គណបក្ស សង្គ្រោះជាតិ ទាមទារឱ្យរបបក្រុងភ្នំពេញ ដែលដឹកនាំដោយលោក ហ៊ុន សែន ចេញមុខទទួលខុសត្រូវ ចំពោះហេតុការណ៍បាក់រលំអគារនៅក្នុងខេត្តព្រះសីហនុ ដែលបានធ្វើឱ្យមនុស្សសម្លាប់ និងរងរបួសជាច្រើននាក់។
នៅក្នុងសេចក្ដីថ្លែងការណ៍របស់គណបក្ស សង្គ្រោះជាតិ នៅថ្ងៃទីចន្ទ ទី២៤ មិថុនានេះ បានថ្កោលទោស ចំពោះអាជ្ញាធររបបក្រុងភ្នំពេញ ដែលមានការធ្វេសប្រហែសមិនយកចិត្តទុកដាក់ចំពោះការគ្រប់គ្រង ត្រួតពិនិត្យ និងការសាងសង់សំណង់អគារគ្មានគុណភាព ព្រមទាំងគ្មានលិខិតអនុញ្ញាតសាងសង់តាមច្បាប់។
គណបក្សប្រឆាំងមួយនេះ ក៏បានទាមទារឱ្យរបបក្រុងភ្នំពេញចាត់វិធានការ និងអនុវត្តច្បាប់ឱ្យបានត្រឹមត្រូវពាក់ព័ន្ធនឹងវិស័យសំណង់ ជាពិសេស អគារសំណង់ទាំងអស់របស់ជនជាតិចិន ឬសាងសង់ដោយក្រុមហ៊ុនវិនិយោគចិននៅលើទឹកដីកម្ពុជា។
មេដឹកនាំជាន់ខ្ពស់នៃគណបក្សប្រឆាំងទាំងពីរ គឺលោក កឹម សុខា និងលោក សម រង្ស៊ី ក៏បានថ្លែងសារចូលរួមមរណទុក្ខជាមួយក្រុមគ្រួសារជនរងគ្រោះ ដែលបានស្លាប់ និងរងរបួសនៅក្នុងហេតុការណ៍បាក់រលំសំណង់អគារកម្ពស់ ៧ជាន់នៅក្នុងខេត្តព្រះសីហនុ។
ប្រធានស្ដីទីគណបក្ស សង្គ្រោះជាតិ លោក សម រង្ស៊ី បានស្ដីបន្ទោសថា ហេតុការណ៍នេះ គឺបណ្ដាលមកពីអំពើពុករលួយ ការព្រងើយកន្តើយលើការអនុវត្តច្បាប់ មិនយកចិត្តទុកដាក់លើបញ្ហាបច្ចេកទេស និងគ្មានស្មារតីទទួលខុសត្រូវរបស់ថ្នាក់ដឹកនាំប្រទេសយើងសព្វថ្ងៃ។ នេះគ្រាន់តែជាសញ្ញាមួយ ដែលយើងទើបតែមើលឃើញទាំងអស់គ្នា។
លោក សម រង្ស៊ី បញ្ជាក់ថា នៅប្រទេសកម្ពុជាសព្វថ្ងៃ មនុស្សខិលខូច ចង់ធ្វើអ្វីក៏បានដែរ ឲ្យតែមានលុយ ហើយថា របបពុករលួយដឹកនាំដោយ ហ៊ុន សែន គឺជាគ្រោះថ្នាក់សម្រាប់ប្រជាពលរដ្ឋខ្មែរទូទៅ។
អាស៊ីសេរីមិនអាចសុំការបំភ្លឺពីលោក ផៃ ស៊ីផាន អ្នកនាំពាក្យរដ្ឋាភិបាលបានទេ ដោយសារតែទូរស័ព្ទមិនមានអ្នកទទួល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។