អតីតអ្នកបឹងកក់ដែលកងសន្តិសុខចាប់ខ្លួន ព្រោះតែព្យាយាមជួបអភិបាលរាជធានីភ្នំពេញ កាលពីថ្ងៃទី៥ មីនា ត្រូវបានអនុញ្ញាតឱ្យចូលជួបមន្ត្រីសាលារាជធានីភ្នំពេញហើយ នៅព្រឹកថ្ងៃទី៦ មីនា។
ក្រុមអតីតអ្នកនៅបឹងកក់ ១៤នាក់ ត្រូវបានមន្ត្រីសាលារាជធានីភ្នំពេញ អនុញ្ញាតឱ្យចូលជួបពិភាក្សាអំពីដំណោះស្រាយសំណងបន្ថែម លើការផ្លាស់ប្ដូរលំនៅចេញពីតំបន់បឹងកក់របស់ពួកគាត់។
តំណាងអ្នកបឹងកក់ម្នាក់ ដែលបានចូលជួបមន្ត្រីសាលារាជធានីភ្នំពេញ នៅព្រឹកថ្ងៃទី៦ មីនា គឺអ្នកស្រី ស៊ា ណារ៉េត ឱ្យដឹងថា ក្រុមរបស់អ្នកស្រីបានជួបនាយករដ្ឋបាលសាលារាជធានីភ្នំពេញ លោក កើត ឆែ និងមន្ត្រីពីររូបផ្សេងទៀត។
អ្នកស្រី ស៊ា ណារ៉េត ថ្លែងថា មានលទ្ធផលខ្លះពីកិច្ចប្រជុំរយៈមួយម៉ោងនោះ៖ «យើងមានលទ្ធផលបន្តិចដែរ ត្រង់ថា សាលាក្រុងគាត់ចាប់ដៃធ្វើការជាមួយធនាគារពិភពលោកហើយ សិក្សាពីការហ្នឹង។ នៅថ្ងៃដប់ជាងនេះ គាត់ចូលសិក្ខាសាលាធនាគារពិភពលោក NGO និងអង្គការសង្គមស៊ីវិល ម្ចាស់ជំនួយ ហើយនិងក្រុមហ៊ុនធំៗ នៅទីនេះ ដែលស្វែងរកថវិកាជួយពួកខ្ញុំ។ គាត់ថា អាចពន្យារពេលរហូតដល់ខែ ៤ ឯណោះ ព្រោះគាត់នៅសិក្ខាសាលាមិនដឹងថ្ងៃណាចប់ទេ។ គាត់មិនហ៊ានកំណត់ជាមួយយើងក្នុងពេលសិក្ខាសាលាហ្នឹងទេ។ ប៉ុន្តែពួកខ្ញុំយ៉ាងយូរដើមខែ ៤ ត្រូវមកទៀតហើយ។ ខ្ញុំទុកពេលវេលាឱ្យគាត់សិន ព្រោះគាត់ត្រូវការសិក្ខាសាលា ត្រូវរកជំនួយធំៗ មកជួយ»។
ក្រុមអ្នកស្រីចង់ឱ្យមានដំណោះស្រាយជាថវិកាឱ្យមានជម្រកក្នុងក្រុង ក្នុងចម្ងាយ ៣គីឡូម៉ែត្រពីទីនោះ ដែលមានហេដ្ឋារចនាសម្ព័ន្ធ ហើយមានការឆ្លើយតបជាលាយលក្ខណ៍អក្សរផង។ អ្នកស្រីថា អ្នកស្រីចាកចេញពីតំបន់បឹងកក់ទាំងបង្ខំចិត្ត ព្រោះតែផ្ទះរបស់ពួកគាត់ ត្រូវក្រុមហ៊ុនស៊ូកាគូ បូមខ្សាច់ពន្លិចមិនអាចរស់នៅបាន។
មន្ត្រីឃ្លាំមើលបញ្ហាដីធ្លី នៃអង្គការការពារសិទ្ធិមនុស្ស អាដហុក លោក ណៃ វ៉ង់ដា សាទរចំពោះលទ្ធផលពីជំនួបគ្នា រវាងមន្ត្រីសាលារាជធានីភ្នំពេញ និងអ្នកបឹងកក់។ ប៉ុន្តែលោកសង្កេតឃើញថា ការសន្យាដោះស្រាយកន្លងមក ចេះតែមានការពន្យារពីកិច្ចប្រជុំមួយ ទៅកិច្ចប្រជុំមួយទៀត។
ការតវ៉ារបស់អតីតអ្នកបឹងកក់នៅថ្ងៃទី៦ មីនា មិនមានហិង្សាកើតឡើងទេ ហើយរំសាយវិញបន្ទាប់ជំនួបជាមួយមន្ត្រីសាលារាជធានីភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។