សភា​អនុម័ត​សេចក្ដី​ព្រាង​ច្បាប់ ស្ដីពី​ការ​គ្រប់គ្រង​ល្បែង​ពាណិជ្ជកម្ម

ដោយ សុជីវី
2020-10-06
អ៊ីម៉ែល
មតិ
Share
បោះពុម្ព
កាស៊ីណូ ណាហ្កា វើលដ៍ (Naga World) ស្ថិត​នៅ​ជិត​កោះពេជ្រ រាជធានី​ភ្នំពេញ ថត​កាល​ពី​ថ្ងៃ​ទី៧ ខែ​មករា ឆ្នាំ២០២០។
កាស៊ីណូ ណាហ្កា វើលដ៍ (Naga World) ស្ថិត​នៅ​ជិត​កោះពេជ្រ រាជធានី​ភ្នំពេញ ថត​កាល​ពី​ថ្ងៃ​ទី៧ ខែ​មករា ឆ្នាំ២០២០។
រូប៖ កម្មករ

រដ្ឋសភា បាន​អនុម័ត​លើ​សេចក្ដី​ព្រាង​ច្បាប់​ស្ដីពី​ការ​គ្រប់គ្រង​ល្បែង​ពាណិជ្ជកម្ម ក្នុង​សម័យ​ប្រជុំ​ពេញ​អង្គ​លើក​ទី៥ នីតិកាល​ទី៦ កាល​ពី​ថ្ងៃ​ចន្ទ ទី៥ ខែ​តុលា ហើយ​បច្ចុប្បន្ន​ព្រឹទ្ធសភា កំពុង​ពិនិត្យ​លើ​ខ្លឹមសារ​នៃ​សេចក្ដី​ព្រាង​ច្បាប់​នេះ។​

អ្នក​នាំ​ពាក្យ​រដ្ឋសភា លោក ឡេង ប៉េងឡុង មាន​ប្រសាសន៍​ប្រាប់​អាស៊ី​សេរី​តាម​ទូរស័ព្ទ កាល​ពី​យប់​ថ្ងៃ​អង្គារ ទី៦ ខែតុលា​ថា គោល​បំណង​សំខាន់​នៃ​សេចក្ដី​ព្រាង​ច្បាប់​នេះ គឺ​ដើម្បី​ពង្រឹង​ការ​គ្រប់គ្រង​កន្លែង​កាស៊ីណូ ជាពិសេស​នៅ​តាម​ព្រំដែន ពង្រឹង​កំណើន​សេដ្ឋកិច្ច​ជាតិ និង​ទាក់ទាញ​ភ្ញៀវ​ទេសចរ​បរទេស​ឲ្យ​បាន​ច្រើន​ថែម​ទៀត​មក​កម្ពុជា៖ «ទី១ គឺ​ចំណេញ​លុយ បាន​មក​ពី​ល្បែង​កាស៊ីណូ​ហ្នឹង។ ទី២ ទីតាំង​កាស៊ីណូ ភាគ​ច្រើន​នៅ​តាម​ព្រំដែន អ៊ីចឹង គឺ​ការពារ​ទឹកដី ហើយ​អ្នក​មាន​ប្រាក់​គេ​មាន​លុយ គេ​មក​លេង ហើយ​គេ​បង​កម្រៃ​ជូន​ដល់​រដ្ឋ អ៊ីចឹង​ទាក់ទាញ​អ្នក​ទេសចរ។ បន្ថែម​ពី​នេះ ក្រុមហ៊ុន ឬ​អ្នក​ទៅ​លេង មិន​អាច​លាង​លុយ​តាម​រយៈ​ការ​លេង​ល្បែង​នោះ​ទេ»

រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញ​វត្ថុលោក អូន ព័ន្ធមុនីរត្ន ប្រាប់​កាសែត​ចិន ស៊ីនហួរ ថា សេចក្ដីព្រាង​ច្បាប់​ថ្មី​នេះ ក៏​ជួយ​បង្កើន​ប្រាក់​ចំណូល​ដល់​ថវិកា​ជាតិ។​ លោក​បន្ត​ថា សេចក្ដី​ព្រាង​ច្បាប់​នេះ ក៏​បាន​កំណត់​ពី​តម្រូវ​ការ​ដើមទុន​អប្បបរមា សម្រាប់​ការ​វិនិយោគ​នៅ​ក្នុង​គម្រោង​កាស៊ីណូ និង​វិធានការ​ពិសេស ដើម្បី​ប្រយុទ្ធ​ប្រឆាំង​នឹង​ការ​លាង​លុយ​កខ្វក់ និង​ការ​ផ្តល់​ថវិកា​ដល់​ក្រុម​ភេរវករ​តាម​រយៈ​កាស៊ីណូ។

បច្ចុប្បន្ន​ កាស៊ីណូ មាន​អាជ្ញាប័ណ្ណ ដែល​កំពុង​ប្រតិបត្តិការ​នៅ​កម្ពុជា​ គឺ​មាន​ចំនួន ១៩៣ កន្លែង។ ក៏​ប៉ុន្តែ​រហូត​មក​ដល់​ពេល​នេះ រដ្ឋាភិបាល​កម្ពុជា អនុញ្ញាត​ឲ្យ​កាស៊ីណូ​ចំនួន ១០ រាប់ទាំង កាស៊ីណូ ណាហ្កា វើលដ៍ ផង អាច​បើក​ដំណើរ​ការ​ឡើង​វិញ​បាន ក្រោយ​ពី​បាន​បិទ​មួយ​រយៈ ដោយសារ​បារម្ភ​ពី​ការ​រាលដាល​សកល នៃ​ជំងឺ​កូវិត១៩ (Covid-19) កាល​ពី​ថ្ងៃ​ទី៤ ខែតុលា ក្រុមហ៊ុន​សាជីវកម្ម ណាហ្គា (Naga Corp Ltd.) បាន​ប្រកាស​ថា កាស៊ីណូ ណាហ្គា វើលដ៍ (Naga World) ទទួល​បាន​ប្រាក់​ចំណូល​សរុប​ចំនួន ជិត ២៩៤ដុល្លារ ក្នុង​អំឡុង​ពេល ៩ខែ ដើម​ឆ្នាំ២០២០ នេះ ហើយ​បើ​ប្រៀបធៀប​រយៈ​ពេល​ដូច​គ្នា កាល​ពី​ឆ្នាំ២០១៩ គឺ​សរុប​ចំនួន​ជាង ៦១៦,៣លាន​ដុល្លារ​អាមេរិក

ក្រុមហ៊ុន​កាស៊ីណូ​ដ៏​ធំ​មួយ​នេះ កាល​ពី​អំឡុង​ឆ្នាំ២០១៩ ទទួល​បាន​ប្រាក់​ចំណូល​ចំនួន​ជិត ២ពាន់​លាន​ដុល្លារ (,៧៥ពាន់​លាន) ក្នុង​នោះ​គឺ ទទួល​បាន​ប្រាក់​ចំណេញ ៥៧១,៨លាន​ដុល្លារ ហើយ​ក្រោយ​ពី​ការ​បង់​ពន្ធ​ទៅ​រដ្ឋាភិបាល​កម្ពុជា​ហើយ គឺ​នៅ​ទទួល​បាន​ប្រាក់​ចំណេញ​ចំនួន ៥២១,៣លាន​ដុល្លារ។ ចំណែក​របាយការណ៍​របស់​ក្រសួង​សេដ្ឋកិច្ច និង​ហិរញ្ញវត្ថុ ក៏​បាន​បង្ហាញ​ផង​ដែរ​ថា កម្ពុជា​ទទួល​បាន​ប្រាក់​ចំណូល​ពន្ធ​ពី​វិស័យ​កាស៊ីណូ​សរុប​ទូទាំង​ប្រទេស មាន​ចំនួន​ជាង ៥៦លាន​ដុល្លារ ក្នុង​ឆ្នាំ២០១៩៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល