ក្រុម​ការងារ​ ១០០​រាត្រី៖ រដ្ឋាភិបាល​​អសមត្ថភាព​​ទប់​ស្កាត់​​អាហារ​​គីមី​​តាម​​ព្រំដែន​​ពី​​វៀតណាម

ដោយ ហេង រស្មី
2019-09-13
អ៊ីម៉ែល
មតិ
Share
បោះពុម្ព
លោក មួង សូនី ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី ថ្លែង​ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ី​សេរី កាល​ពី​ថ្ងៃ​ទី​១៥ ខែ​សីហា ឆ្នាំ​២០១៦។
លោក មួង សូនី ប្រធាន​សមាគម​សម្ព័ន្ធ​និស្សិត​បញ្ញវន្ត​ខ្មែរ និង​ជា​សមាជិក​ក្រុម​ចងក្រង​សៀវភៅ​ស្ដីពី​ទស្សនៈ​បណ្ឌិត កែម ឡី ថ្លែង​ក្នុង​កម្មវិធី​វេទិកា​អ្នក​ស្ដាប់​វិទ្យុ​អាស៊ី​សេរី កាល​ពី​ថ្ងៃ​ទី​១៥ ខែ​សីហា ឆ្នាំ​២០១៦។
RFA

ក្រុម​យុវជន ១០០​រាត្រី ដែល​បន្ត​បេសកកម្ម​ពី​បណ្ឌិត កែម ឡី បាន​ផ្សាយ​របាយការណ៍​ស្រាវជ្រាវ​ថ្មី​មួយទៀត រក​ឃើញ​ថា រដ្ឋាភិបាល​អសមត្ថភាព​ទប់ស្កាត់​បន្លែ ផ្លែឈើ និង​ចំណីអាហារ​ផ្ទុក​សារធាតុ​គីមី នាំចូល​ពី​ប្រទេស​វៀតណាម។ ការ​លាតត្រដាង​របាយ​ការណ៍​នេះ បន្ទាប់ពី​ពួកគេ​បាន​ចុះ​សិក្សា​ស្រាវជ្រាវ រយៈ​ពេល ១​ឆ្នាំ និង​បាន​ចុះ​អង្កេត​សកម្មភាព​នាំចូល​ទំនិញ ចំណីអាហារ និង​បន្លែ​ពី​ប្រទេស​វៀតណាម នៅ​តាម​បណ្ដា​ខេត្ត​មួយ​ចំនួន ជាប់​ព្រំដែន​កម្ពុជា​-​វៀតណាម។

ចំណីអាហារ ត្រី​សាច់ ភេសជ្ជៈ និង បន្លែ​ផ្ទុក​សារធាតុ​គីមី នាំចូល​ពី​ប្រទេស​វៀតណាម មក​លក់ និង​ចែកចាយ​ទូទាំង​ប្រទេស​កម្ពុជា គឺជា​ប្រធានបទ​សំខាន់ ដែល​ក្រុម​យុវជន ពលរដ្ឋ និង​ក្រុម​អង្គការ​សង្គម​ស៊ីវិល ចាត់ទុកថា ជា​ឃាតក​លាក់​មុខ បំផ្លាញ​អាយុជីវិត​មនុស្ស និង​ប្រព័ន្ធ​សេដ្ឋកិច្ច​ប្រជាជន​ខ្មែរ រយៈពេល​វែង។

របាយការណ៍ ៦​ទំព័រ ដែល​ចេញផ្សាយ​កាលពី​ថ្ងៃ​ទី​១០ ខែ​កញ្ញា បាន​លាតត្រដាង​ពី​គុណវិបត្តិ និង​បញ្ហា​ប្រឈម​ជាច្រើន ទាក់ទិន​ចំណីអាហារ​លក់ដូរ ដោយ​សេរី​លើ​ទីផ្សារ ក្នុង​ប្រទេស​កម្ពុជា​ផ្ទុក​ធាតុគីមី និង​គ្មាន​ការ​ត្រួតពិនិត្យ​ត្រឹមត្រូវ​ពី​សំណាក់ អាជ្ញាធរ​ពាក់ព័ន្ធ​របស់​រាជរដ្ឋាភិបាល​។ លើស​ពី​នេះ ផ្សារ​ដើមគ ក្នុង​រាជធានី​ភ្នំពេញ ជាទី​តាំង​ចែកចាយ ចំណីអាហារ​ខ្នាត​ធំ នាំចូល​ពី​ប្រទេស​វៀតណាម។

