លោក ហ៊ុន សែន ស្នើ​ឱ្យ​ជប៉ុន​ជួយ​ប្រាប់​អាមេរិក​ថា កម្ពុជា​នៅតែ​ចង់​ធ្វើ​មិត្ត​ល្អជា​មួយ​អាមេរិក

ដោយ សុ ជីវី
2019-05-30
អ៊ីម៉ែល
មតិ
Share
បោះពុម្ព
មេដឹកនាំ​របប​ក្រុង​ភ្នំពេញ លោក ហ៊ុន សែន (ស្ដាំ) ក្នុង​ជំនួប​ជាមួយ​មន្ត្រី​ជប៉ុន នា​ទីក្រុង​តូត្យូ កាល​ពី​ថ្ងៃ​ទី២៩ ខែ​ឧសភា ឆ្នាំ​២០១៩។
មេដឹកនាំ​របប​ក្រុង​ភ្នំពេញ លោក ហ៊ុន សែន (ស្ដាំ) ក្នុង​ជំនួប​ជាមួយ​មន្ត្រី​ជប៉ុន នា​ទីក្រុង​តូត្យូ កាល​ពី​ថ្ងៃ​ទី២៩ ខែ​ឧសភា ឆ្នាំ​២០១៩។
រូប​ពី​ហ្វេសប៊ុក​ លោក ហ៊ុន សែន

មេដឹកនាំ​របប​ក្រុងភ្នំពេញ​លោក ហ៊ុន សែន ចង់​ឱ្យ​ជប៉ុន​ជួយ​និយាយ​ប្រាប់​សហរដ្ឋអាមេរិក​ថា របប​របស់​លោក​ចង់​មាន​ទំនាក់ទំនង​ល្អ​ជាមួយ​អាមេរិក​។ លោក ហ៊ុន សែន ថ្លែង​បែបនេះ ស្រប​ពេល​របប​របស់​លោក​កំពុង​រង​ការ​រិះគន់​ថា មាន​និន្នាការ​លម្អៀង​ខ្លាំង​ទៅ​រក​ប្រទេស​ចិន ហើយ​បែរខ្នង​ដាក់​ប្រទេស​ប្រជាធិបតេយ្យ​លោក​ខាងលិច​។ អ្នកវិភាគ និង​អ្នកឃ្លាំមើល​សង្គម ថ្លែង​ថា ការសម្រួល​ទំនាក់ទំនង​ជាមួយ​អាមេរិក មិនមែន​ជា​រឿង​ពិបាក​នោះ​ឡើយ សំខាន់​ឱ្យ​តែ​របប​ក្រុងភ្នំពេញ​មាន​ឆន្ទៈ​ពិតប្រាកដ​ក្នុង​ការ​ធ្វើ​រឿង​នេះ។

លោកនាយក​រដ្ឋមន្ត្រី ហ៊ុន សែន អះអាង​ថា ការ​វាយតម្លៃ​ថា កម្ពុជា​បោះបង់ចោល​សហរដ្ឋអាមេរិក ហើយ​ងាក​ទៅ​ចាប់​យក​ប្រទេស​ចិន​នោះ គឺជា​រឿង​ខុស​ទាំងស្រុង។ លោក​បញ្ជាក់​ថា កម្ពុជា​នៅតែ​ចង់​ធ្វើជា​មិត្ត​ល្អ​របស់​អាមេរិក​ជានិច្ច ក៏ប៉ុន្តែ​លោក​ថា មិត្ត​ភាព​ល្អ​នេះ​ក៏​ត្រូវ​រក្សា​បាន​នូវ​ឯករាជ្យ និង​អធិបតេយ្យ​ជាតិ​ផង​ដែរ។ លោក ហ៊ុន សែន អះអាង​បែបនេះ​ប្រាប់​ទៅ​ប្រធាន​សមាគម​ជប៉ុន​-​កម្ពុជា (JCA) និង​ជា​អតីត​ឯកអគ្គរាជទូត​ជប៉ុន​ប្រចាំ​កម្ពុជា លោក តាកាហាស៊ី ហ្វ៊ូមីអាគី (Takahashi Fumiaki) កាលពី​រសៀល​ថ្ងៃ​ទី​២៩ ឧសភា​កន្លង​ទៅ។

លោក ហ៊ុន សែន បញ្ជាក់​នៅ​ក្នុង​ហ្វេសប៊ុក​របស់​លោក​ថា អតីតមន្ត្រី​ការទូត​ជប៉ុន​រូប​នេះ បាន​សាកសួរ​លោក​អំពី​បញ្ហា​អន្តរជាតិ​មួយ​ចំនួន និង​ចង់​ដឹង​អំពី​ទំនាក់ទំនង​រវាង​កម្ពុ​ជា​ជាមួយ​នឹង​សហរដ្ឋអាមេរិក​។ លោក​បាន​ប្រាប់​ទៅវិញ​ថា កម្ពុជា​មិន​ចង់​ធ្វើជា​សត្រូវ​ជាមួយ​ប្រទេស​ណាមួយ​ឡើយ ប៉ុន្តែ​ចង់​ធ្វើជា​មិត្ត​ជាមួយ​គ្រប់​ប្រទេស​ទាំងអស់ ក្នុង​នោះ​ក៏​រួមមាន​ទាំង​សហរដ្ឋអាមេរិក​ផង​ដែរ​។ លោក​ក៏បាន​ពឹង​ពាក់​លោក តាកាហាស៊ី ហ្វ៊ូមីអាគី (Takahashi Fumiaki) ឱ្យ​ជួយ​ពាំនាំ​ប្រសាសន៍​របស់​លោក​នេះ ប្រាប់​ទៅ​សហរដ្ឋអាមេរិក​ផង​ដែរ។

នេះ​ជា​ករណី​មិន​ធ្លាប់​មាន ដែល​មេដឹកនាំ​របប​ក្រុងភ្នំពេញ រត់​ទៅ​ពឹង​មន្ត្រី​ជប៉ុន​ឱ្យ​ជួយ​និយាយ​សម្រួល​ទំនាក់ទំនង​រវាង​កម្ពុជា និង​អាមេរិក ហើយ​ប្រកាសប្រាប់​ជា​សាធារណៈ​នៅ​លើ​បណ្ដាញ​សង្គម​ហ្វេសប៊ុក ក្នុងពេលដែល​របប​របស់​លោក​កំពុង​ល្អូកល្អិន​ខ្លាំង​ជាមួយ​របប​ក្រុង​ប៉េកាំង។

អ្នកវិភាគ​នយោបាយ​បណ្ឌិត មាស នី យល់ថា បើ​រដ្ឋាភិបាល​កម្ពុ​ជាមាន​ឆន្ទៈ​ពិ​ង​ប្រាកដ​ក្នុងការ​ស្តារ​ទំនាក់ទំនង​ជាមួយ​សហ​រដ្ឋ​អាមេរិក​មែន រដ្ឋាភិបាល​គួរតែ​និយាយ​ដោយ​ផ្ទាល់​តែម្តង​ទៅ​តំណាង​រដ្ឋាភិបាល​អាមេរិក​នៅ​កម្ពុជា គឺ​តាមរយៈ​ស្ថានទូត​អាមេរិក​នៅ​ភ្នំពេញ មិន​ចាំបាច់​ទៅ​ពឹងពាក់​ប្រទេស​ដទៃ​ឱ្យ​ជួយ​និយាយ​ឱ្យ​ខ្លួន​នោះ​ទេ​។ លោក​ថា ថ្នាក់ដឹកនាំ​កម្ពុជា​គួរតែ​ប្ដូរ​ទម្លាប់​ពី​កា​រពឹង​បរទេស មក​ជា​ការ​រៀន​ដោះស្រាយ​បញ្ហា​ដោយ​ខ្លួនឯង​វិញ ទើប​ជា​រឿង​ត្រឹមត្រូវ​។

អ្នកវិភាគ​រូប​នេះ ជឿជាក់​ថា ទំនាក់ទំនង​កម្ពុជា​-​អាមេរិក អាច​នឹង​ល្អ​ឡើងវិញ​បាន លុះត្រាតែ​រដ្ឋាភិបាល​កម្ពុ​ជា ឆ្លើយតប​ឱ្យ​មាន​ប្រសិទ្ធភាព​ទៅ​នឹង​លក្ខខណ្ឌ​ស្តារ​សិទ្ធិមនុស្ស និង​ប្រជាធិបតេយ្យ​ឡើងវិញ​។ បើ​ពុំ​ដូច្នេះ​ទេ លោក​ថា ប្រសាសន៍​របស់​ថ្នាក់ដឹកនាំ​រដ្ឋាភិបាល​នេះ គឺ​គ្រាន់តែ​ដើម្បី​កាត់បន្ថយ​ការរិះគន់​រឿង​លម្អៀង​ទៅ​រក​ប្រទេស​ចិន​ប៉ុណ្ណោះ។ «»

ទំនាក់ទំនង​រវាង​កម្ពុជា​ជាមួយ​នឹង​សហរដ្ឋអាមេរិក មាន​ភាព​ល្អក់កករ​ខ្លាំង ក្នុង​រយៈពេល​ប៉ុន្មាន​ឆ្នាំ​ចុង​ក្រោយនេះ បន្ទាប់ពី​របប​ក្រុងភ្នំពេញ​បង្ហាញ​ជំហរ​លម្អៀង​ខ្លាំង​ទៅ​រក​ប្រទេស​ចិន​។ ម្យ៉ាងវិញទៀត អាមេរិក​ដែល​ឱ្យ​តម្លៃ​ខ្លាំង​លើ​ប្រជាធិបតេយ្យ និង​សិទ្ធិមនុស្ស ស្រងាក​ចិត្តជា​ខ្លាំង ដែល​របប​លោក ហ៊ុន សែន គាស់​រំលើង​គ្រឹះ​ប្រជាធិបតេយ្យ ដែល​បាន​ចាក់ឫស​គល់​នៅ​កម្ពុជា ជាង​២០ ឆ្នាំ​មក​ហើយ​នោះ​។ កាន់តែ​ធ្ងន់ធ្ងរ​ជាង​នេះ​ទៅ​ទៀត​នោះ គឺ​របប​លោក ហ៊ុន សែន បាន​ចោទប្រកាន់​ចំៗ​តែ​ម្ដង​ថា សហរដ្ឋអាមេរិក​គឺជា​អ្នកគាំទ្រ​ចលនា​ប៉ុនប៉ង​ផ្តួល​រំលំ​រដ្ឋាភិបាល​ស្របច្បាប់ ឬ​ដែល​របប​នេះ​ហៅថា ជា​ផែនការ​បដិវត្តន៍​ពណ៌។

ជាការ​ឆ្លើយតប សហរដ្ឋអាមេរិក​បាន​កាត់​ផ្តាច់​ជំនួយ​សំខាន់ៗ ដែល​រួមមាន​ជំនួយ​តាមរយៈ​កម្មវិធី​របស់​ទីភ្នាក់ងារ​សហរដ្ឋអាមេរិក​សម្រាប់​កិច្ចការ​អភិវឌ្ឍ​អន្តរជាតិ (USAID) និង​កម្មវិធី​ជំនួយ​ផ្នែក​យោធា ដែល​ធ្លាប់​ផ្ដល់​ឱ្យ​របប​លោក ហ៊ុន សែន ក្នុង​ការ​ជួយ​កសាង​សមត្ថភាព​អាជ្ញាធរ​មូលដ្ឋាន និង​កង​យោធពល​ខេមរភូមិន្ទ ព្រមទាំង​អគ្គនាយកដ្ឋាន​ពន្ធដារ​។ រដ្ឋាភិបាល​អាមេរិក​បញ្ជាក់​ថា ជំនួយ​ទាំងនេះ​មានតម្លៃ​ជា​ទឹកប្រាក់​ជាង ៨ លាន​ដុល្លារ​អាមេរិក ហើយ​ការសម្រេចចិត្ត​នេះ គឺ​ដោយសារ​ពិនិត្យ​ឃើញ​ថា ស្ថាប័ន​ទាំងអស់​នោះ សុទ្ធ​សឹង​តែ​មាន​ជាប់​ពាក់ព័ន្ធ​ទៅ​នឹង​ការបំផ្លាញ​លទ្ធិប្រជាធិបតេយ្យ​នៅ​កម្ពុជា។

ក្រៅពីនេះ សមាជិកសភា​អាមេរិក​ជា​ច្រើន​រូប ក៏​កំពុង​ស្នើ​ច្បាប់​ដាក់ទណ្ឌកម្ម​ផ្នែក​ការទូត និង​សេដ្ឋកិច្ច បន្ថែម​ទៀត​លើ​របប​ក្រុងភ្នំពេញ ដែល​រួម​មានការ​បង្កក​ទ្រព្យសម្បត្តិ​លោក ហ៊ុន សែន និង​ក្រុមគ្រួសារ ព្រមទាំង​មន្ត្រី​គ្រាក់ៗ​ផ្សេងទៀត​នៃ​របប​នេះ ជាពិសេស​គឺ​ការ​ពិនិត្យមើល​ឡើងវិញ​នូវ​ប្រព័ន្ធ​អនុគ្រោះ​ពន្ធ​ទូទៅ (GSP) ដែល​ធ្លាប់​ផ្តល់​ឱ្យ​កម្ពុជា​ផង​ដែរ។

អគ្គលេខាធិការ​សហព័ន្ធ​និស្សិត​បញ្ញវន្ត​កម្ពុជា លោក គៀន ពន្លក ថ្លែង​ថា បើ​រដ្ឋាភិបាល​កម្ពុជា​មាន​បំណង​ស្ដារ​ទំនាក់ទំនង​ជាមួយ​អាមេរិក​ពិតប្រាកដ​មែន​នោះ រដ្ឋាភិបាល​ត្រូវតែ​ចេញ​សេចក្ដី​ថ្លែងការណ៍​ទទួល​ស្គាល់​ថា សហរដ្ឋអាមេរិក​មិនមាន​ជាប់​ពាក់ព័ន្ធ​នឹង​រឿង​បដិវត្តន៍​ពណ៌​នោះ​ឡើយ ហើយ​មន្ត្រី​រដ្ឋាភិបាល​កម្ពុជា ត្រូវតែ​បញ្ឈប់​ជាបន្ទាន់​នូវ​ការ​ការ​លាប​ពណ៌​បែប​ប្រឌិត​នេះ​លើ​សហរដ្ឋអាមេរិក​។ បន្តមក​ទៀត លោក​ថា រដ្ឋាភិបាល​ត្រូវតែ​អនុវត្ត​តាម​លក្ខខណ្ឌ​ស្ដារ​ប្រជាធិបតេយ្យ និង​ការ​គោរព​សិទ្ធិមនុស្ស​ឡើងវិញ តាម​ការ​ស្នើ​ឡើង​របស់​សហរដ្ឋអាមេរិក និង​សហភាព​អឺរ៉ុប​។ លោក​ជឿជាក់ថា ប្រសិនបើ​ធ្វើបែ​បនេះ​បាន នោះ​ទំនាក់ទំនង​កម្ពុជា​-​អាមេរិក នឹង​ល្អ​ប្រសើរ​ឡើងវិញ​ដោយ​ស្វ័យប្រវត្តិ មិន​ចាំ​បាច់​លោក ហ៊ុន សែន ទៅ​ពឹងពាក់​ជប៉ុន ឱ្យ​ជួយ​និយាយ​ជំនួស​ខ្លួន​ឡើយ។ «»

អ្នកតាម​ដាន​បញ្ហា​សង្គម​រូប​នេះ យល់ថា មូលហេតុ​ដែល​លោក ហ៊ុន សែន បង្ហាញ​ជំហរ​ចង់​ស្តារ​ទំនាក់ទំនង​ជាមួយ​អាមេរិក​ឡើងវិញ​នេះ ទំនងជា​ដោយសារ​លោក​បារម្ភ​រឿង​អាមេរិក​ដាក់ទណ្ឌកម្ម​បន្ថែម​ទៀត ពីព្រោះ​បច្ចុប្បន្ន​នេះ​សមាជិកសភា​អាមេរិក កំពុង​ស្នើ​ច្បាប់​ដាក់ទណ្ឌកម្ម​បន្ថែម​លើ​រដ្ឋាភិបាល​កម្ពុជា។

ក្រុម​សមាជិកសភា​សហរដ្ឋអាមេរិក​ធ្លាប់​បាន​វាយតម្លៃ​ថា រយៈពេល​ប៉ុន្មាន​ឆ្នាំ​ចុង​ក្រោយនេះ របប​លោក ហ៊ុន សែន បាន​បង្កើន​ការប្រើប្រាស់​ប្រព័ន្ធ​យុត្តិធម៌​ដោយ​បំពាន​។ ក្នុង​នោះ​មាន​ជាអាទិ៍ ការ​ដាក់​ទោសទណ្ឌ​អ្នកនយោបាយ​បក្ស​ប្រឆាំង និង​សកម្មជន​សិទ្ធិមនុស្ស ចាប់ខ្លួន​មេ​បក្ស​ប្រឆាំង​ដោយ​ចោទប្រកាន់​ទាំង​ស្រពេចស្រពិល​ពី​បទ​ក្បត់ជាតិ រំលាយ​គណបក្ស​សង្គ្រោះ​ជាតិ និង​បាន​ហាមឃាត់​អ្នកនយោបាយ​បក្ស​នេះ​ចំនួន ១១៨ នាក់ មិន​ឱ្យ​ធ្វើ​សកម្មភាព​នយោបាយ​ទៀត​ផង​។ ពួកគេ​ចាត់​ទុក ការ​វាយ​បង្ក្រាប​ទាំងឡាយ​នេះ​ថា ជា​ការ​កាត់ផ្ដាច់​ដំណើរការ​នៃ​ប្រព័ន្ធ​ដឹកនាំ​តាម​បែប​ប្រជាធិបតេយ្យ ហើយ​ផ្ទុយទៅវិញ គឺជា​ការ​បុក​គ្រឹះ​សាងសង់​ប្រព័ន្ធ​ដឹកនាំ​បែប​ផ្ចង់ៗ ដើម្បី​ការ​ឱ្យ​លោក ហ៊ុន សែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល