ព្រះមហាក្សត្រ​ព្រះរាជទាន​លើក​លែង​ទោស​មេឃុំ​បក្ស​ប្រឆាំង​លោក ស៊ាង ចែត

ដោយ ម៉ម មុនីរតន៍
2016-12-07
អ៊ីម៉ែល
មតិ
Share
បោះពុម្ព
លោក​មេឃុំ​ ស៊ាង ចែត (ឆ្វេង​ក្នុង​សំលៀកពាក់​ពណ៌​ទឹក​ក្រូច) ពេល​នាំ​មក​ដល់​សាលាដំបូង​រាជធានី​ភ្នំពេញ នៅ​ថ្ងៃ​ទី​៥ ខែ​ធ្នូ ឆ្នាំ​២០១៦។ RFA/Sorn Chanratha
លោក​មេឃុំ​ ស៊ាង ចែត (ឆ្វេង​ក្នុង​សំលៀកពាក់​ពណ៌​ទឹក​ក្រូច) ពេល​នាំ​មក​ដល់​សាលាដំបូង​រាជធានី​ភ្នំពេញ នៅ​ថ្ងៃ​ទី​៥ ខែ​ធ្នូ ឆ្នាំ​២០១៦។ RFA/Sorn Chanratha
RFA/Sorn Chanratha

លោក​មេ​ឃុំ ស៊ាង ចែត ត្រូវ​បាន​ព្រះមហាក្សត្រ​ព្រះរាជ​ទាន​លើកលែង​ទោស​ហើយ ក្រោយ​ពី​គណបក្ស​ជាប់​ឆ្នោត​ទាំង​ពីរ បើក​ផ្លូវ​ឲ្យ​មាន​ការ​សម្របសម្រួល​ផ្នែក​នយោបាយ។ ការ​ដោះលែង​ដែល​ធ្វើ​ឡើង​នៅ​ថ្ងៃ​ទី​៧ ខែ​ធ្នូ នេះ ធ្វើ​ឡើង​ភ្លាមៗ​ក្រោយ​ពេល​កិច្ច​ប្រជុំ​សភា គឺ​លោក ស ខេង បញ្ជាក់​ថា មេ​ឃុំ​មក​ពី​បក្ស​ប្រឆាំង​រូប​នេះ នឹង​ត្រូវ​ដោះលែង​ពី​ពន្ធនាគារ​វិញ​ហើយ។ បរិបទ​នយោបាយ​ដែល​ប្រែប្រួល​ដ៏​ឆាប់​បែប​នេះ ស្រប​ពេល​មេ​ដឹកនាំ​របស់​បក្ស​នយោបាយ​ទាំង​ពីរ បាន​ព្រមព្រៀង​គ្នា​បន្ត​ប្រើប្រាស់​វប្បធម៌​សន្ទនា​ឡើង​វិញ។

លោក ហ៊ុន សែន បាន​ដឹក​ដៃ​គ្នា​ជាមួយ​លោក កឹម សុខា ត្រសង​ចូល​សភា​ជា​លើក​ដំបូង ក្រោយ​ពី​ប្រមុខ​ដឹកនាំ​បក្ស​ប្រឆាំង​រូប​នេះ អវត្តមាន​ចូល​ប្រជុំ​សភា​ពេញ​អង្គ​ប្រមាណ ១​ឆ្នាំ​មក​ហើយ។ មុន​ពេល​ចាប់​ផ្តើម​នៃ​កិច្ច​ប្រជុំ​សភា​ពេញ​អង្គ​ដំណើរ​ការ​នោះ គេ​សង្កេត​ឃើញ​ទាំង​លោក ហ៊ុន សែន និង​លោក កឹម សុខា សាសង​គ្នា​មួយ​សន្ទុះ មុន​ពេល​ដើរ​ចេញ​ពី​បន្ទប់​ប្រជុំ​សភា​ស្ងាត់ៗ។

មូលហេតុ​ដែល​នាំ​ឲ្យ​វិបត្តិ​នយោបាយ​មាន​ភាព​ប្រសើរ​ឡើង​រហូត​លោក​មេ​ឃុំ ស៊ាង ចែត ត្រូវ​ដោះលែង​ឲ្យ​មាន​សេរីភាព​វិញ និង​កិច្ចការ​បន្ទាប់ ដល់​វេន​សកម្មជន​ការពារ​សិទ្ធិ​មនុស្ស​អាដហុក (ADHOC) ៤​រូប និង​អគ្គលេខាធិការ​រង​នៃ គ..ប នោះ ជាប់​ទាក់ទង​នឹង​ការ​ស្រុះស្រួល​ផ្នែក​នយោបាយ ដែល​បាន​ខ្វែង​គំនិត​គ្នា​ជាង​ពាក់​កណ្ដាល​អាណត្តិ​មក​ហើយ​រវាង​បក្ស​កាន់​អំណាច និង​បក្ស​ប្រឆាំង ពិសេស​ក្រោយ​ពេល​វាយ​តំណាង​រាស្ត្រ​បក្ស​ប្រឆាំង​ចំនួន​ពីរ​រូប ការ​ទម្លាក់​លោក កឹម សុខា ចេញ​ពី​អនុប្រធាន​ទី​១ រដ្ឋសភា និង​ការ​ចោទ​ប្រកាន់​រឿង​អាស្រូវ​ស្នេហា​របស់​លោក កឹម សុខា។

លោក ស ខេង ឧបនាយករដ្ឋមន្ត្រី និង​ជា​រដ្ឋមន្ត្រី​ក្រសួង​មហាផ្ទៃ ឲ្យ​ដឹង​ក្រោយ​ប្រជុំ​សភា​ពេញ​អង្គ​បាន​បិទ​បញ្ចប់​ថា មេ​ឃុំ ស៊ាង ចែត នឹង​ត្រូវ​ដោះលែង​នៅ​ថ្ងៃ​ទី​៧ ធ្នូ នេះ។ លោក​បន្ថែម​ថា ដោយឡែក​មន្ត្រី​សមាគម​អាដហុក និង​មន្ត្រី​ជាន់​ខ្ពស់ គ..លោក នី ចរិយា នឹង​លើក​ទៅ​ពិភាក្សា​នៅ​ចុង​ខែ​ធ្នូ ខាង​មុខ​នេះ​ដែរ។ ក្រៅ​ពី​នេះ លោក ស ខេង នៅ​មិន​ទាន់​ប្រាកដ​នៅ​ឡើយ​ទេ​ពី​ជោគ​វាសនា​របស់​សកម្មជន​គណបក្ស​ប្រឆាំង​ដទៃ​ទៀត​ដែល​កំពុង​ជាប់​ឃុំ ថា​តើ​នឹង​ត្រូវ​ដោះលែង​ដែរ ឬ​យ៉ាង​ណា? លោក​បន្ត​ថា «ខ្ញុំ​មិន​បាន​ជជែក​រឿង​នេះ គឺ​ឯកឧត្ដម កឹម សុខា ជជែក​ជាមួយ​សម្ដេច​តេជោ។ បើ​តាម​ខ្ញុំ​ដឹង ប្រហែល​ជា​មុន​ដំណាច់​ខែ​១២ នេះ នឹង​មាន​ការ​ដោះស្រាយ​ករណី​មន្ត្រី​សិទ្ធិ​មនុស្ស ហើយ​និង​អគ្គលេខាធិការ​រង គ..»

ការ​លើកលែង​ទោស​មេ​ឃុំ ស៊ាង ចែត ដោយ​ព្រះរាជក្រឹត្យ​របស់​ព្រះមហាក្សត្រ​នៅ​ពេល​នេះ ធ្វើ​ឡើង​តែ​ប៉ុន្មាន​ថ្ងៃ​ប៉ុណ្ណោះ ក្រោយ​ពី​សាលក្រម​របស់​តុលាការ​ក្រុង​ភ្នំពេញ​បាន​ផ្ដន្ទាទោស​លោក ស៊ាង ចែត ដាក់​ពន្ធនាគារ ៥​ឆ្នាំ​កាល​ថ្ងៃ​ទី​៥ ខែ​ធ្នូ ពី​បទ​សូកប៉ាន់​សាក្សី​ក្នុង​សំណុំ​រឿង​អ្នក​នាង ខុម ចាន់តារាទី ហៅ​ស្រី​មុំ។

ក្នុង​ពេល​រដ្ឋសភា​កំពុង​បន្ត​សម័យ​ប្រជុំ​ពេញ​អង្គ ដែល​ប្រព្រឹត្ត​ទៅ​កាល​ពី​ព្រឹក​ថ្ងៃ​ទី​៧ ធ្នូ លោក ហ៊ុន សែន និង​លោក កឹម សុខា បាន​ឆ្លៀត​ពេល​ជួប​ប្រជុំ​គ្នា​ក្នុង​បន្ទប់​សម្ងាត់ ដែល​ប្រើ​ពេល​ប្រមាណ ១​ម៉ោង។ ក្រោយ​ការ​ប្រជុំ​ជា​លក្ខណៈ​ទ្វេ​ភាគី​នេះ​បាន​បិទ​បញ្ចប់ មិន​បង្អង់​យូរ​ឡើយ លោក កឹម សុខា ក៏​ជួប​ប្រជុំ​ភ្លាម​ដែរ​ជាមួយ​លោក ស ខេង។ ប្រហែល​ជា​ការ​ជួប​គ្នា​ដោយ​សម្ងាត់​រវាង​មេ​ដឹកនាំ​បក្ស​ប្រឆាំង និង​លោក ហ៊ុន សែន នេះ​ហើយ ទើប​បើក​ផ្លូវ​ឲ្យ​មាន​ដំណោះស្រាយ​នយោបាយ​ចុង​ក្រោយ ដែល​លោក ស ខេង បញ្ជាក់​ថា វាសនា​សកម្មជន​បក្ស​ប្រឆាំង​ដែល​នៅ​សេសសល់​ដទៃ​ទៀត ប្រហែល​ជា​មេ​ដឹកនាំ​ទាំង​ពីរ​ជជែក​គ្នា​ដាច់​ដោយឡែក។

ជុំវិញ​ដំណោះស្រាយ​នយោបាយ​នេះ ប្រធាន​គណបក្ស​ប្រជាជន​កម្ពុជា លោក ហ៊ុន សែន បាន​ថ្លែង​មុន​ចាប់​ដំណើរ​ការ​កិច្ច​ប្រជុំ​សភា​ពេញ​អង្គ ដោយ​ចាត់​ទុក​លោក កឹម សុខា ជា​ដៃគូ​សន្ទនា​ថ្មី​របស់​លោក ក្នុង​ក្របខ័ណ្ឌ​ជា​ប្រធាន​ក្រុម​តំណាង​រាស្ត្រ។ ទន្ទឹម​នឹង​នេះ លោក ហ៊ុន សែន ព្រមាន​ដែរ​ថា ប្រសិន​បើ​តួនាទី​ដែល​នឹង​ផ្ដល់​ឲ្យ​លោក កឹម សុខា នេះ​មាន​ភាព​ស្មុគស្មាញ អាច​នឹង​ត្រូវ​រុះរើ​មាត្រា​មួយ​ចំនួន​ឡើង​វិញ។ លោក​បន្ត​ថា «ប្រសិន​បើ​មិន​អាច​ទទួល​យក​ការ​តែងតាំង​នេះ​បាន គឺ​មាន​តែ​វិធី​បក​ត្រឡប់​មក​ធ្វើ​វិសោធនកម្ម​មាត្រា​៤៨ ដែល​ដក​ចេញ​ទាំងអស់​នូវ​តួនាទី​ទាំងឡាយ ហើយ​វិល​ត្រឡប់​ទៅ ៤៨.២ វិញ»

ហាក់​ផ្ទុយ​ពី​ការ​ថ្លែង​របស់​លោក​នាយក​រដ្ឋមន្ត្រី​នេះ​បន្តិច ដោយឡែក​លោក កឹម សុខា វិញ​យល់​ឃើញ​ថា រឿង​តួនាទី​មុខ​មាត់​វា​គ្រាន់​តែ​ជា​កិច្ចការ​ក្រៅ​ខ្លួន​ប៉ុណ្ណោះ សំខាន់​គឺ​ទិសដៅ​រួម​ដែល​បក្ស​នយោបាយ​នីមួយៗ​តែង​ប្រកាន់​យក គឺ​រួបរួម ឯកភាព​ជាតិ និង​ផ្សះផ្សា​ជាតិ​តែ​មួយ​ជាមួយ​គ្នា។

តាម​រយៈ​ការ​ឯកភាព​នយោបាយ​នេះ លោក កឹម សុខា រំពឹង​ថា បក្ស​ទាំង​ពីរ​នឹង​លែង​ខ្វែង​គំនិត​គ្នា ហើយ​តម្កល់​ផល​ប្រយោជន៍​ជាតិ​ជា​ធំ​ជាមួយ​គ្នា។ លោក​បន្ត​ថា «ចំពោះ​តំណែង​តួនាទី មុខងារ វា​គ្រាន់​តែ​ជា​មធ្យោបាយ​សម្រាប់​យើង​ធ្វើ​ដំណើរ​ទៅ​រក​ផ្លូវ​នោះ​ទេ ប៉ុន្តែ​បើ​សិន​ជា​ទោះ​ជា​តួនាទី​ធំ​ប៉ុនណា​ក៏ដោយ ខ្ពស់​ប៉ុនណា​ក៏ដោយ តែ​បើ​យើង​ដើរ​ខុស​គោលដៅ​ដែល​យើង​ចង់​បាន ដែល​យើង​ត្រូវ​ដើរ​ជាមួយ​នោះ ក៏​មិន​អាច​ជោគជ័យ​ដែរ»

បញ្ហា​នេះ លោក អ៊ូ វីរៈ ប្រធាន​វេទិកា​អនាគត យល់​ឃើញ​ថា នេះ​ជា​ការ​វិវឌ្ឍន៍​មួយ​ល្អ​សម្រាប់​ប្រទេស​ជាតិ ជាពិសេស​អ្នក​ចំណេញ គឺ​ពលរដ្ឋ។ ផ្ទុយ​ពី​នេះ​វិញ អ្វី​ដែល​ជា​ចម្ងល់ និង​ជា​ការ​បារម្ភ​នោះ គឺ​អាច​ជា​ការ​លែង​ទុក​ចិត្ត​គ្នា​នៅ​ក្នុង​ផ្ទៃ​ក្នុង​គណបក្ស​សង្គ្រោះ​ជាតិ ទៅ​វិញ​ទេ។

យ៉ាង​ណា​ក៏ដោយ ទាក់ទិន​ការ​ផ្លាស់ប្ដូរ​តួនាទី​នេះ លោក សម រង្ស៊ី បាន​បង្ហោះ​សារ​នៅ​លើ​បណ្ដាញ​សង្គម​ហ្វេសប៊ុក (Facebook) របស់​លោក​ថា មុខ​តំណែង​មិន​សំខាន់​ទេ អ្វី​ដែល​ចាំបាច់​បំផុត គឺ​ភាព​ទៀង​ត្រង់ និង​សេចក្ដី​ថ្លៃថ្នូរ​របស់​មនុស្ស។ លោក​បន្ថែម​ថា លោក​យល់ព្រម​ធ្វើ​អ្វីៗ​គ្រប់​បែប​យ៉ាង​ឲ្យ​តែ​ប្រទេស​នៅ​គង់វង្ស និង​ឆ្ពោះ​ទៅ​រក​ភាព​រុងរឿង។

សូម​ស្ដាប់​ការ​វិភាគ​ទាក់ទង​នឹង​ការ​វិឌ្ឍន៍​ស្ថានការណ៍​នយោបាយ​ចុង​ក្រោយ​ ដោយ​លោក​ មាស នី និង លោក គឹម សុខ តាយ​ការ​សាកសួរ​របស់​លោក ជុន ច័ន្ទបុត្រ៖

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

Did the King Pardon Mr Sieng Chet? or was the king been told by Hun Sen to pardon as always? Can anybody to me when was the most recent that the king pardon anyone from the opposition party or any of the Rights activists without being told by Hun Sen? and How is a person any person worth if he or she does his/her job only been told by someone else?

Dec 08, 2016 04:00 AM

អ្នក​អាន​អនាមិក

it is a cheap puppet. A brainless bobble head. a scum society. a diseases infested rat.

Dec 10, 2016 05:43 AM

គេហទំព័រ​ទាំងមូល