មេ​ប៉ូលិស​ជាន់ខ្ពស់​កម្ពុជា លោក នេត សាវឿន មិន​ហ៊ាន​និយាយ​រឿង​ដក​ហូត​សញ្ជាតិ​ស៊ីប

ដោយ ហេង រស្មី
2019-12-04
អ៊ីម៉ែល
មតិ
Share
បោះពុម្ព
លោក នេត សាវឿន អគ្គស្នងការ​នគរបាល​ជាតិ ចូលរួម​សិក្ខាសាលា​ស្ដីពី​ប្រព័ន្ធ​សន្តិសុខ ដើម្បី​ធានា​នូវ​សុវត្ថិភាព និង​សន្តិសុខ ចំពោះ​អាយុ​ជីវិត និង​ទ្រព្យសម្បត្តិ​របស់​ពលរដ្ឋ នា​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៥។
លោក នេត សាវឿន អគ្គស្នងការ​នគរបាល​ជាតិ ចូលរួម​សិក្ខាសាលា​ស្ដីពី​ប្រព័ន្ធ​សន្តិសុខ ដើម្បី​ធានា​នូវ​សុវត្ថិភាព និង​សន្តិសុខ ចំពោះ​អាយុ​ជីវិត និង​ទ្រព្យសម្បត្តិ​របស់​ពលរដ្ឋ នា​រាជធានី​ភ្នំពេញ កាល​ពី​ថ្ងៃ​ទី​១៦ ខែ​កញ្ញា ឆ្នាំ​២០១៥។
RFA

មន្ត្រី​ប៉ូលិស​ជាន់ខ្ពស់​ម្នាក់​ក្នុងចំណោម​មន្ត្រី​ជាន់ខ្ពស់​នៃ​របប​ក្រុងភ្នំពេញ​ម្នាក់ ដែល​មាន លិខិតឆ្លងដែន និង សញ្ជាតិ​ស៊ីប បាន​បដិសេធ​មិន​ធ្វើ​អត្ថាធិប្បាយ ជុំវិញ​ព័ត៌មាន ដែល​រដ្ឋាភិបាល​ស៊ី​ប​បាន​លុបចោល លិខិតឆ្លងដែន និង​ដកហូត​សញ្ជាតិ​ស៊ីប​វិញ​កាលពី​ថ្ងៃ​ពុធ ទី​៤ ធ្នូ​។

អគ្គស្នងការ​នគរបាល​ជាតិ លោក នេត សាវឿន បាន​បដិសេធ​មិន​ឆ្លើយតប​នឹង​សំណួរ​អាស៊ីសេរី ពេល​សាកសួរ​ពី​មូល​ហេតុ​ដែល​លោក​ទទួល​បាន​សញ្ជាតិ​ស៊ីប និង​ប្រតិកម្ម​ក្រោយ​បាត់បង់​សញ្ជាតិ​វិញ៖ «អ្នកណា​និយាយ​ទៅ​សួរ​អ្នក​ហ្នឹង​ចុះ កុំ​មក​សួរ​ខ្ញុំ ។ អ្នកណា​អ្នក​ផ្សាយ​ទៅ​សួរ​អ្នក​ហ្នឹង​ចុះ»

ភ្នាក់ងារ​សារព័ត៌មាន​បារាំង អា​.​អេ​ហ្វ​.​ប៉េ (AFP) បាន​ចុះផ្សាយ​កាលពី​ថ្ងៃ​ទី​០៦ វិច្ឆិកា​ថា រដ្ឋាភិបាល​ប្រទេស​ស៊ីប បានសម្រេច​លុបចោល​លិខិតឆ្លងដែន និង​ដក​សញ្ជាតិ​ស៊ីប ដែល​រដ្ឋាភិបាល​ប្រទេស​នេះ​បាន​ផ្តល់​ឱ្យ​ដល់​ជនបរទេស​សរុប​២៦​នាក់។

ក្នុងចំណោម​ជនបរទេស​ទាំង​២៦​នាក់​ដែល​រដ្ឋាភិបាល​ប្រទេស​ស៊ីប​ដកហូត​សញ្ជាតិ​នោះ ក្នុង​នោះ​រួមមាន​មន្ត្រី​ជាន់ខ្ពស់​គណបក្ស​ប្រជាជន​កម្ពុជា​ចំនួន ៥​រូប​ដែល​ភាគច្រើន​មាន​សាច់ញាតិ​ជាមួយ​មេដឹកនាំ​របប​ក្រុងភ្នំពេញ​លោក ហ៊ុន សែន។

សាច់ញាតិ និង​បក្ខពួក​របស់​លោក ហ៊ុន សែន ដែល​ទទួល​បាន​សញ្ជាតិ​ស៊ីប​ទាំងនោះ រួមមាន​ក្មួយ​ស្រី​លោក ហ៊ុន សែន គឺ​អ្នកស្រី ហ៊ុន គឹមឡេង និង​ប្តី លោក នេ​ត សាវឿន អគ្គស្នងការ​នគរបាល​ជាតិ លោក អូន ព័ន្ធមុនីរ័ត្ន រដ្ឋមន្ត្រី​ក្រសួង​សេដ្ឋកិច្ច និង​ហិរញ្ញវត្ថុ និង​ប្រពន្ធ អ្នកស្រី ជឹង សុភាព (​ហៅ​យាយ​ភូ) និង​ប្តី គឺ​លោក ឡៅ ម៉េង​ឃិន សមាជិក​ព្រឹទ្ធសភា គណបក្ស​ប្រជាជន​កម្ពុជា ដែល​ជាប់​ពាក់ព័ន្ធ​នឹង​អំពើ​ច្បាម​យក​ដី​នៅ​តំបន់​បឹងកក់។

ការ​សម្រេច​លុបចោល​លិខិត​ឆ្លងដែន និង​ដក​សញ្ជាតិ​ស៊ីប​នេះ កើត​មានឡើង​ក្រោយពេល​ដែល​មាន​សេចក្តី​រាយការណ៍​អំពី​រឿងរ៉ាវ​អាស្រូវ​ដែល​បាន​ចោទ​ប្រកាន់​ថា រដ្ឋាភិបាល​ប្រទេស​ស៊ីប បាន​លក់​សញ្ជាតិ និង​លិខិតឆ្លងដែន​ឱ្យ​ជនបរទេស​សរុប​ជិត ​២​ពាន់​នាក់ (.៨៦៤​សញ្ជាតិ​) ក្នុង​នោះ​ក៏​មាន​សាច់ញាតិ និង​ក្រុម​បក្ខពួក​លោក​នាយករ​ដ្ឋ​មន្ត្រី ហ៊ុន សែន ផង ក្នុង​តម្លៃ​ជិត ៣លាន​ដុល្លារ​អាមេរិក​សម្រាប់​បុគ្គល​ម្នាក់ៗ​។

លោក នេត្រ សាវឿន ប្រពន្ធ និង​កូន​ទាំង​បី​របស់​លោក បច្ចុប្បន្ន​ក៏​ត្រូវ​សហរដ្ឋអាមេរិក ដាក់បញ្ចូល​ក្នុង​បញ្ជី​ខ្មៅ​រឹតត្បិត​ទិដ្ឋាការ​មិន​ឱ្យ​មក​ជាន់​ទឹកដី​អាមេរិក​ដោយសារតែ​ពួកគេ​បាន​ចូលរួម​បំផ្លាញ​ប្រជាធិបតេយ្យ​នៅ​កម្ពុជា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល