មុន​ឡើយ។

កាល​ពី​ខែ​សីហា ឆ្នាំ២០១៧ អ្នកស្រី រ៉ូណា ស្មីត ធ្លាប់​ធ្វើ​ទស្សនកិច្ច​នៅ​មណ្ឌល​ព្រៃ​ស្ពឺ​នេះ​ម្ដង​ដែរ ដោយ​រក​ឃើញ​ថា មាន​ស្ថានភាព​អាក្រក់​ដោយ​មាន​មនុស្ស​ច្រើន​តាន់តាប់ ខ្វះខាត​សេវា​ថែទាំ​សុខភាព ខ្វះ​ទឹក​ស្អាត គ្មាន​អនាម័យ និង​ខ្វះ​ម្ហូប​អាហារ រួម​ទាំង​ការ​ឃុំឃាំង​មនុស្ស​ខុស​ច្បាប់​ជា ដើម។ អ្នកស្រី​ស្នើសុំ​ក្រសួង​សង្គម​កិច្ច​ឱ្យ​ខិតខំ​កែប្រែ​មណ្ឌល​នេះ​ឲ្យ​បាន​ល្អ​ប្រសើរ​ជាង​មុន។ ជា​ការ​ឆ្លើយ​តប​រដ្ឋមន្ត្រី ក្រសួង​សង្គមកិច្ច លោក វង សូត ក៏​ព្រម​ទទួល​យក​អនុសាសន៍​របស់​អ្នកស្រី​ដែរ។

ក្រៅ​ពី​ធ្វើ​ទស្សនកិច្ច​នៅ​មណ្ឌល​ព្រៃ​ស្ពឺ​នោះ អ្នកស្រី រ៉ូណា ស្មីត ក៏​បាន​ឆ្លៀត​ពេល​ទៅ​ជួប​ជាមួយ​អនុប្រធាន​អង្គភាព​ប្រឆាំង​អំពើ​ពុក​រលួយ​លោក ឃាង សេង នៅ​រសៀល​ថ្ងៃ​ដដែល​នេះ​ដែរ។ ក្នុង​ជំនួប​នោះ លោក ឃាង សេង បាន​ផ្ដល់​ព័ត៌មាន​សង្ខេប​ជូន​អ្នកស្រី​អំពី​យុទ្ធសាស្ត្រ និង​ផែនការ ដែល​បាន​បង្កើត​ឡើង ដើម្បី​ប្រយុទ្ធ​ប្រឆាំង​នឹង​អំពើ​ពុក​រលួយ​នៅ​ក្នុង​ប្រទេស​កម្ពុជា តាម​រយៈ​វិធានការ​ផ្សេងៗ រួម​មាន កំណែ​ទម្រង់​ច្បាប់ ការ​អប់រំ​ប្រឆាំង​អំពើ​ពុក​រលួយ និង​ការ​បង្ការ​ទប់​ស្កាត់​អំពើ​ពុក​រលួយ។

បន្ទាប់​ពី​ជំនួប​នេះ អ្នកស្រី រ៉ូណា ស្មីត ក៏​បាន​ជួប​ជាមួយ​ក្រុម​សហគមន៍​ការពារ​ព្រៃ​ឡង់​មក​ពី​ខេត្ត​កំពង់ធំ ស្ទឹងត្រែង ក្រចេះ និង​ព្រះ​វិហារ ដើម្បី​ចង់​ដឹង​អំពី​កិច្ចការ​ការពារ​ព្រៃ​ឈើ​របស់​ពួក​គេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល