មន្ត្រីសង្គមស៊ីវិល និងអ្នកជំនាញច្បាប់ គាំទ្រចំពោះវិធានការរបស់ឧត្តមក្រុមប្រឹក្សានៃអង្គចៅក្រម ដែលតម្រូវឲ្យចៅក្រម និងព្រះរាជអាជ្ញា ត្រូវដាក់ពាក្យស្នើសុំផ្ដាច់ពីមុខងារជាចៅក្រម ឬព្រះរាជអាជ្ញា ប្រសិនបើជាប់បំពេញមុខងារសាធារណៈផ្សេងទៀត។ ពួកគេយល់ថា ការរឹតបន្តឹងដូច្នេះ គឺជាចំណែកមួយធ្វើឲ្យចៅក្រម ឬព្រះរាជអាជ្ញាអាចបំពេញតួនាទីដោយឯករាជ្យ និងទុកឱកាសការងារសម្រាប់យុវជនជំនាន់ក្រោយ។
ប្រធានក្រុមអ្នកច្បាប់ អមរិន្ទ លោក សុក សំអឿន មានប្រសាសន៍ថា ការតម្រូវឲ្យចៅក្រម ឬព្រះរាជអាជ្ញា មិនអាចបំពេញមុខងារសាធារណៈពីរក្នុងពេលតែមួយ គឺមានចែងក្នុងច្បាប់ជាយូរមកហើយ ប៉ុន្តែលោក ភ្ញាក់ផ្អើលដែលឧត្ដមក្រុមប្រឹក្សានៃអង្គចៅក្រម ទើបចាប់អនុវត្តន៍ច្បាប់នៅពេលនេះទៅវិញ។ អ្នកជំនាញច្បាប់រូបនេះ យល់ថា ការដែលចៅក្រម ឬព្រះរាជអាជ្ញា កំពុងបំពេញវិជ្ជាជីវៈ របស់ខ្លួន ប៉ុន្តែបែរជាជាប់រវល់បំពេញមុខងារសាធារណៈផ្សេងទៀត ដូចជាមុខងារជាតំណាងរាស្ត្រ សមាជិកព្រឹទ្ធសភា សមាជិករដ្ឋាភិបាល ឬក៏ធ្វើជាទីប្រឹក្សារបស់អ្នកធំណាម្នាក់ គឺនាំឲ្យបាត់បង់នូវ អព្យាក្រិត្យ និងឯករាជភាពរបស់ខ្លួនក្នុងការផ្តល់យុត្តិធម៌៖ « ទៅធ្វើទីប្រឹក្សាឲ្យអ្នកធំណាមួយ ក៏អត់បានដែរ ព្រោះយើងជាចៅក្រម ឬព្រះរាជអាជ្ញា គឺយើងត្រូវតែឯករាជ្យ ។ ព្រះរាជអាជ្ញាអាចលើកលែងប៉ុន្តែក្នុងច្បាប់រដ្ឋធម្មនុញ្ញយើងគឺចាត់ទុកដូចចៅក្រមដែរ ដូច្នេះហើយបើនៅស្រុកគេ ព្រះរាជអាជ្ញា គឺជាមេធាវីទេ។ ដូច្នេះហើយត្រូវតែរក្សាឯករាជភាពរបស់ខ្លួនឲ្យច្បាស់ » ។
ការលើកឡើងនេះ បន្ទាប់ពីឧត្ដមក្រុមប្រឹក្សានៃអង្គចៅក្រម ចេញសេចក្ដីជូនដំណឹងមួយច្បាប់ចុះថ្ងៃទី១៥ ខែកញ្ញា បង្ហាញថា យោងតាមច្បាប់ស្តីលក្ខន្តិកៈនៃចៅក្រម និងព្រះរាជអាជ្ញា ត្រង់មាត្រា ៤៤ និងមាត្រា១០៦ គឺចៅក្រម ឬព្រះរាជអាជ្ញាទាំងអស់ មានវិសមត្ថភាព ឬមិនអាចបំពេញមុខងារសាធារណៈផ្សេង ដូចជាមុខងារតំណាងរាស្ត្រ សមាជិកព្រឹទ្ធសភា សមាជិករដ្ឋាភិបាល អនុរដ្ឋលេខាធិការ មុខងារទទួលអាណត្តិដោយការបោះឆ្នោតដទៃទៀត ឬមុខងារជាទីប្រឹក្សាគ្រប់ឋានានុក្រម ។ សេចក្ដីជូនដំណឹងដដែល បញ្ជាក់ថា ប្រសិនបើចៅក្រម ឬព្រះរាជអាជ្ញា មានជាប់ពាក់ព័ន្ធនឹងមុខ ងារទាំងនេះ ហើយមានបំណងចង់នៅបំពេញមុខងារណាមួយ ត្រូវដាក់ពាក្យសុំផ្ដាច់ពីមុខងារជាចៅក្រម ឬព្រះរាជអាជ្ញា ឲ្យបានយ៉ាងយូរត្រឹមដំណាច់ឆ្នាំ២០២០ បើពុំនោះទេ ឧត្ដមក្រុមប្រឹក្សានៃអង្គចៅក្រម នឹងពិនិត្យចាត់ការតាមនីតិវិធីច្បាប់។
អាស៊ីសេរីមិនអាចសុំការអត្ថាធិប្បាយបន្ថែមពីអគ្គលេខាធិការឧត្ដមក្រុមប្រឹក្សានៃអង្គចៅក្រម លោក សំ ប្រជាមានិត បានទេ នៅថ្ងៃទី២០ ខែកញ្ញា ដោយទូរស័ព្ទចូលពុំមានអ្នកទទួល។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត មានប្រសាសន៍ថា សេចក្តីជូនដំណឹងរបស់ឧត្តមក្រុមប្រឹក្សានៃអង្គចៅក្រមនេះ គឺជារឿងត្រឹមត្រូវ ព្រោះចៅក្រម និងព្រះរាជអាជ្ញា មិនអាចបំពេញកិច្ចការរដ្ឋ ឬការងារសាធារណៈពីរក្នុងពេលតែមួយបាននោះទេ។ លោកពិនិត្យឃើញថា មានចៅក្រមឬព្រះរាជអាជ្ញាច្រើន មានតួនាទីនៅក្នុងគណបក្សកាន់អំណាច ដែល ធ្វើឲ្យសាធារណជនរិះគន់អំពីឯករាជភាពរបស់ពួកគេក្នុងការអនុវត្តច្បាប់៖ « វិសមត្ថភាព គឺទាល់តែមានតួនាទីពីរនៅក្នុងរាជរដ្ឋាភិបាល ប៉ុន្តែបើសិនជាមន្ត្រីមានមុខងារ និងតួនាទី ជាមន្ត្រីជាន់ខ្ពស់របស់គណបក្ស គឺអត់មានវិសមត្ថភាពទេ ប៉ុន្តែ មានការរិះគន់កន្លងមកថា វាគួរតែមានការចែកឲ្យដាច់ កុំឲ្យមានការធ្វើតួនាទីក្នុងនយោបាយ ដើម្បីឲ្យតួនាទីរបស់ចៅក្រម ឬព្រះរាជអាជ្ញា មានឯករាជភាពក្នុងពេលបំពេញការងាររបស់ខ្លួន » ។
ក្រៅពីមានបញ្ហាវិសមត្ថភាពការងារនោះ កន្លងមក គេសង្កេតឃើញថា ចៅក្រមនិងព្រះរាជអាជ្ញាដែលមានអាយុលើស ៦០ឆ្នាំ មិនព្រមចូលនិវត្តន៍តាមច្បាប់កំណត់នោះទេ ពោលគឺ នៅបន្តការងារ និង ត្រូវបានដំឡើងឋានៈថែមទៀតផង។ ចៅក្រម និងព្រះរាជអាជ្ញាទាំងនោះ ភាគច្រើនសុទ្ធសឹងតែជាសមាជិកកំពូលៗ របស់គណបក្សប្រជាជនកម្ពុជា និងមានស្នាដៃជាច្រើនជួយគណបក្សប្រជាកម្ពុជា ឲ្យបន្តរក្សាអំណាច តាមរយៈកម្ទេចគណបក្ស និងអ្នកនយោបាយប្រឆាំង ដោយប្រើប្រាស់ច្បាប់ជាឧបករណ៍។ ករណីទាំងនោះ បានធ្វើឲ្យប្រទេសកម្ពុជា មានកេរ្តិ៍ឈ្មោះអសោចខាងការ មិនគោរពសិទ្ធិមនុស្ស និងរំលោភប្រព័ន្ធនីតិរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។