ប៉េអិម​ខេត្ត​ពោធិ៍សាត់​ប្រើ​អំពើ​ហិង្សា​លើ​ស្ត្រី

មន្ត្រី​កង​រាជ​អាវុធ​ហត្ថ ៣​រូប បាន​រង​ការ​ចោទ​ប្រកាន់​ពី​ប្រជា​ពល​រដ្ឋ​ថា បាន​ប្រើ​អំពើ​ហិង្សា និង​ប្រើ​អាវុធ​បាញ់​គំរាម​មក​លើ​ប្រជា​ពល​រដ្ឋ។
ដោយ មណ្ឌល កែវ
2011-03-08
Share

ប្រជា​ពល​រដ្ឋ​នៅ​ភូមិ​ពេជ្រ​បាន ឃុំ​លាជ ស្រុក​ភ្នំក្រវាញ ខេត្ត​ពោធិ៍សាត់ ថ្លែង​ប្រាប់​វិទ្យុ​អាស៊ី​សេរី​នៅ​រសៀល​ថ្ងៃ​ទី​៨ មីនា ក្នុង​លក្ខខ័ណ្ឌ​សុំ​មិន​បញ្ចេញ​ឈ្មោះ​ថា នៅ​វេលា​ម៉ោង ១០​និង​៣០​នាទី​ព្រឹក ថ្ងៃ​ទី​៨ ខែ​មីនា មន្ត្រី​កង​រាជ​អាវុធ​ហត្ថ​ចំនួន ៣​រូប បាន​ប្រើ​អំពើ​ហិង្សា​មក​លើ​ស្ត្រី​អ្នក​ភូមិ​ម្នាក់ ឈ្មោះ ហេង គឹម​លាង ដោយ​បាន​ច្រាន​ស្ត្រី​រូប​នេះ​ឲ្យ​ដួល​ដេក​ទៅ​នឹង​ដី រួច​បាញ់​ភ្ជង់​ដី​ប្រឡោះ​ភ្លៅ​ស្ត្រី​រូប​នេះ ដោយ​កាំភ្លើង​ខ្លី​មួយ​គ្រាប់​ថែម​ទៀត។

ប្រភព​ដដែល​បាន​ឲ្យ​ដឹង​ដែរ​ថា មន្ត្រី​កង​រាជ​អាវុធ​ហត្ថ​ទាំង ៣​រូប​នេះ មាន​ឈ្មោះ ខន សុភឿន ឈ្មោះ តូ សា​មីឌី និង​ម្នាក់​ទៀត​គេ​មិន​ស្គាល់​ឈ្មោះ។ ឯ​មូលហេតុ​នៃ​ការ​ខឹង​សម្បារ​រហូត​បាន​ប្រើ​អំពើ​ហិង្សា​នេះ ដោយ​ពួក​គេ​បាន​រក​ឃើញ​ក្នុង​ផ្ទះ​ស្ត្រី​ឈ្មោះ ហេង គឹម​លាង មាន​ម៉ូតូ​ដឹក​ឈើ​ក្រញូង​ចំនួន ៣​គ្រឿង សំចត​ក្នុង​ផ្ទះ ហើយ​ពួក​គេ​ចង់​ចាប់​យក​ម៉ូតូ​ទាំង​នោះ។ តែ​ស្ត្រី​ឈ្មោះ ហេង គឹម​លាង មិន​ព្រម​ទើប​កើត​មាន​ទំនាស់​គ្នា​រហូត​ដល់​ការ​ប្រើ​អំពើ​ហិង្សា​យ៉ាង​ដូច្នេះ។

មេ​បញ្ជា​ការ​កង​រាជ​អាវុធ​ហត្ថ​ស្រុក​ភ្នំក្រវាញ គឺ​លោក តែម ភារ៉ា មាន​ប្រសាសន៍​ថា មន្ត្រី​កង​រាជ​អាវុធ​ហត្ថ​ទាំង ៣​រូប​នេះ មិន​ស្ថិត​នៅ​ក្រោម​ការ​គ្រប់គ្រង​របស់​លោក​នោះ​ទេ។

វិទ្យុ​អាស៊ី​សេរី​មិន​អាច​ទាក់​ទង​សុំ​ការ​បំភ្លឺ​ពី​លោក សៅ សុខា មេ​បញ្ជា​ការ​កង​រាជ​អាវុធ​ហត្ថ​លើ​ផ្ទៃ​ប្រទេស​បាន​ទេ នៅ​ល្ងាច​ថ្ងៃ​ទី​៨ មីនា​នេះ ដោយ​ទូរស័ព្ទ​លោក​ពុំ​អាច​ទាក់​ទង​បាន។

ការ​ប្រើ​អំពើ​ហិង្សា​មក​លើ​ស្ត្រី​ឈ្មោះ ហេង គឹម​លាង ដោយ​សារ​មន្ត្រី​កង​រាជ​អាវុធ​ហត្ថ​នេះ បាន​កើត​ឡើង​ចំ​ថ្ងៃ​ខួប​គម្រប់ ១០០​ឆ្នាំ ថ្ងៃ​បុណ្យ​សិទ្ធិ​នារី​អន្តរ​ជាតិ៕

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល