លោក អ៊ុំ សំអាន ថា​បើ​លោក​នៅ​ក្រៅ​ពន្ធនាគារ​អាច​មាន​វាសនា​ដូច​លោក​បណ្ឌិត កែម ឡី

ដោយ ខែ សុណង
2016-07-12
អ៊ីម៉ែល
មតិ
Share
បោះពុម្ព
តំណាងរាស្ត្រ​គណបក្ស​សង្គ្រោះជាតិ លោក អ៊ុំ សំអាន (រូប​កណ្ដាល) ថ្លែង​ទៅ​កាន់​អ្នក​សារព័ត៌មាន នៅ​ពេល​លោក ត្រូវ​នាំ​ខ្លួន​មក​កាន់​សាលាឧទ្ធរណ៍ នៅ​ព្រឹក​ថ្ងៃ​ទី​១២ ខែ​កក្កដា ឆ្នាំ​២០១៦។
តំណាងរាស្ត្រ​គណបក្ស​សង្គ្រោះជាតិ លោក អ៊ុំ សំអាន (រូប​កណ្ដាល) ថ្លែង​ទៅ​កាន់​អ្នក​សារព័ត៌មាន នៅ​ពេល​លោក ត្រូវ​នាំ​ខ្លួន​មក​កាន់​សាលាឧទ្ធរណ៍ នៅ​ព្រឹក​ថ្ងៃ​ទី​១២ ខែ​កក្កដា ឆ្នាំ​២០១៦។
RFA/Rann Samnang

តំណាង​រាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន ដែល​កំពុង​ជាប់​ឃុំ​នៅ​ពន្ធនាគារ​ក្នុង​រឿង​រិះគន់​ពី​បញ្ហា​ព្រំដែន បាន​ថ្លែង​ប្រាប់​អ្នក​សារព័ត៌មាន​ថា ការ​ដែល​លោក​ត្រូវ​គេ​ចាប់​ដាក់​ពន្ធនាគារ​នោះ​មាន​សុវត្ថិភាព​ជាង​រស់នៅ​ខាង​ក្រៅ ដែល​អាច​នឹង​មាន​ករណី​បាញ់​សម្លាប់​ដូច​លោក​បណ្ឌិត កែម ឡី ដោយសារ​តែ​ហ៊ាន​រិះគន់​រឿង​ព្រំដែន និង​រឿង​មុខ​ជំនួញ​របស់​ត្រកូល​ហ៊ុន។

ក្នុង​សម្លៀកបំពាក់​ពណ៌​ស្លា​ទុំ ដៃ​ជាប់​ខ្នោះ បណ្ដើរ​ដោយ​កង​សន្តិសុខ តំណាង​រាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន ដែល​កំពុង​ជាប់​ពិរុទ្ធ​ក្នុង​រឿង​រិះគន់​ពី​បញ្ហា​ព្រំដែន បាន​និយាយ​ថា លោក​បាន​ដឹង​ចំពោះ​ការ​បាញ់​ប្រហារ​លើ​លោក​បណ្ឌិត កែម ឡី អ្នក​វិភាគ​ឯករាជ្យ។

នៅ​ពេល​ចេញ​ពី​បន្ទប់​សវនាការ​សាលា​ឧទ្ធរណ៍ នៅ​ថ្ងៃ​ទី​១២ កក្កដា ដែល​មាន​ក្រុម​សន្តិសុខ​ក្រៀក​លោក​បណ្ដើរ​ចូល​រថយន្ត​យ៉ាង​ប្រញាប់ប្រញាល់ លោក អ៊ុំ សំអាន បាន​ឆ្លៀត​ថ្លែង​ទៅ​កាន់​អ្នក​កាសែត​ថា បើ​លោក​មិន​ជាប់​ពន្ធនាគារ​ទេ លោក​អាច​មាន​វាសនា​ដូច​លោក​បណ្ឌិត កែម ឡី។

លោក អ៊ុំ សំអាន ថ្លែង​ថា «ព្រោះ​លោក កែម ឡី គាត់​ហ៊ាន​រិះគន់​រដ្ឋាភិបាល ហ៊ាន​រិះគន់​ជំនួញ​របស់​ត្រកូល​ហ៊ុន តាម​របាយការណ៍ គ្លបល វីនេស (Global witness) ហើយ​រិះគន់​រឿង​ព្រំដែន​បាន​ជា​គេ​សម្លាប់​គាត់។ ដូច្នេះ​នៅ​ក្នុង​ពន្ធនាគារ​នោះ​មាន​សុវត្ថិភាព​ជាង​ក្រៅ។ សម័យ​នេះ​អ្នក​ដែល​ស្នេហា​ជាតិ អ្នក​ដែល​ការពារ​ព្រំដែន​ជាប់​គុក ហើយ​អ្នក​ដែល​កាត់​ដី​ឲ្យ​យួន​បែប​ជា​រួច​ខ្លួន»

មន្ត្រី​ផ្នែក​បច្ចេកទេស​ស៊ើប​អង្កេត​នៃ​អង្គការ​លីកាដូ (LICADHO) លោក អំ សំអាត មាន​ទស្សនៈ​ថា ការ​លើក​ឡើង​របស់​លោក អ៊ុំ សំអាន គឺ​ជា​ការ​ព្រួយ​បារម្ភ​អំពី​ភាព​សុវត្ថិភាព​ផ្ទាល់​ខ្លួន និង​ភាព​អសន្តិសុខ នៅ​បន្ទាប់​ពី​មាន​ការ​បាញ់​ប្រហារ​លើ​លោក​បណ្ឌិត កែម ឡី ដែល​ហ៊ាន​រិះគន់ និង​និយាយ​ចំៗ​ពី​បញ្ហា​នយោបាយ ព្រំដែន សេដ្ឋកិច្ច និង​ការ​អភិវឌ្ឍ​សង្គម៖ «សម្ដេច​នាយក​រដ្ឋមន្ត្រី​ក៏​គាត់​លើក​ឡើង​ដែរ អំពី​បញ្ហា​នៃ​ការ​ធ្វើ​ឃាត​ទៅ​លើ​លោក កែម ឡី នេះ​ការ​មាន​ការ​ឆក​ល្វែង​នៃ​ការ​ផ្ដល់​កិច្ច​ការពារ​សន្តិសុខ​សុវត្ថិភាព​សម្រាប់​ប្រជាពលរដ្ឋ​ទូទៅ ពិសេស​លោក កែម ឡី គាត់​ជា​អ្នក​វិភាគ ហើយ​មាន​ការ​រិះគន់​ធ្ងន់​ទៅ​លើ​គណបក្ស​កាន់​អំណាច គណបក្ស​ជំទាស់ និង​ទៅ​លើ​រដ្ឋាភិបាល​នោះ​បាទ»

ការ​ថ្លែង​នេះ បន្ទាប់​ពី​សភា​ស៊ើបសួរ​សាលា​ឧទ្ធរណ៍ បើក​សវនាការ​ជំនុំ​ជម្រះ​លើ​បណ្ដឹង​មោឃភាព​នីតិវិធី​លើ​ពាក្យ​បណ្ដឹង​របស់​មេធាវី​លោក អ៊ុំ សំអាន ដែល​ក្រុម​មេធាវី​យល់​ថា ចាប់​តាំង​ពី​ចំណាត់​ការ​នៅ​ប៉ូលិស​រហូត​ដល់​ចៅក្រម​ស៊ើបសួរ បំពាន​នីតិវិធី។

សភា​ស៊ើបសួរ​សាលា​ឧទ្ធរណ៍ បាន​សម្រេច​ច្រាន​ចោល​ពាក្យ​បណ្ដឹង​របស់​មេធាវី​ការពារ​តំណាង​រាស្ត្រ​គណបក្ស​សង្គ្រោះ​ជាតិ លោក អ៊ុំ សំអាន ដោយ​ផ្ដល់​ហេតុផល​ចំនួន​ពីរ គឺ​ពាក្យ​បណ្ដឹង​របស់​មេធាវី​មិន​អាច​ទទួល​យក​បាន និង​បង្វិល​សំណុំ​រឿង​ទៅ​សាលា​ដំបូង​ចាត់​ការ​បន្ត។

ទាក់ទង​សេចក្ដី​សម្រេច​នេះ មេធាវី​ការពារ​ក្ដី​លោក អ៊ុំ សំអាន គឺ​លោក ហែម សុជាតិ មាន​ប្រសាសន៍​ថា ក្រុម​មេធាវី​នឹង​ធ្វើ​បណ្ដឹង​សាទុក្ខ​ទៀត​លើ​ករណី​នេះ។ លោក​ថា នីតិវិធី​តុលាការ​បំពាន​មាត្រា​៨០ នៃ​រដ្ឋធម្មនុញ្ញ ដែល​លោក អ៊ុំ សំអាន នៅ​ជា​អ្នក​តំណាង​រាស្ត្រ​មិន​ទាន់​ដក​អភ័យ​ឯកសិទ្ធិ«សភា​ស៊ើបសួរ​យល់​ថា គាត់​អត់​មាន​សមត្ថកិច្ច​ពិចារណា​លើ​មាត្រា​ទី​៨០ នៃ​រដ្ឋធម្មនុញ្ញ​ទេ គឺ​គាត់​អត់​ពិចារណា​ចំណុច​ហ្នឹង​ទេ គឺ​ជា​ចំណុច​សំខាន់ គឺ​គាត់​បាន​ច្រាន​ចោល​របស់​យើង។ យើង​ក៏​បាន​ស្នើសុំ​ឲ្យ​សភា​ពិចារណា​លើ​ចំណុច​នេះ តែ​ទី​បញ្ចប់ សភា​ស៊ើបសួរ​សាលា​ឧទ្ធរណ៍ គឺ​គាត់​ថា​គាត់​អត់​មាន​សមត្ថកិច្ច​ពិចារណា​លើ​មាត្រា​នេះ​ទេ។ ខ្ញុំ​យល់​ឃើញ​ថា សភា​ស៊ើបសួរ​សាលា​ឧទ្ធរណ៍​គាត់​មាន​សមត្ថកិច្ច​អាច​ពិចារណា ពីព្រោះ​គាត់​ត្រូវ​ពិនិត្យ​អំពី​និយតភាព​នៃ​នីតិវិធី ប៉ុន្តែ​នៅ​ពេល​នេះ សភា​ស៊ើបសួរ​គាត់​យល់​ថា ចំណាត់​ការ​របស់​អយ្យការ​សាលា​ដំបូង និង​របស់​ចៅក្រម​ស៊ើបសួរ គាត់​យល់​ថា​ត្រឹមត្រូវ។ ប៉ុន្តែ​សម្រាប់​មេធាវី​នៅ​តែ​ចាត់​ទុក​ថា​មិន​មែន​ជា​ការ​ត្រឹមត្រូវ​ទេ»

ទោះ​យ៉ាង​ណា លោក អ៊ុំ សំអាន យល់​ថា សេចក្ដី​សម្រេច​របស់​សាលា​ឧទ្ធរណ៍​នៅ​ពេល​នេះ រំលោភ​មាត្រា​៨០ នៃ​រដ្ឋធម្មនុញ្ញ ដោយ​តុលាការ​ឃុំ​ខ្លួន​លោក​ដែល​កំពុង​មាន​អភ័យ​ឯកសិទ្ធិ​នៅ​ឡើយ។ នេះ​ជា​រឿង​អយុត្តិធម៌។

លោក អ៊ុំ សំអាន ត្រូវ​បាន​សមត្ថកិច្ច​ចាប់​ខ្លួន​កាល​ពី​ថ្ងៃ​ទី​១១ ខែ​មេសា ឆ្នាំ​២០១៦។ មួយ​ថ្ងៃ​បន្ទាប់​ពី​ការ​ចាប់​ខ្លួន លោក​ត្រូវ​បាន​សាលា​ដំបូង​រាជធានី​ភ្នំពេញ ចេញ​ដីកា​ឲ្យ​ឃុំ​ខ្លួន​បណ្ដោះអាសន្ន​នៅ​គុក​ព្រៃ​ស ដោយ​ចោទ​ប្រកាន់​ពីរ​បទល្មើស គឺ​ញុះញង់​ឲ្យ​ប្រព្រឹត្ត​អំពើ​ឧក្រិដ្ឋ និង​ញុះញង់​ឲ្យ​មាន​ការ​រើសអើង​ជាអាទិ៍​នៃ​ក្រម​ព្រហ្មទណ្ឌ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (4)
Share

អ្នក​អាន​អនាមិក

Kem Ley is a true Khmer HERO! I'm shaken & sadden by his brutal murder. អ៊ុំ សំអាន, I don't want to loose you too. Please keep your mouth shut! This Dictator can & will murder anybody wether you're in the prison or out! Because he knows the United Nation is just a paper tiger!

Jul 12, 2016 07:59 PM

អ្នក​អាន​អនាមិក

Sok Touch should realize in a REAL democracy no one is thinking they could lose their life by expressing their opinions...countries like the U.S, Australia, France and Canada..etc. peopple don't think about that because people are free from fear.

This could only happen in a dictatorship country like Cambodia where people always think about death when they criticize the government. Ask the people if they want to change or stay the same? Almost all want change.

Jul 12, 2016 11:48 AM

អ្នក​អាន​អនាមិក

u r right.

Jul 12, 2016 08:51 AM

អ្នក​អាន​អនាមិក

ស្តាប់ទៅទំនងដែរទាន សម្រាប់ប្រទេសណាមិនដឹងទេ តែសម្រាប់ប្រ​ទេស​ខ្មែរនេះ និងពិសេសចាប់ពីសម័យអាពតមកដល់ឥឡូវ គឺអ្នក​ល្ងង់​​បាន​ធ្វើធំ អ្នកចេះត្រូវតែស្លាប់( ជា វិជ្ជា ឈុត វុធ្ធី លោក បណ្ឌិតកែមឡី) និងបើចង់រស់ត្រូវធ្វើឆ្គួតបាទ និងត្រង់ដែលលោក​ថា​នៅក្នុងគុកមានសុវត្តិភាពជាងនោះ អាលាប់ខ្ញុំដូចមិនជាគាំទ្រទេទាន ធម្មតាត្រីបើនៅក្នុងទ្រុង គឺងាយជួបនិងម្ជូស្វាយជាងក្នុងបឹង នេះតាម​អា​លាប់​​ខ្ញុំយល់អញ្ចឹង ព្រោះអីមានពាក្យថា អ្នកនយោបាយត្រូវទន្ទិញ​ធម្មបីម៉ាត់គឺ ងាប់ ជាប់គុក និង រត់ចោលស្រុក តែអាលាប់ខ្ញុំនៅ​តែ​យល់ថា ងាប់ចាញ់ ជាប់គុកចប់ មានតែរត់ចោលស្រុកទេ​ជាធម្មពិ​សេស ព្រោះរក្សាព្រៃគង់មិនខ្លាចខ្វះឧសដុចទេទាន។

Jul 12, 2016 07:39 AM

គេហទំព័រ​ទាំងមូល