អឺរ៉ុប​នៅ​តែ​ជំរុញ​ឱ្យ​កម្ពុជា​បើក​លំហ​នយោបាយ បើ​មិន​ចង់​បាត់​ប្រព័ន្ធ​អនុគ្រោះ​ពន្ធ EBA

ដោយ មាន ឫទ្ធិ
2019-12-05
អ៊ីម៉ែល
មតិ
Share
បោះពុម្ព
រដ្ឋមន្ត្រី​ក្រសួងមហាផ្ទៃ លោក ស ខេង (ស្ដាំ) ជួយ​នាយករង​ផ្នែក​គ្រប់គ្រង​ប្រចាំ​តំបន់​អាស៊ី និង​ប៉ាស៊ីហ្វិក​នៃ​សហភាព​អឺរ៉ុប អ្នកស្រី ផាអូឡា ផេមផេឡូនី (Paola Pampaloni) នាទីស្តីការក្រសួង​មហាផ្ទៃ នៅ​ថ្ងៃ​ទី២០ ខែ​មីនា ឆ្នាំ​២០១៩
រដ្ឋមន្ត្រី​ក្រសួងមហាផ្ទៃ លោក ស ខេង (ស្ដាំ) ជួយ​នាយករង​ផ្នែក​គ្រប់គ្រង​ប្រចាំ​តំបន់​អាស៊ី និង​ប៉ាស៊ីហ្វិក​នៃ​សហភាព​អឺរ៉ុប អ្នកស្រី ផាអូឡា ផេមផេឡូនី (Paola Pampaloni) នាទីស្តីការក្រសួង​មហាផ្ទៃ នៅ​ថ្ងៃ​ទី២០ ខែ​មីនា ឆ្នាំ​២០១៩
រូប​ហ្វេសប៊ុក​លោក ស ខេង

មន្ត្រី​ជាន់ខ្ពស់ និង​តំណាងរាស្ត្រ​អឺរ៉ុប នៅតែ​ជំរុញ​ឱ្យ​កម្ពុជា​បើក​លំហ​នយោបាយ លំហ​សង្គម​ស៊ីវិល និង​ធ្វើ​ឱ្យ​មាន​ប្រជាធិបតេយ្យ​ប្រកបដោយ​ការ​ជឿ​ទុក​ចិត្ត​បាន​ឡើង​វិញ បើ​មិន​ចង់​បាត់​ប្រព័ន្ធ​អនុគ្រោះ​ពន្ធ EBA។ ការ​ជំរុញ​នេះ ធ្វើឡើង​នៅ​ចំពោះ​មុខ​ឯកអគ្គរាជទូត​កម្ពុជា​ប្រចាំ​សហភាព​អឺរ៉ុប ក្នុង​កិច្ចប្រជុំ​ដេញដោល​មួយ​របស់​គណៈកម្មាធិការ​ទទួលបន្ទុក​ពាណិជ្ជកម្ម​អន្តរជាតិ នៃ​សភា​អឺរ៉ុប នៅ​ទីក្រុង​ប្រ៊ុចសែល ប្រទេស​បែលហ្សិក កាលពី​ថ្ងៃ​ទី៣ ធ្នូ។

មន្ត្រី​ជាន់ខ្ពស់​នៃ​គណៈកម្មការ​អឺរ៉ុប លើកឡើង​ថា ជា​ការ​គួរ​ឱ្យ​សោកស្ដាយ​ណាស់​ដែល​កម្ពុជា​នៅ​មិន​ទាន់​មាន​ការ​កែ​ប្រែជា​ដុំកំភួន​តាម​សំណើ​របស់​គណៈកម្មការ​អឺរ៉ុប​នៅឡើយ​ទេ ចាប់​តាំង​ពី​គណៈកម្មការ​នេះ ដាក់​ចេញ​នីតិវិធី​ព្យួរ​ប្រព័ន្ធ​អនុគ្រោះ​ពន្ធ EBA កាលពី​ខែ​កុម្ភៈ ដើម​ឆ្នាំ​នេះ​។ នាយិកា​ទទួលបន្ទុក​កិច្ចការ​អាស៊ី និង​ប៉ាស៊ីហ្វិក នៃ​គណៈកម្មការ​អឺរ៉ុប អ្នកស្រី ផាអូឡា ផេមផេឡូនី (Paola Pampaloni) សង្កត់​ធ្ងន់ៗ ​ថា កម្ពុជា​គឺជា​រដ្ឋ​ឯក​បក្ស​ដែល​គ្មាន​គណបក្ស​ប្រឆាំង​។ អ្នកស្រី​បន្ត​ថា មាន​វិស័យ​មួយ​ចំនួន​ដែល​គណៈកម្មការ​អឺរ៉ុប​នៅ​តែ​មាន​ក្តី​បារម្ភ​ក្នុង​កម្រិត​នយោបាយ៖ «យើង​បាន​ជំរុញ​ជា​លក្ខណៈ​ទ្វេភាគី​ទៅ​អាជ្ញាធរ​កម្ពុជា ឱ្យ​ធ្វើ​ចំណាត់​ការ​បើក​លំហ​នយោបាយ និង​បង្កើត​ឱ្យ​មាន​ឡើងវិញ​នូវ​គណបក្ស​ប្រឆាំង​តាម​បែប​ប្រជាធិបតេយ្យ​គួរ​ជាទី​ទុក​ចិត្ត​បាន​។ ហេតុ​​ដូច្នេះ​ហើយ យើង​ចង់​ឃើញ​កម្ពុជា ដោះលែង​លោក កឹម សុខា ហើយ​ផ្ដល់​សិទ្ធិ​នយោបាយ​ឱ្យ​លោក​ឡើងវិញ​។ ត្រូវ​ផ្ដល់​សិទ្ធិ​ធ្វើ​នយោបាយ​ដល់​សមាជិក​ជាន់​ខ្ពស់​របស់​គណបក្ស​ដែល​បាន​រំលាយ​នេះ​ឡើងវិញ​! យើង​អំពាវនាវ​ឱ្យ​មានការ​កែប្រែ​ច្បាប់​ស្តីពី​គណបក្ស​នយោបាយ ច្បាប់​ស្ដីពី​សមាគម និង​អង្គការ​មិនមែន​រដ្ឋាភិបាល និង​ច្បាប់​ស្ដីពី​សហជីព​។ នេះ​គឺជា​អ្វី​ដែល​យើង​កំពុង​ពិភាក្សា។ ខ្ញុំ​សូម​គូស​បញ្ជាក់​ជាថ្មី​ឡើង​វិញ ពី​ជំហរ​របស់​យើង គឺថា វត្ថុបំណង​ចុងក្រោយ​របស់​យើង គឺ​ធានា​ឱ្យ​មាន​កម្ពុជា​មួយ​ប្រកបដោយ​វិបុលភាព និង​ស្ថិរភាព​។ យើង​មាន​ទំនុក​ចិត្ត​ថា ការ​គោរព​ប្រជាធិបតេយ្យ និង​សិទ្ធិមនុស្ស គឺ​ពិត​ជា​មាន​សារសំខាន់​ណាស់​ដើម្បី​ឱ្យ​សម្រេច​បាន​នូវ​ស្ថិរភាព​នេះ»

ការ​គូស​បញ្ជាក់​ឡើងវិញ និង​ជំរុញ​ម្ដង​ហើយ​ម្តង​ទៀត​ពី​មន្ត្រី​ជាន់ខ្ពស់​របស់​គណៈកម្មការ​អឺរ៉ុប រូប​នេះ ធ្វើឡើង​នៅ​ចំពោះ​មុខ​ប្រធាន​គណៈកម្មាធិការ​ទទួល​បន្ទុក​ពាណិជ្ជកម្ម​អន្តរជាតិ នៃ​សភា​អឺរ៉ុប លោក ប៊ឺន ឡាងហ៍ (Bernd Lange) និង​ជា​តំណាងរាស្ត្រ​អឺរ៉ុប ក្នុង​កិច្ចប្រជុំ​ដេញដោល​មួយ​របស់​គណៈកម្មធិការ​នេះ អំពី​ស្ថានភាព​នៃ​ដំណើរការ​ពិនិត្យ​សើរើ​ឡើងវិញ​ចំពោះ​ប្រព័ន្ធ​អនុគ្រោះ​​ពន្ធ EBA របស់​សហភាព​អឺរ៉ុប ដែល​មាន​ការចូលរួម​ឆ្លើយតប​ពី​សំណាក់​ឯកអគ្គរាជទូត​កម្ពុជា​ផង​នោះ។

