មន្ត្រីគណបក្សសង្គ្រោះជាតិនៅនូវែលហ្សេឡង់ (New Zealand) ដែលមានទំនាក់ទំនងល្អជាមួយមន្ត្រីរដ្ឋាភិបាលជាន់ខ្ពស់បក្សនេះ បានសម្របសម្រួលដើម្បីឱ្យការបំពេញបេសកកម្មរបស់លោក សម រង្ស៊ី នៅប្រទេសនេះជួបសមាជិកសភា និងរដ្ឋមន្ត្រីនៃប្រទេសនេះដែលជាអ្នកនយោបាយជាន់ខ្ពស់លេខរៀងទី៤ បន្ទាប់ពីប្រធានាធិបតី ដើម្បីជជែកពីដំណោះស្រាយវិបត្តិនយោបាយនៅកម្ពុជា និងការធ្វើមាតុភូមិនិវត្តន៍របស់លោក សម រង្ស៊ី នៅថ្ងៃទី៩ ខែវិច្ឆិកា ខាងមុខ។
តាមគម្រោងនៅយប់ទី២១ ខែសីហា នេះ លោក សម រង្ស៊ី នឹងទៅដល់ប្រទេសនូវែលហ្សេឡង់ ដើម្បីស្វែងការរកគាំទ្រពីពលរដ្ឋខ្មែរ និងសមាជិកសភា និងមន្ត្រីរដ្ឋាភិបាលនៃប្រទេសនេះ។ លោក សម រង្ស៊ី មកបំពេញបេសកកម្មការទូតនៅប្រទេសនេះ ពីថ្ងៃទី២២ ដល់ថ្ងៃទី២៣ ខែសីហា ដែលអ្នករៀបចំអះអាងថា នឹងមានអ្នកគាំទ្ររាប់រយនាក់រង់ចាំស្វាគមន៍។
ប្រធានសាខាគណបក្សសង្គ្រោះជាតិប្រចាំប្រទេសនូវែលហ្សេឡង់ លោក ម៉េង លី ឱ្យអាស៊ីសេរីដឹងថា សមាជិកសភាលោក ម៉ៃឃើល វូដ (Michael Wood) និងរដ្ឋមន្ត្រីក្រសួងនគរូបនីយកម្ម អ្នកស្រីបណ្ឌិត មេហ្គេន វូដ (Megan Wood) រីករាយស្វាគមន៍ និងជួបជជែកជាមួយលោក សម រង្ស៊ី នៅពេលលោកមេដឹកនាំគណបក្សសង្គ្រោះជាតិរូបនេះ មកដល់ប្រទេសនេះ។ លោកបញ្ជាក់ថា រដ្ឋាភិបាលប្រទេស ណូវែល ហ្សេឡង់ មានទំនាក់ល្អជាក្រុមលោក ក៏ដូចជាគណបក្សសង្គ្រោះជាតិ តាំងពីពួកគេនៅជាគណបក្សប្រឆាំងមកម្ល៉េះ៖ «គណបក្សពលករដែលដឹកនាំរដ្ឋាភិបាលគេគាំទ្រចំពោះលទ្ធិប្រជាធិបតេយ្យ សេរីភាពក្នុងការបញ្ចេញមតិ និងសេរីភាពរបស់ប្រជាជន ហើយសារនយោបាយគណបក្សសង្គ្រោះជាតិដើម្បីលទ្ធិប្រជាធិបតេយ្យត្រង់នេះហើយដែលជាកត្តាសំខាន់ដែលគណបក្សនៅនូវែលហ្សេឡង់គាំទ្រយើង»។
លោក ម៉េង លី ឱ្យដឹងទៀតថា លោក សម រង្ស៊ី នឹងជួបអ្នកគាំទ្ររបស់ខ្លួននៅទីក្រុងពីរផ្សេងៗគ្នា ដែលមានអ្នកគាំទ្ររង់ចាំស្វាគមន៍ចន្លោះពី២០០នាក់ និង៣០០នាក់។ លោកថា ជំហរពលរដ្ឋខ្មែរនៅប្រទេសណូវែលហ្សេឡង់ គាំទ្រការធ្វើមាតុភូមិវិវត្តន៍ របស់លោក សម រង្ស៊ី ហើយក៏មានពលរដ្ឋខ្មែរមួយចំនួនផងដែរស្ម័គ្រចិត្តអមដំណើរលោក សម រង្ស៊ី ទៅប្រទេសកម្ពុជាវិញ៖ «ប្រជាជននៅណូវែលហ្សេឡង់ គាត់តែងតែមានក្តីសង្ឃឹមនៅពេលឃើញលោក សម រង្ស៊ី គាត់មកបន្តជាអ្នកដឹកនាំគណបក្សសង្គ្រោះជាតិ ហើយយើងមានសេចក្ដីសប្បាយចិត្តដែលគាត់មកទទួលយកតួនាទីប្រធានស្ដីទីគណបក្សសង្គ្រោះជាតិ»។