ទំនិញ និង​ចំណីអាហារ​ទាំងនោះ​រួមមាន ត្រី សាច់ បន្លែ ផ្លែឈើ និង​គ្រឿង​ឧបភោគ​បរិភោគ​ជាច្រើន​ទៀត នាំចូល​ពី​ប្រទេស​វៀតណាម ផ្ទុក​សារធាតុ​គីមី។

របាយការណ៍​បន្ថែម​ថា ទំនិញ​ភាគច្រើន​នាំចូល​ពី​ប្រទេស​វៀតណាម ថៃ និង​ចិន​គ្មាន​គុណភាព លួច​បន្លំ​ស្លាក និង​ផ្ទុក​សារធាតុ​គីមី ត្រូវ​បាន​ចែកចាយ​នៅ​ទូទាំង​ប្រទេស​កម្ពុជា។ កាល​ពី​ឆ្នាំ​២០១៨ ប្រទេស​វៀតណាម​បាន​នាំ​ទំនិញ និង​ចំណីអាហារ ចូល​មក​លក់​នៅ​ប្រទេស​កម្ពុជា គិត​ជា​ប្រាក់​ជិត ៤០០​ពាន់​លាន​ដុល្លារ (.៧០០)​។ ចំណីអាហារ​ទាំងនោះ រួមមាន ត្រី សាច់ បន្លែ និង​គ្រឿង​ឧបភោគ​បរិភោគ ជាដើម ដែល​គេ​នាំចូល​គ្មាន​ការ​ត្រួត​ពិនិត្យ​ត្រឹមត្រូវ​ពី​សំណាក់​អាជ្ញាធរ​កម្ពុជា។

សមាជិក​ក្រុមការងារ ១០០​រាត្រី លោក មួង សូនី ថ្លែង​ថា ក្រុមការងារ​លោក បាន​ចុះ​សិក្សា​ស្រាវជ្រាវ​បញ្ហា​នេះ នៅ​ផ្សារ​ដើម​គរ និង​ផ្សារ​មួយ​ចំនួន​ទៀត ក្នុង​រាជធានី​ភ្នំពេញ ហើយ​ផ្សា​រទាំង​នោះ​បាន​ចែកចាយ បន្លែ និង​ចំណីអាហារ​នាំចូល​ពី​ប្រទេស​វៀតណាម​។ លោក​ថា ក្រុមការងារ​លោក​រក​ឃើញ​ថា តាម​ច្រក​ព្រំដែន​អន្តរជាតិ និង​ច្រក​របៀង​ស្ទើរតែ​ទាំងអស់ ឋិត​ក្នុង​នៅ​ខេត្ត​រតនគិរី មណ្ឌលគិរី ត្បូងឃ្មុំ និង​ខេត្ត​ស្វាយរៀង គឺ​សមត្ថកិច្ច​ពាក់ព័ន្ធ បា​នប​បណ្ដោយ​ឱ្យ​ពាណិជ្ជករ​វៀតណាម​នាំ​ទំនិញ​ចូល​លក់​ក្នុង​ប្រទេស​កម្ពុជា​ដោយ​សេរី។ លោក​ថា អាជ្ញាធរ​ពាក់ព័ន្ធ​តាម​ព្រំដែន គ្មាន​ឧបករណ៍ និង​សម្ភារ​គ្រប់គ្រាន់​ពិនិត្យ​ទំនិញ​មាន​សារជាតិ​គីមី​ឱ្យ​គ្រប់​ជ្រុងជ្រោយ​នោះ​ទេ៖ «ទំនិញចេញ​ពីវៀតណាម មកកម្ពុជា ដោយ​អនាធិបតេយ្យ តាម​រយៈ​ការ​សូកលុយ ។ ពលរដ្ឋ​វៀតណាម គេ​ចេញ​ចូល​មក​ខ្មែរ​យើង​ដោយ​សេរី​ដែរ ឧទាហរណ៍​ដូចជា នៅ​បាវិត ក្រុង​បាវិត​មាន​ច្រក​របៀង ៣ ទៅ ៤ ជា​ច្រក​ស្ពាន​ជា​ដើម ដែល​វៀតណាម​ចេញ​ចូល​ដោយ​សេរី ដោយ​សូក​លុយ​ឲ្យ​ខ្មែរ​យើង ប៉ូលិស និង​ទាហាន​ខ្មែរ​យើង។ ទំនិញ​វៀតណាម ចូល​មក​កម្ពុជា​យើង យើង​ខ្វះ​ឧបករណ៍​ត្រួត​ពិនិត្យ ខ្វះ​ប៉ុស្តិ៍​ត្រួត​ពិនិត្យ យើង​ជូន​ត្រួត ជូន​ក៏​អត់ ហើយ​អំពើ​ពុក​រលួយ វា​ធ្វើ​ឲ្យ​ទំនិញ​ទាំង​អស់​ហ្នឹង​ចូល​មក​ម្ពុជា​ដោយ​សេរី»

ខ្លឹមសារ​របាយការណ៍​បាន​បង្ហាញ​ពី​ចំណុច​សំខាន់ៗ មួយ​ចំនួន ឆ្លុះបញ្ចាំង​ពី​តួនាទី និង​ភារកិច្ច​របស់​រដ្ឋាភិបាល ដែល​មិន​យកចិត្តទុកដាក់​ទប់ស្កាត់​ទំនិញ​ខូចគុណភាព និង​ផ្ទុក​សារធាតុ​គីមី ពី​ប្រទេស​វៀតណាម ដើម្បី​ការពារ​សុវត្ថិភាព និង​សុខុមាលភាព​ប្រជាជន​ខ្មែរ​។ នៅ​តាម​ច្រក​ព្រំដែន​កម្ពុជា​-​វៀតណាម ស្ទើរតែ​គ្រប់​ខេត្ត​មាន​ច្រក​អន្តរជាតិ និង​ច្រក​របៀង​តូចៗ ជាច្រើន​ទៀត ភាគច្រើន​គ្មាន​ប្រព័ន្ធ​ត្រួតពិនិត្យ​ទំនិញ​ខូចគុណភាព​នោះ​ទេ។ របាយការណ៍​បន្ថែម​ថា ច្រក​ព្រំដែន​ដូងរ័ត្ន ក្នុង​ខេត្ត​ត្បូងឃ្មុំ និង​ច្រក​ព្រំដែន​ជាច្រើន​កន្លែង​ទៀត នៅ​ក្រុង​បាវិត ក្នុង​ខេត្ត​ស្វាយរៀង មាន​ច្រក​របៀង​ខុសច្បាប់​ជាច្រើន ដែល​ពាណិជ្ជករ​វៀតណាម នាំ​ទំនិញ និង​ចំណីអាហារ​ចូល​មក​ប្រទេស​កម្ពុជា គ្មាន​ការពិនិត្យ​។ ច្រក​ព្រំដែន​ទាំងនោះ​សមត្ថកិច្ច​កម្ពុជា មាន​មនោសញ្ចេតនា​ជាមួយ​ជនជាតិ​វៀតណាម ហើយ​បាន​ប្រព្រឹត្ត​អំពើពុករលួយ ជា​ថ្នូរ​អនុញ្ញាត​ឱ្យ​នាំ​ទំនិញ​ចូល​ដោយ​ងាយស្រួល។

លោក មួង សូនី អះអាង​ថា ទំនិញ និង​ចំណីអាហារ​ប្រមាណ ៨០​ភាគរយ លក់​នៅ​ផ្សារ​ដើមគ និង​ផ្សារ​មួយ​ចំនួន​ទៀត​ក្នុង​ក្រុងភ្នំពេញ គឺ​នាំចូល​ពី​ប្រទេស​វៀតណាម​។ លោក​ថា ឥទ្ធិពល​សេដ្ឋកិច្ច​ទីផ្សារ​ទំនិញ​វៀតណាម ស្ទើរតែ​ក្ដោប​ក្ដាប់​ទីផ្សារ​កម្ពុជា​ទាំងមូល៖ «វៀតណាម​គេ​អត់​យក​របស់​ខ្មែរ​យើង​លក់​ទេ។ របស់​ខ្មែរ​យើង​ដែល​យក​ទៅ​បោះ​ដុំ​នៅ​ផ្សារ​ដើម​គ គេ​អត់​យក​ទេ គេ​យក​តែ​របស់​វៀតណាម​ទេ។ ខ្មែរ​យើង អាជីវកម្ម​ខ្មែរ​យើង​នៅ​តាម​ខែត្រ មក​យក​តែ​របស់​វៀតណាម​ទៅ​លក់ មាន​ន័យ​ថា វៀតណាម​គ្រប់គ្រង ផ្សារ​ដើម​គ និង​ផ្សារ​នាគ​មាស រួច​បាត់​ទៅ​ហើយ គឺ​គេ​ក្តោបក្តាប់​សេដ្ឋកិច្ច​ទីផ្សារ​បន្លែបង្ការ និង​ការ​ហូប​ចុងរ​បស់​ខ្មែរ​បាត់​ទៅ​ហើយ»

អាស៊ីសេរី​បាន​ព្យាយាម​ទាក់ទង​អ្នកនាំពាក្យ​ក្រសួងពាណិជ្ជកម្ម លោក ស៊ាង ថៃ និង​អ្នកនាំពាក្យ​រដ្ឋាភិបាល លោក ផៃ ស៊ីផាន ដើម្បី​សុំ​ការ​បំភ្លឺ​រឿង​នេះ តែ​ទូរស័ព្ទ​ហៅ​ចូល​ច្រើនដង​គ្មាន​អ្នកទទួល​នៅ​ថ្ងៃ​ទី​១២ កញ្ញា។

ចំណែក​នាំ​ពាក្យ​គណបក្ស​ប្រជាជន លោក សុខ ឥសាន ចាត់​ទុក​របាយការណ៍​នេះ មិន​បង្ហាញ​ពី​សុក្រឹត និង​ឯករាជភាព​នោះ​ទេ ហើយ​ផ្ទុយទៅវិញ​បាន​ដាក់​ទម្ងន់​មក​លើ​រាជរដ្ឋាភិបាល​។ លោក​បញ្ជាក់​ថា របាយការណ៍​នេះ គឺ​មិន​អាច​យក​ជា​ផ្លូវការ​បាន​នោះ​ទេ ព្រោះ​ក្រុមការងារ ១០០​រាត្រី ពុំ​មែន​អ្នកបច្ចេកទេស​ទេ។ លោក​ថា រដ្ឋាភិបាល​កំពុង​ខិតខំ​កសាង​ព្រំដែន សន្តិភាព មិត្តភាព និង​សហប្រតិបត្តិការ ទាក់ទិន​ការ​នាំ​ទំនិញ​ចេញចូល​ទៅវិញទៅមក​។ រីឯ​ការ​ដោះស្រាយ​បញ្ហា​នេះ ជា​កត្តា​រួម ដែល​ទាំងអស់​គ្នា​ត្រូវ​ទទួលខុសត្រូវ ពុំ​មែន​ដាក់​បន្ទុក​តែ​លើ​រដ្ឋាភិបាល​ម្នាក់​នោះ​ទេ៖ «យើង​មិន​អាច​យក​ជា​ផ្លូវការ​បាន​ទេ ក្នុង​របាយការណ៍​របស់​គាត់ ព្រោះ​គាត់​ពុំ​មែន​អ្នក​បច្ចេកទេស​ទេ គាត់​គ្រាន់​តែ​ជា​ថា។ ចំពោះការ រាជរដ្ឋាភិបាលមិនយកចិត្តទុកដាក់មិនត្រឹមត្រូវទេ ជាតិ​គីមី​នេះ មិន​មែន​តែ​ទំនិញ​មក​ពី​វៀតណាម​ទេ? មក​ពី​ណា​ក៏​ដោយ ដោយសារ​តែ​វិទ្យាសាស្ត្រ​ទំនើប​វា​មាន​លាយ​គីមី​ហ្នឹង​ឯង។ ទាំង​ផលិត​នៅ​ក្នុង​ស្រុក ទាំង​នាំ​ចូល និងនាំចេញ។ បញ្ហាសំខាន់គឺ យើងខិតខំទាំងអស់គ្នា​ពុំ​មែន​ដាក់​បន្ទុក​លើ​នរណា​ម្នាក់​ទេ»

កន្លងទៅ​លោកនាយក​រដ្ឋមន្ត្រី ហ៊ុន សែន ធ្លាប់​បាន​ស្ដីបន្ទោស​ពលរដ្ឋ ដែល​ប្រើប្រាស់ និង​បរិភោគ បន្លែ ផ្លែឈើ អាហារ ត្រី សាច់ ផ្ទុក​សារធាតុ​គីមី ហើយ​បែរជា​ទម្លាក់កំហុស​ទៅលើ​រដ្ឋាភិបាល​ទៅវិញ​។ លោក​ថា ជា​រឿង​ជ្រុល​ពេក​ហើយ ដែល​មក​ស្ដីបន្ទោស​រដ្ឋាភិបាល​។ តាមពិត​ពលរដ្ឋ​ខ្លួនឯង​ទេ ដែល​ប្រើប្រាស់​មិន​ចេះ​មើល៖ «បើ​កុំទិញវា​ចប់​ហើយ អ្នក​ដែល​នាំ​បន្លែបង្ការ ដែល​មាន​សារធាតុ​គីមី​លក់ លែង​ដាច់​ហើយ នាំ​គ្នា​ធ្វើ​ពហិការ​កុំ​ទិញ​បន្លែ​បង្ការ ឬ សាច់ ដែល​មាន​សារធាតុ​គីមី​ទៅ​វា​ចប់​រឿង​ហើយ ចាំបាច់​ទៅ​ជេរ​រដ្ឋាភិបាល​ធ្វើ​អី? តែ​ខ្លួន​ឯង ទៅ​ទិញ​អា​ហ្នឹង​យក​មក​ស៊ី។ ស៊ី​ហើយ​មាន​ជំងឺ​ជេរ​រដ្ឋាភិបាល។ ស៊ីខ្លួនឯងសោះមកជេរ​គ្នា​ដែរ រឿង​ជេររ​ដ្ឋាភិបាល គឺ​ជេរ ហ៊ុន សែន តែ​ម្តង។ ឆ្នាំង​លោក​ឯង ទិញ​ខ្លូន​ឯង ស៊ី​ខ្លួន​ឯង ចុះ​មិន​រើស រួច​លាង​ក៏​លាង​មិន​ស្អាត»

យុវជន​រស់នៅ​រាជធានី​ភ្នំពេញ លោក ម៉ា ចិត្រា បារម្ភ​ថា រដ្ឋាភិបាល​ហាក់​មើល​រំលង​អំពី​សុខភាព​របស់​ប្រជាជន ដែល​កំពុង​ប្រើប្រាស់​ផលិតផល​ប្រចាំថ្ងៃ មាន​សារ​ធាតុគីមី​ក្នុង​បន្លែ ផ្លែឈើ និង​ម្ហូបអាហារ​នេះ បំផ្លាញ​សុខភាព​របស់​ប្រជាជន​ដោយ​មិន​ដឹង​ខ្លួន​។ លោក​ថា រដ្ឋាភិបាល​ហាក់​មាន​ចេតនា​បណ្ដោយ​ឱ្យ​មាន​អំពើពុករលួយ​តាមរយៈ​ការ​នាំ​ចូល​នេះ​ហើយ ជា​មូលហេតុ​មិន​គាំទ្រ ផលិតផល​ក្នុងស្រុក​របស់​ខ្លួន៖ «ខ្ញុំ​យល់​ថា រដ្ឋាភិបាល​នៅ​មាន​ភាព​ទន់​ខ្សោយ​ក្នុង​ការ​ផលិត ផលិត​ក្នុង​ស្រុក ដើម្បី​ឲ្យ​បាន​ទៅ​កាន់​ដាក់​លក់​នៅ​លើ​ទីផ្សារ មាន​ន័យ​ថា រដ្ឋាភិបាល​មិន​បាន​ជំរុញ ឬ​លក់​ទឹក​ចិត្ត ដើម្បី​ឲ្យ​ពលរដ្ឋ​គាត់​ផលិត អាហារ​មាន​សារធាតុ​ល្អ»

មន្ត្រី​នាំ​ពាក្យ​សមាគម​អាដហុក លោក ស៊ឹង សែនករុណា យល់​ឃើញ​ថា របាយការណ៍​នេះ ឆ្លុះបញ្ចាំង​ពី​ការពិត និង​មាន​សារៈសំខាន់​ណាស់ ដែល​រដ្ឋាភិបាល​គួរ​មាន​វិធានការ​ដោះស្រាយ​ឱ្យ​បាន​ត្រឹមត្រូវ​។ លោក​ថា បើ​រដ្ឋាភិបាល​នៅតែ​បណ្ដោយ​ឱ្យ​បាតុភាព​នេះ កើតឡើង​ដដែលៗ ទៀត នឹង​ប៉ះពាល់​សុខុមាលភាព និង​ជីវភាព​ពលរដ្ឋ កាន់តែ​ធ្ងន់ធ្ងរ៖ «រដ្ឋធម្មនុញ្ញ ក្នុង​មាត្រា ៧២ បាន​លើក​ឡើង​ច្បាស់​ថា រដ្ឋ​ជា​អ្នក​ការពារ និង​ធានា​ទៅ​លើ​សុខភាព និង​សុវត្ថិភាព​ពលរដ្ឋ​ហ្នឹង។ យើង​គួរ​ពិនិត្យ​មើល​ឡើង​វិញ​ថា តើ​រក​វិធីសាស្ត្រ​បែប​ណា ដើម្បី​កុំ​ឲ្យ​ទប់ស្កាត់ កុំ​ឲ្យ​ទំនិញ​ទាំង​អស់​កើត​មាន។ គួរ​តែ​មាន​ការ​ចុះ​ត្រួត​ពិនិត្យ បើ​សិន​ជា ខ្វះ​សម្ភារ​ណា​មួយ ក្នុង​ការ​ត្រួត​ពិនិត្យ​ទំនិញ​នាំ​ចូល គួរ​ធ្វើ​ការ​រៀបចំ​ឲ្យ​បាន​ច្បាស់លាស់»

