យុវជន​សោកស្ដាយ​ដែល​នាយករដ្ឋមន្ត្រី មិន​គោរព​ការ​សន្យា​ថា មិន​ចាប់ចង​សកម្មជន​បក្ស​ប្រឆាំង

ដោយ ជាតិ ចំណាន
2020-04-23
អ៊ីម៉ែល
មតិ
Share
បោះពុម្ព
ពី​ឆ្វេង​ទៅ​ស្ដាំ៖ លោក កែវ ថៃ ប្រធាន​គណបក្ស​សង្គ្រោះ​ជាតិ ខេត្ត​កំពង់ឆ្នាំង លោក ថៃ គន្ធា ចាប់​ខ្លួន​នៅ​ខេត្ត​កំពង់ឆ្នាំង និង​លោក យឹម សារ៉េត ជំទប់​ទី១ ឃុំ​ចន្ទ្រី ស្រុក​រមាសហែក ខេត្ត​ស្វាយរៀង កំពុង​ជាប់​ឃុំ​នៅ​គុក​ព្រៃ​ស។
ពី​ឆ្វេង​ទៅ​ស្ដាំ៖ លោក កែវ ថៃ ប្រធាន​គណបក្ស​សង្គ្រោះ​ជាតិ ខេត្ត​កំពង់ឆ្នាំង លោក ថៃ គន្ធា ចាប់​ខ្លួន​នៅ​ខេត្ត​កំពង់ឆ្នាំង និង​លោក យឹម សារ៉េត ជំទប់​ទី១ ឃុំ​ចន្ទ្រី ស្រុក​រមាសហែក ខេត្ត​ស្វាយរៀង កំពុង​ជាប់​ឃុំ​នៅ​គុក​ព្រៃ​ស។
រូប៖ ហ្វេសប៊ុក

ក្រុម​និស្សិត ព្រះសង្ឃ និង​សកម្មជន​យោ​បាយ​សង្កេត​ឃើញ​ថា លោកនាយក​រដ្ឋមន្ត្រី ហ៊ុន សែន មិន​បាន​អនុវត្ត​តាម​ការសន្យា​កន្លងមក​នោះ​ទេ ដោយ​របប​របស់​លោក​នៅតែ​តាម​ធ្វើទុក្ខបុកម្នេញ​សកម្មជន​គណបក្ស​សង្គ្រោះ​ជាតិ​ដដែល​។ ពួកគេ​ថា សិទ្ធិ​សេរីភាព​របស់​ពល​រដ្ឋ​កំពុង​ឋិត​ក្នុង​ភាព​ផុយ​ស្រួល និង​ប្រឈម​ការ​ចាប់ចង​គ្រប់​ពេល ប្រសិនបើ​ពួកគេ​មាន​ទស្សន​នយោបាយ ផ្ទុយ​ពី​រដ្ឋាភិបាល។

សកម្មជន​គណបក្សប្រឆាំង ដែល​ភៀសខ្លួន ទៅ​ប្រទេស​ថៃ លោក នាង សុឃុន យល់​ថា ការ​លើកឡើង​របស់​លោកនាយក​រដ្ឋមន្ត្រី ហ៊ុន សែន គ្រាន់តែ​ជា​ឆាកល្ខោន ដើម្បី​ទាក់ទាញ សកម្មជន​គណបក្ស​សង្គ្រោះជាតិ ឱ្យ​វិល​ចូល​ទ្រុង​វិញ​ប៉ុណ្ណោះ​។ លោក​បញ្ជាក់​ថា ការ​អំពាវនាវ​របស់​លោក ហ៊ុន សែន ពុំ​មែន​ធ្វើ​ឡើង​ដោយ​ចិត្ត​ស្មោះត្រង់​ក្នុង​ស្មារតី​បង្រួបបង្រួម​ជាតិ​នោះ​ទេ។ «»

កាល​ពី​ខែ​វិច្ឆិកា ឆ្នាំ ២០១៩ លោក​នាយករដ្ឋមន្ត្រី ហ៊ុន សែន បាន​បញ្ជា​ឱ្យ​ដោះលែង និង​បញ្ឈប់​ការ​ចាប់ចង ឬ​ធ្វើទុក្ខបុកម្នេញ លើ​អ្នក​ទោស​នយោបាយ ដែល​ត្រូវ​រង​ការ​បង្ក្រាប​ក្នុងអំឡុងពេល​យុទ្ធនាការ ធ្វើ​មាតុភូមិនិវត្តន៍​របស់​លោក សម រង្ស៊ី កន្លង​មក។

លោក​អះអាង​ថា ការ​ដោះលែង និង​បញ្ឈប់​ការ​ចាប់​ចង​នេះ ដោយសារ​លោក​ពិភាក្សា​ជាមួយ លោក ស ខេង ហើយ​យល់ថា អ្នកគាំទ្រ​បក្ស​ប្រឆាំង​ទាំងនោះ ជា​អ្នក​ចាញ់បោក​ក្រុម​មេដឹកនាំ​គណបក្ស​សង្គ្រោះ​ជាតិ ដែល​រុញច្រាន​ឱ្យ​ពលរដ្ឋ​រង​ទុក្ខទោស​ជំនួស​ខ្លួន និង​យល់ថា ផែន​ការ​ធ្វើ​រដ្ឋប្រហារ​នៅ​ថ្ងៃ​ទី​៩ វិច្ឆិកា ទទួល​បរាជ័យ​៖ «ខ្ញុំ​ព្រះករុណា​ខ្ញុំ​អំពាវនាវ ឱ្យ​មនុស្ស​ទាំងអស់ ដែល​កំពុង​រត់គេច​ខ្លួន ត្រឡប់​មក​ភូមិកំណើត​វិញ កុំ​លាក់ខ្លួន​នៅ​កន្លែង​នេះ និង​លាក់ខ្លួន​នៅ​កន្លែង​នោះ តទៅទៀត ហើយ​អាជ្ញាធរ​មូលដ្ឋាន កង​កម្លាំង​ប្រដាប់​អាវុធ ជាពិសេស​នគរបាល និង​អាវុធហត្ថ ក៏ដូចជា មន្ត្រី​នៅ​មូលដ្ឋាន​ទាំងអស់ កុំ​ធ្វើ​អី​ឱ្យ​សោះ ហើយ​គេ​មក​ផ្ទះ​យ៉ាង​ស្រួល ហើយ​រាប់អាន​គ្នា​ទៅ ធ្វើ​ការ​ជាមួយគ្នា​ទៅ»

ការ​លើក​ឡើង​របស់ លោក ហ៊ុន សែន បែបនេះ ញ៉ាំង​ឱ្យ​សកម្មជន​គណបក្សប្រឆាំង និង​អ្នកគាំទ្រ​បក្ស​ប្រឆាំង​មួយ​ចំនួន ដែល​ភៀសខ្លួន​ទៅ​ក្រៅ​ប្រទេស សប្បាយចិត្ត រហូត​មាន​អ្នកខ្លះ នាំគ្នា​វិល​ទៅ​ស្រុកកំណើត​រៀងៗ​ខ្លួន ដោយ​រំពឹង​ថា អាច​នឹង​រួច​ផុត​ពី​ការ​យាយី​។ ក៏ប៉ុន្តែ​ធាតុ​ពិត​ពុំ​ដូច្នេះ​ទេ នៅ​គ្រា​ដែល​ផ្ទុះ​ជំងឺ​កូវីដ-១៩ ហើយ​អាជ្ញាធរ​ថៃ បិទ​ព្រំដែន​គ្រប់​ច្រក បែរ​រដ្ឋាភិបាល​កម្ពុជា​ឆក់​ឱកាស​នេះ ចាប់ខ្លួន​សកម្មជន​បក្ស​ប្រឆាំង​ជា​បន្តបន្ទាប់ កើន​ដល់​ចំនួន ១២​នាក់ ហើយ​គិត​ត្រឹម​ថ្ងៃ​ទី​២២ មេសា។

និស្សិត​មួយ​រូប នៅ​ខេត្ត​កំពង់ចាម កញ្ញា ជា គន្ធីន យល់ថា បើ​មេដឹកនាំ​មិន​គោរព​ពាក្យ​សច្ចៈ​ទេ ពលរដ្ឋ​នឹង​បាត់​ទំនុក​ចិត្ត ហើយ​នាយករដ្ឋមន្ត្រី​ក៏​បាត់បង់​ប្រជាប្រិយភាព​ដែរ​។ កញ្ញា​ចង់​ឃើញ លោកនាយក​រដ្ឋមន្ត្រី ហ៊ុន សែន ដោះស្រាយ​បញ្ហា​ប្រទេសជាតិ ឱ្យ​ប្រសើរ​ឡើងវិញ ជាពិសេស​គោរព​ពាក្យសន្យា​បញ្ឈប់​ការ​ចាប់​ចង​មន្ត្រី​បក្ស​ប្រឆាំង​តទៅ​ទៀត​៖ «ការ​និយាយ​ពី​សច្ចៈ​ផ្ទាល់ខ្លួន និយាយ​ម៉ាត់​ណា គឺ​ធ្វើ​បែប​ហ្នឹង មិនមែន​និយាយ បាត់​ដៃ​ខ្នងដៃ ដល់ពេល​គាត់​និយាយ​អ៊ីចឹង ការបាត់បង់​ប្រជាប្រិយភាព​ក៏​បាត់បង់​ដែរ ប្រជារាស្ត្រ​លែង​មាន​ទំនុក​ចិត្ត​លើ​គាត់ ហើយ​មួយវិញទៀត គាត់​ធ្វើ​ឱ្យ​ប្រទេស អាច​ជ្រួលច្របល់ ដោយសារ​ពាក្យសំដី​របស់​គាត់»

