សមត្ថកិច្ចស្រុកវាលវែង បញ្ជូនខ្លួនជាងថតរូបម្នាក់ ឈ្មោះ មុត សាមាន ដែលចាប់ខ្លួនកាលពីថ្ងៃទី៣ កុម្ភៈ ពីបទបង្ហោះសារជេរប្រមាថមេដឹកនាំរបបក្រុងភ្នំពេញ ទៅស្នងការដ្ឋានខេត្តពោធិ៍សាត់ នៅរសៀលថ្ងៃទី៥ កុម្ភៈ។ សាច់ញាតិ និងអ្នកឃ្លាំមើលសិទ្ធិមនុស្ស ទាមទារឲ្យនគរបាលដោះលែងលោក មុត សាមាន។
បងស្រីរបស់លោក មុត សាមាន គឺលោកស្រី ផាវ សុផុន ថ្លែងមុខស្នងការដ្ឋាននគរបាលខេត្តពោធិ៍សាត់ថា សមត្ថកិច្ចចោទប្អូនប្រុសលោកស្រីពីបទ បង្ហោះសារជេរប្រមាថរដ្ឋាភិបាល។ ប៉ុន្តែ ខ្លឹមសារជេរប្រមាថបែបណានោះ លោកស្រីមិនដឹងទេ ដោយសារលោកស្រីមិនយល់ដឹងពីប្រព័ន្ធហ្វេសប៊ុក (facebook)។
លោកស្រី ផាវ សុផុន ឲ្យដឹងថា លោក មុត សាមាន បានបញ្ជាក់ប្រាប់នគរបាលក្រុងពោធិ៍សាត់ រួចហើយថា គាត់ពិតជាបានបង្ហោះសារមែន ប៉ុន្តែគ្មានចេតនាជេរប្រមាថទេ និងមិនដឹងថា សារនោះជាការជេរប្រមាថទេ។ លោកស្រីស្នើសុំសមត្ថកិច្ចឱ្យដោះលែង លោក មុត សាមាន វិញ ដើម្បីឲ្យប្អូនប្រុសបន្តអាជីពជាងថតរូបតាមរោងការ៖ «សំណូមពរដល់លោក ឯកឧត្ដម អ្វីទាំងអស់ហ្នឹងថា សុខចិត្តសារភាពថា ទទួលខ្លួនខុស ពិតជាបានធ្វើមែន។ ប៉ុន្តែ ថា ទទួលខ្លួនខុស ហើយសូមទទួលកំហុសឈប់ធ្វើអ៊ីចឹងទៀតហើយ។ ឈប់ហើយ ព្រោះនិយាយទៅដូចថា គ្នាហ្នឹងវា លេងទៅដូច វារាងជ្រុលដែរហ្នឹងណាអូន។ ដឹងខ្លួនដែរ។ ដឹងខ្លួនថា លេងទៅវារាងជ្រុល ថាអ៊ីចឹង ហើយមិនមែនថា គិតថា ចង់មើលងាយទេ ប៉ុន្តែព្រោះថា លេងទៅវារាងជ្រុល សុខចិត្តទទួលស្គាល់កំហុស ហើយថ្ងៃក្រោយអត់មានអ៊ីចឹងទៀតដែរ»។
នគរបាលស្រុកវាលវែង បានចាប់ខ្លួនលោក មុត សាមាន នៅភូមិផ្ចឹកជ្រុំ ឃុំប្រមោយ កាលពីថ្ងៃទី៣ កុម្ភៈ ក្នុងពេលលោកកំពុងថតរូបឲ្យកូនក្រមុំកូនកំលោះ ក្នុងពិធីអាពាហ៍ពិពាហ៍មួយ។
ជាងថតរូបម្នាក់នេះមានអាយុ ៣៤ឆ្នាំ ជាអ្នកភូមិអូរបាក់ត្រា ឃុំព្រងិល ស្រុកភ្នំក្រវាញ។ របាយការណ៍របស់នគរបាលស្រុកវាលវែង បានចោទប្រកាន់ថា លោក មុត សាមាន ពាក់ព័ន្ធនឹងករណីបង្ហោះសារតាមហ្វេសប៊ុក ជេរប្រមាថលោកនាយករដ្ឋមន្ត្រី ហ៊ុន សែន។
