ស្ត្រីទុរគតម្នាក់នៅស្រុកថ្មគោល ខេត្តបាត់ដំបង ត្រូវអាជ្ញាធរបំពានយកដីធ្លី និងគំរាមកំហែង
2024.08.31
ស្ត្រីទុរគតដែលផ្ទុកជំងឺអេដស៍ម្នាក់ នៅស្រុកថ្មគោល ខេត្តបាត់ដំបង អះអាងថា អាជ្ញាធរបានជីកកាយយកអាចម៍ដីលក់ក្រោមលេសស្ដារប្រឡាយ ដែលបណ្ដាលឱ្យប៉ះពាល់ដល់ដីលំនៅឋានស្ទើរទាំងស្រុង ខណៈពួកគេថែមទាំងគំរាមកំហែងមិនឱ្យគាត់តវ៉ាទាមទាររកយុត្តិធម៌ទៀតផង។ ស្ត្រីរូបនេះ ស្នើឱ្យថ្នាក់ដឹកនាំរដ្ឋាភិបាល បញ្ជូនមន្ត្រីតំណាងឱ្យចុះមកស្រាវជ្រាវរឿងនេះ ដើម្បីរកយុត្តិធម៌សម្រាប់គាត់នៅជីវិតចុងក្រោយ។
ស្ត្រីមេម៉ាយទុរគតដែលផ្ទុកជំងឺអេដស៍ម្នាក់ រស់នៅភូមិត្រស់ ឃុំអូរតាគី ស្រុកថ្មគោល ស្រក់ទឹកភ្នែក ដោយសារដីលំនៅឋានរបស់លោកស្រី ត្រូវអាជ្ញាធរកាយយកអាចម៍ដីលក់ ស្ទើរតែដល់សសរផ្ទះទៅហើយ ប៉ុន្តែលោកស្រីមិនអាចទាមទាររកយុត្តិធម៌ ហើយថែមទាំងទទួលរងការគំរាមកំហែង និងការជេរប្រមាថសព្វបែបយ៉ាង ពីសំណាក់មន្ត្រីមូលដ្ឋាន ដែលជាអ្នកអនុវត្តច្បាប់។
ពលរដ្ឋនៅឃុំអូរតាគី ស្រុកថ្មគោល លោកស្រី ប៊ិត ពៅ ប្រាប់វិទ្យុអាស៊ីសេរី នៅថ្ងៃទី៣០ ខែសីហា ថា កាលពីដើមឆ្នាំ២០២៣ អាជ្ញាធរឃុំអូរតាគី និងមន្ត្រីរបស់មន្ទីរធនធានទឹក បានកាយយកអាចម៍ដី និងបំផ្លាញផលដំណាំនៅខាងក្រោយផ្ទះលោកស្រី អស់ជាងពាក់កណ្ដាល ក្រោមលេសថា ដើម្បីស្ដារអូរ។ ក៏ប៉ុន្តែ លោកស្រី អះអាងថា អាជ្ញាធរមិនមែនកាយដីដើម្បីស្ដារអូរនោះទេ ដោយអាជ្ញាធរភូមិ និងឃុំ បានឃុបឃិតគ្នាកាយ យកអាចម៍ដីនោះ យកទៅលក់ឱ្យអ្នកដទៃ រហូតធ្វើឱ្យដីលំនៅឋានរបស់លោកស្រីក្លាយទៅជាបឹងមួយ។
លោកស្រី ប៊ិត ពៅ៖ «និយាយឱ្យចំទៅរស់នៅគ្មានមេគ្មានបា រស់ឯកោ។ នឹងឃើញកាលណា គឺទឹកភ្នែក ដល់ថ្នាក់តោងអេស្កាទៀតក៏មាន។ យកអេស្កាមកបុករើរបង បួនដប់ម្ភៃនាក់។ យកអេស្កាមកដកបង្គោលរបងប៉ុនបង្គោលភ្លើង។ ខ្ញុំតោងអេស្កា កាយជិតដល់ផ្ទះខ្ញុំ ខ្ញុំរត់ចូលអេស្កា បានគេកាយយកត្រឹមហ្នឹង»។
លោកស្រី ប៊ិត ពៅ បញ្ជាក់ថា កាលពីដំបូងឡើយ ដីរបស់លោកស្រី មានទំហំ ក្បាល៨០ម៉ែត្រ និងជម្រៅ២៧ម៉ែត្រ។ ប៉ុន្តែក្រោយពីអាជ្ញាធរ កាយយកអាចម៍ដីលក់មក គឺនៅសល់ជម្រៅ១០ម៉ែត្រ ខណៈពលរដ្ឋផ្សេងទៀត ដែលរស់នៅសងខាងជាប់មាត់អូរក្បែរនោះ ទទួលរងផលប៉ះពាល់ ដូចលោកស្រីដែរ ប៉ុន្តែពួកគេមិនហ៊ានតវ៉ានោះទេ ព្រោះមានអាជ្ញាធរមកគំរាម។
វិទ្យុអាស៊ីសេរី មិនអាចទាក់ទង មេភូមិត្រស់ លោក ហឿន សាលួត និងមេឃុំអូរតាគី លោក ពេក គុំ ដើម្បីសុំការបកស្រាយជុំវិញបញ្ហានេះបានទេ នៅថ្ងៃទី៣០ ខែសីហា។
ជុំវិញរឿងនេះ ប្រធានការិយាល័យអង្គការលីកាដូ (Licadho) ប្រចាំនៅខេត្តបន្ទាយមានជ័យ លោក អ៊ិន គង់ជិត មានប្រសាសន៍ថា លោកស្រី ប៊ិត ពៅ ពិតជារងភាពអយុត្តិធម៌ដោយសារការរំលោភយកដី និងការគំរាមកំហែង ដល់ការរស់នៅ និងសុវត្ថិភាពពិតប្រាកដមែន។ លោកស្នើឱ្យអាជ្ញាធរពិចារណាលើទង្វើរបស់ខ្លួនឡើងវិញ និងបញ្ឈប់ការបំពានលើដីពលរដ្ឋ ដើម្បីឱ្យគាត់អាចរស់នៅដោយភាពសមរម្យលើដីរបស់ខ្លួន។
លោក អ៊ិន គង់ជិត៖ «គួរតែចុះទៅពិនិត្យមើលជាក់ស្ដែង អំពីស្ថានភាពគ្រួសាររបស់គាត់ ដែលបានបាត់បង់ដីម្ដងហើយម្ដងទៀត ហើយនៅពេលយកអាចម៍ដីលក់ហ្នឹង គឺគ្មានបានផ្ដល់ឱ្យគាត់មួយកាក់មួយសេន មួយរៀលទេ។ ជាការធ្វើបាបគាត់ ហើយគួរតែបញ្ឈប់អំពីហ្នឹងទៅលើស្ត្រីរងគ្រោះបែបហ្នឹងទៀតទៅ។ ងាកមកគិតគូររឿងមនុស្សធម៌យោគយល់ ហើយអនុគ្រោះឱ្យគាត់រស់នៅក្នុងជីវិតចុងក្រោយរបស់គាត់ ដែលគាត់មានជំងឺក្នុងខ្លួនផង ហើយនិងជាស្ត្រីកម្សត់ទុរគតផង»។
បច្ចុប្បន្ន លោកស្រី ប៊ិត ពៅ អាយុ៦០ឆ្នាំ កំពុងមានជំងឺអេដស៍ និងរស់នៅជាមួយកូនប្រុសម្នាក់ ដែលមានសតិមិនគ្រប់គ្រាន់។ លោកស្រីស្នើឱ្យលោក ហ៊ុន ម៉ាណែត ចាត់មន្ត្រីតំណាងឱ្យចុះមកស្រាវជ្រាវរឿងនេះ ដើម្បីរកយុត្តិធម៌ឱ្យលោកស្រី ព្រោះលោកស្រីនៅសល់តែដីលំនៅឋាននេះប៉ុណ្ណោះ ទុកសម្រាប់ឱ្យកូនរស់នៅ និងអាស្រ័យជីវិត នៅពេលលោកស្រីចែកឋានទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ក្រុមប្រឹក្សាអភិវឌ្ឍន៍កម្ពុជាគ្រោងធ្វើបេសកកម្មដើរគោះទ្វាររកវិនិយោគិននៅអាមេរិកជាថ្មី
- ក្រសួងមហាផ្ទៃបញ្ជាក់ថា កូនមន្ត្រីជាន់ខ្ពស់ ដែលបើកឡានបុកមនុស្សស្លាប់ពីរនាក់ នៅអូស្ត្រាលីនោះ គឺឈ្មោះ ឌឿន ឧត្ដមសេនីយ៍
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អ្នកឃ្លាំមើលថា រដ្ឋមន្ត្រីការបរទេសកម្ពុជា និយាយភូតកុហកពិភពលោកថាកម្ពុជាគោរពសិទ្ធិមនុស្ស និងនីតិរដ្ឋ