លោក ស ខេង ឱ្យ​អាជ្ញាធរ​ខេត្ត​ពោធិ៍សាត់​បង្កើន​ការ​ទប់ស្កាត់​ឧក្រិដ្ឋកម្ម​ជួញដូរ​មនុស្ស

ដោយ សេក បណ្ឌិត
2022.11.25
Share on WhatsApp
Share on WhatsApp
លោក ស ខេង ឱ្យ​អាជ្ញាធរ​ខេត្ត​ពោធិ៍សាត់​បង្កើន​ការ​ទប់ស្កាត់​ឧក្រិដ្ឋកម្ម​ជួញដូរ​មនុស្ស រដ្ឋមន្ត្រី​ក្រសួង​មហាផ្ទៃ លោក ស ខេង។
រូប៖ ហ្វេសប៊ុក​លោក ស ខេង

លោក ស ខេង រដ្ឋមន្ត្រី​ក្រសួងមហាផ្ទៃ​ណែនាំ​ដល់​មន្ត្រី​អាជ្ញាធរ​ខេត្ត​ពោធិ៍សាត់​បង្កើន​ការទប់ស្កាត់​នៃ​ឧក្រិដ្ឋកម្ម​ជួញដូរ​មន​ស្ស​ដែល​កំពុង​កើតឡើង​កាន់តែ​ច្រើន​ស្ថិតនៅ​តំបន់​ថ្មដា ខេត្ត​ពោធិ៍សាត់​។ ទោះបីជា​យ៉ាងណា មន្ត្រី​អាជ្ញាធរ​ខេត្ត​ពោធិ៍សាត់​អះអាង​ថា នៅ​តំបន់​ថ្មដា​មិន​មាន​ករណី​ជួញដូរ​មនុស្ស និង​ការ​បង្ខាំង​មនុស្ស​ឡើយ​។ មន្ត្រី​សង្គម​ស៊ីវិល​យល់​ថា អាជ្ញាធរ និង​រដ្ឋាភិបាល​ហាក់​គ្មាន​ឆន្ទៈ​ក្នុង​ការ​លុបបំបាត់​ឧក្រិដ្ឋកម្ម​ជួញដូរ​មនុស្ស​នៅ​កម្ពុជា​នៅឡើយ។

លោក ស ខេង ឱ្យ​ដឹង​ថា ក្រុម​ឧក្រិដ្ឋជន​មួយចំនួន​ប្រតិបត្តិការ​អំពើ​ជួញដូរ​មនុស្ស​នៅ​ខេត្ត​ព្រះសីហនុ​កន្លង​ទៅ គឺ​ពួកគេ​បាន​គេច​ខ្លួន និង​សំងំ​ប្រតិបត្តិការ​នៅ​តាម​តាម​បណ្ដា​ខេត្ត​ចំនួន​ដូចជា ខេត្ត​កណ្ដាល ស្វាយរៀង រាជធានី​ភ្នំពេញ ជាពិសេស​ទៅកាន់​តំបន់​ថ្មដា ស្រុក​វាលវែង ខេត្ត​ពោធិ៍សាត់។

លោក ស ខេង ណែនាំ​ដល់​មន្ត្រី​អាជ្ញាធរ​ខេត្ត​ពោធិ៍សាត់ ត្រូវ​ចាត់វិធានការ​ទប់ស្កាត់​ឧក្រិដ្ឋកម្ម​ជួញដូរ​មនុស្ស​ក្នុង​តំបន់​ថ្មដា ក្នុង​ស្រុក​វាលវែង ដើម្បី​កុំឱ្យ​ក្រុម​ឧក្រិដ្ឋជន​បន្តសកម្មភាព​រីក​រាលដាល​កាន់តែ​ខ្លាំង​ឡើង ដូចជា​នៅ​ខេត្ត​ព្រះសីហនុ។

លោក ស ខេង៖ «តំបន់​ថ្មដា​យើង គឺ​យើង​ត្រូវ​សម្អាត​ពី​ឥឡូវ​ទៅ​។ កុំ​ទុក​ឱ្យ​វា​កាច់​សម្បុក។ កាច់​សម្បុក​ប្រកបដោយ​អំពើ​ខុសច្បាប់​។ កំពង់សោម​កាច់​សម្បុក​ទៅ​ហើយ ថ្ងៃ​ណា​ក៏​ថ្ងៃ​កាប់សម្លាប់​គ្នា ហើយ​ខ្ញុំ​បាន​លើកឡើង​ថា កំពង់សោម​រដ្ឋាភិបាល​វិនិយោគ​សម្បើម​ណាស់​រាប់ពាន់​លាន​ដុល្លារ តាំងពី​វិនិយោគ​ក្នុង​ផង ក្រៅ​ផង រដ្ឋាភិបាល​ផង​វិស័យ​ឯកជន​ផង​។ តែ​ទីបំផុត​មក​វា​ទៅជា​កន្លែង​ឧក្រិដ្ឋកម្ម​ទៅវិញ ជួញដូរ​មនុស្ស​ទៅវិញ យើង​សោកស្ដាយ​ណាស់»

លោក​លើក​ឡើង​បែប​នេះ ក្នុង​ពិធី​ប្រកាស​ចូលកាន់​មុខតំណែង​អភិបាលខេត្ត​ពោធិ៍សាត់ កាលពី​ថ្ងៃទី​២១ វិច្ឆិកា។

លោក ស ខេង ទទួល​ស្គាល់​ថា មន្ត្រី​អាជ្ញាធរ​មួយចំនួន​គឺ​សមត្ថភាព​ពួកគេ​នៅ​មាន​កម្រិត ដោយសារតែ​ក្រុម​មន្ត្រី​អាជ្ញាធរ​ទាំងនោះ​មិនទាន់​យល់​ច្បាស់​អំពី​ទម្រង់​នៃ​អំពើ​ជួញដូរ​មនុស្ស​ដែល​កំពុង​កើត​នៅ​កម្ពុជា​នៅឡើយ​។ លោក​បញ្ជាក់​ថា ជនបរទេស​ភាគី​ច្រើន​ចូល​កម្ពុជា​ដោយ​មិន​មាន​លិខិតឆ្លងដែន និង​ប័ណ្ណ​ការងារ​នោះ​ទេ។ លើស​ពី​នេះ ពួកគេ​មួយចំនួន​ត្រូវ​បាន​គេ​បោក​បញ្ឆោត​ឱ្យធ្វើ​ការ​ឆបោក​តាម​អនឡាញ​ខុសច្បាប់ ខណៈ​អ្នក​ខ្លះទៀត​ត្រូវ​បាន​ថៅកែ​រឹតត្បិត​សិទ្ធ​សេរីភាព ធ្វើ​ទារុណកម្ម​វាយដំ​បង្ខំ​ឱ្យធ្វើ​ការងារ​ច្រើន​ម៉ោង​ជាដើម។

មនុស្ស​ដែល​ស្និទ្ធ​នឹង​រដ្ឋាភិបាល លោក ហ៊ុន សែន និង​មាន​ងារ​ជា​ឧកញ៉ា បាន​រង​ការ​ចោទ​ប្រកាន់​ថា ជា​មេខ្លោង​នៅ​ពីក្រោយ​នៃ​ឧក្រិដ្ឋកម្ម​ជួញដូរ​មនុស្ស​នៅ​ខេត្តពោធិ៍សាត់​នេះ នេះ​បើ​តាម​ទូរទស្សន៍​អាល់ហ្សា ហ្ស៊ី​រ៉ា (Al Jazeera) ផ្សាយ​កាល​ពី​ពេល​ថ្មីៗ​នេះ​។ ទូរទស្សន៍ អាល់​ហ្សា ហ្ស៊ី​រ៉ា លាតត្រដាង​ថា ឧកញ៉ា ទ្រី ភាព មាន​អគារ​សហគ្រាស​ដែល​មាន​សភាព​ងងឹត​សម្រាប់​ជួល​ឱ្យ​ជនជាតិ​ចិន ដើម្បី​ចាប់ជំរិត​មនុស្ស​ធ្វើ​ទារុណកម្ម ស្ថិតនៅ​តំបន់​សេដ្ឋកិច្ច​ពិសេស​ខេត្តពោធិ៍សាត់​។ ពលរដ្ឋ​នៅ​តំបន់​នោះ​អះអាង​ថា ពួកគាត់​ធ្លាប់​ឃើញ​មានការ​ចាប់​បញ្ជូន​មនុស្ស​ចូល​បរិវេណ​អគារ​របស់ លោក ទ្រី ភាព និង​មាន​សំឡេង​សម្រែក​ដោយសារតែ​ការ​ធ្វើ​ទារុណកម្ម​ទៀត​ផង​។ អាស៊ីសេរី​មិនទាន់​អាច​ទាក់ទង លោក​ឧកញ៉ា ទ្រី ភាព ដើម្បី​បកស្រាយ​បញ្ហា​នេះ​បាន​នៅឡើយ​ទេ នៅ​ថ្ងៃទី ២៤ ខែ​វិច្ឆិកា។

ស្របពេល​ដែល​លោក ស ខេង ចេញមុខ​រិះគន់​មន្ត្រី​ក្រោម​ឱវាទ​របស់​ខ្លួន និង​ឱ្យ​ពួកគេ​បង្កើន​វិធានការ​បង្ក្រាប និង​ទប់ស្កាត់​ឧក្រិដ្ឋកម្ម​ជួញដូរ​មនុស្ស​នេះ មន្ត្រី​អាជ្ញាធរ​ខេត្ត​ពោធិ៍សាត់​អះអាង​ថា នៅ​តំបន់​ថ្មដា ក្នុងស្រុក​វាលវែង គ្មាន​ករណី​ជួញដូរ​មនុស្ស និង​បង្ខាំង​មនុស្ស​ដូចជា​ការ​លើកឡើង​របស់​លោក ស ខេង នោះ​ទេ។

ស្នងការ​រង​នគរបាល​ខេត្តពោធិ៍សាត់​ទទួល​ផែន​ការងារ​ព្រហ្មទណ្ឌ លោក ម៉ូ លីដា ប្រាប់​វិទ្យុ​អាស៊ីសេរី​នៅ​ថ្ងៃទី​២៤ ខែវិច្ឆិកា​ថា កន្លងទៅ​លោក​បាន​ដឹកនាំ​កម្លាំង​ស៊ើបអង្កេត​ទៅតាម​បណ្ដឹង​ជនរងគ្រោះ​ដែល​ភាគី​ច្រើន​ជា​ជន​ជាតិចិន ប៉ុន្តែ​លោក​ថា ក្រុម​ជនជាតិ​ចិន​ទាំងនោះ​ពុំ​ត្រូវ​បាន​គេ​បង្ខាំង​ខុសច្បាប់ ឬ​ជួញដូរ​នោះ​ទេ។

លោក ម៉ូ លីដា អះអាង​ថា នៅ​តំបន់​ថ្មដា គឺ​មាន​ក្រុមហ៊ុន​មួយ​ឈ្មោះ អឹម ឌី អេស (MDS) ដែល​មាន​ជន​ជាតិចិន​ភាគច្រើន​ធ្វើការ​ងារ​នៅ​ទីនោះ​។ មេ​ប៉ូលិស​ផ្កាយ​មួយ​រូប​និយាយ​ថា នៅ​ពេល​ដែល​ជនជាតិ​ចិន​ធ្វើការ​ងារ​នៅ​នោះ​ចង់​ចាក​ចេញពី​ក្រុមហ៊ុន​ត្រឡប់​ទៅ​ស្រុកកំណើត​វិញ​នោះ គឺ​ពួកគេ​បាន​ដាក់​ពាក្យ​ប្ដឹង​ស្នើ​អន្តរាគមន៍ ដោយ​កុហក​ថា​ពួកគេ​ត្រូវ​បាន​គេ​បង្ខាំង និង​ជួញដូរ​មនុស្ស។

លោក ម៉ូ លីដា៖ «ដូច​ថា ជនរងគ្រោះ​ចិន​ហ្នឹង​គាត់​ថា ប្រាក់ខែ​របស់​គាត់ៗ​ចាយ​អត់​គ្រប់ ហើយ​គាត់​ចង់ទៅ​ស្រុក​វិញ​។ ទៅ​ស្រុក​វិញ​គាត់ អត់​មាន​លុយ​ទៅ ម្ល៉ោះ​ហើយ​ធ្វើ​ប្ដឹង​ទៅ​សម្ដេច​ក្រឡាហោម ព្រោះ​ពេលខ្លះ​គាត់​មក​ហ្នឹង​ដោយ​ខុសច្បាប់​អត់​មាន​ឯកសារ​អី​ត្រឹមត្រូវ​ទេ ផាសស្ព័រ (Passport) [​លិខិតឆ្លងដែន​] ក៏​គ្មាន​អី​ក៏​គ្មាន​ដែរ​។ ដល់​អ៊ីចឹង​គាត់​ចង់ទៅ​ស្រុក​វិញ គាត់​ត្រូវ​ទៅ​រក​ផេក (Facebook Page) សម្ដេច ឬមួយ​ក៏​រក​ផេក (Facebook Page) ថ្នាក់ដឹកនាំ គាត់​ដាក់ [​លិខិត​ប្ដឹង​] ទៅ​ឱ្យ​ជួយសង្គ្រោះ​។ គាត់​ថា គេ​ហ្នឹង ក្រុមហ៊ុន​ហ្នឹង​គឺ​បង្ខាំង​មនុស្ស បង្ខាំង​គាត់ បិទ​សិទ្ធ​សេរីភាព​គាត់​។ ដល់ពេល​យើង​ចុះទៅ​ស្រាវជ្រាវ​ជាក់ស្ដែង យើង​ជួយសង្គ្រោះ​គឺ​អត់​មាន»

ជុំវិញ​រឿង​នេះ អ្នកសម្របសម្រួល​សមាគម​ការពារ​សិទ្ធិមនុស្ស​អាដហុក (ADHOC) ប្រចាំ​ខេត្ត​ពោធិ៍សាត់ លោក សំ ច័ន្ទគា សោកស្ដាយ​ដែល​កម្ពុជា​កំពុង​ក្លាយជា​ទីកន្លែង​សម្រាប់​ជនបរទេស ជាពិសេស​ជនជាតិ​ចិន​ប្រព្រឹត្ត​បទឧក្រិដ្ឋ​តាម​អំពើ​ចិត្ត​។ លោក យល់ថា ការប្រកាស​របស់​លោក ស ខេង ដោយ​ណែនាំ​ឱ្យ​មន្ត្រី​របស់​ខ្លួន​បង្កើន​ការ​បង្ក្រាប​ឧក្រិដ្ឋកម្ម​ជួញដូរ​មនុស្ស​នេះ​ទំនង​លោក​ធ្វើឡើង​បំភ័ន្ត​ភ្នែក​អន្តរជាតិ ដើម្បី​កុំឱ្យ​យក​កម្ពុជា​ដាក់​ចូល​ក្នុង​បញ្ជីខ្មៅ​នៃ​ប្រទេស​លាងលុយកខ្វក់​តែប៉ុណ្ណោះ​។ មន្ត្រី​សង្គម​ស៊ីវិល​រូប​នេះ មើលឃើញ​ថា អាជ្ញាធរ និង​រដ្ឋាភិបាល ហាក់​គ្មាន​ឆន្ទៈ​ក្នុង​ការ​បង្ក្រាប​មេខ្លោង​ធំៗ​នៅ​ពីក្រោយ​ឧក្រិដ្ឋកម្ម​ជួញដូរ​មនុស្ស​នេះ​ទេ។

លោក សំ ច័ន្ទគា៖ «រដ្ឋាភិបាល ប្រសិនជា​មិន​មាន​ការ​សហការ​គ្នា មិន​ស្វាហាប់​ក្នុង​ការ​ចាត់ការ​ហ្នឹង​ទេ ខ្លួន​នឹង​មាន​ឈ្មោះ​កាន់តែ​អាក្រក់​ទៅៗ​។ ប្រទេស​ខ្មែរ​អាច​នឹង​មាន​បញ្ហា នៅ​ថ្ងៃ​ខាងមុខ​គេ​នឹង​ដាក់​គំនាប់ ដាក់​ទណ្ឌកម្ម មក​លើ​ប្រទេស​ខ្មែរ​ថែមទៀត​។ យើង​ស្នើ​សុំ​ឱ្យ​អាជ្ញាធរ​ចាត់វិធានការ​ឱ្យ​ម៉ឺងម៉ាត់​ដល់​អ្នក​ជួញដូរ​ហ្នឹង និង​អ្នក​នៅ​ពីក្រោយ​ខ្នង​នៃ​បទឧក្រិដ្ឋ​ការ​ជួញដូរ​មនុស្ស យក​មក​ផ្ដន្ទាទោស ដើម្បី​ស្ដារ​កិត្តិយស​មុខមាត់​ខ្មែរ»

ថ្វី​ត្បិត​អាជ្ញាធរ​បាន​ជួយសង្គ្រោះ​ជនបរទេស​រាប់​រយ​នាក់​បញ្ជូន​ទៅ​ប្រទេស​កំណើត​ពួកគេ​ជា​បន្តបន្ទាប់​យ៉ាងណាក្ដី ប៉ុន្តែ មក​ទល់​នឹង​ពេលនេះ រដ្ឋាភិបាល​នៅតែ​មិនទាន់​រក​ឃើញ​មេខ្លោង​ធំៗ​ជាប់​ពាក់ព័ន្ធ ដែល​ជា​ម្ចាស់​នៃ​អគារ​បង្ខាំង និង​ជួញដូរ​មនុស្ស​នេះ ដើម្បី​បង្ហាញ​ឱ្យ​មហាជន​បានដឹង​នៅ​ឡើយ។

របាយការណ៍​ស្ដីពី​ការ​ជួញដូរ​មនុស្ស​ឆ្នាំ​២០២២ របស់​ក្រសួង​ការបរទេស​អាមេរិក​ចេញ​ផ្សាយ​កាលពី​ខែ​កក្កដា បាន​ទម្លាក់​ចំណាត់ថ្នាក់​កម្ពុជា មក​កម្រិត​ទី​៣ ដែល​មានន័យថា ស្ថានភាព​នៃ​អំពើ​ជួញដូរ​មនុស្ស​នៅ​កម្ពុជា​មាន​លក្ខណៈ​អាក្រក់​បំផុត និង​ពុំ​ធ្លាប់​មាន​ចាប់តាំងពី​ឆ្នាំ​២០១៥ មក​។ អាមេរិក​រក​ឃើញ​ថា កម្ពុជា​ដើរ​ថយក្រោយ និង​គ្មាន​ឆន្ទៈ​ក្នុង​ការ​លុបបំបាត់​ការ​ជួញដូរ​មនុស្ស​នេះ​ទេ ដោយសារ​បញ្ហា​អំពើពុករលួយ​ជា​ប្រព័ន្ធ ដែល​បាន​រារាំង​ដល់​ការអនុវត្ត​ច្បាប់​លើ​ក្រុម​ឧក្រិដ្ឋជន​ដែល​ប្រព្រឹត្ត​នូវ​អំពើ​ជួញដូរ​មនុស្ស​នៅ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។