ពលរដ្ឋខេត្តកោះកុងជិត ១ពាន់គ្រួសារ អំពាវនាវជាថ្មីទៀត ដល់អាជ្ញាធរខេត្តនេះ ឱ្យពន្លឿនការផ្តល់ដីសម្បទានសង្គមកិច្ច ដើម្បីឱ្យអ្នកភូមិទទួលបានដីធ្វើកសិកម្ម សម្រាលជីវភាព។ ក្រុមពលរដ្ឋទាំងនោះ រស់នៅក្នុងឃុំចំនួន ៤ គឺឃុំជីខលើ ឃុំជីខក្រោម ឃុំបឹងព្រាវ និងឃុំដងពែង ស្រុកស្រែអំបិល។
តំណាងពលរដ្ឋ លោកស្រី ផាវ ញ៉ើង ប្រាប់វិទ្យុអាស៊ីសេរី នៅថ្ងៃទី២៦ កក្កដាថា អ្នកភូមិនៅតែរង់ចាំដីសម្បទានសង្គមកិច្ចនេះជាង ៤ឆ្នាំមកហើយ អាជ្ញាធរមិនទាន់ឆ្លើយតប នៅឡើយទេ ធ្វើឱ្យពលរដ្ឋមានមន្ទិលក្នុងចិត្ត និងចង់ឱ្យអាជ្ញាធរស្រាយបំភ្លឺឱ្យច្បាស់លាស់។ លោកស្រីថា ពលរដ្ឋស្នើសុំដីសម្បទានសង្គមកិច្ច ភាគច្រើនជាពលរដ្ឋក្រីក្រ ខ្វះខាតដីធ្វើកសិកម្មចិញ្ចឹមជីវិត ខណៈដែលកូនចៅរបស់ពួកគាត់កាន់តែកើន ត្រូវការដីធ្វើស្រែចម្ការចិញ្ចឹមជីវិត។
លោកស្រីបន្ថែមថា កន្លងទៅ ពលរដ្ឋរាប់រយនាក់ បានលើកគ្នាតវ៉ា នៅសាលាស្រុកស្រែអំបិល ដើម្បីឱ្យអាជ្ញាធរផ្តល់ព័ត៌មានពិស្ដារ ជុំវិញរឿងនេះ ប៉ុន្តែអាជ្ញាធរឆ្លើយតបថា យន្តការដោះស្រាយរឿងនេះ គឺជាភារកិច្ចរបស់អាជ្ញាធរថ្នាក់ជាតិ៖ «មិនអស់ចិត្តចេះតែសួរ គេនៅតែឆ្លើយថា ចាំទៅថ្នាក់នេះ ទៅថ្នាក់នោះ វាពិបាកដែលប្រជាជនដើរទៅ អស់លុយអត់បាន អត់ទឹកហូប គ្នាចេះតែអត់ ដើរទៅអស់ហើយលុយ។ បើសម្ដេច គាត់និយាយថា គាត់មិនឱ្យប្រជាជនអត់ទេ ដីសល់គគោកហ្នឹង គាត់គួរតែកំណត់ឱ្យច្បាស់ កាលណាបានឱ្យ ?»។
វិទ្យុអាស៊ីសេរីមិនទាន់អាចទាក់ទងសុំការបំភ្លឺរឿងនេះ ពីអភិបាលខេត្តកោះកុង អ្នកស្រី មិថុនា ភូថង បាននៅឡើយទេ នៅថ្ងៃទី២៦ កក្កដា។
កាលពីដើមសប្ដាហ៍នេះ (២៥ កក្កដា) ពលរដ្ឋជាង ៣០០នាក់ តំណាងឱ្យអ្នកភូមិជិត ១.០០០គ្រួសារ មកពីឃុំចំនួន៤ ក្នុងស្រុកស្រែអំបិល បានប្រមូលផ្ដុំគ្នាមុខសាលាស្រុក ដើម្បីតាមដានញត្តិរបស់ពួកគាត់ ដែលស្នើសុំដីសម្បទានសង្គមកិច្ច។
ក្រុមពលរដ្ឋទាំងនោះអះអាងថា ពួកគាត់បានស្នើសុំដីសម្បទានសង្គមកិច្ច ក្នុងមួយគ្រួសារ ២ហិកតារ ប្រភេទដីកសិកម្ម អាជ្ញាធរមិនទាន់សម្រេចបែបណានៅឡើយទេជាង ៤ឆ្នាំមកហើយ។ ក្រុមពលរដ្ឋទាំងនោះ ចង់ឱ្យអាជ្ញាធរផ្តល់ភាពច្បាស់លាស់ ដោះស្រាយរឿងនេះ ដើម្បីឱ្យពួកគាត់អស់ចិត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។