មន្ត្រី​សិទ្ធិមនុស្ស​ថា ​សំណុំរឿង​​អ្នក កែម ឡី និយម មាន​សម្ពាធ​​នយោបាយ​ពី​ក្រោយ​ខ្នង

ដោយ ហេង រស្មី
2019-07-24
អ៊ីម៉ែល
មតិ
Share
បោះពុម្ព
នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត ចូលរួម​វេទិកាវិទ្យុ​អាស៊ីសេរី។
នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ (LICADHO) លោក អំ សំអាត ចូលរួម​វេទិកាវិទ្យុ​អាស៊ីសេរី។
RFA

មន្ត្រី​ឃ្លាំមើល​ផ្នែក​សិទ្ធិមនុស្ស​បាន​ចោទ​ប្រកាន់​ថា សំណុំរឿង​សកម្មជន​យុវជន​ដែល​និយម​​បណ្ឌិត​កែម ឡី គឺ​លោក គង់ រ៉ៃយ៉ា និង លោក សួង នាគព័ន្ធ ជាប់​ពាក់​នឹង​រឿង​នយោបាយ​ជាជាង​អនុវត្ត​នីតិវិធី​ច្បាប់។ ការ​លើកឡើង​នេះ​បន្ទាប់​ពី​តុលាការ​របប​ក្រុងភ្នំពេញ​បាន​បដិសេធ​សំណើ​ស្នើសុំ​របស់​មេធាវី ដើម្បី​ឱ្យ​អ្នក​ទាំង​ពីរ​បាន​នៅ​ក្រៅ​ឃុំ​ជា​បណ្ដោះអាសន្ន​ដោយមាន​ការ​បង់​ប្រាក់​ធានា។

នាយករង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​ លីកាដូ (LICADHO) លោក អំ សំអាត​ប្រាប់​អាស៊ីសេរី​នៅ​ថ្ងៃ​ទី​២៤ កក្កដា ថា តុលាការ​ក្រុង​ភ្នំពេញ​បាន​រំលោភ​សិទ្ធិ​សេរីភាព​ទៅលើ​ជនជាប់ចោទ​គឺ​លោក គង់ រ៉ៃយ៉ា និង លោក សួង នាគព័ន្ធ ដោយសារតែ​សំណុំ​រឿង​នេះ​​មិន​មាន​បទល្មើស​ធ្ងន់ធ្ងរ​រហូតដល់​តុលាការ​បដិសេធ​សំណើ​របស់​មេធាវី ស្នើសុំ​អោយ​នៅ​ក្រៅ​ឃុំ​ចំពោះ​ករណី​អ្នក​ទាំងពីរ​នោះ​ទេ។

លោក អំ សំអាត​ចោទប្រកាន់​ចំៗ​ថា សំណុំ​រឿង​នេះ​ជាប់​ពាក់ព័ន្ធ​នឹង​រឿង​នយោបាយ​ទើប​តុលាការ​របប​ក្រុងភ្នំពេញ​ច្រានចោល​ទៅ​នឹង​សំណើ​របស់​មេធាវី៖ «ការ​មិន​អនុញ្ញាត​ឱ្យ​នៅ​ក្រៅ​ឃុំ​នេះ​វា​ប៉ះពាល់​ធ្ងន់ធ្ងរ​ទៅលើ​សិទ្ធិ​សេរីភាព​របស់​លោក គង់ រ៉ៃយ៉ា ក៏ដូចជា​លោក សួង នាគព័ន្ធ ហើយ​ធ្វើ​ឱ្យ​សាធារណមតិ និង​អន្តរជាតិ​បាន​ន័យ​ថា សហគមន៍​អន្តរជាតិ​គេ​យល់​ថា ករណី​នេះ​វា​ពាក់ព័ន្ធ​នឹង​ស្ថានភាព​នយោបាយ​ទៅ​ទៀត​ហើយ​ការ​ឃុំខ្លួន​បន្ត​នេះ វា​អាច​អត់​មាន​អី​ចំណេញ​ទេ​ផ្ទុយទៅវិញ​វា​ខាតបង់»

ការ​លើកឡើង​របស់​លោក អំ សំអាត បាន​កើត​មាន​ឡើង​ក្រោយពី​ចៅក្រម​ស៊ើបសួរ​សាលាដំបូង​រាជធានី​ភ្នំពេញ ឯក ប៉ូលីហ្វីល នៅ​ថ្ងៃ​ទី​២៤ កក្កដា​នេះ​បាន​បដិសេធ​សំណើសុំ​នៅ​ក្រៅ​ឃុំ​របស់​មេធាវី សំ សុគង់ ដោយ​មិន​អនុញ្ញាត​ឱ្យ​លោក គង់ រ៉ៃយ៉ា និង លោក សួង នាគព័ន្ធ បាន​នៅ​ក្រៅ​ឃុំ​បណ្ដោះអាសន្ន​ឡើយ។

លោក​ចៅក្រម​ស៊ើបអង្កេត​នៃ​តុលាការ​ក្រុង​ភ្នំពេញ​លោក ឯក ប៉ូលីហ្វីល បាន​លើក​យក​ហេតុផល​ថា ចៅក្រម​ស៊ើបសួរ​មិនទាន់​បាន​សាកសួរ​ជន​ជាប់​ពាក់ព័ន្ធ​នឹង​សំណុំរឿង​ព្រហ្មទណ្ឌ​នេះ ចប់​សព្វគ្រប់​នៅ​ឡើយ​។ ដូច្នេះ​ដើម្បី​បញ្ចប់​បទល្មើស ឬ​បង្ការ​បទ​ល្មើស​​កុំ​​ឱ្យ​​កើត​ឡើង​​សា​ជា​ថ្មី ឬ​កុំ​ឱ្យ​មានការ​គាប​សង្កត់​លើ​សាក្សី និង​អ្នកសមគំនិត ក៏ដូចជា​ដើម្បី​រក្សា​ជន​ត្រូវ​ចោទ​ទុក​ជូន​តុលាការ​ចាត់ការ​តាម​នីតិវិធី មិន​គប្បី​ដោះលែង​ជន​ត្រូវ​ចោទ​នោះ ឱ្យ​នៅ​ក្រៅ​ឃុំ​តាម​ការ​ស្នើសុំ​ឡើយ។

តុលាការ​ក្រុង​ភ្នំពេញ​បាន​ចោទប្រកាន់​លោក គង់ រ៉ៃយ៉ា និង លោក សួង នាគព័ន្ធ ដូចៗ ​គ្នា​ពី​បទ ​«​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍» តាម​បញ្ញត្តិ​មាត្រា​៤៩៤ និង​មាត្រា​៤៩៥ នៃ​ក្រម​ព្រហ្មទណ្ឌ​ ដែល​បទ​ចោទ​នេះ​តុលាការ​សំអាង​ថា ជនសង្ស័យ​ទាំងពីរ​អាច​បង្ក​ឱ្យ​ប៉ះពាល់​ដល់​របៀបរៀបរយ​សណ្ដាប់ធ្នាប់​សាធារណៈ និង​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម។

មេធាវី​ការពារ​ក្តី សំ សុគង់ នៅ​ថ្ងៃ​ទី​២៤ កក្កដា​នេះ មិន​អាច​ទាក់​ទង់​សុំ​សេចក្ដី​អត្ថាធិប្បាយ​បំភ្លឺ​បានទេ។ ក៏ប៉ុន្តែ​កាលពី​ថ្ងៃ​ទី​២៣ កក្កដា លោក​ប្រាប់​អាស៊ីសេរី​ថា ការ​បន្ត​ឃុំខ្លួន​កូន​ក្តី​របស់​លោក​នេះ​គឺជា​ការរំលោភ​សិទ្ធិ​របស់​ជន​ជាប់ចោទ ដោយសារតែ​ពួកគេ​គ្រាន់តែ​ចូលរួម​សកម្មភាព​សង្គម​តែប៉ុណ្ណោះ មិន​ប៉ះពាល់​ដល់​សណ្ដាប់ធ្នាប់​សាធារណៈ​ទេ៖ «ការ​ឃុំខ្លួន​អ្នក​ទាំងពីរ​នាក់​ហ្នឹង​គឺ​មិន​មាន​ផលប្រយោជន៍​អ្វី​ដល់​ការ​ឃុំខ្លួន​ទេ​បើសិនជា​តុលាការ​យល់​ឃើញ​ថា ដើម្បី​អនាគត​និង​ដើម្បី​ជួយ​ឱ​ពួកគាត់​មាន​អនាគត​សម្រាប់​ពួកគាត់​ទាំងអស់​ហ្នឹង»

អាជ្ញាធរ​របប​ក្រុងភ្នំពេញ​បាន​ចាប់ខ្លួន​យុវជន​គង់ រ៉ៃយ៉ា និង លោក សួង នាគព័ន្ធ ដាច់​ដោយឡែកៗ​ ពី​គ្នា​កាលពី​ថ្ងៃ​ទី​១០ ​ខែ​កក្កដា​កន្លង​ទៅ​នេះ ក្នុង​ខណៈ​ដែល​ពួកគេ​បាន​ចូលរួម​គោរព​វិញ្ញាណក្ខន្ធ​​គម្រប់​ខួប ៣​ឆ្នាំ នៃ​ការ​បាញ់​សម្លាប់​លោក​បណ្ឌិត កែម ឡី នៅ​ស្ថានីយ​ប្រេងសាំង​កាល់​តិច​ជិត​ស្តុប​បូកគោ​ក្រុងភ្នំពេញ​។ លោក យុវជន គង់ រ៉ៃយ៉ា ត្រូវ​បាន​ចាប់ខ្លួន​បន្ទាប់ពី​លោក​បាន​ប្រកាស​លក់​អាវ​យឺត​ដែល​សារ​សរសេរ​នូវ​ទស្សនៈ​របស់​លោក បណ្ឌិត កែម ឡី ថា “​បើ​អ្នក​មិន​ធ្វើ​អ្វី​សោះ ក៏​គង់​នឹង​រង​គ្រោះ​ដែរ គ្រាន់តែ​មិនទាន់​ដល់​វេន​អ្នក​ប៉ុណ្ណោះ”៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល