តើ​កូនៗ​លោក ហ៊ុន សែន បាន​លុយ​ពី​ណា​ទិញ​ផ្ទះ​នៅ​អាមេរិក ពេល​កំពុង​សិក្សា​នៅ​ឡើយ?

ដោយ​ ខែ សុណង
2019-11-15
អ៊ីម៉ែល
មតិ
Share
បោះពុម្ព
ផ្ទះដែលមានបន្ទប់ដេកបួន ស្ថិត​ក្នុង​តំបន់​អ្នកមាន​ សាយយ៉ូសិត (Syosset) នៃ​កោះឡង​ អៃសឡេន (Long Island) ក្នុង​ទីក្រុង​ញូយ៉ក​ (New York)។​
ផ្ទះដែលមានបន្ទប់ដេកបួន ស្ថិត​ក្នុង​តំបន់​អ្នកមាន​ សាយយ៉ូសិត (Syosset) នៃ​កោះឡង​ អៃសឡេន (Long Island) ក្នុង​ទីក្រុង​ញូយ៉ក​ (New York)។​
Nassau County Assessor.

លោកនាយករដ្ឋមន្ត្រី ហ៊ុន សែន តែង​ឆ្លើយតប​ទៅ​នឹង​អ្នក​រិះគន់​ថា​ លោក​គ្មាន​ទ្រព្យ​សម្បត្តិ​លាក់​ទុក​នៅ​ក្រៅ​ប្រទេស​ទេ ​ហើយ​ថា​បើ​មន្ត្រី​ណា​យក​ទ្រព្យ​របស់​ខ្លួន​ ទៅ​លាក់​ទុក​នៅ​ក្រៅ​ប្រទេស​គឺជា​មនុស្ស​ភ្លើ​។ ​ទោះ​ជា​យ៉ាងណា​ យោង​តាម​ឯកសារ​ដែល​អាស៊ីសេរី​ ទទួល​បាន​ កូនៗ​របស់​លោក​ ហ៊ុន សែន​ ៤​នាក់​បាន​ទិញ​ផ្ទះ​រួម​គ្នា​មួយ​ស្ថិត​នៅ​ជាយ​ក្រុង​ញូវយ៉ក​ សហរដ្ឋ​អាមេរិក​ បើ​ទោះ​ជា​ផ្ទះ​នោះ​បាន​លក់​ទៅវិញ​ហើយ​ក៏​ដោយ​ចុះ​។​

កូន​របស់​លោក ​ហ៊ុន សែន ​និង​ផ្ទះ​របស់​ពួកគេ​ក្នុង​ទីក្រុង​ញូយ៉ក​

HunSenChildren

កំណត់​ហេតុ​នៃ​ការ​ទិញ​លក់​ដី​ ដែល​អាស៊ីសេរី​ទទួល​បាន​ ស្តីពី​ការ​ទិញ​ផ្ទះ​ដែល​មាន​បន្ទប់​ដេក​ចំនួន​​បួន​ នៅ​ក្នុង​តំបន់​ជាយ​ក្រុង​ញូយ៉ក (New York) សហរដ្ឋអាមេរិក​ ដែល​ក្រុម​គ្រួសារ​លោក​ ហ៊ុន សែន​ បាន​ទិញ​កាល​ពី​ឆ្នាំ​២០០០​ បាន​បង្ហាញ​​ឱ្យ​​ឃើញ​នូវ​ជំហាន​ទី​១​ ដែល​ក្រុម​គ្រួសារ​​នេះ​​ប្រឹង​ប្រែង​​លាក់​បាំង​​នូវ​​ទ្រព្យ​​ធន​​ដ៏​ច្រើន​របស់​ខ្លួន​នៅ​ក្រៅ​ប្រទេស​ អស់​រយៈ​ពេល​ជិត ​២​ទសវត្ស​កន្លង​​ទៅ​។​

កូនៗ​ ទាំង​បួន​នាក់​របស់​លោក​ ហ៊ុន​ សែន គឺ​លោក​ ហ៊ុន ម៉ាណែត​ ដែល​ពេល​នោះ​មាន​អាយុ​ ២៣​ឆ្នាំ​ អ្នកស្រី ​ហ៊ុន ម៉ាណា ​ពេល​នោះ​ អាយុ​ ២០​ឆ្នាំ​ លោក​ ហ៊ុន ម៉ានិត​ ពេល​នោះ​ អាយុ ​១៩ឆ្នាំ​ និង​លោក​ ហ៊ុន ម៉ានី ​ដែល​ពេល​នោះ​មាន​អាយុ​មិន​ទាន់​គ្រប់​ ១៨ឆ្នាំ​ស្រួលបួល​ផង ​ពួកគេ​បាន​ទិញ​ផ្ទះ​រួមគ្នា​មួយ​ខ្នង​ ក្នុង​តំបន់​ជាយ​ក្រុង​ញូយ៉ក​ ក្នុង​តម្លៃ​​ទឹកប្រាក់សរុប ៥​​សែន​ ៥​ម៉ឺន​ដុល្លារ​អាមេរិក (៥៥០.០០០)។ ការ​ទិញ​ផ្ទះ​នៅ​ពេល​នោះ​គឺ​ធ្វើ​ឡើង​នៅ​ពេល​ដែល​កូន​ប្រុស​ច្បង​របស់​លោក ​ហ៊ុន សែន ​គឺ​លោក ហ៊ុន ម៉ាណែត​ កំពុង​សិក្សា​ថ្នាក់​អនុបណ្ឌិត​ឆ្នាំ​ទី២​ ផ្នែក​សេដ្ឋកិច្ច​នៃ​សកល​វិទ្យាល័យ​ទីក្រុង​ញូយ៉ក​។​ លោក​ ហ៊ុន ម៉ាណែត ​ក៏​ជា​ជនជាតិ​ខ្មែរ​ដំបូង​ដែល​បាន​បញ្ចប់​ការ​សិក្សា​ នៅ​បណ្ឌិត​យោធាអាមេរិក​ វេស ផួញ (West Point) នៅ​ដើម​ឆ្នាំ​១៩៩៩ ​ដែល​ផ្ទះ​នោះ​នៅ​មិន​ឆ្ងាយ​ប៉ុន្មាន​ពី​ សកលវិទ្យាល័យ​ ទីក្រុង​ញូយ៉ក​នោះ​ឡើយ​។​

ដោយសារ​កូនៗ​ទាំង​បួន​របស់​លោក​ ហ៊ុន សែន​ កាល​នោះ​កំពុង​ស្ថិត​នៅ​ក្នុង​វ័យ​សិក្សា​នៅ​ឡើយ​ ហើយ​ប្រាក់ខែ​ផ្លូវការ​របស់​លោក​ ហ៊ុន សែន ​គឺ​ប្រមាណ​តែ ​១ម៉ឺន ​២ពាន់​ដុល្លារ​​អាមេរិក​​ប៉ុណ្ណោះ​ ក្នុង​​មួយ​ឆ្នាំ​ (១២.០០០)។ ដូច្ចេះ​ការ​ទិញ​ផ្ទះ​នេះ​ បាន​ធ្វើ​ឱ្យ​​មាន​សំណួរ​ជាច្រើន​​ថា ​តើ​ពួកគេ​ដែល​​ជា​​កូនៗ​ របស់​​លោក​ ហ៊ុន សែន ​ដែល​ពេល​នោះ​កំពុង​ស្ថិត​ក្នុង​វ័យ​សិក្សា​ បាន​ប្រាក់​មក​ពី​ណា​ក្នុង​​ការ​​ទិញ​​ផ្ទះ​​មួយ​​ខ្នង​​នោះ​។ យោង​តាម​កំណត់ហេតុ​នៃការ​ទិញ​ដូរ​អចលនទ្រព្យ​នេះ​ ក៏​​ពុំ​មាន​​កន្លែង​​ណា​មួយ​​បញ្ជាក់​​ថា​ កូនៗ ​ត្រកូល​ហ៊ុន​បង់​ប្រាក់​រំលោះ​ផ្ទះ​នេះ​នោះ​ទេ​។​