អាស៊ីសេរី មិនអាចសុំការបញ្ជាក់ព័ត៌មាននេះ ពីស្នងការនគរបាលខេត្តពោធិ៍សាត់ លោក សារុន ចាន់ធី បានទេ នៅថ្ងៃទី៥ កុម្ភៈ ដោយសារទូរស័ព្ទរោទ៍គ្មានអ្នកលើក។ ប៉ុន្តែ នៅម៉ោងជាង ៤រសៀល ថ្ងៃទី៥ កុម្ភៈដដែល លោកស្រី ផាវ សុផុន ឲ្យដឹងថា នគរបាលមិនទាន់បញ្ជូនលោក មុត សាមាន ទៅសាលាដំបូងខេត្តពោធិ៍សាត់ទេ ដោយប្រាប់គ្រួសារថា នឹងបន្តឃុំខ្លួនក្នុងស្នងការ ១យប់ទៀត។
ទោះជាយ៉ាងណា បើតាមសារព័ត៌មានក្នុងស្រុក នគរបាលស្រុកវាលវែងបានចោទ លោក មុត សាមាន ថា បានបង្ហោះសារជេរប្រមាថលោកនាយករដ្ឋមន្ត្រី ហ៊ុន សែន។
បុគ្គលិកឃ្លាំមើលការរំលោភសិទ្ធិមនុស្សអង្គការលីកាដូ ប្រចាំខេត្តពោធិ៍សាត់ លោក កែម គីមស្រ៊ន់ យល់ថា ប្រសិនបើមានការបង្ហោះសារជេរប្រមាថមែន នគរបាលគ្រប់ជាន់ថ្នាក់ គួរតែសម្របសម្រួលឲ្យលោក មុត សាមាន ធ្វើកិច្ចសន្យាបញ្ឈប់សកម្មភាព មិនគួរចាប់ខ្លួនបញ្ជូនទៅតុលាការទេ។ អ្នកឃ្លាំមើលការរំលោភសិទ្ធិមនុស្សរូបនេះយល់ថា ប្រសិនបើសមត្ថកិច្ចបញ្ជូនលោក មុត សាមាន ទៅតុលាការមែន នេះជាការបំភិតបំភ័យដល់ពលរដ្ឋផ្សេងទៀត៖ «អាជ្ញាធរពាក់ព័ន្ធឈានយករូបគាត់ទៅដល់ដាក់ពន្ធនាគារ បើសិនករណីហ្នឹងកើតអ៊ីចឹងមែន វាអត់ត្រឹមត្រូវទេ។ ហ្នឹងប្រសិនជាយកទៅអនុវត្តបែបហ្នឹងណា។ ខាងយើងសង្ឃឹមថា អាជ្ញាធរពាក់ព័ន្ធទាំងអស់ គាត់នឹងយល់ ហើយគាត់នឹងសម្រេចដោះលែងគាត់ឲ្យមានសេរីភាពវិញ។ អ្វីដែលធ្វើចំពោះគាត់ បើសិនមានការចោទប្រកាន់ខុស ដូចការចោទប្រកាន់ ទាក់ទងនឹងការជេរប្រមាថថ្នាក់ដឹកនាំពិតមែន គ្រាន់តែធ្វើកិច្ចសន្យាអប់រំ ណែនាំគាត់ទៅ។ ខ្ញុំយល់ថា រឿងមួយដែលសមស្របក្នុងការអនុវត្តច្បាប់»។
ទោះជាយ៉ាងណា អាស៊ីសេរីមិនទាន់ដឹងខ្លឹមសារជេរប្រមាថ ដែលសមត្ថិកិច្ចចោទលោក មុត សាមាន ថា បានបង្ហោះលើហ្វេសប៊ុកនោះ មានខ្លឹមសារលំអិតយ៉ាងណានៅឡើយទេ ដោយសារមិនទាន់អាចទាក់ទងសមត្ថកិច្ចបាននៅឡើយមកដល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។