ប្រធាន​គណៈកម្មាធិការ​ទទួលបន្ទុក​ពាណិជ្ជកម្ម​អន្តរជាតិ​នៃ​សភា​អឺរ៉ុប លោក ប៊ឺន ឡាងហ៍ ដែល​បាន​ដឹកនាំ​កិច្ចប្រជុំ​នេះ ថ្លែង​ថា វា​ហាក់បីដូចជា​ច្បាស់​ណាស់​ថា ការ​ព្យួរ​ប្រព័ន្ធ​អនុគ្រោះ​ពន្ធ​នេះ ជា​ការ​ចាំបាច់​។ ក៏ប៉ុន្តែ លោក​ក៏បាន​ព្រលយ​ពី​លទ្ធភាព ឬ​ជម្រើស​នៃ​ការ​ព្យួរ​ប្រព័ន្ធ​អនុគ្រោះ​ពន្ធ​នេះ​ដែល​មិនមែន​ជា​ការ​ព្យួរ​ទាំងស្រុង តែ​ជា​ការ​គិត​ពន្ធ​ដោយ​ផ្នែក​ទៅលើ​ផលិតផល​ជាក់លាក់​មួយ​ចំនួន ដែល​កម្ពុជា​នាំចេញ​ទៅ​ទីផ្សារ​អឺរ៉ុប​នោះ។ យ៉ាងណាក៏ដោយ លោក​ថា ដំណើរការ​បែបនេះ នឹង​​ត្រូវ​​ឆ្លង​កាត់​​ការ​​កែ​ប្រែ​​ច្បាប់ ដែល​ត្រូវការ​ពេលវេលា​ដ៏​យូរ​មួយ​។ ប្រធាន​គណៈកម្មាធិការ​ទទួល​បន្ទុក​​ពាណិជ្ជកម្ម​​អន្តរជាតិ​​នៃ​​សភា​​អឺរ៉ុប​​រូប​​នេះ បាន​​ចោទ​សួរ​​ត្រង់​ៗ ​ទៅ​កាន់​​ឯក​អគ្គ​រាជ​ទូត​​កម្ពុជា​​ប្រចាំ​​សហភាព​​អឺរ៉ុប នៅ​ទីក្រុង​ប្រ៊ុចសែល ប្រទេស​បែលហ្សិក លោក ណុំ ពិសិដ្ឋ ឱ្យ​ឆ្លើយ​ថា តើ​​កម្ពុជា​​ពិត​ជា​​មាន​​ឆន្ទៈ​​នយោបាយ​​ដែរ ឬ​​អត់ ​ដើម្បី​​ដោះ​ស្រាយ​​បញ្ហា​​នេះ។

ឆ្លើយតប​ទៅ​នឹង​ការ​ចោទសួរ និង​ការ​ទទូច​ចង់​ឃើញ​ឱ្យ​មានការ​បើក​លំហ​នយោបាយ និង​សិទ្ធិមនុស្ស​ឡើងវិញ​នៅ​កម្ពុជា​នោះ លោក ណុំ ពិសិដ្ឋ ថ្លែងប្រាប់​មន្ត្រី​ជាន់ខ្ពស់ និង​តំណាងរាស្ត្រ​អឺរ៉ុប ថា កម្ពុជា នឹង​ផ្ដល់​ចម្លើយ​ចំពោះ​របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប ត្រឹម​ថ្ងៃ​ទី​១២ ធ្នូ​។ លោក​ថា រាល់​ចម្លើយ​ទាំងអស់​នឹង​ផ្ដោត​លើ​ដំណើរ​វិវឌ្ឍ​ចុងក្រោយ និង​បញ្ហា​កង្វះខាត​ជា​អវិជ្ជមាន​នានា ដែល​បាន​លើកឡើង​ក្នុង​របាយការណ៍​នេះ ហើយ​ថា​រដ្ឋាភិបាល ពិត​ជា​មាន​ឆន្ទៈ​នយោបាយ​ក្នុង​ការ​ដោះស្រាយ​បញ្ហា​ទាំងនេះ៖ «ថា តើ​រដ្ឋាភិបាល​មាន​ឆន្ទៈ​នយោបាយ​នឹង​ធ្វើ​ដូច្នេះ​ដែរ​ឬ​ទេ? ប្រាកដ​ណាស់ យើង​ប្ដេជ្ញា​ចិត្ត​កែ​លម្អ​ស្ថានភាព​ទាំងនេះ។ ពាក់ព័ន្ធ​នឹង​សិទ្ធិ​នយោបាយ និង​សិទ្ធិ​ពលរដ្ឋ យើង​ក៏​មាន​ការ​ប្តេជ្ញា​ចិត្ត​ក្នុង​ការ​ដោះស្រាយ​បញ្ហា​នេះ បន្តិច​ម្តងៗ ដោយ​ផ្អែក​តាម​សេចក្ដី​ប្រកាស​របស់​យើង​កាលពី​ឆ្នាំទៅ​។ ដំណើរការ​នីតិកម្ម មិន​មែន​​ជា​​ដំណើរ​ការ​​ខ្លី​​នោះ​​ទេ វា​ត្រូវ​ការ​ពេលវេលា​។ យើង​ធ្វើការ​បន្តិច​ម្តងៗ ដើម្បី​កែ​លម្អ​លំហ​នយោបាយ និង​លំហ​សង្គម​​ស៊ីវិល»

លោក ណុំ ពិសិដ្ឋ ពន្យល់​ប្រាប់​ទៅ​សមាជិកសភា​អឺរ៉ុប និង​​សមាជិក​​គណៈកម្មាធិការ​​ពាណិជ្ជកម្ម​​អន្តរជាតិ​​នៃ​​សភា​តំណាង​រាស្ត្រ​​អឺរ៉ុប​ថា លោក​សង្ឃឹមថា តុលាការ​នឹង​ប្រកាស​ពេលវេលា​អំពី​ដំណើរការ​កាត់​ក្តី​សំណុំរឿង​លោក កឹម សុខា នា​ពេល​​ឆាប់ៗ​ នេះ​។ លោក​​ថា លោក កឹម សុខា អាច​​នឹង​​ត្រូវ​​ដោះ​លែង​​ឱ្យ​​មាន​​សេរីភាព​​ពេញលេញ លុះត្រា​តែ​​ព្រះមហាក្សត្រ​​ព្រះរាជ​ទាន​​លើក​លែង​​ទោស ប្រសិន​បើ​​តុលាការ​​រក​​ឃើញ​​ថា លោក​ពិតជា​មាន​ទោស​ពាក់ព័ន្ធ​នឹង​​បទ​​ត្រូវរ៉ូវ​​គ្នា​​ជាមួយ​​រដ្ឋ​​បរទេស​​មែ​ន​​នោះ​។ ដោយឡែក​ចំពោះ​បញ្ហា​សង្គម​ស៊ីវិល​វិញ លោក​ថា រដ្ឋាភិបាល បាន​បើក​​​​កិច្ច​​​​ពិគ្រោះ​​​​យោបល់​​​ពីរ​​​លើក​​​ជា​មួយ​​សង្គម​​​ស៊ីវិល ដើម្បី​​ចាប់​​ផ្ដើម​ធ្វើ​វិសោធនកម្ម​ច្បាប់​​កែ​​លម្អ​​សិទ្ធិ​​របស់​​សង្គម​​ស៊ីវិល​។ ដូចគ្នា​នេះ​ដែរ​ ចំពោះ​​ច្បាប់​​ស្ដីពី​​សហជីព​​វិញ លោក​​ថា ឥឡូវ​នេះ រដ្ឋសភា​​​​កំពុង​​​ដំណើរ​​ការ​​​អនុម័ត​​​វិសោធនកម្ម​​​ច្បាប់​​​នេះ។

នេះ​គឺជា​លើកទីមួយ​ហើយ​ដែល​មន្ត្រី​ជាន់ខ្ពស់​កម្ពុជា​ចេញមុខ​ទទួលស្គាល់​ថា របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប ពិតជា​បាន​លើក​ឡើង​ពី​បញ្ហា​កង្វះខាត​ជា​អវិជ្ជមាន​នៅ​កម្ពុជា បើ​ទោះ​បី​ជា​ពេល​កន្លង​មក​ក្រសួង​ការបរទេស​កម្ពុជា​បាន​ចោទប្រកាន់​អាស៊ីសេរី​ថា បាន​ផ្សព្វផ្សាយ​របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប ខុស​ពី​អ្វី​ដែល​ខ្លួន​មាន​។ ក៏ប៉ុន្តែ របប​នេះ​ពុំបាន​បង្ហាញ​តម្លាភាព​ហ៊ាន​បញ្ចេញ​របាយការណ៍​នោះ​ជា​សាធារណៈ​នោះ​ទេ​។ ផ្អែក​តាម​របាយការណ៍​វាយតម្លៃ​បឋម​របស់​គណៈកម្មការ​អឺរ៉ុប​ដាក់​ជូន​រដ្ឋាភិបាល​កម្ពុជា​កាលពី​ថ្ងៃ​ទី​១២ វិច្ឆិកា ដែល​អាស៊ីសេរី​ទទួល​បាន​នោះ គណៈកម្មការ​អឺរ៉ុប​វាយតម្លៃ​ថា មាន​ការ​រំលោភបំពាន​ធ្ងន់ធ្ងរ​ជា​ប្រព័ន្ធ​ទៅ​លើ​សិទ្ធិ​នយោបាយ និង​សិទ្ធិ​ពលរដ្ឋ និង​សិទ្ធិ​សំខាន់ៗ ​មួយ​ចំនួន​ទៀត ពិសេស​គឺ​សិទ្ធិ​ការងារ សិទ្ធិ​ដីធ្លី សិទ្ធិ​សង្គម​និង​វប្បធម៌​ជាដើម​នោះ។

អគ្គនាយិកា​រង​នៃ​នាយកដ្ឋាន​ពាណិជ្ជកម្ម​របស់​គណៈកម្មការ​អឺរ៉ុប អ្នកស្រី អេឡែណា កូនីហ៍ (Elena Konig) ពន្យល់​ប្រាប់​គណៈកម្មាធិការ​ទទួល​បន្ទុក​ពាណិជ្ជកម្ម​អន្តរជាតិ​នៃ​សភា​អឺរ៉ុប​ថា ពិត​ជា​មាន​ភស្តុតាង​រឹងមាំ​ដែល​ថា គិត​មក​ទល់​ពេល​នេះ ចំណាត់​ការ​របស់​រដ្ឋាភិបាល​កម្ពុជា បាន​រំលោភ​ទៅ​នឹង​គោលការណ៍​ដែល​មាន​ចែង​ក្នុង​បទប្បញ្ញត្តិ​ស្ដីពី​ការ​ផ្តល់​ប្រព័ន្ធ​អនុគ្រោះ​ពន្ធ​ទូទៅ ឬ GSP របស់​សហភាព​អឺរ៉ុប​។ អ្នកស្រី​ថា នៅ​ពុំ​ទាន់​មានការ​សម្រេច​ចិត្តជា​ផ្លូវការ​ណាមួយ​នៅឡើយ​ទេ ហើយ​កម្ពុជា​មាន​រយៈពេល​ត្រឹម​ថ្ងៃ​ទី១២ ធ្នូ ដើម្បី​ធ្វើការ​ឆ្លើយតប​។ អ្នកស្រី​ពន្យល់​ថា គណៈកម្មការ​​អឺរ៉ុប​កំពុង​វិភាគ និង​ពិចារណា​ទៅលើ​ផល​ប៉ះពាល់​ផ្នែក​សង្គម សេដ្ឋកិច្ច និង​ធុរកិច្ច ក្នុង​ករណី​ដែល​មាន​ការ​ដកហូត​ដោយ​ផ្នែក ឬ​ទាំងស្រុង​នូវ​ប្រព័ន្ធ​អនុគ្រោះ​ពន្ធ​នេះ​ពី​កម្ពុជា​មែន​នោះ​។ យ៉ាងណាក៏ដោយ អ្នកស្រី​កត់សម្គាល់​ថា ការ​ដកហូត​ប្រព័ន្ធ​នេះ នឹង​ត្រូវ​ធ្វើឡើង​ដោយ​សមាមាត្រ​ទៅ​នឹង​គុណ​តម្លៃ​របស់​សហភាព​អឺរ៉ុប​។ អ្នកស្រី ក៏​ថ្លែង​ឱ្យ​ដឹង​ដែរ​ថា ក្នុង​ករណី​ដែល​មាន​ការ​សម្រេច​ដក​ហូត​ប្រព័ន្ធ​អនុគ្រោះ​ពន្ធ​នេះ​មែន​ នោះ​សភា និង​រដ្ឋ​សមាជិក​អឺរ៉ុប មាន​ពេល ​២​ខែ ដើម្បី​ធ្វើការ​ជំទាស់​ទៅ​នឹង​សេចក្តី​សម្រេច​របស់​គណៈកម្មការ​អឺរ៉ុប​នេះ ហើយ​ប្រសិនបើ​គ្មាន​ការ​ជំទាស់​​ណា​មួយ​នោះ​ទេ នោះ​ការ​យក​ពន្ធ​ផ្លូវការ​ពី​កម្ពុជា នឹង​ចាប់​ផ្ដើម​ពី​ថ្ងៃ​ទី​១២ ខែ​សីហា ឆ្នាំ​២០២០ ខាង​មុខ។

ស្ថាប័ន​ហិរញ្ញវត្ថុ​ធំៗ ​របស់​ពិភពលោក​រួមមាន​ធនាគារ​ពិភពលោក ធនាគារ​អភិវឌ្ឍន៍​អាស៊ី និង​មូលនិធិ​រូបិយវត្ថុ​អន្តរជាតិ សុទ្ធតែ​ធ្លាប់​បាន​ព្រមាន​ជា​បន្តបន្ទាប់ ដោយ​ព្យាករណ៍​ថា កំណើន​សេដ្ឋកិច្ច​កម្ពុជា នឹង​ត្រូវ​ធ្លាក់​ចុះ​ពី​៧ភាគរយ ក្នុង​ឆ្នាំ​២០១៩ ​នេះ មក​នៅ ៦,% ក្នុង​ឆ្នាំ​២០២០​ ខាង​មុខនេះ ដោយសារ​ភាព​មិន​ប្រាកដ​ប្រជា​នៃ​បញ្ហា​ព្យួរ​ប្រព័ន្ធ​អនុគ្រោះ​ពន្ធ​ដ៏​មាន​​ឥទ្ធិពល​​របស់​សហភាព​​អឺរ៉ុប​នេះ​។ កម្ពុជា​នឹង​ត្រូវ​ខាតបង់​យ៉ាងហោចណាស់​ជិត ​៧០០​លាន​ដុល្លារ​អាមេរិក​ក្នុង​មួយ​ឆ្នាំ ឬ​ជិត ​២​លាន​​ដុល្លារ​អាមេរិក​ក្នុង​មួយ​ថ្ងៃ ប្រសិន​បើ​សហភាព​អឺរ៉ុប​សម្រេច​ព្យួរ​ប្រព័ន្ធ​អនុគ្រោះ​​ពន្ធ​នេះ​មែន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល