មន្ត្រី​រដ្ឋាភិបាល​បដិសេធ​ការ​សំណើ​​របស់​​អង្គការ​សមាគម​ចំនួន​ ១០០​ស្ថាប័ន ទាមទារ​​រាជ​រដ្ឋាភិបាល​ឱ្យ​​លុប​ចោល​ច្បាប់​ស្ដីពី​សមាគម ​និង​​អង្គការ​​មិន​មែន​​រដ្ឋាភិបាល

ដោយ ហេង រស្មី
2020-02-10
អ៊ីម៉ែល
មតិ
Share
បោះពុម្ព
(ជួរ​ខាង​ឆ្វេង) មន្ត្រី​អង្គការ​សមាគម​សង្គម​ស៊ីវិល ជួប​ប្រជុំ​ជា​មួយ​មន្ត្រី​ក្រសួង​មហាផ្ទៃ (ជួរ​ខាង​ស្ដាំ)  ពិភាក្សា​អំពី​ការ​ធ្វើ​វិសោធនកម្ម​ច្បាប់​ស្ដីពី​សមាគម​និង​អង្គការ​មិនមែន​រដ្ឋាភិបាល កាលថ្ងៃទី១០ ខែ​កុម្ភៈ ឆ្នាំ២០២០។
(ជួរ​ខាង​ឆ្វេង) មន្ត្រី​អង្គការ​សមាគម​សង្គម​ស៊ីវិល ជួប​ប្រជុំ​ជា​មួយ​មន្ត្រី​ក្រសួង​មហាផ្ទៃ (ជួរ​ខាង​ស្ដាំ) ពិភាក្សា​អំពី​ការ​ធ្វើ​វិសោធនកម្ម​ច្បាប់​ស្ដីពី​សមាគម​និង​អង្គការ​មិនមែន​រដ្ឋាភិបាល កាលថ្ងៃទី១០ ខែ​កុម្ភៈ ឆ្នាំ២០២០។
រូប៖ ហ្វេសប៊ុក​ក្រសួង​មហាផ្ទៃ

មន្ត្រី​ជាន់​ខ្ពស់​ក្រសួង​មហាផ្ទៃ​បាន​ច្រាន​ចោល​សំណើ​របស់​អង្គការ​សមាគម​ចំនួន ១០០​ស្ថាប័ន​ដែល​ទាមទារ​ឱ្យ​រាជ​រដ្ឋាភិបាល​លុប​ចោល​ច្បាប់​ស្ដីពី​សមាគម​និង​អង្គការ​មិនមែន​រដ្ឋាភិបាល​ដោយ​ចាត់​ទុក​ថា​ ការ​ស្នើ​សុំ​នេះ​បំពាន​ទៅ​ច្បាប់​រដ្ឋ​ធម្មនុញ្ញ។

មន្ត្រី​សង្គម​ស៊ីវិល​បញ្ជាក់​ថា រដ្ឋាភិបាល​គួរ​តែ​ទទួល​យក​សំណូម​ពរ​របស់​អង្គការ​សង្គម​ស៊ីវិល​ទាំង​នោះ​មិន​ត្រូវ​បដិសេធ​ទេ និង​ស្នើ​ឲ្យ​របប​ក្រុង​ភ្នំពេញ​គួរតែ​ធ្វើ​ការ​អោយ​មាន​តម្លាភាព​ជុំវិញ​ករណី​នេះ។

រដ្ឋលេខាធិការ​ក្រសួង​មហាផ្ទៃ​លោក ប៊ុន ហុន មាន​ប្រសាសន៍​ថា រដ្ឋាភិបាល​មិន​អាច​ធ្វើតាម​ការ​ចង់​បាន​របស់​មន្ត្រី​អង្គការ​សង្គម​ស៊ីវិលទាំង ១០០​ស្ថាប័ន​នោះ​បាន​ទេ។ លោក​មាន​ប្រសាសន៍​ថា​ក្រសួង​មហាផ្ទៃ​បាន​ពិភាក្សា​ចំនួន​ ៤​លើក​រួច​មក​ហើយ ពាក់​ព័ន្ធ​នឹង​ច្បាប់​ស្ដីពី​សមាគម និង​អង្គការ​មិន​មែន​រដ្ឋាភិបាល​ ហើយ​មាត្រា​១១​ នៃ​ច្បាប់​នេះ ​ក៏​បាន​ពិភាក្សា​គ្នា​ចប់​ហើយ​ដែរ​ តែ​មន្ត្រី​សង្គម​ស៊ីវិល​ទាំង​នោះ​នៅ​តែ​ទាម​ទារ​ដាក់​ចំណុច​បន្ថែម​ទៀត ដែល​ក្រសួង​មិន​អាច​ធ្វើ​បាន​ទេ៖ «ការ​ស្នើសុំ​និរាករណ៍​ច្បាប់​នេះ​គឺ​ទី១ បំពាន​ទៅ​លើ​រដ្ឋធម្មនុញ្ញ។ ទី២ ខាង​យើង​ខ្ញុំ​នេះ​មិន​មាន​សិទ្ធិ​អំណាច​​ណា​នៅ​ក្នុង​និរាករណ៍​ច្បាប់​ទេ​គឺ​ថា​បំពាន​ទៅ​លើ​អង្គការ​នីតិ​បញ្ញត្តិ។ ទី៣ យើង​ខ្ញុំ​នៅ​តែ​មាន​ឆន្ទៈ​ធ្វើ​កិច្ច​ការ​ជាមួយ​ពួក​គាត់​ប៉ុន្តែ​សុំ​ឱ្យ​គាត់​មាន​ភាព​ស្មោះ​ត្រង់​នឹង​គ្នា​កុំ​អោយ​ជជែក​គ្នា​ស្រុះស្រួល​គ្នា​ជា​មួយ​គ្នា​ស្រាប់តែ​ចេញ​មក​ធ្វើ​សេចក្ដី​ថ្លែងការណ៍​ឯណា​ឆ្កុយ​ខ្ញុំ​អត់​យល់​ថា​គាត់​ចង់​បាន​ស្អី»

ការ​ឆ្លើយ​តប​របស់​មន្ត្រី​ជាន់​ខ្ពស់​ក្រសួង​មហាផ្ទៃ​នេះ​បាន​កើត​មាន​ឡើង​ក្រោយ​ពី​ក្រុម​អង្គការ សមាគម និង​សហគមន៍​ចំនួន​១០០​ស្ថាប័ន​បាន​ចេញ​សេចក្ដី​ថ្លែង​ការណ៍​មួយ​ទាមទារ​ឱ្យ​រាជ​រដ្ឋាភិបាល​និរាករណ៍ ឬ​លុបចោល ច្បាប់​ស្ដីពី​សមាគម​និង​អង្គការ​មិនមែន​រដ្ឋាភិបាល។

សេចក្ដីថ្លែងការណ៍​របស់​ក្រុម​បណ្ដាញ​អង្គការ​ទាំង ១០០ កាល​ពី​​ថ្ងៃ​ទី១០ ខែ​កុម្ភៈ បាន​ចេញ​ផ្សាយ​ក្រោយ​កិច្ចប្រជុំ​លើកទី៤​រវាង​ក្រសួង​មហាផ្ទៃ និង​អង្គការ​មិនមែន​រដ្ឋាភិបាល​ក្នុងស្រុក​មួយ​ចំនួន។ ក្រុម​អង្គការ​ទាំង​នេះ​លើកឡើង​ថា​កិច្ចប្រជុំ​នោះ​បាន​បញ្ចប់​ទៅ​ដោយ​មិន​មាន​លទ្ធផល​ជា​វិជ្ជមាន​ចំពោះ​ការ​ធ្វើ​វិសោធនកម្ម​ច្បាប់​ស្ដីពី​​សមាគម និង​អង្គការ​មិនមែន​រដ្ឋាភិបាល ដើម្បី​អោយ​ច្បាប់​នេះ​មាន​ភាព​ល្អ​ប្រសើរ​ទេ ពោល​គឺ​រដ្ឋាភិបាល​ខ្វះ​ឆន្ទៈ​ក្នុង​ការ​ធ្វើ​វិសោធនកម្ម​ច្បាប់​នេះ​តែ​ម្ដង។

អនុប្រធាន​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ​ លោក អំ សំអាត មាន​ប្រសាសន៍​ថា មាន​អង្គការ​សង្គម​ស៊ីវិល​មួយ​ចំនួន​យល់​ថា ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល​អាច​មាន​ផល​ប៉ះពាល់​ដល់​ សមាគម ឬ​សហគមន៍​ដែល​មិន​បាន​ចុះ​បញ្ជី​ដោយ​សារ​អាជ្ញាធរ​មូលដ្ឋាន​តែងតែ​យក​ច្បាប់​នេះ​ទៅ​បន្ទច់​បង្អាក់ ឬ​គំរាមកំហែង​ និង​ បំភិត​បំភ័យ​ទៅ​លើ​សហគមន៍​ទាំង​នោះ។​

លោក​បញ្ជាក់​ថា រដ្ឋាភិបាល​គួរ​តែ​ទទួល​យក​សំណូម​ពរ​របស់​អង្គការ​សង្គម​ស៊ីវិល​ទាំង​នោះ​មិន​ត្រូវ​បដិសេធ​ទេ៖ «តាម​ការ​ពិត​អានេះ​វា​ជា​សំណូម​ពរ​ដែល​ពិនិត្យ​ទៅ​លើ​បញ្ហា​ទាំង​អស់​ហ្នឹង​។ ប៉ុន្តែ​អ្នក​ដែល​មាន​សិទ្ធិ​សម្រេច​តាម​ការ​ស្នើ​សុំ​គឺ​រដ្ឋាភិបាល​ ក្នុង​ការ​សម្រេច​ថា​តើ​ធ្វើ​វិសោធនកម្ម​ ឬ​និរាករណ៍​ស្អី គឺ​ជា​ការ​ស្នើ​សុំ​របស់​រដ្ឋាភិបាល​ ហើយ​រដ្ឋសភា​ជា​អ្នក​អនុម័ត​។​ ប៉ុន្តែ​ អង្គការ​សង្គម​ស៊ីវិល​អ្នក​ដែល​ពាក់ព័ន្ធ​ហ្នឹង គឺ​ការ​ស្នើ​សុំ​ជា​សិទ្ធិ​សេរីភាព តែ​ការ​ស្នើ​សុំ​ហើយ​ការ​អនុវត្ត​យ៉ាង​ណា​នោះ គឺ​អាស្រ័យ​ទៅ​លើ​អ្នក​ដែល​ពាក់​ព័ន្ធ​នោះ​ហើយ​បាទ»

សេចក្ដីថ្លែងការណ៍​របស់​ក្រុម​បណ្ដាញ​អង្គការ​ទាំង ១០០ ក៏​បាន​​មើល​ឃើញ​ផង​ដែរ​ថា ការ​បន្ត​រក្សា​ទុក​ច្បាប់​នេះ​ឱ្យ​នៅ​ដដែល ឬ​ការ​ធ្វើ​វិសោធនកម្ម ដោយ​មិន​បាន​កែប្រែ​ឱ្យ​បាន​ត្រឹមត្រូវ​នោះ​ការ​អនុវត្ត​ច្បាប់​នេះ​នឹង​មិន​ត្រឹម​តែ​ធ្វើ​ឱ្យ​ប៉ះ​ពាល់​ដល់​អង្គការ​មិន​មែន​រដ្ឋាភិបាល​ប៉ុណ្ណោះ​ទេ គឺ​ថែមទាំង​ប៉ះ​ពាល់​ដល់​សមាគម និង​ក្រុម​សហគមន៍​មូលដ្ឋាន​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល