ពលរដ្ឋ​មួយ​ចំនួន​នៅ​ត្បូងឃ្មុំ​តវ៉ា​រឿង​អាជ្ញាធរ​មូលដ្ឋាន​មិន​ចែក​លុយ​តាម​សន្យា​ក្រោយ​បោះឆ្នោត

វ៉ែន សុមេធ
2018-08-25
អ៊ីម៉ែល
មតិ
Share
បោះពុម្ព
ផែនទី​ខេត្ត​ត្បូងឃ្មុំ
ផែនទី​ខេត្ត​ត្បូងឃ្មុំ
Photo: RFA

ប្រជាពលរដ្ឋ​ដែល​បាន​ទៅ​បោះឆ្នោត នៅ​ស្រុក​តំបែរ ខេត្ត​ត្បូងឃ្មុំ ផ្ទុះ​ការ​តវ៉ា​ទាមទារ​លុយ​ពីរ​ម៉ឺន​រៀល ថ្លៃ​ឈ្នួល​ពួកគេ​ទៅ​បោះឆ្នោត បន្ទាប់​ពី​អាជ្ញាធរ​មូលដ្ឋាន​មិន​បាន​ចែក​លុយ​តាម​ការសន្យា ក្រោយពី​បោះឆ្នោត។ រីឯ​អាជ្ញាធរ​មូលដ្ឋាន ថា​លុយ​នោះ​សម្រាប់​ចែក​ជូន សមាជិក​គណបក្ស​ប្រជាជន​កម្ពុជា​ប៉ុណ្ណោះ មិនមែន​ចែក​គ្រប់​អ្នក​ទៅ​បោះឆ្នោត​នោះ​ទេ។ អ្នក​ជំនាញ​រឿង​បោះឆ្នោត យល់​ថា ការ​ដែល​អាជ្ញាធរ​ចែក​លុយ​ដល់​អ្នកបោះឆ្នោត​នោះ គឺជា​រូបភាព​ទិញ​សន្លឹកឆ្នោត ដែល​ផ្ទុយ​ពី​ច្បាប់​ត្រូវ​ទទួលទោស។

ប្រជាពលរដ្ឋ​ម្នាក់​សុំ​មិន​បញ្ចេញ​ឈ្មោះ រស់នៅ​ភូមិ​ក្រសាំង ឃុំ​ទឹក​ជ្រៅ ស្រុក​តំបែរ ឲ្យ​ដឹង​ថា ប្រជាពលរដ្ឋ​ជាច្រើន​នាក់ ដែល​បាន​ទៅ​បោះឆ្នោត​នោះ នាំគ្នា​តវ៉ា​នៅផ្ទះ​មេភូមិ​ក្រសាំង និង​ផ្ទះ​មេឃុំ​ទឹក​ជ្រៅ ចាប់​តាំង​ពី​ថ្ងៃទី​២៤ ខែ​សីហា មក ដោយសារ​ភូត​កុហក មិន​ព្រម​ចែក​លុយ​តាម​ការសន្យា។ ពលរដ្ឋ​រូប​នេះ បន្ត​ថា មេភូមិ ក៏​បាន​ប្រើ​ភាសា​គំរាមកំហែង និង​អោយ​ប្រជាពលរដ្ឋ​ស្បថ​ដាក់​ជីវិត មុននឹង​ទទួលយក​លុយ ដែល​គេ​បាន​សន្យា​ផ្ដល់​ឲ្យ កាល​ពី​មុន​បោះឆ្នោត។ ប្រជាពលរដ្ឋ​ខ្លះ​ទៀត ខឹង​ខ្លាំង​រហូត​នាំគ្នា​ផ្តិត​មេដៃ ធ្វើ​ញត្តិ​ទម្លាក់​មេភូមិ​នោះ​ទៀត​ផង។ ពលរដ្ឋ​រូប​នេះ បញ្ជាក់​ថា នៅមុន​ថ្ងៃ​បោះឆ្នោត គឺ​អាជ្ញាធរ​បាន​ដើរ​គំរាមកំហែង និង​សន្យា​ថា គណបក្ស​ប្រជាជន​កម្ពុជា នឹង​ចែក​លុយ សម្រាប់​ប្រជាពលរដ្ឋ​ម្នាក់ៗ ២​ម៉ឺន​រៀល ប្រសិនបើ​ទៅ​បោះឆ្នោត​មាន​ស្នាម​ទឹកខ្មៅ​លើ​ម្រាមដៃ។ «»

ប្រជាពលរដ្ឋ​ឲ្យ​ដឹង​ថា គណបក្ស​ប្រជាជន​កម្ពុជា បាន​ទម្លាក់​លុយ​ទៅ​តាម​ភូមិ យ៉ាង​ហោចណាស់ ១០​លាន​រៀល សម្រាប់​ចែក​ប្រជាពលរដ្ឋ​ដែល​បាន​បោះឆ្នោត ប៉ុន្តែ​មេភូមិ​មួយ​ចំនួន បាន​កិបកេង​លុយ​នោះ​ទុក​ខ្លួនឯង ឬក៏​ចែកចាយ​តែ​បក្ខពួក​ប៉ុណ្ណោះ ម្ល៉ោះ​ហើយ​ទើប​បណ្ដាល​ឲ្យ​អ្នកបោះឆ្នោត​ខ្លះ ខឹង​ហើយ​នាំគ្នា​តវ៉ា។

ចំណែក​ពលរដ្ឋ​ម្នាក់ទៀត រស់នៅ​ភូមិ​ស្រម៉ ឃុំ​ទឹក​ជ្រៅ រៀបរាប់​ដែរ​ថា មេភូមិ​ស្រម៉ ក៏​បាន​ហៅ​អ្នក​បោះឆ្នោត​ទៅ​ចែក​លុយ​ដែរ។ លោក​បញ្ជាក់​ថា លុយ​នោះ គឺជា​លុយ​ទិញ​សន្លឹកឆ្នោត ព្រោះ​មុន​ការ បោះឆ្នោត ខាង​គណបក្ស​ប្រជាជន​កម្ពុជា បាន​ដើរ​សន្យា​ចែក​លុយ បើ​អ្នកណា​ទៅ​បោះឆ្នោត។ «»

ឆ្លើយតប​ករណី​នេះ មេឃុំ​ទឹក​ជ្រៅ លោក ហ៊ឹង ម៉េងហ៊ាង លើកឡើង​ថា គណបក្ស​ប្រជាជន​កម្ពុជា​នៅ​ខាងលើ ពិត​ជា​បាន​ទម្លាក់​កញ្ចប់​លុយ​អោយ​តាម​ភូមិ ដើម្បី​ចែក​អ្នក​ទៅ​បោះឆ្នោត​មែន ប៉ុន្តែ​ចែក​សម្រាប់​សមាជិក​គណ​បក្ស​ប្រជាជន​កម្ពុជា​ប៉ុណ្ណោះ មិនមែន​ចែក​សម្រាប់​អ្នកបោះឆ្នោត​គ្រប់​រូប​នោះ ទេ។ លោក​បញ្ជាក់​ថា ការដែល​អ្នកភូមិ​តវ៉ា​នោះ ព្រោះ​ពួកគេ​យល់​ច្រឡំ​ថា លុយ​នោះ​សម្រាប់​ចែកចាយ​គ្រប់គ្នា ហើយ​មានតែ​ភូមិ​ក្រសាំង​មួយ​ប៉ុណ្ណោះ ដែល​មាន​អ្នកបោះឆ្នោត​តវ៉ា​ទាម​ទារ​លុយ​ចំនួន ២​ម៉ឺន​រៀល ចំណែក​ភូមិ​ផ្សេង​មិន​មាន​ការ​តវ៉ា​ទេ។ «»

អាស៊ីសេរី មិន​អាច​សុំ​ការ​ឆ្លើយ​តប​ពី​អភិបាលខេត្ត​ត្បូងឃ្មុំ លោក លី ឡេង នៅ​ថ្ងៃ​ទី​២៥ ខែ​សីហា បានទេ ដោយ​លោក​ប្រាប់​ថា ជាប់​រវល់​សែន​ចិន និង​ជួបជុំ​បងប្អូន។

អតីត​សមាជិក​គណៈកម្មាធិការ​ជាតិ​រៀបចំ​ការបោះឆ្នោត និង​ជា​ប្រធាន​សហភាព​សហជីព​កម្ពុជា និង​ជា​លោក រ៉ុង ឈុន មាន​ប្រសាសន៍​ថា នៅ​ក្នុង​ខេត្ត​ត្បូងឃ្មុំ ដែល​មាន​មន្ត្រី​គណបក្ស​ប្រជាជន​បាន​ផ្តល់​ប្រាក់​ឲ្យ​ប្រជាពលរដ្ឋ បន្ទាប់ពី​ការបោះឆ្នោត​ហើយ គឺជា​ទង្វើ​មួយ​ផ្ទុយ​ពី​ច្បាប់​ដែល​ត្រូវតែ​ទទួលទោស។ លើស​ពី​នេះ លោក​យល់​ថា ករណី​នេះ ក៏​ជា​ភស្តុតាង​បង្ហាញ​បន្ថែម​ទៀត​ថា ការ​បោះ ឆ្នោត​កន្លងទៅ​គ្មាន​យុត្តិធម៌ និង​សេរី​ត្រឹមត្រូវ។ «»

ព្រឹត្តិការណ៍​ថ្ងៃ​ទី​២៩ ខែ​កក្កដា កន្លង​ទៅ ត្រូវ​សហគមន៍​ជាតិ និង​អន្តរជាតិ ចាត់ទុកថា ជា​ការ​បោះឆ្នោត​ក្លែងក្លាយ គ្មាន​ភាព​សេរី ត្រឹមត្រូវ និង​យុត្តិធម៌ ដែល​អាច​ឆ្លុះបញ្ចាំង​ឆន្ទៈ​រាស្ត្រ​ពិតប្រាកដ​នោះ​ឡើយ ដោយសារ​របប​លោក ហ៊ុន សែន មិន​ត្រឹមតែ​បាន​រារាំង​មិន​ឲ្យ​គណបក្ស​សង្គ្រោះជាតិ​ចូលរួម​ការបោះឆ្នោត​នោះ​ទេ គឺ​ថែមទាំង​បាន​គំរាមកំហែង បំភិតបំភ័យ ទិញ​ទឹកចិត្ត បំបិទ​សេរីភាព​សព្វបែបយ៉ាង ដើម្បី​ដណ្ដើម​ជ័យជំនះ​តែ​ម្នាក់ឯង។ ក្រុម​អ្នក​និយម​ប្រជាធិបតេយ្យ និង​ប្រទេស​ប្រជាធិបតេយ្យ​ធំៗ លើ​ពិភពលោក​មួយ​ចំនួន ប្រកាស​មិន​ទទួលស្គាល់​លទ្ធផល​ឆ្នោត និង​មិន​ទទួល​ស្គាល់​រដ្ឋាភិបាល​ថ្មី​ដែល​បង្កើត​ឡើង​ដោយ​របប​លោក ហ៊ុន សែន នោះ​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល