ក្រសួង​ដែន​ដី​បាន​ហៅ​អតិថិជន​បុរី​ពិភព​ថ្មី​ទៅ​ពិភាក្សា ដើម្បី​រក​ដំណោះស្រាយ

ដោយ សុ ជីវី
2024.04.08
ក្រសួង​ដែន​ដី​បាន​ហៅ​អតិថិជន​បុរី​ពិភព​ថ្មី​ទៅ​ពិភាក្សា ដើម្បី​រក​ដំណោះស្រាយ អតិថិជន​បុរី​ពិភព​ថ្មី​ នាំ​គ្នា​ទៅ​ដាក់​ញត្តិ​នៅ​ស្នងការដ្ឋាន​​នគរបាល​រាជធានី​ភ្នំពេញ នៅ​ថ្ងៃ​ទី៧ ខែមេសា ឆ្នាំ២០២៤។
រូបពីពលរដ្ឋ

ក្រសួង​រៀបចំ​ដែនដី​នគរូបនីយកម្ម និង​សំណង់ នៅ​ថ្ងៃ​ទី៨ ខែមេសា បាន​អញ្ជើញ​អតិថិជន​បុរី​ពិភព​ថ្មី​ចំនួន ២០នាក់ ដើម្បី​ជួប​ជជែក​រក​ដំណោះស្រាយ​ជាមួយ​ថៅកែ​ក្រុមហ៊ុន​បុរី​ពិភព​ថ្មី គឺ​អ្នក​ឧកញ៉ា ហុង ពីវ។ ប៉ុន្តែ អតិថិជន​បុរី​ពិភព​ថ្មី​អះអាង​ថា ការ​ជួប​ជជែក​នេះ នៅ​ពុំ​មាន​ដំណោះស្រាយ​នៅ​ឡើយ​ទេ ពីព្រោះ​ក្រសួង​ដែនដី​ព្យាយាម​លើក​ពី​បញ្ហា ដើម្បី​ដាក់​បន្ទុក​លើ​ក្រុម​អតិថិជន​បុរី​ពិភព​ថ្មី​ទៅ​វិញ។

អតិថិជន​បុរី​ពិភព​ថ្មី​ខណ្ឌដង្កោ លោកស្រី គង់ លីដា ប្រាប់​វិទ្យុ​អាស៊ី​សេរី នៅ​ថ្ងៃ​ទី៨ ខែមេសា ថា ការ​ជួប​ជជែក​ពិភាក្សា​នេះ គឺ​ក្រសួង​ដែនដី​បាន​កោះហៅ​អតិថិជន​បុរី​ពិភព​ថ្មី ដែល​បាន​ចូលរួម​ដុត​កង់ឡាន​នៅ​ខាង​មុខ​ក្រុមហ៊ុន កាល​ពី​ថ្ងៃ​ទី៦ ប៉ុណ្ណោះ។ លោកស្រី​បន្ត​ថា រដ្ឋមន្ត្រី​ក្រសួង​ដែនដី​បាន​សួរ​នាំ​រក​មុខ​អ្នក​ដុត​កង់ឡាន ដោយ​លើក​ឡើង​ថា ខុស​ច្បាប់ និង​អាច​ប្រឈម​នឹង​ការ​ជាប់​ទោស។

លោកស្រី គង់ លីដា៖

លោកស្រី គង់ លីដា អះអាង​ថា អតិថិជន​បុរីពិភព​ថ្មី លោក អេង ប្រុស ដែល​អាជ្ញាធរ​ចាប់​ខ្លួន កាល​ពី​ថ្ងៃ​ទី៧ ខែមេសា សមត្ថកិច្ច​នៅ​មិន​ទាន់​ដោះលែង​នៅ​ឡើយ​ទេ ហើយ​លោកស្រី​នៅ​មិន​ទាន់​ដឹង​ថា អាជ្ញាធរ​បញ្ជូន​ខ្លួន លោក អេង ប្រុស ទៅ​ទី​ណា​ដែរ។

ក្រសួង​ដែនដី​នឹង​បន្ត​ជួប​ជជែក​ពិភាក្សា​មួយ​អតិថិជន​បុរី​ពិភព​ថ្មី និង​ភាគី​ក្រុមហ៊ុន នៅ​ថ្ងៃ​ទី៩ ខែមេសា​បន្ត​ទៀត។

វិទ្យុ​អាស៊ី​សេរី​មិន​អាច​ទាក់ទង​អ្នក​នាំ​ពាក្យ​ក្រសួង​រៀបចំ​ដែនដី​នគរូបនីយកម្ម និង​សំណង់ លោក សេង ឡូត និង​ស្នងការ​នគរបាល​រាជធានី​ភ្នំពេញ លោក ជួន ណារិន្ទ ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃ​ទី៨ ខែមេសា។

ការណ៍​ដែល​ក្រសួង​ដែនដី​ហៅ​ពួក​គាត់​ទៅ​ចរចា​នេះ គឺ​ដោយសារ​តែ​កាល​ពី​យប់​ថ្ងៃ​ទី៧ ខែមេសា អតិថិជន​បុរី​ពិភព​ថ្មី ប្រមាណ ៣០នាក់ នាំ​គ្នា​សម្រុក​ទៅ​ផ្ទះ​លោក ហ៊ុន សែន នៅ​ក្រុង​តាខ្មៅ ខេត្តកណ្ដាល ដើម្បី​ដាក់​ញត្តិ​សុំ​កិច្ច​អន្តរាគមន៍​ឱ្យ​ដោះ​លែង​សមាជិក​ពួក​គាត់​ឱ្យ​មាន​សេរីភាព​ឡើង​វិញ បន្ទាប់​ពី​សមត្ថកិច្ច នៃ​ស្នងការដ្ឋាន​នគរបាល​រាជធានី​ភ្នំពេញ​បាន​ឃាត់​ខ្លួន​សមាជិក​ពួក​គាត់ ៥នាក់។

ប៉ុន្តែ​សមត្ថកិច្ច​បាន​ដោះ​លែង​វិញ ៤នាក់ ហើយ​ទុក​តែ​ម្នាក់​ប៉ុណ្ណោះ នៅ​ក្នុង​ស្នងការដ្ឋាន​នគរបាល​រាជធានី​ភ្នំពេញ គឺ​លោក អេង ប្រុស។ ការ​ឃាត់​ខ្លួន​ពួក​គាត់​នេះ គឺ​បន្ទាប់​ពី​គាត់ និង​អតិថិជន​បុរី​ពិភព​ថ្មី​នៅ​ក្នុង​ខណ្ឌដង្កោ និង​ខណ្ឌកំបូល ប្រមាណ ៧០នាក់ បាន​ជួបជុំ​ដាក់​ពាក្យ​ប្ដឹង​ម្ចាស់​ក្រុមហ៊ុន​បុរី​ពិភព​ថ្មី​ពី​បទ​មាន​ចេតនា​បើក​ឡាន​បុក​ពលរដ្ឋ ដែល​កំពុង​ឈរ​តវ៉ា នៅ​ខាង​មុខ​ក្រុមហ៊ុន​បុរី​ពិភព​ថ្មី​សាខា​កួរ​ស្រូវ២។

អតិថិជន​បុរី​ពិភព​ថ្មី នៅ​តែ​ប្រកាន់​គោល​ជំហរ នៅ​បន្ត​ការ​តវ៉ា​ទាមទារ​រក​ដំណោះស្រាយ​ពី​ម្ចាស់​បុរី​ពិភព​ថ្មី​រហូត​ទទួល​បាន​ដំណោះស្រាយ​សមរម្យ​សម្រាប់​ពួក​គាត់ ប្រសិនបើ​ក្រសួង​ដែនដី​មិន​អាច​រក​យុត្តិធម៌​ជូន​ពួក​គាត់​បាន​ទេ​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។