សង្គម​ស៊ីវិល និង​សហជីព​ឯករាជ្យ​ដាក់​ញត្តិ​ឱ្យ​ក្រសួង​មហាផ្ទៃ​​ឈប់​ការ​ស្រង់​ស្ថិតិ​បុគ្គលិក​ពី​សំណាក់​នគរបាល

ដោយ ខែ សុណង
2020-10-06
អ៊ីម៉ែល
មតិ
Share
បោះពុម្ព
អ្នកស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា
អ្នកស្រី យ៉ាង សោភ័ណ្ឌ ប្រធាន​សម្ព័ន្ធ​សហជីព​កម្ពុជា
ហ្វេសប៊ុក

តំណាង​សមាគម​ ​និង​អង្គការ​មិនមែន​រដ្ឋាភិបាល​ ​រួម​ទាំង​សហជីព​ឯករាជ្យ​ ​៦​ស្ថាប័ន​ ​បាន​ដាក់​ញត្តិ​ស្នើសុំ​ឱ្យ​ក្រសួងមហាផ្ទៃ​ ​លោក​ ​ស​ ​ខេង​ ​អន្តរាគមន៍​ទៅ​នគរបាល​ ​ខណ្ឌ​មានជ័យ​ ឱ្យ​បញ្ឈប់​ការ​ស្រង់​ស្ថិតិ​បុគ្គលិក​ ​ដែល​កំពុង​បម្រើ​ការងារ​ក្នុង​ស្ថាប័ន​របស់​ខ្លួន​។​ ​ក្រុម​អង្គការសង្គម​ស៊ីវិល​ទាំងនេះ​ព្រួយបារម្ភ​ ​ពី​ការ​រំខាន​ ​យាយី​ពីសំណាក់​អាជ្ញាធរ​ក្រុងភ្នំពេញ​ ​ប៉ះពាល់​ភារកិច្ច​ការងារ​ ​និង​សិទ្ធិ​សេរីភាព​របស់​ពួកគេ។

ក្រុម​អង្គការ​សង្គម​ស៊ីវិល​ទាំង​នោះ ប្រាប់​អាស៊ី​សេរី​នៅ​ថ្ងៃ​ទី៦ ខែ​តុលា​ថា ពួក​គេ​បាន​យក​ញត្តិ​ដាក់​ជូន​រដ្ឋមន្ត្រី​ក្រសួង​មហាផ្ទៃ លោក ស ខេង រួច​ហើយ កាល​ពី​សប្ដាហ៍​មុន តែ​មក​ទល់​ពេល​នេះ មិន​ទាន់​មាន​ការ​ឆ្លើយ​តប​នៅឡើយ​ទេ។

ខ្លឹមសារ​ញត្តិ ៤ទំព័រ បាន​ស្នើ​ឱ្យ ​លោក ស ខេង បញ្ឈប់​សកម្មភាព របស់​កម្លាំង​នគរបាល​ខណ្ឌ​មានជ័យ​ ​ដែល​បាន​ចុះ​ដល់​ការិយាល័យ​របស់​ពួកគេ​​ធ្វើ​បច្ចុប្បន្នភាព​ព័ត៌មាន​លម្អិត​​ពី​អត្តសញ្ញាណ​ ​នៃ​បុគ្គលិក​ម្នាក់ៗ​ ​រួម​ទាំង​រូបថត​ ​កាលពី​ចុងខែ​កក្កដា​កន្លងទៅ។ ពួកគេ​ចាត់​ទុក​ទង្វើ​នេះ​ថា​ ​ផ្ទុយពី​ច្បាប់​ ​ស្តីពី​សមាគម​ ​និង​អង្គការ​មិនមែន​រដ្ឋាភិបាល។

ប្រធាន​សម្ព័ន្ធ​សហជីព​កម្ពុជា​ ​អ្នកស្រី យ៉ាង សោភ័ណ្ឌ ​ថ្លែង​ថា ទង្វើ​របស់​នគរបាល​ខណ្ឌ​មានជ័យ មិន​ត្រឹម​តែ​គំរាម​កំហែង និង​បំភិតបំភ័យ​ ​បុគ្គលិក និង​សហការី របស់​អ្នកស្រី​នោះ​ទេ​  ​វា​ហាក់​ដើរ​បញ្ច្រាស​​ពី​គោល​ការណ៍​ច្បាប់​របស់​​​ក្រសួង​ការងារ។ អ្នកស្រី​ថា ប្រសិនបើ​ក្រុម​នគរបាល​ទាំងនោះ​ ​ចង់​ស្រង់​ទិន្នន័យ និង​ស្ថិតិ​បុគ្គលិក គួរ​តែ​ទំនាក់ទំនង​ទៅ​ក្រសួង​ការ​ងា​វិញ​ ​ព្រោះ​ស្ថាប័ន​សហជីព​របស់​អ្នកស្រី បាន​ចុះ​បញ្ជី​ ​ឋិត​ក្រោម​ការ​គ្រប់គ្រង​របស់​​​ក្រសួង​ការងារ​ ៖​«​​ត្រូវ​ធ្វើ​តាម​បែប​បទ​បាន​ន័យ​ថា បើ​សិន​ជា​គាត់​ចង់​បានអ្វី​ផ្សេងៗ​ ​គួរតែ​គាត់​ទំនាក់ទំនង​ទៅ​ក្រសួង​ការងារ​វិញ​ ​មិន​គួរ​មានការ​ចុះ​មក​ដល់​ស្ថាប័ន​យើង ដើម្បី​សួរ​នាំ​បញ្ហា​អ្វី​ផ្សេងៗ​អ៊ីចឹង​ទេ​។​ ​វា​ហាក់​ដូច​ជា​ដើរ​អស់​សង់​តង់​គ្នា​ ​ធ្វើ​ដើម្បី​បង្ហាញ​សាធារណជន ឬក៏​បំភិតបំភ័យ​ ​បំបាក់​ស្មារតី​របស់​ពួក​យើង​ទៅ​វិញ អ្វី​ដែល​បាន​ធ្វើ​មក​កន្លងមក​នេះ»

កាល​ពី​ចុង​ខែកក្កដា​កន្លង​ទៅ​ ​អធិការ​ខណ្ឌ​មានជ័យ លោក ម៉េង វិមានតារា បាន​ជូនដំណឹង​ឲ្យ​អង្គការ​ ​សមាគម​ ​និង​សហជីព​ដែល​ធ្វើ​ការ​ដោយ​ឯករាជ្យ​ ​យ៉ាង​ហោច​ណាស់​ចំនួន​ប្រាំ​ពីរ​ស្ថាប័ន​ឲ្យ​ត្រៀម​ឯកសារ​ទាំងអស់​ ​ដើម្បី​សហការ​ជាមួយ​អាជ្ញាធរ​មូលដ្ឋាន​ ​ក្នុង​ការ​ចុះទៅ​ស្រង់​បច្ចុប្បន្នភាព​ស្ថិតិ​កម្មករ​ ​និយោជិត​ខ្មែរ និង​បរទេស និង​ត្រួតពិនិត្យ​លើ​រចនា​សម្ព័ន្ធ នៃ​សមាគម ចាប់ពី​ថ្ងៃ​ទី៣ កញ្ញា​ត​ទៅ។ ក្រោយពេល​ក្រុម​អង្គការ​សមាគម​ទាំង​នេះ​ ​បដិសេធ​មិន​សហការ​នោះ​ ​អធិការ​ខណ្ឌ​មានជ័យ​ ​បាន​ជូន​សុំ​លើក​ត្រួតពិនិត្យ​នេះ​ទៅ​ពេល​ក្រោយ​ដោយ​មិន​កំណត់ពេលវេលា​។​

អាស៊ី​សេរី​បាន​ព្យាយាម​ទាក់ទង​ ​ក្រុម​អ្នកនាំពាក្យ​ក្រសួងមហាផ្ទៃ​ ​លោក​ ​ខៀវ​ ​សុភ​គ៌ ​លោក​ ​ផា​ត​ ​សុផានិត និង​លោក ម៉ែន ប៊ុនរិទ្ធ ដើម្បី​សុំ​ការ​បំភ្លឺ​រឿង​នេះ​ ​តែ​ពួក​លោក​ ​មិន​លើក​ទូរសព្ទ​ ​និង​ខ្លះ​ចុច​ផ្ដាច់​ទូរស័ព្ទ នៅ​ថ្ងៃ​ទី៦ តុលា។