ចំណែក ព្រះតេជព្រះគុណ ថា សារ៉ាត់ មាន​ថេរដីកា​ថា សច្ចៈ​វាចា​នេះ គឺ​ជា​តម្លៃ​ស្នូល ដ៏​សំខាន់​របស់​មេដឹកនាំ​ប្រទេស ដែល​ចាំបាច់​ត្រូវ​អនុវត្ត​ឱ្យ​បាន​ខ្ជាប់ខ្ជួន​។ ព្រះអង្គ​មាន​ថេរដីកា​បន្ថែម​ថា ក្នុង​ព្រះពុទ្ធសាសនា ប្រសិន​បើ មេដឹកនាំ មិន​អនុវត្ត​តាម​ការ​សន្យា ទេ នឹង​បាត់បង់​តម្លៃ ធ្វើ​ឱ្យ​ពលរដ្ឋ​អស់​ជំនឿ​ចិត្ត​៖ «ទី​១ បាត់បង់​ទំនុក​ចិត្ត​ពី​ប្រជាពលរដ្ឋ នៅ​ពេល​ដែល​ខ្លួន​និយាយ​លើក​ក្រោយ ឬ​អំពាវនាវ​លើក​ក្រោយ ឱ្យ​ពលរដ្ឋ​ចូលរួម គឺ​គាត់​បាត់បង់​ទំនុក​ចិត្ត នៅ​ពេល​យើង កុំ​បន្ទោស​ពលរដ្ឋ ត្រូវ​ដឹង​ថា ទង្វើ​ដែល​យើង​និយាយ យើង​មិន​ផ្ដល់​តម្លៃ​ខ្លួនឯង និង​មិន​ប្រកាន់​ពាក្យ​សច្ចៈ។ នេះ​ជា​ផល​អាក្រក់ គឺជា​បាបកម្ម​មួយ ដែល​យើង​មិន​គោរព​ពាក្យ​សំដី​ខ្លួនឯង»

ឆ្លើយ​តប​រឿង​នេះ អ្នកនាំពាក្យ​គណបក្ស​កាន់អំណាច លោក សុខ ឥសាន ប្រាប់​អាស៊ីសេរី​ថា ការ​ចាប់ខ្លួន សកម្មជន​គណបក្សប្រឆាំង​ជាច្រើន​នាក់ នៅ​ពេល​ថ្មីៗ​នេះ គឺ​ដោយសារតែ​ពួកគេ នៅតែ​បន្ត​ធ្វើ​សកម្មភាព​ប្រឆាំង​រដ្ឋាភិបាល​។ លោក​ថា សកម្មជន​នយោបាយ​ណា ដែល​មិន​មាន​សកម្មភាព​ប្រឆាំង​រដ្ឋាភិបាល​ទេ អាជ្ញាធរ​នឹង​មិន​ចាប់ខ្លួន​ទេ​៖ «អតីត​បក្ស​ប្រឆាំង ត្រូវ​បាន​រំលាយ ដោយ​តុលាការ​កំពូល​ហើយ​។ អ៊ីចឹង​ទៅ ជា​ខ្មោច​ដែល​ខុសច្បាប់ ហើយ​អ្នក​ដែល​គាំទ្រ​អ្នក​ខុសច្បាប់ អ្នក​ហ្នឹង​ក៏​ខុសច្បាប់​ដែរ​។ យល់​ទេ​? បើ​បងប្អូន​នៅ​ក្នុង​ស្រុក​ក្តី និង​នៅ​ក្រៅ​ក្តី ឈប់​ធ្វើ​សកម្មភាព គ្មាន​អ្នក​រុក​គួន​អី​គាត់ វា​អត់​ទេ។ វា​ខូច​តែ​គាត់​ធ្វើ​សកម្មភាព»

ចាប់​តាំង​ពី​ឆ្នាំ ២០២០ មកទល់​ថ្ងៃ​ទី​២២ មេសា មាន​សកម្មជន​បក្ស​ប្រឆាំង ១២ នាក់​ហើយ ដែល​ត្រូវ​បាន​អាជ្ញាធរ​ចាប់ខ្លួន និង​បញ្ជូន​ទៅ​តុលាការ ដោយ​ចោទ​ថា រួមគំនិត​ក្បត់ ញុះញង់​ឱ្យ​យោធា​មិន​ស្ដាប់​បញ្ជា និង​ញុះញង់​ឱ្យ​ប្រព្រឹត្ត​បទឧក្រិដ្ឋ​ជាអាទិ៍​។ កាលពី​ចុង​ឆ្នាំ ២០១៩ តុលាការ​បាន​ដោះលែង​សកម្មជន​បក្ស​ប្រឆាំង​ជាង ៧០ នាក់ នៅសល់​ជាង ១០​នាក់​ទៀត មិន​ទាន់​ដោះលែង បន្ទាប់​ពី​លោក ហ៊ុន សែន បញ្ជា​ឱ្យ​ដោះលែង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល