កូនប្រុសច្បងលោក ហ៊ុន សែន គឺលោក ហ៊ុន ម៉ាណែត ក្លាយជាប្រធានយុវជនគណបក្សប្រជាជនកម្ពុជាជាផ្លូវការហើយ នៅថ្ងៃទី១៣ មិថុនា ដោយមានអនុប្រធានគណបក្សលោក សាយ ឈុំ ជាអធិបតីក្នុងពិធីផ្ទេរតំណែងនេះ។ ចំណែក លោក កែ ប៊ុនខៀង ដែលធ្លាប់ជាប្រធានយុវជន ត្រូវបានផ្ទេរឱ្យទៅកាន់តួនាទីចាស់របស់លោកជាអនុប្រធានគណៈឃោសនាអប់រំរបស់គណបក្សប្រជាជនកម្ពុជាវិញ។
លោក ហ៊ុន ម៉ាណែត បានសរសេរលើហ្វេសប៊ុកថា លោកនឹងថែរក្សាឱ្យបានជាដាច់ខាតរាល់សមិទ្ធផលដែលគណបក្សប្រជាជនកម្ពុជាសម្រេចបាន ក្នុងការកសាងប្រទេស។ ក្រៅពីនេះ លោកនឹងបន្តពង្រីកសមិទ្ធផលថ្មីៗរបស់យុវជនគណបក្ស ក្នុងបុព្វហេតុបម្រើជាតិ និងប្រជាជនឱ្យបានកាន់តែល្អប្រសើរ។
នាយករដ្ឋមន្ត្រី និងជាប្រធានគណបក្សប្រជាជនកម្ពុជា លោក ហ៊ុន សែន បានតែងតាំងលោក ហ៊ុន ម៉ាណែត ឱ្យធ្វើជាប្រធានយុវជនគណបក្ស កាលពី៨ មិថុនា បន្ថែមពីលើតួនាទីជាសមាជិកគណៈអចិន្ត្រៃយ៍ ដែលជាក្បាលម៉ាស៊ីនដឹកនាំរបស់បក្សកាន់អំណាច។
ក្នុងវ័យ៤២ ឆ្នាំ លោក ហ៊ុន ម៉ាណែត គឺជាឧត្តមសេនីយ៍ផ្កាយ៣ កាន់តួនាទីជាអគ្គមេបញ្ជាការរងកងយោពលខេមរភូមិន្ទ ជាមេបញ្ជាការកងទ័ពជើងគោក ជាមេបញ្ជាការកងកម្លាំងពិសេសប្រឆាំងភេរវកម្ម និងជាមេបញ្ជាការរងកងអង្គរក្សលោក ហ៊ុន សែន។
ក្រុមអ្នកសង្កេតការណ៍ និងមន្ត្រីជាន់ខ្ពស់គណបក្សសង្គ្រោះជាតិ ជឿថា ការបន្ថែមតួនាទីនៅក្នុងជួរបក្សនេះ គឺដើម្បីឱ្យលោក ហ៊ុន ម៉ាណែត គ្រប់គ្រងសមាជិកជំនាន់ក្រោយរបស់គណបក្ស ដើម្បីឈានទៅស្នងតំណែងតពីឪពុករបស់លោកនៅថ្ងៃអនាគត។ ជាពិសេស តួនាទីនេះនឹងជួយបង្កើនឥទ្ធិពលរបស់លោកក្នុងជួរមន្ត្រីស៊ីវិល ស្របពេលលោកមានអំណាចខ្លាំងស្រាប់នៅក្នុងជួរកងទ័ព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។