ក្រុម​សហគមន៍​មាន​ជម្លោះ​ដីធ្លី​ នាំ​គ្នា​ស្វែង​រក​ដំណោះស្រាយ​ពី​អាជ្ញាធរ​ខត្ត​កោះកុង

2021-11-24
Share
ក្រុម​សហគមន៍​មាន​ជម្លោះ​ដីធ្លី​ នាំ​គ្នា​ស្វែង​រក​ដំណោះស្រាយ​ពី​អាជ្ញាធរ​ខត្ត​កោះកុង ​ពលរដ្ឋ​ដែល​មាន​ជម្លោះ​ដីធ្លី​ជាមួយ​ក្រុមហ៊ុន​ចិន​ឈ្មោះ យូញៀន ឌិវិឡប់មិន ​ហ្គ្រុប (Union Developemnt Group), ក្រុមហ៊ុន​ស្ករ​អំពៅ​របស់​ឧកញ៉ា លី យ៉ុងផាត និង​ក្រុមហ៊ុន​ ហេង អភិវឌ្ឍន៍ ​របស់​ឧកញ៉ា ហេង ហ៊ុយ ក្នុង​ខេត្ត​កោះកុង នៅ​ថ្ងៃ​ទី២៤ ខែវិច្ឆិកា ឆ្នាំ១០២១ នាំ​គ្នា​លើកបដា នៅ​​ខាង​មុខ​សាលា​ខេត្ត​កោះកុង ​ទាមទារ​​អាជ្ញាធរ ឱ្យ​​ដោះស្រាយ​បញ្ចប់​វិបត្តិ​ដីធ្លី​រ៉ាំរ៉ៃ ​អូស​បន្លាយ​ច្រើន​ឆ្នាំ​មក​នេះ។
រូប៖ ពលរដ្ឋផ្ដល់ឱ្យ

ប្រជាពលរដ្ឋ​ប្រមាណ ៧០០នាក់ ដែល​មក​ពី​សហគមន៍​មាន​ជម្លោះ​ដីធ្លី​ចំនួន ៧សហគមន៍ ប្រមូល​ផ្ដុំ​គ្នា​មុខ​សាលា​ខេត្ត​កោះកុង នៅ​ថ្ងៃ​ទី២៤ ខែ​វិច្ឆិកា ដើម្បី​ស្នើ​សុំ​ឲ្យ​អាជ្ញាធរ​ពន្លឿន​ដំណោះស្រាយ​វិវាទ​ដីធ្លី​ជូន​ពួកគាត់។ ក្រុម​តំណាង​ពលរដ្ឋ​ហាក់​មាន​ក្ដី​សង្ឃឹម​តិច​តួច ក្រោយ​ពី​ពួក​គាត់​ចូល​ជួប​ពិភាក្សា​ជាមួយ​អភិបាល​ខេត្ត ដែល​បាន​សន្យា​ថា នឹង​ពិនិត្យ​មើល​សំណើ​ពលរដ្ឋ ដើម្បី​បញ្ជូន​ទៅ​ថ្នាក់​ជាតិ​សម្រេច​បន្ត។

ក្រុម​ប្រជា​ពលរដ្ឋ​ដែល​មាន​ជម្លោះ​ដីធ្លី​ជាមួយ​ក្រុមហ៊ុន​ចិន យូញៀន ឌឹវិឡប់មិន​ហ្គ្រុប (Union Developemnt Group) ក្រុមហ៊ុន​ស្ករ​អំពៅ​របស់​ឧកញ៉ា លី យ៉ុងផាត និង​ក្រុមហ៊ុន​ហេង អភិវឌ្ឍន៍​របស់​ឧកញ៉ា ហេង ហ៊ុយ ក្នុង​ខេត្ត​កោះកុង នាំ​គ្នា​ឈរ​លើក​បដា រូប​ថត​លោក​នាយករដ្ឋមន្ត្រី ហ៊ុន​ សែន និង​ភរិយា នៅ​ខាង​មុខ​សាលា​ខេត្ត​កោះកុង ​ទាមទារ​ឲ្យ​អាជ្ញាធរ ​ចុះ​ដោះស្រាយ​បញ្ចប់​វិបត្តិ​ដីធ្លី​ដ៏​រ៉ាំរ៉ៃ ​ដែល​អូស​បន្លាយ​ជា​ច្រើន​ឆ្នាំ​មក​នេះ ​ត្រឹម​ដើម​ឆ្នាំ​២០២២​ខាង​មុខ។

ពលរដ្ឋ​លើក​ឡើង​ថា ការ​ជួបជុំ​គ្នា​នេះ គឺ​ដើម្បី​តាម​ដាន​ញត្តិ​ ដែល​ពួកគាត់​បាន​ដាក់​ជូន​សាលា​ខេត្ត​កោះកុង​ កាល​ពី​ពេល​កន្លង​មក ស្នើ​សុំ​អន្តរាគមន៍​ដោះស្រាយ​បញ្ហា​ដីធ្លី​ជាមួយ​ភាគី​ក្រុមហ៊ុន ដែល​ពួកគាត់​មិន​ទទួល​បាន​ដំណោះស្រាយ​នៅ​ឡើយ។ ចំណែក អាជ្ញាធរ​បាន​ដាក់​ពង្រាយ​កង​កម្លាំង​សមត្ថកិច្ច​រាប់​រយ​នាក់ និង​ដាក់​របាំង​ដែក​បិទ​ផ្លូវ​ជុំ​វិញ​សាលា​ខេត្ត​។ ក្នុង​ពេល​ពលរដ្ឋ​ជួប​ជុំ​គ្នា​នោះ គឺ​មិន​មាន​ការ​ប៉ះទង្គិច​គ្នា​ជាមួយ​សមត្ថកិច្ច​បង្ក​ជា​អំពើ​ហិង្សា​នោះ​ទេ។

តំណាង​ពលរដ្ឋ​មាន​ជម្លោះ​ដីធ្លី ៤៥គ្រួសារ​ជាមួយ​ក្រុមហ៊ុន​ចិន យូញៀន (Union) ក្នុង​ឃុំ​តានូន ស្រុក​បុទុមសាគរ លោក សម ធី ថ្លែង​ថា ពលរដ្ឋ​បាន​ស្វែង​រក​ដំណោះស្រាយ​ជា​ច្រើន​ដង​មក​ហើយ ពី​អាជ្ញាធរ​និង​ក្រសួង​ដែនដី ប៉ុន្តែ​មក​ដល់​ពេល​នេះ ពួកគាត់​គ្មាន​ទទួល​បាន​ដំណោះស្រាយ​ណាមួយ​ទេ។

លោក​បន្ត​ថា ការ​ផ្ដល់​គោលនយោបាយ​ដីធ្លី​ជូន​ពលរដ្ឋ​កន្លង​មក​នោះ គឺ​មិន​មាន​តម្លាភាព និង​យុត្តិធម៌​ចំពោះ​អ្នក​ដែល​មាន​ទំហំ​ដី​ច្រើន​ហិកតារ​នោះ​ទេ។ លោក​ស្នើ​ឲ្យ​អាជ្ញាធរ​ចុះ​ពិនិត្យ​ដីធ្លី​របស់​ប្រជាពលរដ្ឋដល់​កន្លែង​មាន​ទំនាស់​ជាក់​ស្ដែង និង​ផ្ដល់​សំណង​សមរម្យ៖ «បើ​គាត់​ធ្វើ​អភិបាល​ខេត្ត​ហើយ​ ដោះ​ស្រាយ​រឿង​ហ្នឹង​មិន​ចេញ​ទេ។ ដូច​ពាក្យ​សម្ដេច​គាត់​និយាយ​អ៊ីចឹង អា​ហ្នឹង​ដោះ​ក្រៅ​ប្រព័ន្ធ​តុលាការ​។ សូម​យក​ពាក្យ​សម្ដេច​មក​ប្រើ​ផង។ ហើយ​ខ្ញុំ​សំណូមពរ​ សូម​សម្ដេច​ជួយ​មើល​អភិបាល​ខេត្ត​កោះកុង​ផង ឲ្យ​គាត់​ដោះស្រាយ​សូម​ដូច​អភិបាល​ខេត្ត​កំពត​ ដែល​គាត់​ដោះស្រាយ​កន្លង​មក​នេះ ប្រកប​ដោយ​យុត្តិធម៌ លើក​កន្លែង​ពី​ខេត្ត​យក​ទៅ​ភូមិ​ឃុំ ដើម្បី​រក​ដំណោះស្រាយ​ ដូច​អភិបាល​ខេត្ត​កំពត​ហ្នឹង។ អា​ហ្នឹង! ត្រឹមត្រូវ យុត្តិធម៌​ស​ថា​ស ខ្មៅ​ថា​ខ្មៅ»

ទន្ទឹម​គ្នា​នេះ តំណាង​សហគមន៍​ម្នាក់​ទៀត​ ដែល​មាន​ជម្លោះ​ដីធ្លី​ជាមួយ​ក្រុមហ៊ុន​ស្ករ​អំពៅ​របស់​ឧកញ៉ា លី យ៉ុងផាត់ ក្នុង​ស្រុក​បុទុមសាគរ លោក ឈឹម សាផាន ឲ្យ​ដឹង​ថា រយៈ​ពេល ៤ឆ្នាំ​ចុង​ក្រោយ​នេះ ទាំង​អាជ្ញាធរ​និង​ក្រសួង​ដែនដី តែង​ចេញ​លិខិត​បដិសេធ​មិន​ដោះ​ស្រាយ​បញ្ហា​ជូន​ប្រជាពលរដ្ឋ ៨៤៣គ្រួសារ​នោះ​ទេ។

លោក​បន្ត​ថា ការ​នាំ​គ្នា​មក​សាលា​ខេត្ត​លើក​នេះ គឺ​ដើម្បី​បញ្ជាក់​ប្រាប់​អភិបាល​ខេត្ត​កោះកុង ថា ពួក​គាត់​ពិត​ជា​ពលរដ្ឋ​ដែល​ធ្លាប់​អាស្រ័យ​ផល​លើ​ដី​មាន​ទំនាស់​នោះ​ពិត​ប្រាកដ​មែន ចាប់​តាំង​ឆ្នាំ១៩៧៩ មក។ លោក​ស្នើ​សុំ​អាជ្ញាធរ​កាត់​ឆ្វៀល​ដីធ្លី​ពី​ក្រុមហ៊ុន​ប្រគល់​ឲ្យ​ពលរដ្ឋ​វិញ ​ក្នុង​មួយ​គ្រួសារ​ ទទួល​បាន​ដី​២​ហិកតារ រួម​នឹង​ប្រាក់​សំណង ៥ពាន់​ដុល្លារ ដើម្បី​បញ្ចប់​ជម្លោះ​ដីធ្លី​ជាង ១៥ឆ្នាំ​នេះ៖ «យើង​យក​ញត្តិ​មក​ច្រាន​ចោល​សេចក្ដី​សម្រេច ស..ណ របស់​សាលា​ខេត្ត​កោះកុង​ថា​អត់​ដោះ​ដី​ជូន។ លទ្ធផល​ដែល​បាន​ជួប​លោក​ជំទាវ​ផ្ទាល់ និង​លោក​ សុខ​ សុធី បាន​ជជែក​គ្នា​យ៉ាង​ផុលផុស អាច​ទទួល​យក​បាន។ អ៊ីចឹង! សំណូមពរ​របស់​ខ្ញុំ​ដែល​ចង់​បាន​ទី១ ឈប់​ឲ្យ​គាត់​ច្រាន​ចោល ហើយ​គាត់​នឹង​ពាំនាំ​ពាក្យ​សម្ដី​ដែល​ខ្ញុំ​និយាយ​សំណូមពរ​ទៅ​គាត់​ ពន្លឿន​ការ​ដោះស្រាយ​ដីធ្លី​ជូន​ពួក​ខ្ញុំ​ ហើយ​នឹង​ចុះ​ដល់​ទីតាំង​មាន​បញ្ហា ទំនាស់​ជាមួយ​ក្រុម​ហ៊ុន​កោះកុង ស៊ូហ្គើ (Koh Kong Sugar) និង​ក្រុមហ៊ុន​កោះកុង ផ្លែនថេសិន (Koh Kong Plantation) របស់​លោក​ឧកញ៉ា​ លី យ៉ុងផាត់»

ចំណែក​ តំណាង​សហគមន៍​ដីធ្លី​ក្រុម ១៧៥គ្រួសារ នៅ​ស្រុក​ស្រែ​អំបិល លោក​ស្រី ផាវ ញ៉ើង ស្នើ​សុំ​អភិបាល​ខេត្ត​ ពន្លឿន​ការ​ដោះស្រាយ​និង​បញ្ឈប់​ការ​កោះ​ហៅ​ពលរដ្ឋ​ចូល​បំភ្លឺ​នៅ​តុលាការ ដោយ​ចោទ​ថា​ញុះញង់ និង​បរិហារ​កេរ្តិ៍​តទៅ​ទៀត ព្រោះ​ថា​រឿង​រ៉ាវ​ទាំង​នេះ គឺ​ផ្ដើម​ចេញ​ពី​ជម្លោះ​ដីធ្លី។ លោកស្រី​ ស្នើ​ឲ្យ​មាន​ដោះស្រាយ​បញ្ចប់​បញ្ហា​ដីធ្លី​នេះ​ឲ្យ​បាន​ឆាប់ និង​ទម្លាក់​ចោល​ការ​ប្រកាន់​មក​លើ​តំណាង​ពលរដ្ឋ៖ «ខ្ញុំ​យល់​ឃើញ​ថា មាន​តែ​មួយ​គត់​ គឺ​លោក​ជំទាវ​ត្រូវ​តែ​ខិត​ខំប្រឹង​ប្រែង​ឲ្យ​បាន​លឿន​បំផុត​ធ្វើ​ការ​ដោះស្រាយ​បញ្ហា​ទំនាស់​ដីធ្លី​ ដើម្បី​ចៀស​វាង​ការ​ចោទ​ប្រកាន់ ព្រោះ​បើ​ពួកគាត់​អត់​បាត់​បង់​ដី​ មិន​មែន​គាត់​មក​ទេ ដោយ​សារ​ពួក​យើង​ អ្នក​ខ្លះ​អត់​ដី​មែន អត់​មាន​អី​នៅ​ទេ។ តែ​អ្នក​ខ្លះ​បាត់​ដី​ហើយ បាត់​បង់​ទៅ​ទៀ។ អ្វី​ដែល​យើង​ចង់​បាន​ គឺ​ចង់​ឃើញ​លោក​ជំទាវ​កុំ​សន្យា​ខ្យល់។ សូម​ឲ្យ​លោក​ជំទាវ​មេត្តា​យក​ចិត្ត​ទុក​ដាក់​ក្នុង​ការ​ស្រាវជ្រាវ​និង​ដោះស្រាយ​បញ្ហា​ទំនាស់​ដី​នេះ ដើម្បី​បញ្ចប់​បញ្ហា​អំពី​ការ​ឡើង​តុលាការ​ហ្នឹង​ត​ទៅ​ទៀត»

វិទ្យុ​អាស៊ី​សេរី​មិន​អាច​សុំ​ការ​ឆ្លើយ​តប​រឿង​នេះ​ពី​អភិបាល​ខេត្ត​កោះកុង​ អ្នកស្រី មិថុនា ភូថង និង​រដ្ឋលេខាធិការ​ទទួល​បន្ទុក​ដោះស្រាយ​វិវាទ​ដីធ្លី​នៃ​ក្រសួង​ដែនដី លោក ទេព ធន បាន​ទេ​ នៅ​ថ្ងៃ​ទី​២៤ វិច្ឆិកា​ ដោយ​ហៅ​ទូរស័ព្ទ​ តែ​ពុំ​មាន​អ្នក​ទទួល។

ទោះ​បី​ជា​យ៉ាង​ណា ក្រុម​តំណាង​ពលរដ្ឋ​ ឲ្យ​ដឹង​ថា អភិបាល​ខេត្ត​កោះកុង អ្នកស្រី មិថុនា ភូថង សុំ​ពេល​ពិនិត្យ​មើល​វិវាទ​ដីធ្លី​របស់​ពួកគាត់ ហើយ​នឹង​បញ្ជូន​បន្ត​ទៅ​ក្រសួង​ដែនដី នគរូបនីយកម្ម និង​សំណង់​ ធ្វើ​ការ​សម្រេច។ ពលរដ្ឋ​ថា ពួកគាត់​មាន​ក្ដី​សង្ឃឹម​តិច​តួច​ ក្រោយ​ពី​អភិបាល​រូប​នោះ បញ្ជាក់​ថា ខាង​ថ្នាក់​ជាតិ​គឺ​ជា​អ្នក​ដោះស្រាយ​សម្រេច​ជូន​ប្រជាពលរដ្ឋ​ ចំណែក​ខាង​ថ្នាក់​ខេត្ត គឺ​អ្នក​អនុវត្ត​ទៅតាម​ការ​សម្រេច​នោះ។

ទាក់ទង​នឹង​បញ្ហា​នេះ អ្នក​សម្របសម្រួល​នៃ​អង្គការ​សិទ្ធិមនុស្ស​​លីកាដូ ប្រចាំ​កោះកុង លោក ហួរ អ៊ីន មាន​ប្រសាសន៍​ថា ​វិវាទ​ដីធ្លី​នៅ​ក្នុង​សហគមន៍​ទាំង​នោះ គឺ​អូស​បន្លាយ​អស់​ជា​ច្រើន​ឆ្នាំ​មក​ហើយ ដោយ​ពលរដ្ឋ​តែង​តែ​ចេញ​ស្វែង​រក​អន្តរាគមន៍​ជា​ច្រើន​លើក ​ពី​អាជ្ញាធរ​និង​ក្រសួង​ពាក់ព័ន្ធ​ ដើម្បី​សម្រប​សម្រួល​ដោះស្រាយ​បញ្ចប់។

លោក​សង្ឃឹម​ថា តាម​រយៈ​ការ​ជួប​មុខ​គ្នា​រវាង​ក្រុម​តំណាង​សហគមន៍​ដីធ្លី​ និង​អភិបាល​ខេត្ត​កោះកុង​ នៅ​ពេល​នេះ​ នឹង​អាច​មាន​ដំណោះស្រាយ​សមរម្យ​ណាមួយ​ជូន​ប្រជាពលរដ្ឋ​ដែល​អាច​ទទួល​យក​បាន​នៅ​ពេល​ខាង​មុខ៖ «ប្រជាពលរដ្ឋ​ដែល​នៅ​មុខ​សាលា​ខេត្ត​ហ្នឹង អ៊ីចឹង!​អាជ្ញាធរ​ខេត្ត​គួរ​តែ​ពន្លឿន​ក្នុង​ការ​ដោះស្រាយ​។ បង្ហាញ​យ៉ាង​ណា​ឲ្យ​ប្រជាពលរដ្ឋ​មាន​ការ​ជឿ​ទុក​ចិត្ត ដើម្បី​កុំ​ឲ្យ​មាន​ការ​ប្រមូល​ផ្ដុំ​គ្នា​តវ៉ា​មក​ទៀត​ ព្រោះ​ថា​​អាជ្ញាធរ​តែង​តែ​មិន​ចង់​ឲ្យ​មាន​ការ​តវ៉ា។ អ៊ីចឹង! ដើម្បី​កុំ​ឲ្យ​មាន​ប្រជាពលរដ្ឋ​មាន​ការ​តវ៉ា​ អាជ្ញាធរ​គួរ​តែ​បង្ហាញ​អំពី​វិធានការ​នៃ​ការ​ដោះស្រាយ​ ក៏​ដូច​ជា​បង្ហាញ​ភាព​ស្មោះត្រង់​ដើម្បី​ឲ្យ​ប្រជាពលរដ្ឋ​មាន​ការ​ជឿ​ទុក​ចិត្ត»

ក្រុម​ប្រជា​ពលរដ្ឋ​មាន​ជម្លោះ​ដីធ្លី​ ប្រកាន់​ជំហរ​ថា ប្រសិន​បើ​ពុំ​មាន​ដំណោះស្រាយ​ណាមួយ​ដែល​អាច​ទទួល​យក​បាន​ ក្នុង​រយៈ​ពេល ១ខែ​ទៀត នោះ​ពួកគាត់​នឹង​នាំ​គ្នា​ទៅ​រក​ដំណោះស្រាយ​ពី​ខុទ្ទកាល័យ​លោក​នាយករដ្ឋមន្ត្រី ហ៊ុន សែន និង​ក្រសួង​ដែនដី នៅ​រាជ​ធានី​ភ្នំពេញ៕



កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល