អ្នកវិភាគ​សង្គម​ថា កម្ពុជា​មិន​គួរ​គាំទ្រ​ចិន​ងប់ងុល​ពេក​នោះ​ទេ

ដោយ ម៉ៅ សុធានី
2020-05-24
អ៊ីម៉ែល
មតិ
Share
បោះពុម្ព
លោក ហ៊ុន សែន មេដឹកនាំ​របប​ក្រុង​ភ្នំពេញ និង​លោក ស៊ី ជិនពីង (Xi Jinping) ប្រធានាធិបតី​ចិន​ក្នុង​ជំនួប​នៅ​ទីក្រុង​ប៉េកាំង​កាល​ពី​ថ្ងៃ​ទី២៩ ខែ​មេសា ឆ្នាំ២០១៩។
លោក ហ៊ុន សែន មេដឹកនាំ​របប​ក្រុង​ភ្នំពេញ និង​លោក ស៊ី ជិនពីង (Xi Jinping) ប្រធានាធិបតី​ចិន​ក្នុង​ជំនួប​នៅ​ទីក្រុង​ប៉េកាំង​កាល​ពី​ថ្ងៃ​ទី២៩ ខែ​មេសា ឆ្នាំ២០១៩។
រូប៖ ហ្វេសប៊ុក Samdech Hun Sen, Cambodian Prime Minister

អ្នកវិភាគ​នយោបាយ​លោក គឹម សុខ រិះគន់​រដ្ឋាភិបាល​កម្ពុជា​ដែល​គាំទ្រ​នយោបាយ​ចិន ទៅ​លើការ​បង្កើត​ច្បាប់​គ្រប់គ្រង​ផ្នែក​សន្តិសុខ និង​សណ្តាប់ធ្នាប់​សង្គម​នៅ​ហុងកុង ថា ជា​បញ្ហា​នាំ​គ្រោះថ្នាក់​ដល់​ប្រទេស​ជាតិ នៅ​គ្រា​ដែល​ចិន កំពុង​ក្លាយ​ជា​សត្រូវ​នយោបាយ នៅ​ជុំវិញ​ពិភពលោក។

អ្នកវិភាគ​នយោបាយ​កំពុង​រស់នៅ​ជ្រកកោន​នយោបាយ នៅ​ប្រទេស​ទី​៣​នេះ បន្ត​ថា កម្ពុជា​គួរតែ​ពិនិត្យមើល​ពី​និន្នាការ​នយោបាយ​នៃ​បណ្តា​ប្រទេស​សេរី ដែល​កំពុង​ដាក់​គំនាប​យ៉ាង​ខ្លាំង ទៅ​លើ​រដ្ឋាភិបាល​ចិន ទាំង​ផ្នែក​ការទូត និង​សេដ្ឋកិច្ច ក្រោយ​ដែល​ចិន​រង​ការ​រិះគន់​ថា បាន​លាក់លៀម​ទិន្នន័យ​នៃ​ការឆ្លង​រាលដាល​ជំងឺ​កូវីដ-១៩ (Covid-19) ដែល​បាន​ផ្ទុះ​ឡើងជា​លើកដំបូង នៅ​ក្រុង​វូហាន (Wuhan) កាលពី​ចុង​ខែ​ធ្នូ ឆ្នាំ​២០១៩ កន្លង​មក​នេះ៖ «ការ​ប្រកាស​ជំហរ​របស់​ក្រុម​លោក ហ៊ុន សែន គឺ​ជា​នយោបាយ​ការបរទេស​មិន​ឆ្លាត​ទេ ហើយ​អាច​នាំ​ឱ្យ​កម្ពុជា​ស្លាប់​ផង។ ប្រទេស​ទាំង​នេះ គេ​កំពុង​ត្រៀមខ្លួន​ប្តឹង​ចិន​ផង រិត​ត្បិត​នយោបាយ​ការបរទេស​ជាមួយ​ចិន​ផង និង​សង្កត់​សេដ្ឋកិច្ច​ចិន​ជា​ប្រព័ន្ធ ដូចនេះ​បញ្ហា​ចិន​កំពុង​ជួបប្រទះ​ច្រើន និង​ធ្ងន់ធ្ងរ។ ការ​នៅ​ជាមួយ​ចិន​ក្នុង​ទំនាក់ទំនង​មិត្តភាព គួរតែមាន​ហើយ តែ​ការ​នៅ​ស្លា​ប់រស់​ជាមួយ​ចិន អាច​នាំ​ឱ្យ​គ្រោះ​ថ្នាក់​ដល់​ប្រទេសជាតិ»

ប្រតិកម្ម​របស់លោក គឹម សុខ នេះ ក្រោយ​ដែល​អ្នកនាំពាក្យ​ក្រសួង​ការបរទេស លោក កុយ គួង បាន​ប្រាប់ អង្គភាព​ពត៌មាន​របស់​លោ​នាយករដ្ឋមន្ត្រី ហ៊ុន សែន កាល​ពី​ថ្ងៃទី២៣ ខែ​សភា ថា រដ្ឋាភិបាល​កម្ពុជា ប្រកាន់ខ្ជាប់​ខ្ជួន​នូវ​គោលនយោបាយ​ចិន​តែមួយ។ បន្ថែម​ពីនេះ​លោក កុយ គួង ថា កម្ពុជា​គាំទ្រ​សភា​ប្រជាជន​ចិន លើ​ការបង្កើត​និង​កែលម្អ​ប្រព័ន្ធ​ច្បាប់​ព្រមទាំង​យន្តការ​អនុវត្ត​ច្បាប់ ដើម្បី​រក្សា​សន្តិសុខ​និង​សណ្តាប់ធ្នាប់ នៅ​ហុងកុង។

ពាក់ព័ន្ធ​នឹង​ស្ថានការណ៍​នៅ​ហុងកុង​នេះដែរ លោក គឹម សុខ អះអាង​ថា ទោះបីជា​រដ្ឋាភិបាល​ចិន ចាត់ទុក​ថា ហុង កុង និង​កោះ​តៃវ៉ាន់ ជា​ផ្នែក​មួយ​របស់​ប្រទេស​ចិន​ក៏ដោយ ក៏​ថ្នាក់ដឹកនាំ​របស់​ហុងកុង និង​តៃវ៉ាន់ គឺ​នៅតែ​បន្ត​ដឹកនាំ​ប្រទេស​របស់ខ្លួន តាម​បែប​ប្រជាធិបតេយ្យ ដែល​មាន​ការ​គាំទ្រ​យ៉ាង​ខ្លាំង ពី​បណ្តា​ប្រទេស​សេរី នៅ​ទូទាំង​ពិភពលោក ក្នុង​នោះ​ក៏មាន​សហរដ្ឋអាមេរិក​ផងដែរ៖ «អ្វីដែល​ចិន​បារម្ភ​ខ្លាំង​បំផុត និង​ប្រយ័ត្ន​នោះ គឺ​ការបះបោរ​សង្គម​។ ប្រសិនបើ​ទប់​មិន​បានទេ គឺ​ចិន​មិនអាច​ក្លាយ​ជា​ប្រទេស​មហាអំណាច​ធំ​នៅ​ថ្ងៃ​ក្រោយបាន​ទេយើង​មើល​ស្ថានភាព​បច្ចុប្បន្ន នៅ​ហុងកុង មិន​ទាន់​ស្ងប់​ទេ ចំពោះ​ការ​ប្រឆាំង​ចិន ស្រប​ពេលដែល​តៃវ៉ាន់ ទើប​ជ្រើសរើស​ប្រធានាធិបតី​ថ្មី​មួយ​ជា​ស្ត្រី ដែល​ប្រកាន់ខ្ជាប់​នូវ​ជំហរ សេរី និង​លទ្ធិប្រជាធិបតេយ្យ មិន​រណប​ចិន​នោះ​ទេ​ដូច​នេះ ចលនា​ប្រឆាំង​ចិន​កាន់តែ​ធំ​ឡើង ចិន​ពិបាក​ទប់ស្កាត់»

ប្រការ​ដែល​រដ្ឋាភិបាល​ចិន បង្កើត​ច្បាប់​គ្រប់គ្រង​ផ្នែក​សន្តិសុខ​និង​សណ្តាប់ធ្នាប់​នេះ គឺ​ក្នុង​គោលបំណង​ទប់ស្កាត់​ការធ្វើ​បាតុកម្ម​ទ្រង់ទ្រាយ​ធំ នៅ​ហុងកុង។ កាល​ពីខែ​មិថុនា ឆ្នាំ​២០១៩ កន្លង​មក​នេះ ពលរដ្ឋ​ហុងកុង រាប់ម៉ឺន​នាក់ បាន​នាំគ្នាធ្វើ​បាតុកម្ម ប្រឆាំងនឹង​សេចក្តីព្រាងច្បាប់​ទាក់ទង​នឹង​ការធ្វើ​បត្យាប័ន​ជនសង្ស័យ ទៅ​ប្រទេស​ចិន​។ ទោះបីជា​ថ្នាក់ដឹកនាំ​ហុងកុង យល់ព្រម​លុបចោល​វិញ​ក៏ដោយ ក៏​សកម្មភាព​តវ៉ា​នៅតែ​បន្ត​កើតឡើង រហូតដល់​វិបត្តិ​ជំងឺ​រាតត្បាត​សកល COVID-19 បាន​ផ្ទុះឡើង ទើប​ការ​តវ៉ា​នេះ បាន​ស្ងប់ស្ងាត់​ទៅ​វិញ

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល