មន្ត្រីបក្សប្រឆាំងលើកឡើងថា លោក ហ៊ុន ម៉ាណែត គួរតែស្ដារប្រជាធិបតេយ្យ និងការគោរពសិទ្ធិមនុស្សឡើងវិញ តាមលិខិតរបស់អគ្គលេខាធិការអង្គការសហប្រជាជាតិ។ ការលើកឡើងបែបនេះ គឺបន្ទាប់ពីអគ្គលេខាធិការអង្គការសហប្រជាជាតិ និងប្រធានក្រុមប្រឹក្សាអឺរ៉ុប ផ្ញើលិខិតអបអរចំពោះលោក ហ៊ុន ម៉ាណែត ដែលត្រូវបានតែងតាំងជានាយករដ្ឋមន្ត្រី និងជំរុញឱ្យនាយករដ្ឋមន្ត្រីថ្មីកម្ពុជា លើកកម្ពស់សិទ្ធិមនុស្ស និងលទ្ធិប្រជាធិបតេយ្យ។
មន្ត្រីបក្សប្រឆាំង យល់ថា នាយករដ្ឋមន្ត្រីថ្មី លោក ហ៊ុន ម៉ាណែត គួរតែកែលម្អស្ថានភាពប្រជាធិបតេយ្យ និងការគោរពសិទ្ធិមនុស្សនៅក្នុងប្រទេសកម្ពុជាឡើងវិញ ដើម្បីទទួលបានការផ្ដល់តម្លៃកាន់តែច្រើនពីសហគមន៍អន្តរជាតិ។
អនុប្រធានគណបក្សភ្លើងទៀនលោក រ៉ុង ឈុន ប្រាប់វិទ្យុអាស៊ីសេរី នៅថ្ងៃទី៨ កញ្ញាថា លោកមិនភ្ញាក់ផ្អើល នឹងលិខិតរបស់អគ្គលេខាធិការអង្គការសហប្រជាជាតិ និងប្រធានក្រុមប្រឹក្សាអឺរ៉ុប ដែលអបអរលោក ហ៊ុន ម៉ាណែត ក្លាយជានាយករដ្ឋមន្ត្រីនោះទេ។ លោកថា ដោយសារលិខិតនោះ គ្រាន់តែបញ្ជាក់យ៉ាងខ្លីថា លោក ហ៊ុន ម៉ាណែត ត្រូវបានតែងតាំងជានាយករដ្ឋមន្ត្រី មិនមែនជានាយករដ្ឋមន្ត្រី កើតចេញពីការបោះឆ្នោត។
លោក រ៉ុង ឈុន៖«បើគេ(ប្រធានអង្គការសហប្រជាជាតិ)មិនបានលើកឡើងពីដំណើរការបោះឆ្នោត ជាប់ដោយសារការបោះឆ្នោតត្រឹមត្រូវ អ៊ីចឹងមានន័យថា គេចាត់ទុកការបោះឆ្នោតហ្នឹង វាមិនទៅតាមគោលការណ៍ប្រជាធិបតេយ្យ ធ្វើឱ្យប៉ះពាល់សិទ្ធិ និងបាត់បង់សិទ្ធិប្រជារាស្ត្ររាប់លាននាក់ តាមរយៈការមិនឱ្យគណបក្សភ្លើងទៀន ចូលរួមការបោះឆ្នោត»។
ការលើកឡើងរបស់មន្ត្រីបក្សប្រឆាំងនេះ ធ្វើឡើងក្រោយពីអគ្គលេខាធិការអង្គការសហប្រជាជាតិលោក លោក អង់តូនីញ៉ូ ហ្គោទែរ៉េស (Antonio Guterres) និងប្រធានក្រុមប្រឹក្សាអឺរ៉ុប លោក ឆាល មីសែល (Charles Michel) ផ្ញើលិខិតអបអរលោក ហ៊ុន ម៉ាណែត ដែលត្រូវបានតែងតាំងជានាយករដ្ឋមន្ត្រីកម្ពុជា។ ប៉ុន្តែនៅក្នុងលិខិតទាំងពីរនោះ មិនបានបញ្ជាក់ថា លោក ហ៊ុន ម៉ាណែត បានដំណែងនាយករដ្ឋមន្ត្រី តាមរយៈការបោះឆ្នោតដោយសេរី ត្រឹមត្រូវ និងយុត្តិធម៌ និងស្របច្បាប់ជាតិ និងអន្តរជាតិនោះទេ។
អគ្គលេខាធិការអង្គការសហប្រជាជាតិ បានលើកឡើងនៅក្នុងលិខិតចុះថ្ងៃទី៦ ខែកញ្ញាថា ដើម្បីឱ្យកម្ពុជា បន្តចូលរួមជាមួយអន្តរជាតិ ដោះស្រាយបញ្ហាប្រឈមជាសកល រួមមានការប្រែប្រួលអាកាសធាតុ។ លើសពីនេះ លោក អង់តូនីញ៉ូ ហ្គោទែរ៉េ ជំរុញឱ្យរដ្ឋាភិបាលថ្មីរបស់លោក ហ៊ុន ម៉ាណែត លើកកម្ពស់ការចូលរួមរបស់ស្ត្រីក្នុងនយោបាយ ការលើកកម្ពស់សិទ្ធិមនុស្ស និងការចូលរួមដ៏រឹងមាំរបស់សង្គមស៊ីវិល ដែលជាកត្តាជំរុញជាមូលដ្ឋាននៃរបៀបវារៈការអភិវឌ្ឍប្រកបដោយចិរភាព និងមានសារៈសំខាន់ក្នុងការទ្រទ្រង់សន្តិភាពនៅកម្ពុជា។
ចំណែកលិខិតរបស់ប្រធានក្រុមប្រឹក្សាអឺរ៉ុប លោក ឆាល មីសែល (Charles Michel) ចុះកាលពីថ្ងៃទី១ កញ្ញា ក៏បានប្រើប្រាស់សារខ្លី ដើម្បីអបអរលោក ហ៊ុន ម៉ាណែត ដែរ ប៉ុន្តែបានបង្ហាញទំនុកចិត្តថា ស្ថិតក្រោមការដឹកនាំរបស់លោក ហ៊ុន ម៉ាណែត នឹងអាចជួយធ្វើឱ្យទំនាក់ទំនងកម្ពុជានិងសហភាពអឺរ៉ុបល្អប្រសើរជាងមុន។
ជុំវិញរឿងនេះ វិទ្យុអាស៊ីសេរីមិនអាចសុំការបកស្រាយបន្ថែមពីប្រធានអង្គភាពអ្នកនាំពាក្យរដ្ឋាភិបាលថ្មីលោក ប៉ែន បូណា បានទេនៅថ្ងៃទី៨ កញ្ញា។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា យល់ឃើញថា លិខិតរបស់អគ្គលេខាធិការអង្គការសហប្រជាជាតិផ្ញើឱ្យលោក ហ៊ុន ម៉ាណែត គ្រាន់តែជាផ្នែកមួយក្នុងទំនាក់ទំនងការទូតធម្មតា ប៉ុន្តែអ្វីដែលលោកសង្កេតឃើញ ខ្លឹមសារសំខាន់នៅក្នុងលិខិតនោះ ហាក់ចង់សង្កត់ធ្ងន់ឱ្យកម្ពុជាវិលទៅរកការគោរពសិទ្ធិមនុស្ស ស្របទៅតាមច្បាប់អន្តរជាតិឡើងវិញ។
លោក ស៊ឹង សែនករុណា៖«អ្វីដែលជាខ្លឹមសារសំខាន់ ហាក់ដូចជាការចង់បញ្ជាក់ ហើយគេចង់ឃើញ នូវអ្វីដែលជាការបើកនូវលំហការគោរពសិទ្ធិមនុស្ស ហើយលំហនៃលទ្ធិប្រជាធិបតេយ្យ។ ហើយទាំងអស់នេះទេ ដែលជារឿងសំខាន់»។
មន្ត្រីបក្សប្រឆាំងយល់ឃើញថា ប្រសិនបើនៅក្នុងរយៈពេលខាងមុខនេះ នាយករដ្ឋមន្ត្រីថ្មីលោក ហ៊ុន ម៉ាណែត អាចកែលម្អស្ថានភាពសិទ្ធិមនុស្ស និងលទ្ធិប្រជាធិបតេយ្យល្អប្រសើរ តាមរយៈការដោះលែងអ្នកទោសនយោបាយ រួមមានលោក កឹម សុខា លោក ថាច់ សេដ្ឋា កញ្ញា សេង ធារី និងសកម្មជនសិទ្ធិមនុស្សកញ្ញា ឈឹម ស៊ីថរ រួមទាំងបើកឱ្យគណបក្សភ្លើងទៀន និងគណបក្សសង្គ្រោះជាតិ អាចចូលរួមការបោះឆ្នោតឡើងវិញ រួមទាំងឈប់រឹតត្បិតលើសិទ្ធិសេរីភាពសារព័ត៌មាន នោះទើបកម្ពុជាទទួលបានការសាទរលើកមុខមាត់ជាតិពិតប្រាកដ លើឆាកអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។