ប្រធាន​អង្គការ​សម្ព័ន្ធ​គណនេយ្យភាព​សង្គម​កម្ពុជា លោក សន ជ័យ មើលឃើញ​ថា ការ​ធ្វេស​ប្រហែស​ឱ្យ​នាំ​ទំនិញ​ចូល​ពី​វៀតណាម ផ្ទុក​សារធាតុ​គីមី បង្ក​ប៉ះពាល់​សុខភាព​ពលរដ្ឋ​អ្នកប្រើប្រាស់​ធ្ងន់ធ្ងរ​។ លោក​ថា ពលរដ្ឋ​ខ្មែរ​មួយ​ចំនួន​មាន​ជំងឺ និង​សុខភាព​ទ្រុឌទ្រោម បាន​យក​លុយ​ជាច្រើន ទៅ​ព្យាបាល​នៅ​ក្រៅ​ប្រទេស​៖ «ត្រូវ​មាន​ប្រព័ន្ធ​ត្រួត​ពិនិត្យ មាន​ការ​ត្រួត​ពិនិត្យ​ជាក់​ស្តែង​តាម​ព្រំដែន ដើម្បី​ធានា​ថា បន្លែ ត្រី​សាច់​នាំ​ចូល​ពី​វៀតណាម គ្មាន​សារធាតុ​គីមី។ បន្លែ​ត្រី​សាច់ និង​គ្រឿងទេស​មាន​សារធាតុ​គីមី​មាន​អ្វី​ខ្លះ? មិន​បាច់​ទៅ​មើល​ទី​ឆ្ងាយ​ទេ យើង​មើល​តែ​ពលរដ្ឋ​កម្ពុជា​ឈឺ សុខភាព​ទ្រុឌទ្រោម យក​លុយ​ទាំង​ដុំៗ ទៅ​ព្យាបាល​ទៅ​ក្រៅ​ប្រទស មាន​ថៃ វៀតណាម និង​សិង្ហបុរីជាដើម។ នេះ​ហើយ​ជា​ផល​ប៉ះពាល់»

ក្រុមការងារ ១០០ រាត្រី បន្ថែម​ថា បច្ចុប្បន្ន ពលរដ្ឋ​ខ្មែរ​ភាគច្រើន កំពុង​រស់នៅ​ដោយ​ភាព​ភ័យខ្លាច ក្នុង​ការ​បរិភោគ និង​បន្លែ​លក់​នៅ​ទីផ្សារ។ ពួកគេ​សង្ស័យ​ថា សារធាតុ​គីមី ក្នុង​ចំណីអាហារ​ទាំងនោះ ជា​មូលហេតុ​ធ្វើ​ឱ្យ​អ្នកប្រើប្រាស់ កើត​ជំងឺ មាន​ដូចជា មហារីក​ក្រពះ និង​ទឹកនោមផ្អែម​ជាដើម​។ ក្រុម​យុវជន ១០០​រាត្រី ចាត់​ទុក​បញ្ហា​នេះ​ថា ជា​យុទ្ធសាស្ត្រ​នយោបាយ​រយៈពេល​វែង​របស់​រដ្ឋាភិបាល​វៀតណាម មាន​ចេតនា​ធ្វើទុក្ខបុកម្នេញ​ប្រជាជន​ខ្មែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

ព្រោះអំពើពុករលួយ រលួយដល់ឆ្អឹង

Sep 13, 2019 08:13 AM

គេហទំព័រ​ទាំងមូល