អតិថិជន​បុរី​ពិភព​ថ្មី​ថា នឹង​ឡើង​ទៅ​ដល់​ផ្ទះ​នាយករដ្ឋមន្ត្រី បើ​នៅ​តែ​មិន​មាន​ដំណោះស្រាយ

ដោយ ខាន់ លក្ខិណា
2024.02.16
អតិថិជន​បុរី​ពិភព​ថ្មី​ថា នឹង​ឡើង​ទៅ​ដល់​ផ្ទះ​នាយករដ្ឋមន្ត្រី បើ​នៅ​តែ​មិន​មាន​ដំណោះស្រាយ អតិថិជន​បង់​រំលស់​បុរី​ពិភព​ថ្មី​នៅ​ខណ្ឌកំបូល៣ ​កាលពី​ថ្ងៃ​ទី១៥ ខែកុម្ភៈ ឆ្នាំ២០២៤ នាំ​គ្នា​តវ៉ា​នឹង​ក្រុមហ៊ុន ដែល​រឹបអូស​ផ្ទះ​របស់​ពួក​គាត់។
រូបពីពលរដ្ឋ

អតិថិជន​បុរី​ពិភព​ថ្មី​អះអាង​ថា ពួក​គាត់​នឹង​នាំ​គ្នា ឡើង​ទៅ​ដល់​ផ្ទះ​នាយក​រដ្ឋមន្ត្រី បើ​ខាង​ខុទ្ទកាល័យ​នាយក​រដ្ឋមន្ត្រី​ទទួល​ញត្តិ​ហើយ មិន​មាន​ដំណោះ​ស្រាយ ហើយ​ក្រុមហ៊ុន​បុរី​ពិភព​ថ្មី​របស់​ឧកញ៉ា ហុង ពីវ នៅ​បន្ត​រឹប​អូស​ផ្ទះ និង​ចាក់​សោ​ផ្ទះ​ពួក​គាត់​នោះ។ ការ​អះអាង​នេះ ក្រោយ​ពី​មន្ត្រី​ជាន់​ខ្ពស់​ខុទ្ទកាល័យ​លោក​នាយក​រដ្ឋមន្ត្រី ហ៊ុន ម៉ាណែត បាន​ចុះ​ទៅ​យក​ញត្តិ​អតិថិជន​បុរី​ពិភព​ថ្មី​ទាំង​យប់​កាលពី​ម្សិលមិញ។

អតិថិជន​បង់​រំលស់​បុរី​​ពិភព​ថ្មី អះអាង​ថា ពួកគាត់​នឹង​នាំ​គ្នា​ឡើង​ទៅ​ដល់​ផ្ទះ​នាយករដ្ឋមន្ត្រី ប្រសិន​បើ​ខាង​ខុទ្ទកាល័យ​នាយក​រដ្ឋមន្ត្រី​ទទួល​ញត្តិ​ហើយ គ្មាន​ដំណោះ​ស្រាយ បណ្ដាល​ឱ្យ​ក្រុមហ៊ុន​បុរី​ពិភព​ថ្មី បន្ត​រឹបអូស និង​ចាក់​សោ​ផ្ទះ​របស់​ពួកគាត់​ទៀត។

ការ​អះអាង​នេះ បន្ទាប់​ពី​មន្ត្រី​ជាន់​ខ្ពស់​ខុទ្ទកាល័យ​នាយក​រដ្ឋមន្ត្រី លោក គង់ ចំរើន នៅ​ល្ងាច​ថ្ងៃ​ទី១៥ កុម្ភៈ បាន​ចុះ​ទៅ​ទទួល​យក​ញត្តិ​ពី​អតិថិជន​បុរី​ពិភព​ថ្មី​នៅ​ពាក់​កណ្ដាល​ផ្លូវ ស្រប​ពេល​ក្រុម​អតិថិជន​បុរី​ពិភព​ថ្មី គ្រោង​នឹង​គ្នា​ដង្ហែ​ញត្តិ​នេះ យក​ទៅ​ដាក់​នៅ​​ខុទ្ទកាល័យ​នាយក​មន្ត្រី​ផ្ទាល់។

អតិថិជន​បង់​រំលស់​បុរី​ពិភព​ថ្មី​នៅ​ខណ្ឌកំបូល៣ លោកស្រី អនស៊ាន បូរី ប្រាប់​វិទ្យុ​អាស៊ី​សេរី​នៅ​ថ្ងៃ​ទី១៦ កុម្ភៈ​ថា គោលបំណង​របស់​ពួកគាត់​កាលពី​ថ្ងៃ​ទី១៥ កុម្ភៈ គ្រោង​យក​ញត្តិ​នេះ ទៅ​ដាក់​ដល់​ខុទ្ទកាល័យ​នាយក​រដ្ឋមន្ត្រី​ដោយ​ផ្ទាល់ ប៉ុន្តែ​ត្រូវ​បាន​អាជ្ញាធរ​រារាំង ដោយ​ឱ្យ​រង់ចាំ​មន្ត្រី​ខុទ្ទកាល័យ​ចុះ​យក​មក​ញត្តិ​ពី​ពួក​គាត់​វិញ។

លោកស្រី​ថា មន្ត្រី​ខុទ្ទកាល័យ​បាន​ទទួល​ញត្តិ​ពី​ពួកគាត់​ហើយ​ក៏ដោយ ប៉ុន្តែ​មិន​បាន​សន្យា​អ្វី​ទេ ហើយ​ក៏​មិន​ឱ្យ​​ពួកគាត់​សួរ​នាំ​ដែរ។

លោកស្រី អនស៊ាន បូរី ថ្លែង​ថា បើ​ខាង​ខុទ្ទកាល័យ​ទទួល​យក​ញត្តិ​ហើយ ប៉ុន្តែ​មិន​មាន​ដំណោះស្រាយ ហើយ​ក្រុមហ៊ុន​បុរី​ពិភព​ថ្មី​នៅ​តែ​គំរាមកំហែង និង​បន្ត​ដើរ​កិប​សោ​ផ្ទះ រឹបអូស​ផ្ទះ​ទៀត​នោះ លោកស្រី​ថា ពួកគាត់​នឹង​មិន​នៅ​រង់ចាំ​ចម្លើយ​ពី​ខាង​ខុទ្ទកាល័យ​ទៀត​ទេ ដោយ​ពួកគាត់​នឹង​នាំ​គ្នា​ហែ​ក្បួន​ទៅ​កាន់​ផ្ទះ​នាយក​រដ្ឋមន្ត្រី​ទាំង​ចាស់ និង​នាយក​រដ្ឋមន្ត្រី​ថ្មី។

លោកស្រី អនស៊ាន បូរី៖ «បើ​សិន​ជា​មិន​បង្អង់​ក្នុង​ការ​អនុវត្ត​គោលការណ៍​នៅ​តែ​បន្ត​កិប​សោ រឹប​អូស​បន្ត​ទៀត គឺ​ពួក​ខ្ញុំ​មិន​រង​ចាំ​ទៀត​ទេ ពីព្រោះ​ការ​រង​ចាំ​ពី​ក្រសួង​ផ្សេងៗ ដែល​សន្យា​រំងាប់​អារម្មណ៍​ហ្នឹង វា​ច្រើន​តង់​ហើយ វា​អស់​នៅ​​កន្លែង​ដែល​យើង​ត្រូវ​ទុក​ចិត្ត។ ខ្ញុំ​មិន​ទាន់​មាន​ភាព​ជឿជាក់​ទេ និយាយ​ចេញ​ពី​ចិត្ត​តែ​ម្ដង ខ្ញុំ​អត់​ទាន់​មាន​ភាព​ជឿជាក់​ថា នឹង​មាន​ដំណោះស្រាយ ហើយ​គាត់​នឹង​ពិត​ជា​ជួយ​ដោះស្រាយ​ក្នុង​រឿង​ហ្នឹង ពេល​ខ្លះ​អាច​ចុះ​មក​ទទួល​ញត្តិ​ហ្នឹង ដើម្បី​ឱ្យ​ស្ថានភាព​តានតឹង​ហ្នឹង រសាយ​ទៅ​វិញ ដើម្បី​រំងាប់​ចិត្ត​ពួក​ខ្ញុំ ក្នុង​មួយ​គ្រា​ខ្លី​ហើយ​ឱ្យ​ក្រុមហ៊ុន​បន្ត​អនុវត្ត​គោល​ការណ៍​ហ្នឹង​ដដែល»

