បើទោះបីជាក្រសួងព័ត៌មានបានប្រកាសដកអាជ្ញាប័ណ្ណសារព័ត៌មាន វីអូឌី(VOD) ក្ដី ក៏ថ្នាក់ដឹកនាំស្ថាប័ននេះ នៅតែមានសង្ឃឹម និងកំពុងស្វែងរកដំណោះស្រាយពីភាគីពាក់ព័ន្ធផ្សេងៗទៀត ដើម្បីឱ្យរដ្ឋាភិបាលអនុញ្ញាតឱ្យសារព័ត៌មាននេះបន្តការងាររបស់ខ្លួនបាន។ មន្ត្រីអង្គការសង្គមស៊ីវិលយល់ថា រដ្ឋាភិបាលគួរតែផ្ដល់ឱកាសដល់ស្ថាប័នព័ត៌មាន វីអូឌី អាចបន្តការងាររបស់ខ្លួន ដើម្បីលើកកម្ពស់សេរីភាពសារព័ត៌មាន និងតម្លាភាពនៅកម្ពុជា។
ថ្នាក់ដឹកនាំសារព័ត៌មាន វីអូឌី នៅតែបន្តសង្ឃឹមថា រដ្ឋាភិបាលនិងផ្ដល់ឱកាសឱ្យស្ថាប័នមួយនេះ អាចបន្តការងាររបស់ខ្លួនដើម្បីរួមចំណែកអភិវឌ្ឍប្រទេសជាតិ ប្រកបដោយតម្លាភាព និងនិរន្តរភាព បើទោះបីជាក្រសួងព័ត៌មានបានប្រកាសដកអាជ្ញាប័ណ្ណសារព័ត៌មាន រួចហើយក៏ដោយក្ដី។
ប្រធានស្ដីទីសារព័ត៌មាន វីអូឌី (VOD) លោក អ៊ិត សុធឿត ប្រាប់វិទ្យុអាស៊ីសេរីនៅថ្ងៃទី១៣ កុម្ភៈថា លោកកំពុងបន្តពិភាក្សាជាមួយភាគីពាក់ព័ន្ធផ្សេងៗ ដើម្បីស្នើរដ្ឋាភិបាលអនុញ្ញាតឱ្យ វីអូឌី បន្តបេសកកម្មការងាររបស់ខ្លួនឡើងវិញបាន។ ទោះជាយ៉ាងណា លោកសុំមិនបកស្រាយថា លោកកំពុងពិភាក្សាជាមួយដៃគូរពាក់ព័ន្ធណាខ្លះឡើយ។
លោក អ៊ិត សុធឿត៖ «គោលជំហររបស់យើង យើងនៅតែបន្តខិតខំប្រឹងប្រែងធ្វើការបន្តទៀត ដោយសង្ឃឹមថា ដើម្បីអាចបន្តបេសកកម្ម វីអូឌី ទៅដល់បងប្អូនប្រជាពលរដ្ឋយើងនៅក្នុងប្រទេសកម្ពុជា»។
ស្ថាប័នព័ត៌មានវីអូឌី បានប្រកាសឱ្យបុគ្គលិកឈប់សម្រាកពីការងារមួយរយៈសិន ដោយមិនទាន់កំណត់ពេលចូលធ្វើការវិញនោះឡើយ។
លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងព័ត៌មាន ដកអាជ្ញាប័ណ្ណសារព័ត៌មាន វីអូឌី ក្រោយពីលោកបានទទួលលិខិតមួយពីវីអូឌី តាមរយៈទីស្ដីការគណៈរដ្ឋមន្ត្រីនៅល្ងាចថ្ងៃទី១២ ខែកុម្ភៈ។ លោកបានលើកឡើងថា ការប្រើប្រាស់ពាក្យសូមអធ្យាស្រ័យ និងសម្ដែងការសោកស្ដាយ មិនមានន័យថាសុំទោសនោះឡើយ។ បន្ទាប់មក វីអូឌី ក៏ចេញលិខិតមួយទៀត នៅពាក់កណ្ដាលយប់ថ្ងៃទី១២ ខែកុម្ភៈ ដដែល ដោយបានប្រើពាក្យ សុំទោស ដោយផ្ទាល់ទៅកាន់លោក ហ៊ុន សែន និងកូនប្រុសច្បងរបស់លោក។ ទោះជាយ៉ាងណា លោក ហ៊ុន សែន មិនបានគោរពពាក្យរបស់ខ្លួនដែលបានដាក់កំហិតឱ្យសារព័ត៌មាន វីអូឌី សុំទោសត្រឹមម៉ោង១០ ព្រឹក ថ្ងៃទី១៣ ខែកុម្ភៈនោះឡើយ ហើយលោកបានឆ្លើយតបនឹងលិខិត សុំទោស ទាំងពាក់កណ្ដាលយប់វេលាម៉ោង២ រលងអាធ្រាត្រឈានចូលដល់ថ្ងៃទី១៣ ខែកុម្ភៈតែម្ដង។ លោក ហ៊ុន សែន បានឆ្លើយតបនៅលើទំព័រហ្វេសប៊ុករបស់លោកថា លោកមិនមែនក្មេងបៀមដៃនោះទេ ហើយលោកនៅតែមិនដកបទបញ្ជាដែលលោកបានសម្រេចឱ្យក្រសួងព័ត៌មាន ដកហូតអាជ្ញាប័ណ្ណសារព័ត៌មាន វីអូឌី នោះឡើយ។
ដោយឡែក បុគ្គលិកវីអូឌី នៅថ្ងៃទី១៣ ខែកុម្ភៈនេះ បានទៅការិយាល័យទាំងអស់គ្នា ក៏ប៉ុន្តែពួកគេមិនបានធ្វើការនោះឡើយ។ ជាមួយគ្នានេះ មន្ត្រីអង្គការសង្គមស៊ីវិលមួយចំនួនក៏បានទៅដល់ការិយាល័យ វីអូឌី ដើម្បីផ្ដល់កម្លាំងចិត្តដល់ពួកគេផងដែរ ខណៈបុគ្គលិកភាគច្រើនមានទឹកមុខស្រងូតស្រងាត់ និងអ្នកខ្លះបានយំទៀតផង។ មន្ត្រីនគរបាលខណ្ឌ និងមន្ត្រីពីក្រសួងព័ត៌មានប្រមាណ១០នាក់ ក៏បានយកលិខិតប្រកាសដកហូតអាជ្ញាប័ណ្ណសារព័ត៌មាន វីអូឌី ដល់ការិយាល័យផងដែរ ក៏ប៉ុន្តែមន្ត្រីទាំងនោះមិនបានថ្លែងសារអ្វីឡើយ។ ចំណែកឯនៅខាងមុខការិយាល័យវិញ ក៏មានអ្នកសារព័ត៌មានជាតិ អន្តរជាតិ និងមន្ត្រីអង្គការសង្គមស៊ីវិលចូលរួមអង្កេតការព្រឹត្តិការណ៍នេះដែរ។
អ្នករាយការណ៍ព័ត៌មាន វីអូឌី ម្នាក់ គឺកញ្ញា ខាន់ លក្ខិណា ដែលបានធ្វើការជាមួយសារព័ត៌មាន វីអូឌី ជិត១០ឆ្នាំនោះ លើកឡើងថា កញ្ញាមានអារម្មណ៍ពិបាកទទួលយកបាន នៅពេលរដ្ឋាភិបាលសម្រេចឱ្យវីអូឌី បញ្ឈប់សកម្មភាពរបស់ខ្លួនយ៉ាងតក់ក្រហល់បែបនេះ។ កញ្ញាបន្ថែមថា ការបិទសារព័ត៌មាន វីអូឌី ប្រៀបដូចជាការបិទសំឡេងរបស់ប្រជាពលរដ្ឋ ដែលតែងទាមទារឱ្យរដ្ឋាភិបាល ដោះស្រាយបញ្ហាឱ្យពួកគាត់យ៉ាងដូច្នេះដែរ។ កញ្ញា ខាន់ លក្ខិណា បន្ថែមថា រដ្ឋាភិបាលគួរតែពិចារណាឡើងវិញ ក្នុងការផ្ដល់ឱកាសឱ្យសារព័ត៌មាន វីអូឌី ដំណើរការការងាររបស់ខ្លួនឡើងវិញ។
កញ្ញា ខាន់ លក្ខិណា៖ «ខ្ញុំចង់ឱ្យរដ្ឋាភិបាលពិចារណាឡើងវិញ ចំពោះការបិទវីអូឌី នេះ។ ហេតុអ្វីត្រូវពិចារណា?ព្រោះវីអូឌីជាសំឡេងមួយដែលនាំសំឡេងប្រជាពលរដ្ឋដែលជាម្ចាស់ឆ្នោតហ្នឹង ទៅឱ្យរដ្ឋាភិបាល ហើយរដ្ឋាភិបាលតែងតែចាត់ទុកប្រជាពលរដ្ឋហ្នឹងជា បុគ្គលសំខាន់ ហើយតែងតែចាត់ទុកថា គាត់ហ្នឹងធ្វើការអភិវឌ្ឍប្រទេសដើម្បីឱ្យពលរដ្ឋហ្នឹងមានការសប្បាយចិត្ត រីកចំរើន»។
ការប្រកាសលុបចោលអាជ្ញាប័ណ្ណ វីអូឌី នេះ ត្រូវបានមតិមហាជនមើលឃើញថា ក្រសួងព័ត៌មានបានធ្វើតាមបទបញ្ជារបស់លោកនាយករដ្ឋមន្ត្រី ហ៊ុន សែន ដែលផ្ទុយពីច្បាប់ស្ដីពីរបបសារព័ត៌មាន។ ច្បាប់នេះមិនបានចែងអំពីការដកហូតអាជ្ញាប័ណ្ណសារព័ត៌មាននោះឡើយ។ មាត្រា១០ នៃច្បាប់ស្ដីពីរបបសារព័ត៌មាន ចែងថា នៅពេលសារព័ត៌មានផ្សព្វផ្សាយខុសពីការពិត ដែលមានបំណងបំផ្លាញបុគ្គលសាធារណៈ ហើយតុលាការរកឃើញថា ការផ្សាយខុសពីការពិត ដូចតាមការចោទប្រកាន់របស់ដើមបណ្ដឹងរដ្ឋប្បវេណី នោះតុលាការគ្រាន់តែអាចបង្គាប់ឱ្យសារព័ត៌មានចុះផ្សាយកែតម្រូវឡើងវិញ ឬសងជំងឺចិត្តទៅដល់ដើមបណ្ដឹងរដ្ឋប្បវេណីតែប៉ុណ្ណោះ។
ជុំវិញរឿងនេះ នាយិកាមជ្ឈមណ្ឌលសិទ្ធិមនុស្សកម្ពុជា CCHR អ្នកស្រី ចក់ សុភាព មានប្រសាសន៍ថា វត្តមានរបស់សារព័ត៌មានវីអូឌី មិនត្រឹមតែមានប្រយោជន៍សម្រាប់សាធារណៈជនប៉ុណ្ណោះទេ ក៏ប៉ុន្តែថែមទាំងអាចផ្ដល់ផលប្រយោជន៍ដល់រដ្ឋាភិបាល ដែលអាចឱ្យធ្វើការកាន់តែមានប្រសិទ្ធភាពដែរ តាមរយៈការផ្ដល់ព័ត៌មានអសកម្មរបស់មន្ត្រីថ្នាក់ក្រោមជាតិ។ អ្នកស្រីបន្ថែមថា ថ្នាក់ដឹកនាំរដ្ឋាភិបាលគួរថ្លឹងថ្លែងពីលទ្ធផលការងាររបស់សារព័ត៌មាន វីអូឌី ទាំងមូល ក្នុងការលើកកម្ពស់តម្លាភាពពីការអភិវឌ្ឍកន្លងមក ជាជាងមើលឃើញតែកំហុសតូចមួយ ហើយដកអាជ្ញាប័ណ្ណសារព័ត៌មានឯករាជ្យយ៉ាងដូច្នេះ។
អ្នកស្រី ចក់ សុភាព៖ «ខ្ញុំសូមអំពាវនាវដល់លោកនាយករដ្ឋមន្ត្រី រួមទាំងស្ថាប័នពាក់ព័ន្ធទាំងអស់ហ្នឹង សូមជួយពិចារណាឡើងវិញ ធ្វើកិច្ចការងារដែលយើងអាចជួយដោះស្រាយ បង្កនូវបរិយាកាសអំណោយផល សម្រាប់សេរីភាពសារព័ត៌មានអាចដំណើរការ»។
អ្នកស្រី ចក់ សុភាព ថា សារព័ត៌មាន វីអូឌី បានបំពេញការងាររបស់ខ្លួនអស់រយៈពេល ២០ឆ្នាំមកហើយ។ ជាលទ្ធផល សារព័ត៌មាននេះបាននាំយកព័ត៌មានស្ដីពីបញ្ហាក្នុងសង្គមជាច្រើន យកមកផ្សព្វផ្សាយឱ្យសាធារណជនបានដឹង និងទទួលបានដំណោះស្រាយពីរដ្ឋាភិបាល។ ជាក់ស្ដែងករណីថ្មីៗនេះ រដ្ឋាភិបាលបានរក្សាព្រៃតំបន់ភ្នំតាម៉ៅ និងឱ្យគេវាយកម្ទេចរបងនៅលើដីឆ្នេរសមុទ្រ ចេញវិញ បន្ទាប់ពីមានមតិមហាជនរិះគន់នៅលើបណ្ដាញសង្គមកាន់តែច្រើន។ លើសពីនេះទៀត សារព័ត៌មាន វីអូឌី ក៏តែងតែផ្សព្វផ្សាយពីការរំលោភសិទ្ធិមនុស្ស សិទ្ធិដីធ្លី និងការបំផ្លិចបំផ្លាញធនធានធម្មជាតិ ដែលភាគច្រើនបង្កឡើងដោយមន្ត្រីធំៗ និងសមាជិកគណបក្សប្រជាជនកម្ពុជា។ អ្នកវិភាគដើម្បីការអភិវឌ្ឍសង្គម យល់ឃើញថា លោកនាយករដ្ឋមន្ត្រី ហ៊ុន សែន មិនពេញចិត្តទៅនឹងការបណ្ដុះស្មារតីមហាជន ឱ្យតវ៉ាចំពោះការអភិវឌ្ឍដោយគ្មានតម្លាភាព ក្រោមការដឹកនាំរបស់លោក ដូច្នេះហើយ ទើបលោក ជម្នះចេញបញ្ជាដកអាជ្ញាប័ណ្ណសារព័ត៌មានវីអូឌី យ៉ាងតក់ក្រហល់ បើទោះបីជាក្បត់នឹងពាក្យសម្ដីរបស់ខ្លួនឯងក៏ដោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។