លោក សម រង្ស៊ី បន្តអំពាវនាវដល់កងកម្លាំងកុំធ្វើតាមមេដឹកនាំផ្ដាច់ការបញ្ជាបាញ់ពលរដ្ឋ
2019.03.30
លោកនាយករដ្ឋមន្ត្រី ហ៊ុន សែន (ឆ្វេង) លោក សម រង្ស៊ី (ស្ដាំ) អតីតប្រធានគណបក្សសង្គ្រោះជាតិ។
Photo: RFA
ចចលោក សម រង្ស៊ី ប្រធានស្ដីទីគណបក្ស សង្គ្រោះជាតិ ថា លោកបន្តអំពាវនាវខ្លាំងឡើងៗ និងជាញឹកញាប់ ទៅកងកម្លាំងប្រដាប់អាវុធ នាយទាហាន ពលទាហាន និងកងនគរបាល កុំឱ្យធ្វើតាមបញ្ជាពីមេដឹកនាំណា ដែលផ្ដាច់ការ បើមេដឹកនាំនោះ បញ្ជាឱ្យបាញ់ប្រហារ និងសម្លាប់ប្រជាពលរដ្ឋស្លូតត្រង់។
លោក សម រង្ស៊ី បង្ហោះក្នុងបណ្ដាញសង្គមហ្វេសប៊ុក (Facebook) ថា ពីពេលនេះទៅ លោកសូមបន្ថែមការអំពាវនាវមួយទៀត គឺសូមជនរួមជាតិម្នាក់ៗ ដែលមានកាំភ្លើងមួយដើមក្នុងដៃ ត្រៀមខ្លួនឈប់ស្ដាប់បញ្ជា លោក ហ៊ុន សែន មេដឹកនាំរបបឯកបក្ស ហើយរក្សាកាំភ្លើងរៀងៗ ខ្លួន ដើម្បីការពារខ្លួន និងការពារប្រជាពលរដ្ឋ ដែលមានសាច់ឈាមជាខ្មែរដូចគ្នា។
ការអំពាវនាវរបស់លោក សម រង្ស៊ី ធ្វើឡើង ក្រោយពេលលោកអះអាងថា លោកបានទទួលដំណឹងថា តុលាការរបបក្រុងភ្នំពេញ បានកោះហៅឱ្យទៅបង្ហាញមុខ នៅថ្ងៃទី២២ ខែមេសា ពីបទចោទប្រកាន់ ញុះញង់កុំឱ្យយោធិន ស្ដាប់បង្គាប់ និងធ្វើឱ្យខូចទឹកចិត្តកងទ័ព។ តែលោកថាមិនខ្វល់ពីការកោះហៅទេ ដោយហៅតុលាការនៃរបបឯកបក្សថា ជាតុលាការអាយ៉ង។ តែលោកមិនបានបញ្ជាក់ថា តុលាការថ្នាក់ណាកោះហៅលោកទេ។
អាស៊ីសេរី មិនទាន់អាចសុំការបញ្ជាក់ពីអ្នកនាំពាក្យសាលាដំបូងរាជធានីភ្នំពេញ លោក លី សុផាណា បាននៅឡើយទេ នៅថ្ងៃទី៣០ មីនា ដោយសារមិនទទួលទូរស័ព្ទ។
លោក សម រង្ស៊ី អះអាងថា ការបង្គាប់ឱ្យពលរដ្ឋរក្សាអាវុធ ដើម្បីការពារដីធ្លី ផ្ទះសម្បែងរបស់ពលរដ្ឋរៀងៗខ្លួន ព្រោះ ពេលអាជ្ញាធរមករឹបអូសដីធ្លី និង ផ្ទះសម្បែងរបស់ពលរដ្ឋ នឹងមានការបាញ់ប្រហារមកលើពលរដ្ឋ។ មេដឹកនាំបក្សប្រឆាំងរូបនេះ យល់ថា បើពលរដ្ឋគ្មានទោស មិនព្រមការពារខ្លួនទេ នៅពេលជនសាហាវ ឬក្រុមសាហាវណាមួយ មករំលោភបំពានពលរដ្ឋ នឹងរងគ្រោះដល់ស្លាប់។
គិតមកដល់ពេលនេះ លោក សម រង្ស៊ី កំពុងរងបណ្ដឹង ពីលោក ហ៊ុន សែន ក្រុមមេយោធា មន្ត្រីជាន់ខ្ពស់របបឯកបក្ស នៅតុលាការកម្ពុជាជាង ១០បណ្ដឹង សុទ្ធតែពាក់ព័ន្ធនឹងរឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
រឿងដែលគេអានច្រើនបំផុត
RFA
- លោក គា សុគន្ធ អ្នកនិពន្ធគំរូក្នុងការឆ្លុះបញ្ចាំងការពិត និងបណ្ដុះស្មារតីស្នេហាជាតិ
- ថៃយល់ព្រមឱ្យកម្ពុជាប្រើពាក្យ «គុនខ្មែរ» ក្នុងព្រឹត្តិការណ៍ស៊ីហ្គេម២០២៣
- ធនាគារABA មិនព្រមបើកប្រាក់ជាង១ម៉ឺន ៥ពាន់ដុល្លារ ដែលឧបត្ថម្ភដល់បុគ្គលិកណាហ្គាវើលដ៍
- «ករណីឧកញ៉ា សៀង ចាន់ហេង ប្រគល់ដីឲ្យប្អូនស្រីនាយករដ្ឋមន្ត្រីបង្ហាញថា អ្នកធំតែងឈ្នះ»
- លោកខាងលិចចង់ឃើញការបោះឆ្នោតជាតិប្រព្រឹត្តទៅដោយសេរី និងយុត្តិធម៌ ក្រោយការចាប់ខ្លួនលោក ថាច់ សេដ្ឋា
រឿងដែលគេអានច្រើនបំផុត
នយោបាយ
- ក្រុមមន្ត្រីជាន់ខ្ពស់គណបក្សកាន់អំណាចប្រតិកម្មនឹងពលរដ្ឋខ្មែររស់នៅក្រៅប្រទេស ជេរប្រមាថលោក ហ៊ុន ម៉ាណែត តាមបណ្ដាញសង្គម
- លោក ហ៊ុន សែន បន្តប្រកាសថា នឹងការពារមិនឱ្យមានរដ្ឋប្រហារ ដើម្បីអភិវឌ្ឍប្រទេសឱ្យរីកចំរើន
- គណបក្សចំនួន៣ ចូលរួមប្រកួតដណ្ដើមកៅអីក្រុមប្រឹក្សាស្រុកក្រុងទើបបំបែកថ្មី
- លោក រ៉ុង ឈុន នឹងដឹកនាំធ្វើធម្មយាត្រាលើកកម្ពស់សីលធម៌សង្គមនៅសប្តាហ៍ក្រោយ
- គណបក្សភ្លើងទៀនប្រជុំថ្នាក់ដឹកនាំតាមរាជធានីខេត្ត ក្រោយបក្សកាន់អំណាចធ្វើទុក្ខបុកម្នេញ