មន្ត្រីសង្គមស៊ីវិលស្នើឱ្យអាជ្ញាធររឹតបន្តឹង ចំពោះការផ្ដល់ឯកសារ ដែលទាក់ទងនឹងការចូលមករស់នៅ ឬប្រកបរបររបស់ជនជាតិចិន ចៀសវាងការលិខិតស្នាមទាំងនោះទាំងខុសច្បាប់។
អ្នកសម្របសម្រួលនៃអង្គការអាដហុក (Adhoc) ប្រចាំខេត្តស្វាយរៀង និងព្រៃវែង អ្នកស្រី អ៊ាង គឹកលី បានឱ្យអាស៊ីសេរីដឹងកាលពីថ្ងៃទី៥ ខែកុម្ភៈ ថា អាជ្ញាធរពិតជាមានសមត្ថភាពគ្រប់គ្រាន់ ក្នុងការពិនិត្យមើលឯកសារ សម្រាប់ជនបរទេស មកធ្វើការនៅកម្ពុជា ដោយស្របច្បាប់៖ «ចិននៅព្រំដែន ឆ្ងាយពីខ្មែរយើង។ ប្រសិន វៀតណាម យើងធ្លាប់ ឮព័ត៌មានថា ចូលមកទឹកដីខ្មែរយើងដោយ គ្មានលិខិតឆ្លងដែន ឬឯកសារ គាត់ឆ្លងដែនមកដោយខុសច្បាប់។ តែករណីនេះខ្ញុំចង់សំណូមពរ ឱ្យអាជ្ញាធរគាត់រឹតបន្តឹង បើសិនជាពួកគាត់ចូលមកដោយគ្មានឯកសារ តើពួកគាត់ចូលមក ចូលមកក្នុងគោលបំណងអ្វី មកជាកម្មករ ឬកម្មសិក្សា។ ប្រសិនជាយើងអត់មានច្បាស់លាស់អ៊ីចឹង ធ្វើឱ្យប្រជាពលរដ្ឋយើងអាចមានបញ្ហា ព្រោះកន្លងមកយើងឃើញហើយថា ជនជាតិចិនមួយចំនួននឹងប្រើអំពើហិង្សាតាមសាធារណៈ បង្កឱ្យមានភាពអសន្តិសុខសង្គម»។
ការលើកឡើងរបស់មន្ដ្រីសង្គមស៊ីវិលបែបនេះ ដោយសារតែសារព័ត៌មានក្នុងស្រុក ចុះផ្សាយអំពីក្រុមការងារចម្រុះអធិការកិច្ចហត្ថពលកម្មបរទេស នៃអគ្គនាយកដ្ឋានអន្តោប្រវេសន៍ ដែលចុះធ្វើអធិការកិច្ចចាប់ពីថ្ងៃទី២៤ ខែតុលា ដល់ ២៧ ខែធ្នូ ឆ្នាំ២០១៨ កន្លងទៅ រកឃើញថា ជនជាតិចិនជាង ១ពាន់ ៨រយនាក់ (១.៨០៨) នាក់មកធ្វើការងារ នៅកម្ពុជា ដោយគ្មានប័ណ្ណការងារ ក្នុងចំណោមជនជាតិចិនសរុបប្រមាណ ៧ពាន់ ៦រយនាក់ (៧.៦០៩នាក់)។ ជនជាតិចិនទាំងនេះ ធ្វើការនៅកាស៊ីណូ ១២កន្លែង នៅទីក្រុងបាវិត ខេត្តស្វាយរៀង។
អ្នកស្រី អ៊ាង គឹមលី បន្ថែមថា ពលរដ្ឋធ្លាប់មានកង្វល់ពីការហូរចូលដ៏ច្រើនសន្ធឹករបស់ជនជាតិចិន បែបនេះ។ អ្នកស្រីយល់ថា ពលរដ្ឋដែលរស់នៅតំបន់នោះ អាចនឹងប្រឈមនឹងការផ្លាស់ប្ដូរទីលំនៅ ដោយសារការហូរចូលរបស់ជនជាតិចិនទាំងនោះ៖ «កន្លងមក ប្រជាពលរដ្ឋ ខ្វាយខ្វល់ នឹងការហូរចូលនៃពលរដ្ឋចិន។ ធម្មតាដីឡើងថ្លៃ ជនជាតិចិនគាត់ហ៊ានទិញដីពីពលរដ្ឋខ្មែរយើងថ្លៃៗ ហើយពលរដ្ឋខ្មែរយើងអាចនឹងលក់ដីហ្នឹង ព្រោះគាត់ឃើញថា ដីនឹងថ្លៃ គាត់លក់បានលុយច្រើន គាត់យកទៅចាយ សប្បាយ ប៉ុន្តែ ជីវិតចុងក្រោយរបស់គាត់ គាត់អាចក្លាយជាកម្មករ របស់ជនជាតិចិនវិញ ឬតំបន់ហ្នឹង អាចក្លាយជាតំបន់របស់ចិន ដែលចិនគ្រប់គ្រងដែលខ្មែរមិនអាចរស់នៅបាន សូម្បីតែផ្ទះជួល ឥវ៉ាន់ស្អីៗក៏ថ្លៃ អ៊ីចឹងធ្វើឱ្យគាត់មានបញ្ហាហ្នឹងនៅថ្ងៃក្រោយ»។
របាយការណ៍របស់ក្រសួងមហាផ្ទៃឱ្យដឹងថា ជនជាតិចិន ដែលបានចូលមកស្នាក់នៅក្នុងប្រទេសកម្ពុជា មានដល់ទៅជាងម្ភៃមួយម៉ឺននាក់ ហើយក្នុងនេះ មានតែជាងពីរម៉ឺននាក់ប៉ុណ្ណោះ ដែលមានប័ណ្ណការងារត្រឹមត្រូវ។ ក្នុងរយៈពេលប៉ុន្មានឆ្នាំចុងក្រោយនេះ ការហូរចូលរបស់ជនជាតិចិន មកប្រទេសកម្ពុជា មានភាពគំហុក ដែលបង្កជាការព្រួយបារម្ភ ដល់ពលរដ្ឋខ្មែរទូទៅ និងមន្ត្រីអង្គការសង្គមស៊ីវិល ទាំងផ្នែកសន្តិសុខ និងសង្គម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។