យុវជន កែម ឡី និយម គង់ រ៉ៃយ៉ា ស្នើសុំ​ឲ្យ​តុលាការ​ក្រុង​ភ្នំពេញ ទម្លាក់​ចោល​ការ​ចោទ​ប្រកាន់

ដោយ ខែ សុណង
2020-05-08
អ៊ីម៉ែល
មតិ
Share
បោះពុម្ព
សកម្មជន​គណបក្សសង្គ្រោះជាតិ លោក គង់ រ៉ៃយ៉ា។
សកម្មជន​គណបក្សសង្គ្រោះជាតិ លោក គង់ រ៉ៃយ៉ា។
បណ្ដាញ​សង្គម​ហ្វេសប៊ុក

យុវជន គង់ រ៉ៃយ៉ា ស្នើ​សុំ​ឲ្យ​តុលាការ​ក្រុងភ្នំពេញ​ទម្លាក់​ចោល​ការ​ចោទ​ប្រកាន់​ទាំង​ស្រុង ដោយ​លោក​អះអាង​ថា សកម្មភាព​លក់​អាវយឺត​មាន​រូប និង​ទស្សនៈ​បណ្ឌិត កែម ឡី មិន​មែន​ជា​អំពើ​ខុសច្បាប់​នោះ​ទេ។ ការ​ស្នើសុំ​នេះ ខណៈ​តុលាការ​ក្រុង​ភ្នំពេញ គ្រោង​បើក​សវនាការ​ជំនុំ ជម្រះ​សំណុំរឿង​យុវជន កែម ឡីនិយម រូប​នេះ នៅ​ថ្ងៃ​ទី២០ ខែ​ឧសភា​ខាង​មុខ​នេះ។

យុវជន កែម ឡី និយម លោក​ គង់ រ៉ៃយ៉ា ស្វាគមន៍​ដែល​តុលាការ​ក្រុង​ភ្នំពេញ បញ្ជូន​សំណុំ​រឿង របស់​លោក​ទៅ​ជំនុំជម្រះ​ឡើង​វិញ បន្ទាប់​ពី​ប្រកាស​លើក​ពេល​កាល​ពី​ចុង​ឆ្នាំ២០១៩ ប៉ុន្តែ​លោក ស្នើសុំ​ឲ្យ​តុលាការ​ទម្លាក់​ចោល​ការ​ចោទ​ប្រកាន់​ ដើម្បី​ឲ្យ​លោក​មាន​សិទ្ធិ​សេរីភាព​ពេញលេញ ដូច ពលរដ្ឋ​ទូទៅ។ លោក​ចាត់​ទុក​ការ​ចាប់​ខ្លួន និង​ចោទ​ប្រកាន់​រូប​លោក​កន្លងមក​ថា ជា​អំពើ​ព្រៃផ្សៃ និង​អយុត្តិធម៌​បំផុត ព្រោះ​លោក​គ្រាន់​តែ​លក់​អាវ​យឺត ដែល​មាន​រូប និង​ទស្សនៈ​បណ្ឌិត កែម ឡី ដូច​ពលរដ្ឋ​មួយ​ចំនួន​ទៀត​ប៉ុណ្ណោះ៖ «ខ្ញុំ​យល់​ឃើញ​ថា ការ​ចោទ​ប្រកាន់​របស់​តុលាការ គឺ​ធ្ងន់ធ្ងរ​ហួស​ហេតុ​ខ្លាំង​មែនទែន ដោយសារ​តែ​ខ្ញុំ​បាន​លក់​អាវ​បណ្ឌិត កែម ឡី នេះ ជាង ២ឆ្នាំ​ហើយ មិន​ទាន់​មាន ជា​ព្យសនកម្ម​ណា​មួយ ដែល​ប៉ះពាល់​ដល់​សង្គម​នោះ​ទេ ហើយ​ពលរដ្ឋ​នៅ​តែ​ពាក់អាវ​បណ្ឌិត កែម ឡី ហើយ​ពួក​គាត់​មិន​ដែល​បញ្ចេញ​ទង្វើ​ណា​មួយ ដែល​ធ្វើ​ឲ្យ​ប៉ះ​ពាល់​សង្គម​តាម​រយៈ ទស្សនៈ​បណ្ឌិត កែម ឡី ដែរ។ ខ្ញុំ​យល់​ឃើញ​ថា ចាប់​ខ្លួន​ខ្ញុំ និង​ការ​ដាក់​បទ​ចោទ​ដ៏​ធ្ងន់ធ្ងរ​បែប​នេះ គ្រាន់​តែ​ជា​ការ​បំបិទ​សិទ្ធិ​សេរីភាព​បញ្ចេញ​មតិ​នៅ​កម្ពុជា និង​ចង់​គំរាម​យុវជន ដែល​គាត់​ហ៊ាន រិះគន់​បញ្ហា​សង្គម ក៏​ដូចជា ភាព​កម្សោយ​នៃ​ការ​ដឹក​នាំ​របស់​រដ្ឋាភិបាល។»

ព្រះរាជអាជ្ញា​រង​អម​សាលាដំបូង​រាជធានី​ភ្នំពេញ លោក សំម ឬទ្ធីវាសនា បាន​ចេញដីកា អញ្ជើញ​មេធាវី​ការពារ​ក្តី​ឲ្យ​យុវជន គង់ រ៉ៃយ៉ា ចូលរួម​សវនាការ​នៅ​ថ្ងៃ​ទី២០ ខែឧសភា ពាក់ព័ន្ធ​នឹង​ដំណើរ​រឿង​ញុះញង់​ឲ្យ​ប្រព្រឹត្ត​អំពើ​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សង្គម និង​ករណី​មិន​រាងចាល​ក្នុង​បទ​មជ្ឈិម ដែល​ប្រព្រឹត្ត កាល​ពី​ថ្ងៃ​ទី៩ ខែកក្កដា ឆ្នាំ២០១៩។

លោក គង់ រ៉ៃយ៉ា អាយុ ២៨ឆ្នាំ ឲ្យដឹង​ថា លោក​មិន​ទាន់​ឃើញ​ដីកា​កោះ​ហៅ​លោក​ចូលរួម​សវនាការ​នៅ​ឡើយ​ទេ ហើយ​លោក ក៏​នឹង​មិន​ទៅ​ចូលរួម​ការ​កាត់​ក្តី​នេះ​ដែរ ដោយសារ​បច្ចុប្បន្ន លោក កំពុង​រស់នៅ​ភៀស​ខ្លួន​នៅ​ក្រៅ​ប្រទេស។ ទោះ​ជា​យ៉ាង​ណា យុវជន​រូប​នេះ​អះអាង​ថា លោក​បាន​ជជែក និង​បាន​ប្រគល់​សិទ្ធិ​ជូន​មេធាវី​ការពារ​ក្តី​របស់​លោក​រួច​ហើយ។

អ្នក​នាំ​ពាក្យ​សមាគម​ការពារ​សិទ្ធិ​មនុស្ស​អាដហុក (ADHOC) លោក ស៊ឹង សែនករុណា មាន​ប្រសាសន៍​ថា សកម្មភាព​លក់​អាវ​យឺត​ដែល​មាន​រូប និង​ទស្សនៈ​បណ្ឌិត កែម ឡី គឺ​ជា​សិទ្ធិ​សេរីភាព មិន​មែន​ជា​អំពើ​ខុស​ច្បាប់​នោះ​ទេ។ លោក​យល់​ថា តុលាការ គួរ​តែ​ពិចារណា​ទម្លាក់​ចោល​ការ​ចោទ​ប្រកាន់​មិន​សម​ទំនង​លើ​លោក គង់ រៃយ៉ា ដើម្បី​ឲ្យ​រូប​គេ​មាន​សិទ្ធិ​សេរីភាព​ពេញលេញ​ឡើង​វិញ ព្រោះ លោក​ពិនិត្យ​ឃើញ​ថា ការ​ចាប់​ខ្លួន និង​ចោទ ប្រកាន់​កន្លង​មក គ្មាន​មូលដ្ឋាន​គ្រប់គ្រាន់​នោះ​ឡើយ៖ «តុលាការ​គួរ​តែ​ពិចារណា​ទម្លាក់​បទ​ចោទ​នេះ​ចោល ព្រោះ​ថា ការ​ចាត់​ការ​ទៅ​លើ​ករណី​នេះ​វា​នាំ​ឲ្យ​ប៉ះ​ពាល់​មុខ​មាត់​របស់​សមត្ថកិច្ច​កម្ពុជា និង​តុលាការ​ដែរ ព្រោះ​រឿង​នេះ​មិន​ស័ក្ដិសម​នឹង​ចាត់​វិធានការ​ផ្លូវ​ច្បាប់​រហូត​ដល់​មាន​ការ​ឃុំ​ខ្លួន​នោះ​ទេ»

ទាក់ទង​នឹង​ករណី​នេះ អាស៊ី​សេរី​មិន​អាច​សុំ​ការ​ឆ្លើយ​តប​ពី​អ្នក​នាំ​ពាក្យ​សាលា​ដំបូង​រាជ​ធានី​ភ្នំពេញ លោក អ៊ី រិន្ទ បានទេ ដោយ​ទូរស័ព្ទ​ចូល​ពុំ​មាន​អ្នក​ទទួល។

សមត្ថកិច្ច​​ក្រុងភ្នំពេញ​ បាន​ចាប់ខ្លួន​លោក​ គង់​ រ៉ៃ​យ៉ា​ ជា​លើក​ទី២ កាលពី​ថ្ងៃ​ទី៩ ខែកក្កដា ក្នុង​ផ្ទះ​ជួល​របស់​គាត់​ ជាមួយ​កូន​តូច​អាយុ ៦ខែ និង​ភរិយា​ ព្រមទាំង​បងប្អូន​បង្កើត ២នាក់​ទៀត បន្ទាប់ពី​រូប​គេ​បាន​ផ្សព្វផ្សាយ​លក់​អាវយឺត​មាន​រូប​ និង​ទស្សនៈ​បណ្ឌិត ​កែម​ ឡី​ នៅ​លើ​បណ្ដាញ​សង្គម​ហ្វេ​សប៊ុក (Facebook) សម្រាប់​ខួប​បី​ឆ្នាំ​នៃ​អំពើ​ឃាតកម្ម​លើ​បណ្ឌិត កែម ឡី។ សមាជិក​គ្រួសារ​ របស់​លោក​ គង់ រ៉ៃយ៉ា ត្រូវ​បាន​ដោះលែង​វិញ​នៅ​ថ្ងៃ​បន្ទាប់​ ក្រោយ​ត្រូវ​បង្ខំ​ឲ្យ​ស៊ីញេ​លើ​ក្រ​ដាស់​ សន្យា​ឈប់​រំលោភច្បាប់​។ តុលាការ​ ចោទប្រកាន់​លោក​ គង់​ រ៉ៃ​យ៉ា​ និង​បាន​ឃុំ​ខ្លួន​លោក ក្នុង​ពន្ធនាគារ​ជាង ៤​ខែ ទើប​ដោះលែង​ឲ្យ​នៅ​ក្រៅ​ឃុំ​បណ្ដោះអាសន្ន​វិញ កាល​ពី​ថ្ងៃ​ទី២៩ ខែ​វិច្ឆិកា ឆ្នាំ២០១៩ បន្ទាប់​ពី​លោក នាយករដ្ឋមន្ត្រី ហ៊ុន សែន បញ្ជា​ឲ្យ​ដោះ​លែង​អ្នក​ជាប់​ឃុំ ពាក់​ព័ន្ធ​នឹង​រឿង​នយោបាយ​ទាំងអស់ ស្រប​ពេល​សហភាព​អឺរ៉ុប​ពេល​នោះ កំពុង​បន្ត​នីតិវិធី​ដក​ប្រព័ន្ធ​អនុ​គ្រោះពន្ធ EBA ពី​កម្ពុជា។

អង្គការសហប្រជាជាតិ សហរដ្ឋអាមេរិក និង​អង្គការ​សង្គម​ស៊ីវិល​ជាតិ និង​អន្តរជាតិ បាន​ចេញ​សេចក្ដី​ថ្លែងការណ៍​ថ្កោលទោស​ជា​បន្ត​បន្ទាប់​ថា ចំណាត់​ការ​របស់​អាជ្ញាធរ​ក្រុង​ភ្នំពេញ​លើ យុវជន គង់​ រ៉ៃយ៉ា គឺ​មាន​គោលដៅ​ធ្វើ​ទុក្ខ​បុក​ម្នេញ​អ្នក​ដែល​ហ៊ាន​បញ្ចេញ​មតិ និង​ការ​ជួប​ប្រជុំ​គ្នា​ដោយ​សន្តិវិធី​។ ពួកគេ អំពាវនាវ​ឱ្យ​អាជ្ញាធរ​រដ្ឋាភិបាល ទម្លាក់​ចោល​ការ​ចោទ​ប្រកាន់​លើ​លោក គង់ រ៉ៃយ៉ា និង​បញ្ឈប់​ការ​រឹតត្បិត​សិទ្ធិ​សេរីភាព​ប្រជាពលរដ្ឋ​ដូច្នេះ​តទៅទៀត៕

ព័ត៌មាន (0)
Share
គេហទំព័រ​ទាំងមូល