តែ​យ៉ាងណា​ ​នាយ​ផ្នែក​សន្តិសុខ​នៃ​អធិការដ្ឋាន​នគរបាល​ខណ្ឌ​មានជ័យ​ ​លោក​ ​ភិន​ ​ផល​ ​ធ្លាប់​ប្រាប់​អាស៊ី​សេរី​ថា​ ​ការ​ចុះទៅ​ស្រង់​បច្ចុប្បន្នភាព​ស្ថិតិ​បុគ្គលិក​របស់​ ​អង្គការ​ ​សមាគម​ ​ដើម្បី​ងាយស្រួល​ក្នុង​ការ​គ្រប់គ្រង​ ​ការ​ស្នាក់​នៅ​ ​និង​ការ​គ្រប់គ្រង​បុគ្គលិក​ ​ដែល​បម្រើ​ការ​ងារ​ក្នុង​ស្ថាប័ន​ទាំងនោះ​។​

នាយក​រង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​ ​នៃ​អង្គការ​សិទ្ធិមនុស្ស​លី​កា​ដូ ​លោក​ អំ ​សំអាត​ ​យល់ថា​  ​ទង្វើ​របស់​នគរបាល​ខណ្ឌ​មានជ័យ​ ​គឺជា​បំភិតបំភ័យ​ ​និង​ ​គំរាមកំហែង​ ​ដល់​បុគ្គលិក​អង្គការ​ ​និង​សមាគម​  ​ព្រោះ​សមាគម​ ​និង​អង្គការ​មិនមែន​រដ្ឋាភិបាល​ ​រួម​ទាំង​សហជីព​ឯករាជ​ ​សុទ្ធតែ​បាន​ចុះបញ្ជី​ ​និង​តម្កល់​លក្ខន្តិកៈ ​នៅ​ក្រសួង​មហាផ្ទៃ៖ «ចំណុច​ដែល​ថា​ ​អាជ្ញាធរ​មក​ធ្វើការ​ត្រួតពិនិត្យ​ចំនួន​បុគ្គលិក គឺ​អត់មាន​ចែង​ទេ ក្នុង​ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល ហើយ​ប្រសិន​បើ​ធ្វើ​អីចឹង​ ​វា​អាំ​ច​បំភិតបំភ័យ​ ​និង​គំរាមកំហែង​ ​និង​ទី២ ប៉ះពាល់​ការងារ​របស់​ពួកគេ​ផង​ ​»​។​
ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល​មាត្រា​មាត្រា១០ ចែង​ថា សមាគម និង​អង្គការ​មិន​មែន​រដ្ឋាភិបាល​ក្នុង​ស្រុក ត្រូវ​ជូនដំណឹង​ជា​អក្សរ​ពី​ព័ត៌មាន​គណនេយ្យ​សម្រាប់​កិច្ច​សហប្រតិបត្តិការ​របស់​ខ្លួន​ទៅ​ធនាគារ​ជាតិ ក្រសួង​មហាផ្ទៃ និង​ក្រសួងសេដ្ឋកិច្ច​ក្នុង​រយៈពេល ៣០ថ្ងៃ គិត​ចាប់ពី​ថ្ងៃ​ចុះ​បញ្ជី។ សមាគម​ត្រូវ​ជូនដំណឹង​ជា​អក្សរ​ទៅ​ក្រសួងមហាផ្ទៃ​ក្នុង​ករណី​ដែល​ផ្លាស់ប្ដូរ​លក្ខន្តិកៈ​ផ្លាស់ប្ដូរ​ទីស្នាក់ការ និង​ផ្លាស់​តំណែង​ប្រធាន ឬ​នាយក​ប្រតិបត្តិ។ ក្រុម​អង្គការ​សមាគម និង​សហជីព​លើក​ឡើង​ថា ពួក​គេ​ព្រួយបារម្ភ​ចំពោះ​សំណើ​ត្រួត​ពិនិត្យ​របស់​នគរបាល ដែល​មាន​គោលដៅ​ធ្វើឡើង​តែ​ចំពោះ​អង្គការ​សមាគម និង​សហជីព​ណា ដែល​សកម្ម និង​មាន​បេ​សកម្ម​លើ​វិស័យ​សិទ្ធិមនុស្ស​ដោយ​ឯករាជ្យ និង​ស្រប​ច្បាប់៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល