ព្រះគ្រូចៅអធិការវត្តម៉ុងរ៉េអាល់ ប្រទេសកាណាដា ព្រះតេជព្រះគុណបណ្ឌិត ហុក សាវណ្ណ ថា បើចង់ឱ្យខ្មែរបានសុខ ទាល់តែបក្សកាន់អំណាច ឈប់បៀតបៀនបក្សប្រឆាំង ដូចសព្វថ្ងៃនេះតទៅទៀត។
ព្រះតេជព្រះគុណបណ្ឌិត ហុក សាវណ្ណ មានថេរដីកាថា អំពើរបស់គណបក្សកាន់អំណាចមកលើគណបក្សសង្គ្រោះជាតិ ដែលជាបក្សប្រឆាំង និងប្រជាពលរដ្ឋខ្មែរទូទៅដែលមិនមែនជាមនុស្សរបស់បក្សខ្លួន គឺជាអំពើបាបកម្ម ដែលនាំអន្តរាយដល់សេចក្ដីសុខក្សេមក្សាន្តរបស់ពលរដ្ឋខ្មែរទូទៅ៖ «បច្ចុប្បន្ននេះ ព្រឹត្តិការណ៍ដែលកើតមានឡើង ដែលធ្វើមិនឱ្យខ្មែរបានសុខ ដោយសារបក្សប្រជាជនសុទ្ធសាធ។ បង្កើតរឿងអ្វីទាំងអស់ ជាពិសេសការរម្លាយគណបក្សសង្គ្រោះជាតិ ធ្វើច្បាប់រម្លាយគេ តាមដានគេ ធ្វើបាបគេតទៅទៀត កុំឱ្យគេងើបមុខរួច។ អាហ្នឹងហើយ យកខ្មែរគ្នាឯងជាសត្រូវ»។
ព្រះតេជព្រះគុណបណ្ឌិត ហុក សាវណ្ណ បន្ថែមថា ការបំផ្លាញសេចក្ដីសុខអ្នកដទៃនេះ មន្ត្រីនិងអ្នកគាំទ្រគណបក្សប្រជាជនកម្ពុជា ក៏មិនបានសុខ និងស្ងប់ចិត្តនោះដែរ។ លោកលើកយកព្រះពុទ្ធឱវាទ ត្រង់ឃ្លាថា “នត្ថិ សន្តិ បរំ សុខំ” ដែលព្រះពុទ្ធប្រៀនប្រដៅមនុស្សថា គ្មានសេចក្តីសុខឯណា ស្មើនឹងសេចក្ដីស្ងប់ឡើយ ឬសេចក្តីសុខគ្រប់យ៉ាង កើតមកអំពីសេចក្ដីស្ងប់។
នៅក្នុងន័យនេះ ព្រះតេជព្រះគុណបណ្ឌិត ហុក សាវណ្ណ បន្ថែមថា បើប្រាសចាសសេចក្ដីស្ងប់នេះ គឺសុខសន្តិភាពគ្មានទេ៖ «ចិត្តអត់ស្ងប់ ! បៀតបៀនគណបក្សសង្គ្រោះជាតិ បៀតបៀនប្រជារាស្ត្ររបស់ខ្លួន អាហ្នឹងអត់សុខទេ។ ប្រទេសហ្នឹងអត់សុខទេ ! ស្ងប់មិនមែនតែអត់ចម្បាំងច្បាំងគ្នា ថាសុខនោះទេ អត់ទេ។ អត់ច្បាំងសុខម្យ៉ាងហើយ ប៉ុន្តែ សុខកុំឱ្យបៀតបៀនប្រជារាស្ត្រខ្លួនឯង ការងារប្រចាំថ្ងៃសព្វថ្ងៃ គឺចាប់កំហុសប្រជារាស្ត្រ យកទៅដាក់ពន្ធនាគារ។ អាហ្នឹងហើយដែលធ្វើមិនឱ្យខ្មែរបានសុខ។ គ្មានសង្គ្រាមតទល់គ្នាក៏ដោយ ប៉ុន្តែបក្សប្រជាជនរករឿងប្រជារាស្ត្ររបស់ខ្លួន បើប្រជារាស្ត្រនោះមិនគាំទ្រខ្លួន មិនគាំទ្របក្សរបស់ខ្លួន រករឿងប្រជាពលរដ្ឋអត់ចប់
»។
ព្រះតេជព្រះគុណបណ្ឌិត ហុក សាវណ្ណ ថាអំពើបាបដែលគណបក្សកាន់អំណាចកំពុងសាងនេះ គឺបង្ហាញបាបកម្មជាក់ស្ដែងជាបណ្តើរៗហើយ ដោយមិនចាំជាតិក្រោយនោះឡើយ៖ «សាងអាក្រក់នាំឱ្យក្តៅក្រហាយខ្លួន ភ័យភិត ដេកផ្លាស់កន្លែង ខ្លាចគេព្យាបាទវិញ ! ទីពីរ សហគមន៍អន្តរជាតិ កំពុងដាក់ទណ្ឌកម្ម ! អាហ្នឹងហើយគឺបាប ! កំពុងដាក់ទណ្ឌកម្មបន្តៗទៅទៀត។ ហើយប្រជារាស្ត្រតស៊ូមតិ ដោយប្រុងប្រយ័ត្ន។ ហើយបក្សប្រជាជនអត់ឋិតថេរទេ ព្រោះខ្លួននៅតែសាងអំពើបាប។ ប្រជារាស្ត្រមិនអាចគាំទ្រអ្នកដឹកនាំ ដែលធ្វើបាបខ្លួនទេ គេចង់ផ្លាស់ប្ដូរ។ បើបក្សប្រជាជនធ្វើល្អ គេចង់ទុក តែបើធ្វើអាក្រក់ដូច្នេះ គេចង់ផ្លាស់ប្ដូរ ជាការពិត។ មាននរណាចង់បានទុក្ខ គេចង់បានសុខ»។
ដើម្បីបានសុខទាំងអស់គ្នា ព្រះតេជព្រះគុណបណ្ឌិត ហុក សាវណ្ណ ថា មន្ត្រីបក្សកាន់អំណាច ត្រូវរៀនធ្វើចិត្តឱ្យស្ងប់ ដោយឈប់មានចិត្តបៀតបៀនអ្នកដទៃបែបនេះតទៅទៀត ព្រោះចិត្តស្ងប់នេះ វានឹងបញ្ជាកាយវាចា ឱ្យឈប់បៀតបៀនគេដែរ។ ព្រះតេជព្រះគុណ បន្តថា ពេលចូលឆ្នាំសាកលប្រពៃណីសកលលោកនេះ ខ្មែរទាំងអស់ ទាំងអ្នកកាន់អំណាច ទាំងប្រជារាស្ត្រខ្មែរ បើស្ងប់ផ្លូវចិត្តប្រទេសហ្នឹងបានសុខ។ មិនបៀតបៀនគ្នាទៅវិញ ទៅមក ស្រលាញ់រាប់អានគ្នាត្រឹមត្រូវ មិនរំលោភលើសិទ្ធិគ្នា ជាពិសេសច្បាប់ជាតិ និងច្បាប់អន្តរជាតិ៖ «សូមអំពាវនាវថាឱ្យខ្មែរទាំងប្រជារាស្ត្រ ទាំងអ្នកកាន់អំណាចរក្សាសេចក្ដីស្ងប់ ស្ងប់ផ្លូវចិត្ត កុំបៀតបៀនប្រជារាស្ត្ររបស់ខ្លួន ត្រូវគិតថា ជាជនរួមជាតិ រក្សាបូរណភាពទឹកដី ឱ្យបានគង់វង្សទើបការជូនពរឆ្នាំថ្មីបានសុខចម្រើន។ បើអត់ធ្វើដូច្នេះទេ ជូនពរក៏អត់ប្រយោជន៍អ្វីនោះដែរ ព្រោះបើមនុស្សមិនបៀតបៀនគ្នា ទោះមិនជូនពរក៏បានសុខដែរ
»។
ជាមួយគ្នានេះដែរ ព្រះតេជព្រះគុណក៏បានលើកទឹកចិត្តឱ្យគណបក្សសង្គ្រោះជាតិ បន្តរើបម្រះ តទៅទៀត ដើម្បីទាមទារឱ្យមានការស្ដារសិទ្ធិមនុស្ស និងប្រជាធិបតេយ្យឡើងវិញ ព្រោះគណបក្សនេះ ជាជនរងគ្រោះដោយអំពើបាបរបស់គណបក្សកាន់អំណាច។ ទោះជាយ៉ាងនេះក្តី ព្រះតេជព្រះគុណបណ្ឌិត ហុក សាវណ្ណ អំពាវនាវឱ្យគណបក្សសង្គ្រោះជាតិ បន្តតស៊ូមតិ និងតវ៉ា ដោយរួបរួមគ្នា និងដោយមិនប្រើហិង្សា ទើបអាចទទួលជោគជ័យ ដោយមានការគាំទ្រពីសហគមន៍អន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។