អាស៊ីសេរី​បាន​ផ្ញើ​សំណួរ​សុំ​ការ​ឆ្លើយ​តប​ពី​កូន​ៗ​ ទាំង​បួន​នាក់​របស់​លោក​ ហ៊ុន សែន​ ជុំវិញ​​រឿង​​​ទិញ​​ផ្ទះ​​នេះ​ តែ​​ពួក​គេ​​មិន​​បាន​​ឆ្លើយ​តប​​នោះ​​ឡើយ។​ ជុំវិញ​រឿង​នេះ​ផង​ដែរ​ អ្នក​​រិះគន់​​លោក​ ហ៊ុន សែន ​សម្តែង​ការ​សង្ស័យ​ ចំពោះ​ទឹក​ប្រាក់​ដែល​បាន​ប្រើប្រាស់​ក្នុងការ​ទិញ​ផ្ទះ​មួយ​ខ្នង​នេះ ​ដែល​មាន​ទីតាំង​ស្ថិត​ក្នុង​តំបន់​អ្នកមាន​ សាយយ៉ូសិត (Syosset) នៃ​កោះឡង​ អៃសឡេន (Long Island) ក្នុង​ទីក្រុង​ញូយ៉ក​ ដែល​ប្រើ​ពេល​ធ្វើ​ដំណើរ​តាម​រថយន្ត​ប្រមាណ​ជាង​មួយ​ម៉ោង​ពី​​ទី​​ប្រជុំជន​ មែនហ៊េតថិន (Manhattan) ដែល​ជា​ទី​ប្រជុំជន​ដ៏ធំ​របស់​ទីក្រុង​នេះ​។

ប្រធាន​ស្តី​ទី​គណបក្ស​ប្រឆាំង​ដែល​កំពុង​រស់នៅ​និរទេស​ខ្លួន​ លោក សម រង្ស៊ី ​លើកឡើង​ថា​ វា​​ប្រាកដ​​ច្បាស់​​ហើយ​​​ថា​ លុយ​​ដែល​​ទិញ​​ផ្ទះ​​នេះ​ គឺជា​លុយ​ដែល​កើត​ចេញ​​ពី​​អំពើ​​ពុក​រលួយ​។ វា​​ជា​​អំពើ​ពុក​រលួយ​​របស់​​រដ្ឋាភិបាល​​លោក ​ហ៊ុន សែន ​ជា​អំពើ​ពុក​រលួយ​ដែល​កើត​មាន​ជា​ប្រព័ន្ធ​ និង​​ជា​អំពើ​​ពុក​រលួយ ​ដែល​​កើត​​ចេញ​​ពី​ការ​​ជញ្ជក់​​ឈាម​​ប្រជាពលរដ្ឋ​ខ្មែរ​។​

ជា​ផ្ទះ​សាមញ្ញ ​តែ​មាន​សារៈសំខាន់​

ផ្ទះ​ដែល​កូនៗ​ ទាំង​បួន​របស់​លោក​ ហ៊ុន សែន​ បាន​ទិញ​នេះ​ មាន​លក្ខណៈ​សាមញ្ញ ​បើ​ប្រៀបធៀប​​​ទៅ​​​នឹង​​​ស្តង់ដារ​​​នៃ​​​អ្នក​​មាន​​​ទ្រព្យ​​មហាសាល​​នៅ​កម្ពុជា​នៃ​គ្រួសារ​ត្រកូល​ហ៊ុន​ ដែល​កំពុង​គ្រប់គ្រង​​ប្រទេស​នេះ​។​ តាម​ការ​ស៊ើបអង្កេត​របស់​ទី​ភ្នាក់ងារ​សារព័ត៌មាន​ រ៉យទ័រ (Reuters)​ កាល​​ពី​​ខែ​​តុលា​ បាន​​បង្ហាញ​​ថា​ ត្រកូល​ហ៊ុន​ មាន​អចល​ទ្រព្យ ​និង​ផ្ទះ​សម្បែង​នៅ​ជុំវិញ​ពិភព​លោក​ ដែល​មាន​តំលៃ​រាប់​សិប​លាន​ដុល្លារ​អាមេរិក​។​ បណ្ឌិត​ លី ម៉ហ្គែនប៊ែសឺ (Lee Morgenbesser) នៃ​សកល​វិទ្យាល័យ​ ហ្រ្គីសហ្វីត (Griffith) ក្នុង​ទីក្រុង​ ឃ្វីនឡែន (Queensland) នៃ​ប្រទេស​អូស្រ្តាលី​ បាន​គូស​បញ្ជាក់​ថា​ ផ្ទះ​ដែលកូនៗ របស់លោក ហ៊ុន សែន បានទិញក្នុងពេលដែលពួកគេកំពុងស្ថិតក្នុងវ័យសិក្សានោះ យ៉ាងហោចណាស់ មាន​រយៈ​ពេល​មួយ​ទសវត្ស​មុន​ពេល​ដែល​របាយការណ៏ ស្តីពី​អចលនទ្រព្យ​​នៅ​ក្រៅ​ប្រទេស​របស់​គ្រួសារត្រកូល ហ៊ុន ត្រូវ​បាន​ទម្លាយ​ចេញ ដែល​នេះ​អាច​ធ្វើ​ឱ្យ​គេ​សន្និដ្ឋាន​​បាន​ថា ត្រកូល ហ៊ុន មាន​ទ្រព្យធន​ច្រើន​ជាង​ចំនួន ដែល​គេ​ធ្លាប់​បាន​​គិត​​ពី​​ពេល​​មុន​​ទៅ​​ទៀត។ បណ្ឌិត លី ម៉ហ្គែនប៊ែសឺ (Lee Morgenbesser) ដែល​ជា​អ្នក​សិក្សា​ពី​របប​ផ្តាច់ការ​ក្នុង​​តំបន់​​អាស៊ី​​​អគ្នេយ៍​បាន​​បន្ថែម​​ទៀត​​ថា៖ «ប្រសិនបើក្រុមគ្រួសារត្រកូល ហ៊ុន ពិត​ជា​ផ្តើម​ទិញ​អចលនទ្រព្យថ្លៃៗ នៅ​ក្រៅ​ប្រទេស​តាំង​តែ​ពី​ឆ្នាំ២០០០ មែន​​នោះ គឺ​​អាច​​ឲ្យ​​យើង​​សន្និដ្ឋាន​​បាន​​ថា សកម្មភាព​ក្នុង​ការ​បង្កើន​ទ្រព្យ​ដោយ​​ទុច្ចរិត និង​ការ​​វិនិយោគ​​របស់​​ត្រកូល ហ៊ុន នេះ មាន​ទំហំ​ធំធេង​លើស​ពី​អ្វី​ដែល​យើង​ធ្លាប់​ដឹង។ ខ្ញុំអាច​សន្និដ្ឋានបានថា ទំហំ​​នៃ​​ទ្រព្យ​​សម្បត្តិ​​របស់​​គ្រួសារ​​ត្រកូល ហ៊ុន គឺ​​វា​​ធំធេង​​ជាង​​អ្វី​ដែល​ធ្លាប់​បាន​​រាយការណ៍​កន្លង​មក»។

លោក សម រង្ស៊ី ប្រធានស្តីទីគណបក្សសង្គ្រោះជាតិ បានរំលឹកឡើងវិញនូវអតីតភាពរបស់លោក ក្នុង​នាម​ជា​រដ្ឋមន្ត្រី​ក្រសួង​សេដ្ឋកិច្ច និងហិរញ្ញវិត្ថុ ពីឆ្នាំ១៩៩៣ ដល់ឆ្នាំ១៩៩៤ ដោយបានចោទ ប្រកាន់ លោក ហ៊ុន សែន ថា បាន​ប្រឹងប្រែង​ដោយ​ចេតនា​ក្នុង​ការ​ការពារ​ផល​ប្រយោជន៍ ដែល​បាន​មក​ពី​អំពី​ពុក​រលួយ​របស់​ក្រុម​គ្រួសារ និងបក្សពួករបស់ខ្លួន នៅ​ក្នុង​ឧស្សហកម្ម​កាប់​ឈើ​ដែល​ក្នុង​នោះ​លោក ហ៊ុន​ សែន បាន​រារាំង​រាល់​ការ​ត្រួត​ពិនិត្យ​របស់​ក្រសួង​ហិរញ្ញវត្ថុ​ទៅ​លើ​ការ​នាំ​ឈើ​​ចេញ​​ទៅ​ក្រៅ​ប្រទេស។ ការចោទប្រកាន់របស់លោក សម រង្ស៊ី មានភាពស៊ីសង្វាក់គ្នាជាមួយការ ស៊ើបអង្កេត របស់អង្គការក្រៅ​រដ្ឋាភិបាលមួយចំនួន ដូចជាអង្គការ Global Witness ជាដើម។ អង្គការ​នេះ ដែលបានរកឃើញថា ការកាប់ឈើខុសច្បាប់នៅក្នុងប្រទេសកម្ពុជា បាន​កើត​មាន​ឡើង ក្រោម​ប្រព័ន្ធ​គ្រប់គ្រង​បែប «អញជួយឯង ឯងជួយអញ» នៅទូទាំងប្រទេស ដែល​ចំណូល​បាន​មក​ពី​កាប់​​ឈើ​ទាំង​​នោះ បាន​ហូរ​ចូលទៅក្នុង​ហោប៉ៅ អ្នករត់ពន្ធឈើទៅក្រុមឧកញ្ញា និង​ពី​ឧកញ៉ា​បន្ត ទៅ​ហោប៉ៅរបស់​មន្រ្តីគ្រាក់ៗរបស់រដ្ឋាភិបាលខ្មែរ។

ប្រទេសកម្ពុជាក្នុងពេលបច្ចុប្បន្ន ស្ថិតក្នុងចំណាត់ថ្នាក់ទី១៦១ ក្នុងចំណោមប្រទេសចំនួន១៨០ នៅ​ក្នុង​​បញ្ជី​ស្តីពី​អំពើ​ពុក​រលួយ​របស់​អង្គការ​តម្លាភាព​អន្តរជាតិ (Transparency International)។​ លោក ហ៊ុន សែន បាន​កាន់​តួនាទី​ជា​នាយក​រដ្ឋមន្ត្រី ចាប់​តាំង​ពី​ឆ្នាំ១៩៨៥ មក។

នៅគ្រាដែលកូនៗរបស់លោក ហ៊ុន​ សែន ទិញផ្ទះនៅជាយក្រុងបុរីញូយ៉ក សហរដ្ឋអាមេរិក ទិន្នន័យ​របស់ធនាគាពិភពលោក (World Bank) បានបង្ហាញថា ពលរដ្ឋខែ្មរសាមញ្ញម្នាក់ៗ អាច​រក​ចំណូល​​បាន​​តែ ៣រយដុល្លារ​អាមេរិក (៣០០ដុល្លារ) តែ​ប៉ុណ្ណោះ​ក្នុង​មួយ​ឆ្នាំ។ ប្រសិនបើពលរដ្ឋខ្មែរសាមញ្ញ​ម្នាក់ សន្សំប្រាក់មួយសេនចេញពីក្នុងទឹកប្រាក់ ៣០០ដុល្លារ​ដែល​គេ​រក​បាន ក្នុង​​មួយ​ឆ្នាំ​​នោះ គេ​នឹង​​ត្រូវ​ប្រើ​ពេល​វេលា​ជាង ១ពាន់ ៦រយ​ឆ្នាំ (១.៦០០) ដើម្បី​សន្សំ​ប្រាក់​​ឱ្យ​​បាន ៥សែន​​ដុល្លារ នៃ​​តម្លៃ​​​ផ្ទះ​​​នោះ។

ដំណើរទៅមុខ

៧ឆ្នាំក្រោយមក គឺក្នុងឆ្នាំ២០០៧ កូនៗរបស់លោក ហ៊ុន សែន បានលក់ផ្ទះនោះក្នុងតម្លៃ ៧សែន ៤ម៉ឺនដុល្លារអាមេរិក (៧៤០.០០០)។ ក្នុងចំណោមកូនៗទាំងបួននាក់ដែលមានឈ្មោះក្នុងបញ្ជី ទិញ​ផ្ទះ​នោះ គឺមានតែកូនច្បងរបស់លោក ហ៊ុន សែន ម្នាក់ប៉ុណ្ណោះ គឺលោក ហ៊ុន ម៉ាណែត ដែល​មាន​វត្តមានក្នុងទីក្រុងញូយ៉ក ក្នុងការចុះហត្ថលេខាដើម្បីលក់ផ្ទះនោះ។ ដើម្បីលក់ផ្ទះនោះបាន លោក ហ៊ុន ម៉ាណែត បានទទួលសិទ្ធិតាមផ្លូវច្បាប់ក្នុងការចុះហត្ថលេខាជំនួសប្អូនៗរបស់លោក​ ដែល​​លិខិត​ផ្ទេរ​សិទ្ធិ​តាម​ផ្លូវ​ច្បាប់​នេះ ត្រូវ​បាន​ប្រថាប់​ត្រា​ទទួល​ស្គាល់​ដោយ​មន្ត្រី​កុងស៊ុល​របស់​ស្ថានទូត​អាមេរិក​ក្នុង​ប្រទេស​កម្ពុជា និង​ប្រទេស​​អូស្តា្រលី។

ឯកសារទាំងនោះ បានបង្ហាញអោយដឹង ពីតំរុយនៃជីវិតរស់នៅរបស់កូនៗលោក ហ៊ុន សែន នៅ​​ពេល​នោះ។ លោក ហ៊ុន ម៉ានិត ដែល​បច្ចុប្បន្ន​មាន​តួនាទី​ជា​ប្រធាន​ចារកម្ម​ផ្នែក​យោធា​របស់​កម្ពុជា បានដាក់អស័យដ្ឋានផ្ទះរបស់លោក ឌី​ វិជ្ជា ដែល​មាន​តម្លៃ​រាប់​លាន​ដុល្លារ​អាមេរិក នៅ​​ក្នុង​​ប្រទេស​​អូស្ត្រាលី។ លោក ហ៊ុន ម៉ានិត រៀបការជាមួយប្អូនស្រីរបស់លោក ឌី វិជ្ជា គឺ​អ្នកស្រី ហុក ចាន់ដាវី ដែល​ជា​កូន​របស់​លោក ហុក ឡង់ឌី អគ្គស្នងការ​នគរបាលជាតិ​នៅ​ពេល​នោះ។

ចំណែក​លោក ហ៊ុន ម៉ានី​ វិញ នៅក្នុងឆ្នាំ២០០៤ លោកមានអាយុ ២៤ឆ្នាំ។ បច្ចុប្បន្នលោក​ជា​សមាជិក​​សភា​របស់​គណបក្ស​ប្រជាជនកម្ពុជា ដែលជាគណបក្សកាន់អំណាច បាន​ផ្តល់​អស័យដ្ឋាន​​របស់​​លោក​នៅ​ពេល​នោះ​ថា​ ជានិស្សិតកំពុងស្នាក់ក្នុងអន្តេវាសិកដ្ឋាន (dormitory) នៅក្នុងទីក្រុង មែលប៊ន (Melbourne) ប្រទេសអូស្ត្រាលី។

ទន្ទឹមគ្នានេះដែរ អ្នកស្រី ហ៊ុន ម៉ាណា ដែលនៅពេលនោះ ជិតចូលរោងការជាមួយលោក ឌី​ វិជ្ជា  បាន​ប្រើប្រាស់​អស័យដ្ឋាន​របស់​ឳពុក​អ្នក​ស្រី​នៅ​ទល់​មុខ​វិមាន​ឯករាជ្យ​ ក្នុង​រាជធានី​ភ្នំពេញ។ អ្នក​សរសេរ​ប្រវត្តិរូប​របស់​លោក ហ៊ុន សែន បាន​ព័ណ៌នា​លំនៅឋាន​នោះ​ថា ជា​វិមាន​ភូមិគ្រឹៈ​ដ៏​ធំ​ល្វឹងល្វើយ មាន​ទីធ្លា​សួន​ច្បារ​ដ៏​ស្រស់​ស្អាត ដែល​ដើម​ផ្កា​ត្រូវ​បាន​គេ​រចនា​ចេញ​ជា​រូប​ក្តាន់ និង​​សត្វ​​ឆ្កែ​ជា​​​ដើម។

សក្ខីកម្មក្លែងក្លាយ

យោងតាមឯកសារ ដែលអាស៊ីសេរីទទួលបាន ការទិញផ្ទះនៅជាក្រុងញូយ៉កកាលពីឆ្នាំ២០០០នោះ ក៏​បាន​លេច​ចេញ​នូវ​សំណួរ​ជា​ច្រើន​ ទាក់ទងនឹងកូនប្រុសច្បងរបស់លោក ហ៊ុន សែន គឺ​លោក ហ៊ុន ម៉ាណែត ដែល​បច្ចុប្បន្ន​នេះ មាន​តួនាទី​ជា​អគ្គ​មេបញ្ជាការ​កងទ័ព​ជើង​គោក បានផ្តល់សក្ខីកម្ម​ក្លែងក្លាយ ដល់តុលាការសហព័ន្ធរបស់អាមេរិកកាលពីឆ្នាំ២០១៧ ដែល​អាច​ប្រឈម​ទោស​​ព្រហ្មទណ្ឌ ក្រោម​ច្បាប់​សហរដ្ឋ​អាមេរិក។ លោក ហ៊ុន ម៉ាណែត បានបញ្ជាក់នៅក្នុងលិខិតប្រកាស​មួយ​បង្ហាញ​ទៅ​តុលាការ​កណ្តាល​ក្នុង​រដ្ឋ​កាលីហ្វ័រញ៉ា (California Central District Court) សហរដ្ឋ​​អាមេរិក ជា​ការ​ឆ្លើយ​តប​ទៅ​នឹង​បណ្តឹង​របស់​មន្ត្រី​គណបក្ស​ប្រឆាំង លោក មាជ សុវណ្ណារ៉ា ដែល បាន​ចោទ លោកហ៊ុន ម៉ាណែត ថា ជា​អ្នក​រួម​គំនិត​ក្នុង​ការ​ធ្វើ​ទារុណ្ឌកម្ម។ នៅ​ក្នុង​​លិខិត​ជូន​ទៅ តុលាការនោះ លោក ហ៊ុន ម៉ាណែត បាន​ប្រកាស​ថា៖ «រូប​គាត់​បាន​ចូល​សិក្សា​នៅ​សាលាបណ្ឌិត​យោធា​អាមេរិក​ ពីឆ្នាំ១៩៩៤​ ដល់ ឆ្នាំ១៩៩៩ ហើយ​ពេល​​នោះ គឺ​​ជា​​ពេល​វេលា​តែ​​មួយ​គត់​ដែល​គាត់​បាន​រស់​នៅ​​លើ​ទឹក​ដី​សហរដ្ឋ​អាមេរិក»។​

ទោះជាយ៉ាងនេះក្តី នៅពេលលោក​ ហ៊ុន ម៉ាណែត និងប្អូនៗទាំង៣នាក់របស់លោកទិញផ្ទះ នៅក្នុង​ទីក្រុងញូយ៉ក ឆ្នាំ២០០០​នោះ លោកបានផ្តល់អស័យដ្ឋានមួយផ្សេងទៀតនៅក្នុងរដ្ឋញូយ៉កថា ជា​ផ្ទះ​​របស់​លោក ដោយ​ដាក់​ថា រូប​លោក​បាន​រស់នៅ​ទីនោះ​ក្រោយ​ឆ្នាំ១៩៩៩។ ៧ឆ្នាំ​ក្រោយ​មក លោក​គឺ​ជា​មនុស្ស​តែ​ម្នាក់​គត់​ក្នុង​ចំណោម​បង​ប្អូន​របស់​លោក ដែល​បាន​បង្ហាញ​មុខ​ក្នុង​ទីក្រុង ញូយ៉ក ដើម្បី​​ចុះ​ហត្ថលេខា​លក់​ផ្ទះ​នោះ។ លោក ហ៊ុន ម៉ាណែត ក៏​បាន​ចុះ​ឈ្មោះ​ចូល​រៀន​ក្នុង​​សកល​វិទ្យាល័យ​​ញូយ៉ក សម្រាប់​​កម្មវិធី​សិក្សា​អនុបណ្ឌិត​ផ្នែក​សេដ្ឋកិច្ច រហូត​ដល់​ខែ​មករា ឆ្នាំ២០០២។ ក្នុង​ឆ្នាំ២០០៣​ អ្នក​សរសេរ​ប្រវត្តិរូប​របស់​លោក ហ៊ុន សែន បាន​ធ្វើ​បទ​សម្ភាសន៍​មួយ ជាមួយ​លោក ហ៊ុន ម៉ាណែត ក្នុង​ទីក្រុង​បាងកក ប្រទេស​ថៃ ដោយ​​អ្នក​​សរសេរ​​ប្រវត្តិ​រូប​​នោះ​ពិពណ៌នា​​ថា លោក ហ៊ុន ម៉ាណែត បាន​រស់​នៅ​ក្នុង​ទីក្រុង​ញូយ៉ក នៅ​ក្នុង​អំឡុង​ពេល​នៃ​ការ​សិក្សា​ផ្នែក​សេដ្ឋកិច្ច​នោះ។

មេធាវីផ្នែកសិទ្ធិមនុស្ស លោក ម៉ថុន ក្លារ (Morton Sklar) ដែលកាន់សំណុំរឿងប្រឆាំងលោក ហ៊ុន ម៉ាណែត ជឿជាក់ថា លោក ហ៊ុន ម៉ាណែត ពិត​ជា​បាន​និយាយ​ភូត​កុហក​យ៉ាង​ច្បាស់​ក្រោម​សម្បថ នៅ​មុខតុលាការ ក្នុងការលាក់បាំងពីការស់នៅរបស់លោកនៅក្នុងទឹកដីសហរដ្ឋអាមេរិក។​ លោកថ្លែងប្រាប់អាស៊ីសេរីថា លោកគ្មានចម្ងល់អ្វីទេចំពោះរឿងនេះ។​

ការភូតកុហកតុលាការក្រោមសម្បថ គឺជាបទល្មើសព្រហ្មទណ្ឌនៅក្នុងសហរដ្ឋអាមេរិក ដែល​អាច​មាន​ទោស​ជាប់​ពន្ធនាគារ​រហូត​ដល់ ៥ឆ្នាំ។ ទោះជាយ៉ាងណាក្តី ការភូតកុហកនៅក្នុងសំណុំ​រឿង​រដ្ឋប្បវេណី ដូច​ជា​ករណី​ជា​មួយ​លោក មាជ សុវណ្ណារ៉ា ជា​ដើម កម្រ​ត្រូវ​បាន​គេ​កាត់​ទោស​ណាស់។

អ្នកនាំពាក្យរាជរដ្ឋាភិបាលកម្ពុជា លោក ផៃ ស៊ីផាន បានបដិសេធន៏មិនធ្វើអត្ថាធិប្បាយលំអិតទេ ជុំវិញ​ករណី​ទិញ​លក់​ផ្ទះ​របស់​កូន​លោក ហ៊ុន សែន ក្នុងទីក្រុងញូយ៉ក សហរដ្ឋអាមេរិកនោះ ដោយ​​លោកលើកឡើងថា វា​ជា​រឿង​ឯកជន​សុទ្ធសាធ ដែល​មិន​ទាក់ទង​អ្វី​ដល់​រាជរដ្ឋាភិបាលកម្ពុជា​នោះ​​​ឡើយ។ ទោះ​ជា​យ៉ាង​នេះ​ក្តី លោក​​​បាន​បដិសេធន៍​ចំពោះ​ការ​លើក​ឡើង​ដែល​ថា លុយ​ដែល​​យក​​​ទៅ​ទិញ​​ផ្ទះ​នោះ ជា​​លុយ​​ដែល​​បាន​​មក​​ពី​​អំពើ​​ពុក​​រលួយ។ លោក ផៃ ស៊ីផាន បាន​ប្រាប់​អាស៊ី​សេរី​ថា ប្រសិន​បើ​លុយ​ដែល​យក​ទៅ​ទិញ​ផ្ទះ​នោះ ជា​​លុយ​​ដែល​​កើត​​មក​​ពី​​ការ​​លាង​​លុយ​កខ្វក់​​​មែន​​នោះ ហេតុ​អ្វី​ក៏​សហរដ្ឋ​អាមេរិក មាន​ភាព​ល្ងង់​ខ្លៅ​ម៉្លេះ​នៅ​ពេល​នោះ​ ដែល​បាន​បណ្តោយ​​ឱ្យ​​​អំពើ​​ទាំង​​នោះ កើត​ឡើង​លើ​ទឹក​ដី​របស់​ខ្លួន​យ៉ាង​ដូច្នេះ៕​​

ឯកសារ​ពាក់ព័ន្ធ​ នឹង​របាយការណ៍​នេះ មាន​នៅ​ទីនេះ--->

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

world beggar with a $3 million WATCH lifestyle,depsite million poor pple who live under povery line....shaaaaaaam

No one surprise with all these crooks family criminal business empire,Inc.All these crooks,thieves=evil HSen that why tmil HSen always tries to protected his children or grand children to against someone who said or criticized with all his families will be arrest or threat or look for safe haven"untouchable family clans".

Nov 15, 2019 05:50 PM

គេហទំព័រ​ទាំងមូល