អតិថិជន​បង់​រំលស់​បុរី​ពិភព​ថ្មី​ម្នាក់​ទៀត លោកស្រី កៅ សុធារី លើក​ឡើង​ថា ពួកគាត់​មិន​ចង់​តវ៉ា​ដូច្នេះ​ឡើយ ប៉ុន្តែ​មក​ពី​គ្មាន​ដំណោះស្រាយ ខណៈ​បុរី​នៅ​តែ​បន្ត​ដើរ​កិប​សោ​ផ្ទះ​របស់​ពួកគាត់។

លោកស្រី កៅ សុធារី៖ «ពួក​ខ្ញុំ គឺ​រង​ចាំ​តែ​ដំណោះ​ស្រាយ​ទេ ប៉ុន្តែ​ជាក់​ស្ដែង​ខាង​បុរី​គាត់​ធ្វើ​ខ្លាំង។ គាត់​នៅ​តែ​អនុវត្ត​រហូត​អ៊ីចឹង តាំង​ពី​ផ្ទះ​ខ្ញុំ​មិន​ទាន់​រឹបអូស​រហូត​រឹបអូស​បាត់​ក្នុង​បញ្ជី​អី​ក៏​មាន​ដែរ។ ជាក់​ស្ដែង​ដូច​ផ្ទះ​ខ្ញុំ បើ​គាត់​ចាក់​សោ ហើយ​គាត់​ដាក់​អ៊ីចឹង លក្ខណៈ​រឹបអូស​ហើយ។ ខ្ញុំ​តវ៉ា​តាំង​ពី​មិន​ទាន់​រឹបអូស​រហូត​ដល់​លក្ខណៈ​រឹបអូស»

អតិថិជន​បង់​រំលស់​បុរី​ពិភព​ថ្មី អះអាង​ថា ការ​ដាក់​ញត្តិ​ទៅ​ខុទ្ទកាល័យ​នេះ ដើម្បី​សុំ​ឱ្យ​នាយក​រដ្ឋមន្ត្រី ហ៊ុន ម៉ាណែត អន្តរាគមន៍​ឱ្យ​ក្រុមហ៊ុន​ព្រម​ទទួល​ទិញ​ផ្ទះ​វិញ​ក្នុង​តម្លៃ ៥០ភាគ​រយនៃ​តម្លៃ​ដើម និង​បញ្ឈប់​ការ​ចាក់​សោ​ផ្ទះ​របស់​ពួកគាត់​បន្ត​ទៀត។

វិទ្យុ​អាស៊ី​សេរី​នៅ​ថ្ងៃ​ទី១៦ កុម្ភៈ មិន​សុំ​ការ​អត្ថាធិប្បាយ​ពី​មន្ត្រី​ខុទ្ទកាល័យ​នាយក​រដ្ឋមន្ត្រី លោក គង់ ចំរើន ដែល​ចុះ​ទៅ​ទទួល​ញត្តិ​ពី​ប្រជាពលរដ្ឋ កាល​ពី​ល្ងាច​ថ្ងៃ​ទី១៥ កុម្ភៈ​នោះ​បាន​ទេ។ រីឯ​ទូរស័ព្ទ​អ្នក​នាំ​ពាក្យ​នាយក​រដ្ឋមន្ត្រី លោក មាស សុភ័ណ្ឌ ចូល​គ្មាន​អ្នក​ទទួល។

កាលពី​ខែមិថុនា ឆ្នាំ២០២៣ អតីត​នាយក​រដ្ឋមន្ត្រី ហ៊ុន សែន ស្នើ​ដល់​ម្ចាស់​បុរី​ទាំងអស់​យោគយល់​ដល់​អ្នក ដែល​បាន​ទិញ​ផ្ទះ​បង់​រំលស់ ដោយសារ​តែ​ជួប​បញ្ហា​ប្រាក់​ចំណូល​នាំ​ឱ្យ​គ្មាន​លទ្ធភាព​បង់​ប្រាក់​តាម​កិច្ចសន្យា​កំណត់។ លោក​បញ្ជាក់​ថា បើ​បណ្ដោយ​ឱ្យ​ម្ចាស់​បុរី​រឹបអូស​យក​ផ្ទះ​ពី​អ្នក​បង់​រំលស់​ណា​មួយ​នោះ​នឹង​ធ្វើ​ឱ្យ​ពលរដ្ឋ​រង​ការ​ឈឺ​ចាប់ ហើយ​សេដ្ឋកិច្ច​កម្ពុជា​នឹង​ដើរ​ដល់​ដំណាក់​កាល​គ្រោះ​ថ្នាក់។

លោក ហ៊ុន សែន៖ «គ្នា​បង់​អស់ ១០ម៉ឺន​ហើយ ស្រាប់​តែ​ឥឡូវ​រឹប​អូស​យក​ទៅ​បាន​អ៊ីចឹង ឱ្យ​មក​វិញ ៥ម៉ឺន​បាន​ទេ ឬ​ក៏​រឹប​អូស​ថ្មីៗ អញ្ជើញ​គាត់​ត្រឡប់​មក​វិញ។ ឥឡូវ​ខ្ញុំ​រៀបចំ​ឥណទាន​ឡើង​ឱ្យ​អ្នក​ឯង​មក​នៅ​វិញ ធ្វើ​បុណ្យ​ទាន់​ជាតិ​នេះ កុំ​ចាំ​ជាតិ​ក្រោយ។ អា​ហ្នឹង​ធ្វើ​បុណ្យ​អ៊ីចឹង អា​ហ្នឹង​បាន​បុណ្យ បើ​មិន​នៅ​ឋាន​មនុស្ស​ទេ គឺ​ទៅ​ឋាន​ទេវតា ឬ​ឋាន​និព្វាន។ អ៊ីចឹង​ទេ ខ្ញុំ​អំពាវនាវ​សារ​ជា​ថ្មី ចំពោះ​ម្ចាស់​លក់​ផ្ទះ​ទាំង​អស់ ដែល​ត្រៀម​រឹប​អូស​ផ្ទះ​អ្នក​ណា​ឈប់​និយាយ​គ្នា​សិន! ផ្អាក​ត្រឹម​ប៉ុណ្ណឹង»

ទោះបីជា​លោក ហ៊ុន សែន ធ្លាប់​អះអាង និង​ស្នើ​ដូច្នេះ​ក៏​ដោយ ប៉ុន្តែ​គ្មាន​ប្រសិទ្ធភាព ឬ​ដំណោះស្រាយ​ឡើយ។ ផ្ទុយ​ទៅ​វិញ ក្រុម​អតិថិជន​អះអាង​ថា ទាំង​អាជ្ញាធរ និង​ក្រសួង ដែល​ពួក​គាត់​ធ្លាប់​រក​អន្តរាគមន៍​កន្លង​មក បាន​ត្រឹម​តែ​សន្យា ហើយ​ការ​ដោះ​ស្រាយ​បែរ​ជា​លំអៀង​ទៅ​ក្រុមហ៊ុន​បុរី​ពិភព​ថ្មី ដែល​ករណី​នេះ ធ្វើ​ឱ្យ​ពួក​គាត់​បាត់​បង់​ទំនុក​ចិត្ត។

លើស​ពី​នេះ ក្រុមហ៊ុន​បុរី​ពិភព​ថ្មី និង​មេធាវី​របស់​ម្ចាស់​បុរី កាល​ពី​ពេល​ថ្មីៗ បាន​ចេញ​លិខិត​ព្រមាន​រឹប​អូស​ផ្ទះ ប្រសិន​បើ​អតិថិជន​ទាំង​អស់ ដែល​ខក​ខាន​បង់​ជូន​ក្រុមហ៊ុន ហើយ​ករណី​អតិថិជន​មិន​បាន​បង់​ប្រាក់​តាម​ការ​ជូន​ដំណឹង​នេះ​ទេ ភាគី​ក្រុមហ៊ុន​នឹង​រឹប​អូស​យក​ផ្ទះ​វិញ​តាម​កិច្ច​សន្យា​ទិញ​លក់​ជា​ដើម។

វិទ្យុ​អាស៊ី​សេរី​មិន​អាច​ទាក់ទង​តំណាង​ក្រុមហ៊ុន​បុរី​ពិភព​ថ្មី ដើម្បី​សុំ​ការ​បកស្រាយ​​បញ្ហា​នេះ​បាន​ទេ នៅ​ថ្ងៃ​ទី១៦ ខែកុម្ភៈ។

នាយក​ទទួល​បន្ទុក​កិច្ចការ​ទូទៅ​នៃ​អង្គការ​ការពារ​សិទ្ធិ​មនុស្ស​លីកាដូ (LICADHO) លោក អំ សំអាត សង្ឃឹម​ថា បញ្ហា​នេះ នឹង​ត្រូវ​បាន​ដោះ​ស្រាយ​នៅ​ពេល​មន្ត្រី​ខុទ្ទកាល័យ​នាយក​រដ្ឋមន្ត្រី​ទទួល​បាន​ញត្តិ​ពី​ប្រជាពលរដ្ឋ​ហើយ។

លោក អំ សំអាត៖ «យើង​គ្រាន់តែ​សង្ឃឹម​ថា ក្រោយ​មាន​ការ​ទទួល​យក​ញត្តិ ហើយ​ពី​បងប្អូន​ប្រជាពលរដ្ឋ។ រដ្ឋាភិបាល​នឹង​ពិនិត្យ​មើល​ទៅ​លើ​សំណើ​បងប្អូន​ប្រជាពលរដ្ឋ​ហ្នឹង ហើយ​ស្វែង​រក​ដំណោះស្រាយ​ណា​មួយ​សមស្រប​រវាង​ក្រុមហ៊ុន និង​អតិថិជន​ដែល​ទិញ​ផ្ទះ​ហ្នឹង ដើម្បី​ឱ្យ​ដំណោះស្រាយ​ហ្នឹង​ទទួល​យក​បាន​ទាំង​អស់​គ្នា ដូច​រាជរដ្ឋាភិបាល​ធ្លាប់​ធ្វើ​មុន គឺ​ដំណោះស្រាយ​ឈ្នះៗ ទាំង​អស់​គ្នា។ អ៊ីចឹង​ឃើញ​ថា ដំណោះស្រាយ​ហ្នឹង ជា​រឿង​ចាំបាច់​ហើយ ក្នុង​ការ​ដែល​អាច​ឱ្យ​ភាគី​ទាំង​ពីរ អាច​ទទួល​យក​បាន​ទាំងអស់​គ្នា»

លោក អំ សំអាត ថា លោក​នឹង​ធ្វើ​ការ​តាម​ដាន​មើល​ការ​ជួយ​សម្រប​សម្រួល​ពី​របស់​អាជ្ញាធរ ក៏​ដូច​ជា រដ្ឋាភិបាល ក្នុង​ការ​ស្វែងរក​ដំណោះស្រាយ​ប្រកប​ដោយ​ប្រសិទ្ធភាព ហើយ​អាច​ទទួល​យក​បាន​ទាំង​អស់​គ្នា ទើប​អាច​បញ្ចប់​នូវ​បញ្ហា​រវាង​ម្ចាស់​បុរី និង​ប្រជាពលរដ្ឋ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
សាលាក្រុង​ភ្នំពេញ​បដិសេធ​មិន​ឲ្យ​សមាគម​ខ្មែរ​កម្ពុជា​ក្រោម ហែ​ក្បួន​បាតុកម្ម
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។