អ្នកឃ្លាំមើលសវនាការជំនុំជម្រះក្តី ករណីលោក កឹម សុខា រឹតតែមានមន្ទិល អំពីដំណើរការក្តីប្រធានគណបក្សប្រឆាំងនេះ ក្រោយតំណាងអយ្យការ ដែលជាភាគីចោទប្រកាន់ យកឯកសារអនាមិក ពីបណ្តាញសង្គមហ្វេសប៊ុក ជាប្រភពភស្តុតាង ក្នុងការសួរដេញដោល ដាក់បន្ទុកលើលោក កឹម សុខា។
មន្ត្រីនាំពាក្យសមាគមអាដហុក (Adhoc) លោក ស៊ឹង សែនករុណា ដែលបានចូលរួមតាមដានសវនាការដោយផ្ទាល់ ក្នុងការជំនុំជម្រះក្តីលោក កឹម សុខា ថ្ងៃទីមួយ សប្ដាហ៍ទី ៤ ដែលប្រព្រឹត្តទៅកាលពីថ្ងៃទី៥ ខែ កុម្ភៈ ម្សិលមិញនេះ ថា លោកកាន់តែបារម្ភអំពីភាពមិនប្រក្រតី នៃកិច្ចដំណើរការនីតិវិធីតុលាការ ដែលកំពុងរងការរិះគន់ ថា មានចរិតនយោបាយស្រាប់នេះ។
ការកាន់តែព្រួយបារម្ភរបស់អ្នកឃ្លាំមើលដំណើរការក្ដីតុលាការ រឿងលោក កឹម សុខា រូបនេះ កើតមានឡើង ក្រោយតំណាងព្រះរាជអាជ្ញា ផ្ដើមចោទសួរលោក កឹម សុខា ដោយយោងទៅលើការបង្ហោះសារ និងឯកសាររបស់គណនីបណ្ដាញសង្គមហ្វេសប៊ុក ដែលគ្មានអត្តសញ្ញាណពិតប្រាកដមួយ ឈ្មោះថា "កូនខ្មែរ"។
ការយោងទៅលើប្រភពអនាមិកបែបនេះ លោក ស៊ឹង សែន ករុណា យល់ថា ជាការបង្ហាញពីភាពមិនច្បាស់លាស់ដំណើរការក្តីទាំងមូល៖ «គ្រាន់តែឮឈ្មោះថាកូនខ្មែរ យើងមិនដឹងថា បុគ្គលដែលជាម្ចាស់អាខោន (account) នោះជានរណាឱ្យប្រាកដផងហ្នឹង ! ខ្ញុំយល់ថា ក្នុងនាមជាអ្នកច្បាប់ គួរតែលើកនូវចំណុច ឬក៏ភស្តុតាងដែលជាការដាក់បន្ទុក ឱ្យមានភាពច្បាស់លាស់បន្តិច។ ការលើកឡើងបែបនេះ ហាក់ដូចជាការវាយប្រហារទៅលើជនជាប់សង្ស័យ។ ការលើកឡើងបែបនេះ ធ្វើឱ្យប៉ះពាល់ដល់ការអនុវត្តច្បាប់របស់តំណាងអយ្យការហ្នឹង»។
ការយកប្រភពភស្តុតាងពីគណនីហ្វេសប៊ុកអនាមិក ដែលគ្មានអត្តសញ្ញាណច្បាស់លាស់នេះ លោក ស៊ឹង សែនករុណា បន្ថែមថា វាមិនត្រឹមតែប៉ះពាល់ដល់ការអនុវត្តច្បាប់ក្នុងប្រព័ន្ធតុលាការនោះទេ ប៉ុន្តែវាធ្វើឱ្យខាតពេលវេលានៃការជំនុំជម្រះក្តីនេះផងដែរ។
បន្ថែមលើការយោងលើគណនីហ្វេសប៊ុក ដែលគ្មានម្ចាស់ច្បាស់លាស់នេះ ខាងតំណាងអយ្យការក៏បានយករូបថតមួយចំនួន ក្នុងនោះមានរូបថតមួយសន្លឹក ដែលមានកូនស្រីច្បងរបស់លោក កឹម សុខា គឺកញ្ញា កឹម មនោវិទ្យា និងសមាជិកគ្រួសារលោក អង្គុយទទួលទានអាហារជាមួយជនបរទេសមួយរូប ដើម្បីចោទសួរលោក កឹម សុខា។
សហមេធាវីការពារក្តីលោក កឹម សុខា គឺលោក ផែង ហេង ថា លោក កឹម សុខា ប្រតិកម្មតបទៅខាងព្រះរាជអាជ្ញា ដែលយករឿងជីវិតឯកជនរបស់គ្រួសារលោក មកចោទសួរក្នុងសវនាការនេះ ដែលលោកចាត់ទុកថា ជាការខ្វះសុជីវធម៌។ ចំណុចនេះ លោក ផែង ហេង ថា លោក កឹម សុខា មិនចង់ឆ្លើយឆ្លងជាមួយខាងតំណាងព្រះរាជអាជ្ញានោះឡើយ។
អាស៊ីសេរី មិនទាន់អាចសុំការបំភ្លឺពីខាងព្រះរាជអាជ្ញាបានទេ ជុំវិញរឿងនេះ។ អាស៊ីសេរី ក៏មិនអាចសុំការបំភ្លឺពីមេធាវីតំណាងរដ្ឋាភិបាល គឺលោក គី តិច បាននោះដែរ ដោយសារតែទូរស័ព្ទចូល គ្មានអ្នកទទួល។
តែកាលពីពេលថ្មីៗនេះ លោក គី តិច បានអះអាងថា ដំណើរការក្តីនៅតុលាការនេះ គឺជាបង្ហាញឱ្យឃើញច្បាស់ ថាកម្ពុជាកំពុងអនុវត្តច្បាប់ត្រឹមត្រូវ ក្នុងប្រព័ន្ធតុលាការឯករាជ្យ។
ទោះជាយ៉ាងនេះក្តី ដំណើរការក្តីលោក កឹម សុខា នេះរងការរិះគន់ជុំទិស ថា មានចរិតនយោបាយ ដោយគណបក្សកាន់អំណាច ប្រើប្រាស់ប្រព័ន្ធតុលាការ ធ្វើជាឧបករណ៍ដើម្បីធ្វើទុក្ខបុកម្នេញបំបិទសំឡេងប្រឆាំងប៉ុណ្ណោះ។
សវនាការបានប្រព្រឹត្តទៅ ចូលដល់សប្ដាហ៍ទីបួនទៅហើយ ខាងសហមេធាវីការពារក្តីលោក កឹម សុខា នៅតែអះអាងថា ខាងភាគីដើមចោទ នៅតែមិនទាន់បានបង្ហាញអង្គហេតុ ដើម្បីគាំទ្រការចោទប្រកាន់លោក កឹម សុខា ពីបទសន្ទិដ្ឋិភាព ឬត្រូវរ៉ូវគ្នាដោយសម្ងាត់ជាមួយរដ្ឋបរទេស ដើម្បីផ្តួលរំលំរដ្ឋាភិបាលនោះឡើយ។ ពួកគាត់អះអាងថា អង្គហេតុនៃការចោទប្រកាន់ អំពីការត្រូវរ៉ូវគ្នាដោយសម្ងាត់ជាមួយបរទេស និងចោទថា លោក កឹម សុខា មានគោលបំណងទុច្ចរិតជាដើមនោះ នៅតែមិនឃើញមានយកមកបង្ហាញ នៅក្នុងសវនាការ។
ទោះយ៉ាងណា សហមេធាវីការពារក្តីលោក កឹម សុខា ថា ក្រុមមេធាវី នឹងបន្តប្ដេជ្ញាតស៊ូការពារក្តីលោក កឹម សុខា ដល់ទីបញ្ចប់ ដើម្បីបង្ហាញភាពស្អាតស្អំរបស់លោក កឹម សុខា ផង និងតតាំងទៅនឹងភាពមិនត្រឹមត្រូវនៃកិច្ចដំណើរការនីតិវិធីផង។
ក្រុមមេធាវីលោក កឹម សុខា បានដាក់ភស្តុតាងដោះបន្ទុកបន្ថែម ១៦ចំណុចទៀត បន្ថែមទៅលើភស្តុតាងចំនួន ៣៥ ដែលបានដាក់កាលពីពាក់កណ្ដាលខែ មករា។ ភស្តុតាងទាំងនេះ នឹងត្រូវលើកយកមកជជែកដេញដោលគ្នា នៅក្នុងសវនាការថ្ងៃ ព្រហស្បតិ៍ ទី ៦ ខែកុម្ភៈនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។