របបលោក ហ៊ុន សែន សុំទោសពលរដ្ឋរឿងដាក់ពង្រាយកងទ័ព និងបិទព្រំដែនកាលពីថ្ងៃទី០៩ វិច្ឆិកា ដោយយកហេតុផលថា ជាការបង្ការ និងទប់ស្កាត់សកម្មភាពរបស់គណបក្សប្រឆាំង និងធានាការពារសន្តិសុខសណ្ដាប់ធ្នាប់សាធារណៈ និងសុវត្ថិភាពតាមតំបន់ព្រំដែនកម្ពុជា-ថៃ។ អ្នកវិភាគយល់ថា រដ្ឋាភិបាលហាក់ប្រើកម្លាំងជ្រុល និងជាការខ្ជះខ្ជាយថវិកាជាតិ ដោយសារតែការចង់យកឈ្នះចាញ់គូបដិបក្ខនយោបាយ។
អ្នកឃ្លាំមើលបញ្ហាសង្គម និងនយោបាយ បណ្ឌិត មាស នី ហៅការចេញសេចក្តីថ្លែងការណ៍សុំទោសពលរដ្ឋខ្មែរនេះថា ជាកាយវិការវិជ្ជមាន និងជាកាយវិការដ៏កម្រមួយ។ លោកថា នេះគឺជាចរិតនយោបាយល្អមួយ ដែលឆ្លុះឱ្យឃើញថា រដ្ឋាភិបាលយល់ចិត្តពលរដ្ឋ ដែលមិនសប្បាយចិត្តចំពោះហេតុការណ៍នៃការដាក់ពង្រាយកងទ័ពកាលពីពេលកន្លងមកនេះ។ ក៏ប៉ុន្តែ បណ្ឌិត មាស នី ថា រដ្ឋាភិបាលហាក់បីដូចជាបានប្រើប្រាស់កម្លាំងជ្រុលពេក ដែលជាការខ្ជះខ្ជាយថវិកាជាតិ។ លោកថា រឿងនេះពុំបានផ្ដល់ផលប្រយោជន៍អ្វីនោះឡើយ ក្រៅតែពីការចង់យកឈ្នះចង់ចាញ់ជាមួយគូបដិបក្ខ៖ «ទីមួយវាធ្វើឱ្យមើលទៅស្ថានភាពសន្តិសុខរបស់ប្រទេសកម្ពុជា វាមិនល្អមើល។ យើងដឹងស្រាប់ហើយថា នៅពេលដែលមានដាក់កងកម្លាំង មានកាំភ្លើងច្រូងច្រាងនៅតាមព្រំដែន ហើយពិសេសអមតាមច្រកចូលអន្តរជាតិមួយៗហ្នឹង បានបង្ហាញច្បាស់ណាស់ថា ប្រទេសមួយនេះស្ថិតក្នុងភាពប្រុងប្រៀប គឺស្ថិតក្នុងភាពប្រកាសអាសន្ន។ អ៊ីចឹងទៅ វាធ្វើឱ្យប៉ះពាល់ដល់វិស័យសេដ្ឋកិច្ច វិស័យទេសចរណ៍ទៀតផង»។
របបលោក ហ៊ុន សែន ចេញសេចក្តីថ្លែងការណ៍នៅថ្ងៃទី១៣ វិច្ឆិកានេះ សុំទោសពលរដ្ឋខ្មែរ រឿងដាក់ពង្រាយកងទ័ព និងបិទព្រំដែនកាលពីថ្ងៃទី៩ វិច្ឆិកា។ ក្នុងសេចក្ដីថ្លែងការណ៍ផ្សាយថ្ងៃទី១៣ វិច្ឆិកា គណៈរដ្ឋមន្ត្រីរបបលោក ហ៊ុន សែន បានសុំការយោគយល់អធ្យាស្រ័យពីសំណាក់ប្រជាពលរដ្ឋ និងអាជីវករ ចំពោះភាពរអាក់រអួលក្នុងការចេញចូលឆ្លងកាត់ច្រកទ្វារព្រំដែនកម្ពុជា-ថៃ កាលពីថ្ងៃទី៩ វិច្ឆិកា កន្លងទៅ។ របបនេះផ្ដល់ហេតុផលថា ភាពរអាក់រអួលនេះ គឺដោយសារតែការរឹតបន្តឹងការត្រួតពិនិត្យការចេញចូលឆ្លងកាត់ព្រំដែន ក្នុងអ្វីមួយដែលរបបនេះអះអាងថា «ដើម្បីទប់ស្កាត់សកម្មភាពរបស់ក្រុមឧទ្ទាម និងធានាថែរក្សាការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម» នៅតាមតំបន់ព្រំដែនកម្ពុជា-ថៃ។
បណ្ឌិត មាស នី ស្នើឱ្យរដ្ឋាភិបាល គួរតែពិនិត្យមើលរឿងនេះឡើងវិញ ហើយគួរប្រើកម្លាំងឱ្យបានសមស្រប ទៅតាមស្ថានការណ៍ ដើម្បីកុំឱ្យមើលទៅជាការបង្ហាញសាច់ដុំហើយមិនស្របទៅនឹងព្រឹត្តិការណ៍ដែលកើតមានឡើង។
សេចក្ដីថ្លែងការណ៍របស់របបក្រុងភ្នំពេញដដែល ក៏មិនភ្លេចលើកឡើងដែរថា រដ្ឋាភិបាលនៅតែលើកទឹកចិត្តដល់សមត្ថកិច្ចពាក់ព័ន្ធទាំងអស់ ឱ្យជំរុញបន្តអនុវត្តមាត្រា ៤៥៤ នៃក្រមព្រហ្មទណ្ឌ ក្នុងអ្វីមួយដែលរបបនេះថា ដើម្បី «កុំឱ្យមានទោសពៃរ៍ចំពោះការចាញ់បោកឧបាយកលនយោបាយរបស់ក្រុមឧទ្ទាម» ក្រោមដំណើរវិលត្រលប់មកប្រទេសវិញរបស់លោក សម រង្ស៊ី។ ការជំរុញបន្តអនុវត្តមាត្រា ៤៥៤នេះ ដែលចែងពីការលើកលែងទោស ចំពោះបុគ្គលណាដែលចូលរួមក្នុងអំពើរួមគំនិតក្បត់ ប្រសិនបើមុនការចោទប្រកាន់បុគ្គលទាំងនោះបានបង្ហាញប្រាប់ ឬសារភាពប្រាប់សមត្ថកិច្ចជាមុននោះ ខណៈរបបនេះអះអាងថា «ផែនការប៉ុនប៉ងធ្វើរដ្ឋប្រហារ» របស់លោក សម រង្ស៊ី បានទទួល «បរាជ័យទាំងស្រុង» ហើយនោះ ហើយរដ្ឋាភិបាលបានធានាយ៉ាងរឹងមាំជាប្រក្រតីចំពោះសន្តិសុខ សណ្ដាប់ធ្នាប់សាធារណៈនៅទូទាំងប្រទេស។
បណ្ឌិត មាស នី ហៅការបន្តជំរុញឱ្យអនុវត្តនេះ មានន័យថា រដ្ឋាភិបាលនៅមានភាពបារម្ភ និងមិនស្ងប់ចិត្ត និងនៅតែមានការប្រុងប្រៀបនៅឡើយទេ ចំពោះចលនារបស់គណបក្សសង្គ្រោះជាតិ៖ «ការគំរាម ឬការបង្ក្រាបទាំងឡាយណា វាគ្រាន់តែដោះស្រាយបញ្ហាហ្នឹងរយៈពេលខ្លីប៉ុណ្ណោះទេដើម្បីបន្ថយការព្រួយបារម្ភការភ័យខ្លាច។ ក៏ប៉ុន្តែ បើសិនការបង្ក្រាបហ្នឹងធ្វើយូរតទៅទៀត ជួនកាលវាអាចធ្វើឱ្យប្រទេសនេះស្ថិតក្នុងភាពអយុត្តិធម៌យ៉ាងដូច្នេះរហូត។ ទីចុងបញ្ចប់ នៅស្រុកយើងវាអត់មានការអនុវត្តច្បាប់ត្រឹមត្រូវ ហើយវាអត់មានតុលាការឯករាជ្យនោះទេ។ ជួនកាលទៅ អ្នកដែលនៅខាងក្រោមហ្នឹង អាចយកការណ៍ហ្នឹងទៅប្រើលេស ដោយសារការគុំកួនផ្ទាល់ខ្លួន ដើម្បីទៅធ្វើការប្តឹងទៅចាប់មនុស្សពាសពេញប្រទេស។ បើធ្វើអ៊ីចឹងទៅ វានឹងអាចក្លាយដូចកាលពីជំនាន់ ប៉ុល ពត ចាប់មុន ឬសម្លាប់មុនបានរាយការណ៍ក្រោយនោះ។ ខ្ញុំមិនចង់និយាយថា ឥឡូវហ្នឹងវាដូច ប៉ុល ពត ទេ»។
ការអនុវត្តវិធានការតឹងរ៉ឹងចុងក្រោយដែលរួមមានដូចជា ការដាក់ពង្រាយកងទ័ពខុសពីប្រក្រតី នៅតាមតំបន់សំខាន់ៗក្នុងប្រទេស ការបង្ក្រាបមកលើសកម្មជនគណបក្សប្រឆាំងតាមមូលដ្ឋាន មិនធ្លាប់មានពីមុនមកនេះ រងការរិះគន់ខ្លាំងៗពីសំណាក់សហគមន៍ជាតិ និងអន្តរជាតិ ថា ជាការរំលោភសិទ្ធិមនុស្សធ្ងន់ធ្ងរ។ ពួកគេចង់ឃើញកម្ពុជារបស់លោក ហ៊ុន សែន ងាកមករកការស្តារប្រជាធិបតេយ្យ និងការគោរពសិទ្ធិមនុស្សឡើងវិញ តាមរយៈការផ្សះផ្សាជាតិឡើងវិញ ដោយមានការចូលរួមពីគ្រប់ភាគីពាក់ព័ន្ធទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។