កម្ពុជា​-​ឡាវ​ព្រមព្រៀងគ្នា​​បណ្ដោះអាសន្ន​​ដក​​កងទ័ព​​ចេញ​​ពី​​តំបន់​​មាន​​ជម្លោះ

ដោយ ហេង រស្មី
2019-08-30
អ៊ីម៉ែល
មតិ
Share
បោះពុម្ព
ទាហាន​ខ្មែរ (ឆ្វេង) និង​ទាហាន​ឡាវ (ស្ដាំ)។
ទាហាន​ខ្មែរ (ឆ្វេង) និង​ទាហាន​ឡាវ (ស្ដាំ)។
រូប​ពី​នាយកដ្ឋាន​ព័ត៌មាន ក្រសួង​ការពារជាតិ

យោធា​ខ្មែរ​និង​ឡាវ​បាន​ដក​កងទ័ព​បន្ទាប់ពី​បាន​ព្រមព្រៀងគ្នា​ពាក់ព័ន្ធ​រឿង​ជម្លោះព្រំដែន​នៅ​តំបន់​មាន​ជម្លោះ​នៅ​ក្នុង​ខេត្ត​ព្រះវិហារ​ជាប់​នឹង​ព្រំដែន​ឡាវ។ លទ្ធផល​នេះ បាន​កើត​ឡើង ក្រោយ​ពី​ទាហាន​ការពារ​ព្រំដែន​នៃ​ប្រទេស​ទាំងពីរ បាន​ជួប​ពិភាក្សា​គ្នា​ដើម្បី​ដោះស្រាយ​ភាព​តានតឹង​នៅ​តាម​ព្រំប្រទល់​ថ្ងៃ​ទី​២៩ សីហា​នេះ។

លោក ទៀ បាញ់ រដ្ឋមន្ត្រី​ក្រសួង​មហាផ្ទៃ​ប្រាប់​អាស៊ីសេរី​តាម​ទូរស័ព្ទ​ថា ទាំង​ភាគី​សងខាង​បាន​ព្រមព្រៀងគ្នា​ថា នឹង​ដក​កងទ័ព​ចេញពី​តំបន់​មាន​ជម្លោះ​តែ​រៀង​ៗ​ខ្លួន​ហើយ​សន្យា​ថា នឹង​មិន​មាន​បញ្ហា​ជម្លោះព្រំដែន​កើតមាន​សាជាថ្មី​ទៀត​ទេ។

បើ​ទោះ​បី​ជា​ភាគី​កម្ពុជា និង​ប្រទេស​ឡាវ​បាន​ព្រមព្រៀងគ្នា​បញ្ចប់​ជម្លោះព្រំដែន​មួយអន្លើ​យ៉ាងណាក៏ដោយ ក៏​លោក ទៀ បាញ់ បញ្ជាក់​ថា នៅ​មាន​ចំណុច​សេសសល់​បន្តិចបន្តួច​ដែល​ភាគី​ទាំងពីរ​ត្រូវការ​ពិភាក្សា​គ្នា​បន្ត​ទៀត​។ តែ​លោក ទៀ បាញ់ មិន​បាន​បញ្ជាក់​ចំណុច​ដែល​នៅ​សេសសល់​មាន​បញ្ហា​អ្វីខ្លះ​នោះ​ទេ៖ «និយាយ​ហើយ​និយាយ​ទៀត​ចាំបាច់​សួរដេញដោល​ស្អី។ ខ្ញុំ​ថា​កន្លែង​នោះ​នៅ​តិចតួច​ហ្នឹង គេ​នៅ​បន្ត​ពិភាក្សា​គ្នា​ទេ​។ គ្មាន​ស្អី​ទៅ​ដាក់​អី​ច្រើន​នាំ​តែ​មូស​ខាំ​ហ្នឹង វា​អត់​មាន​ស្អី​ផង​។ កន្លែង​នោះ​នៅ​មាន​បញ្ហា​បន្តិចបន្តួច គឺ​កម្លាំង​បួនដប់​នាក់​ឈរ​នៅ​ក្បែរៗ​គ្នា​ដើម្បី​ជួប​ទាក់ទង​គ្នា​ជជែក​គ្នា​ត​ទៅមុខ​ទៀត តែ​ប៉ុណ្ណឹង​ទេ»

កងទ័ព​កម្ពុជា​ខាង​ភាគី​ឡាវ និង ភាគី​កម្ពុជា នៅ​ថ្ងៃ​ទី​២៦ សីហា កន្លង​ទៅ​បាន​ជួប​ចរចា​ម្ដង​រួច​ទៅ​ហើយ ក្រោយពី​មាន​ភាព​តានតឹង​ស្ថិតនៅ​តំបន់​ទន្លេ​ល្ពៅ ក្នុងស្រុក​ជាំ​ក្សាន្ត ខេត្ត​ព្រះវិហារ និង​ខេត្ត​ចំប៉ា​សាក់ ប្រទេស​ឡាវ កាល​ពី​ចុង​សប្ដាហ៍​មុន ដែល​ភាគី​ទាំងពីរ​អះអាង​ថា ជា​ទឹកដី​របស់​ខ្លួន​តែ​រៀងៗ​ខ្លួន។

ការ​ប្រឈម​មុខ​គ្នា​នេះ​បាន​ធ្វើ​ឱ្យ​ភាគី​កម្ពុជា​ត្រៀមលក្ខណៈ​ជម្លៀស​ប្រជាជន​ពីរ​ឃុំ ចេញពី​លំនៅឋាន ក្នុង​ករណី​មានការ​ផ្ទុះ​អាវុធ​ណាមួយ​កើត​ឡើង​ជាយថាហេតុ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល