ភរិយាលោក រ៉ាត់ រត្នមុនី គឺអ្នកស្រី ឡុង គីមហ៊ាង អំពាវនាវដល់តុលាការកំពូលឱ្យទម្លាក់ចោលការចោទប្រកាន់លើស្វាមី ក្រោយពេលមេធាវីបានដាក់បណ្ដឹងទាស់ទៅតុលាការជាន់ខ្ពស់មួយនេះ។ អ្នកស្រីសង្ឃឹមថា តុលាការកំពូលនឹងអាចរកយុត្តិធម៌ជូនស្វាមីអ្នកស្រី ហើយរដ្ឋាភិបាលលោក ហ៊ុន សែន នឹងដោះលែងគាត់ពីពន្ធនាគារវិញក្នុងពេលឆាប់ៗ ខាងមុខ។
មេធាវីការពារក្តីឱ្យលោក រ៉ាត់ រត្នមុនី លោក សំ ទិត្យសីហា ឱ្យដឹងថា លោកបានយកបណ្តឹងទាស់នេះទៅដាក់នៅសាលាឧទ្ធរណ៍រួចហើយនៅថ្ងៃទី១៦ ធ្នូ ដើម្បីបញ្ជូនបន្តទៅតុលាការកំពូល។ លោករំពឹងថា តុលាការកំពូលនឹងលើកយករឿងនេះមកជំនុំជម្រះឱ្យបានឆាប់ និងកោះហៅគ្រប់ភាគីពាក់ព័ន្ធមកតតាំងគ្នាក្នុងអង្គសវនាការ។
សកម្មជនសិទ្ធិការងារលោក រ៉ាត់ រត្នមុនី ត្រូវតុលាការក្រុងភ្នំពេញផ្ដន្ទាទោសដាក់ពន្ធនាគាររយៈពេល២ ឆ្នាំ ពីបទ "ញុះញង់ឱ្យមានការរើសអើង" ដោយសារលោកជួយផលិតភាពយន្តឯកសារស្ដីពីការជួញដូរផ្លូវភេទនៅកម្ពុជា ក្រោមចំណងជើងថា "ម្ដាយខ្ញុំ លក់ខ្ញុំ"។ អាជ្ញាធរកម្ពុជាបានចាត់ទុកភាពយន្តឯកសារនោះថា ជារឿងប្រឌិត ប៉ះពាល់ដល់កិត្តិយសស្ត្រីខ្មែរ និងបំផ្លាញកេរ្តិ៍ឈ្មោះកម្ពុជា។
គិតត្រឹមពេលនេះ ប្រធានសហព័ន្ធសហជីពកម្មករសំណង់កម្ពុជា លោក រ៉ាត់ រត្នមុនី បានជាប់ឃុំក្នុងពន្ធនាគារព្រៃអស់រយៈពេល ១ឆ្នាំមកហើយ។ សហគមន៍ជាតិ និងអន្តរជាតិនៅតែទទូចឱ្យអាជ្ញាធរទម្លាក់ចោលបទចោទប្រកាន់ និងដោះលែងសកម្មជនសិទ្ធិការងាររូបនេះឱ្យមានសេរីភាពវិញ ព្រោះលោកមិនទទួលបានសវនាការប្រកបដោយយុត្តិធម៌ឡើយ។ ជាពិសេសក្នុងសវនាការសាលាឧទ្ធរណ៍នាពេលកន្លងទៅ ភាគីដើមបណ្ដឹង និងអ្នកពាក់ព័ន្ធផ្សេងទៀត មិនបានចូលរួមក្នុងអង្គសវនាការនោះឡើយ ប៉ុន្តែសាលាឧទ្ធរណ៍នៅតែសម្រេចតម្កល់សាលក្រមផ្ដន្ទាទោសលោក រ៉ាត់ រត្នមុនី ទុកជាបានការដដែល៕
(អ្នកស្រី ឡុង គីមហ៊ាង សកម្មនារីសិទ្ធិលំនៅឋាន និងជាប្រពន្ធលោក រ៉ាត់ រត្នមុនី ពេលទៅឈរកាន់បដាតវ៉ានៅស្ថានទូតសហព័ន្ធរុស្ស៊ី កាលពីថ្ងៃទី១៨ ខែធ្នូ ឆ្នាំ២០១៨ ឱ្យជួយធ្វើអន្តរាគមន៍ឱ្យប្ដីអ្នកស្រីរួចផុតពីការចោទប្រកាន់ និនពីការឃុំឃាំង។ រូប៖ ហ្វេសប៊ុកអ្នកស្រី ឡុង គីមហ៊ាង)
(លោក រ៉ាត់ រត្នមុនី មានភាពរីករាយជាមួយប្រពន្ធ និងកូន មុនពេលជាប់ឃុំឃាំង។ រូប៖ ហ្វេសប៊ុកអ្នកស្រី ឡុង គីមហ៊ាង)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។