មុនពេលលោក លោក សម រង្ស៊ី មកដល់ប្រទេសនូវែលហ្សេឡង់ មេដឹកនាំគណបក្សប្រឆាំងរូបនេះ បានជួបអ្នកគាំទ្រ សមាជិករដ្ឋសភា និងព្រឹទ្ធសភា នៅប្រទេសអូស្ត្រាលីដែលជាប់ព្រំដែននឹងប្រទេសនូវែលហ្សេឡង់។ សមាជិករដ្ឋសភា និងព្រឹទ្ធសភាអូស្ត្រាលីមួយចំនួន ត្រូវបានមន្ត្រីគណបក្សសង្គ្រោះជាតិអះ អាងថា គាំទ្រការវិលចូល ស្រុករបស់លោក សម រង្ស៊ី ថែមសន្យាធ្វើជាសាក្សី និងតាមដានព្រឹត្តិការណ៍នេះ។
អនុប្រធានគណបក្សសង្គ្រោះជាតិ លោក អេង ឆៃអ៊ាង ដែលអមដំណើរលោក សម រង្ស៊ី ក្នុងការបំពេញបេសកកម្មនេះ ឱ្យដឹងថា លោក សម រង្ស៊ី នឹងលើកឡើងពីវិបត្តិនយោបាយ ការរំលោភសិទ្ធិមនុស្ស និងប្រជាធិបតេយ្យនៅកម្ពុជា ប្រាប់ទៅសមាជិកសភា និងរដ្ឋមន្ត្រីប្រទេសនូវែលហ្សេឡង់ ឱ្យបានដឹងកាន់តែច្បាស់។ លោកថា សារសំខាន់មួយទៀត គឺលោក សម រង្ស៊ី នឹងបញ្ជាក់ជំហររបស់ខ្លួនក្នុងការវិលចូលស្រុកវិញនៅថ្ងៃទី៩ ខែវិច្ឆិកា ដើម្បីស្តារសិទ្ធិមនុស្ស និងប្រជាធិបតេយ្យឡើងវិញ៖ «យើងត្រូវតែជម្រាបគេឱ្យដឹងអំពីផែនការសកម្មភាពនយោបាយរបស់យើងជាពិសេសជុំវិញការវិលត្រឡប់ទៅកាន់ប្រទេសកម្ពុជាវិញរបស់លោកប្រធានស្តីទី សម រង្ស៊ី ឱ្យគេបានដឹង ឱ្យគេឃ្លាំមើល»។
ក្រុមអ្នកវិភាគយល់ថា លោក សម រង្ស៊ី កំពុងស្វែងការគាំទ្រពីពលរដ្ឋខ្មែរនៅក្រៅស្រុក និងសហគមន៍អន្តរជាតិ ហើយក៏កំពុងទទួលបានលទ្ធផលជាវិជ្ជមាន។ គណបក្សសង្គ្រោះជាតិប្រកាសថា លោក សម រង្ស៊ី នឹងធ្វើមាតុភូមិនិវត្តន៍ទៅកម្ពុជាវិញ នៅថ្ងៃទី០៩ ខែវិច្ឆិកាខាងមុខ ចំថ្ងៃបុណ្យឯករាជ្យជាតិរបស់កម្ពុជា។ លោក សម រង្ស៊ី បញ្ជាក់ជំហរថា ការវិលចូលស្រុករបស់លោកដើម្បីយកប្រទេសកម្ពុជា ពីមេដឹកនាំផ្ដាច់ការ ហ៊ុន សែន មកវិញ។ លោក សម រង្ស៊ី ធ្លាប់សន្យាថា វិលចូលកម្ពុជាជាញឹកញយ ក៏ប៉ុន្តែលោកមិនទាន់បានធ្វើតាមការសន្យានោះឡើយ រហូតមកទល់ពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។