អ្នកវិភាគមិនមានជំនឿលើទំនាក់ទំនងរវាងកម្ពុជា និងអាមេរិក ថាមានភាពប្រសើរឡើងដោយសារកម្ពុជាស្ថិតនៅក្រោមស្រមោលចិន។ការលើកឡើងនេះ ស្របពេលដែលលោកនាយករដ្ឋមន្ត្រីហ៊ុន សែន សន្យាថា នឹងរក្សាទំនាក់ទំនងជាមួយប្រធានាធិបតីជាប់ឆ្នោតថ្មី របស់សហរដ្ឋអាមេរិក ឱ្យកាន់តែរឹងមាំបន្ថែមទៀត។ ប៉ុន្តែលោកមិនបានបញ្ជាក់ថា នឹងកែប្រែប្រទេសកម្ពុជាវិលទៅរកលំហប្រជាធិបតេយ្យតាមការចង់បានរបស់សហគមន៍អន្តរជាតិនោះទេ។
អ្នកវិភាគចាស់វស្សាលោក បណ្ឌិត ឡៅ ម៉ុងហៃ បានសរសេរនៅលើហ្វេសប៊ុករបស់លោកថា លោកមិនមានជំនឿ ថាទំនាក់ទំនង រវាងកម្ពុជា និងសហរដ្ឋអាមេរិក នឹងបានប្រសើរឡើងទេ ដរាបណាកម្ពុជាស្ថិតនៅក្រោមស្រមោលចិន និងមិនស្ដារប្រជាធិបតេយ្យ និងសិទ្ធិមនុស្សឡើងវិញនោះទេ។
ការលើកឡើងរបស់អ្នកវិភាគចាស់វស្សារូបនេះបានកើតមានឡើងក្រោយពីមេដឹកនាំរបបក្រុងភ្នំពេញគឺលោក ហ៊ុន សែន បានសរសេរលិខិតមួយច្បាប់ កាលពីថ្ងៃទី ១៥ ខែធ្នូ ដើម្បីអបអរសារទរចំពោះលោក ចូ បៃឌិន(Joe Biden) ដែលបានជាប់ឆ្នោតជាប្រធានាធិបតី សហរដ្ឋអាមេរិកទី៤៦។
លោកនាយករដ្ឋមន្ត្រីហ៊ុន សែន បានបញ្ជាក់នៅក្នុងលិខិតនោះថា រាជរដ្ឋាភិបាលរបស់លោក បានប្ដេជ្ញាយ៉ាងពេញទំហឹង ក្នុងការធ្វើការងារជាមួយរដ្ឋបាលរបស់លោក ចូ បៃឌិន(Joe Biden)ដើម្បីជំរុញទំនាក់ទំនងទ្វេភាគីឱ្យកាន់តែល្អប្រសើរបន្ថែមទៀត។
ទាក់ទិននឹងបញ្ហានេះ អ្នកនាំពាក្យគណបក្សសង្គ្រោះជាតិ លោក អ៊ូ ច័ន្ទឬទ្ធិ មានប្រសាសន៍ថា លោកមានជំនឿ ថាប្រធានាធិបតីសហរដ្ឋអាមេរិកថ្មី នឹងនាំមកនូវការផ្លាស់ប្ដូរ។
លោកសង្ឃឹមថា ប្រធានាធិបតីថ្មី នឹងដាក់សម្ពាធដល់រដ្ឋាភិបាលកម្ពុជា បើលំហ លទ្ធិប្រជាធិបតេយ្យ និងឱ្យគណបក្សប្រឆាំងបានវិលត្រឡប់ទៅរកការបោះឆ្នោតឡើងវិញ៖«ខ្ញុំគិតថា មានភាពល្អប្រសើរជាង ក្រោមការដឹកនាំរបស់លោក ចូ បៃឌិន ពីព្រោះគាត់ផ្ដោតទៅលើ ប្រជាធិបតេយ្យ និងសិទ្ធិមនុស្ស ។ ខ្ញុំជឿថា ទំនាក់ទំនងហ្នឹងអាច មានភាពប្រសើរនៅក្នុងប្រទេសកម្ពុជា ខាងផ្នែកសិទ្ធិមនុស្ស និងប្រជាធិបតេយ្យហ្នឹងឯង។»
អ្នកនាំពាក្យក្រសួងការបរទេសលោក កុយ គួង មិនមានអត្ថាធិប្បាយអ្វីបន្ថែមទៅលើលិខិតរបស់លោក នាយករដ្ឋមន្ត្រីហ៊ុន សែនទេ។ តែទោះជាយ៉ាងណាក៏ដោយអ្នកនាំពាក្យគណបក្សប្រជាជនកម្ពុជាលោក សុខ ឥសាន្ត មានសុទិដ្ឋិនិយមថា ទំនាក់ទំនងរវាងអាមេរិក និងកម្ពុជានៅតែមានភាពល្អប្រសើរ។ លោក សុខ ឥសាន្តថា នៅកម្ពុជាគ្មានការរំលោភសិទ្ធិមនុស្សទេ ដូច្នោះលោកមិនបារម្ភថា អាមេរិកនឹងដាក់ទណ្ឌកម្មលើកម្ពុជាឡើយ៖«គណបក្សប្រជាជនកម្ពុជា ដឹកនាំមិនតម្រូវគណបក្សដែលជាក្រុមឧទ្ទាមក្រៅច្បាប់ដែលជាអតីតបក្សប្រឆាំងដែលត្រូវរំលាយចោលដោយតុលាការកំពូលនោះទេ។យើងមានការអីរំលោភសិទ្ធិមនុស្ស បើរំលោភសិទ្ធិមនុស្សនោះសង្គមកម្ពុជា វិលទៅរកការបះបោរ ហើយបើប្រៀបធៀបនៅអាមេរិកក្នុងពេលបោះឆ្នោតកន្លងទៅ បើនិយាយពីរំលោភសិទ្ធិមនុស្ស អាមេរិកចង់ខ្លាំងជាងខ្មែរទៅទៀត។»
ពាក់ព័ន្ធរឿងទំនាក់ទំនងខ្មែរអាមេរិកនេះដែរ អ្នកស្រាវជ្រាវការអភិវឌ្ឍន៍សង្គមលោកបណ្ឌិត សេង សារី ចង់ឃើញឱ្យរដ្ឋាភិបាលកម្ពុជាងាកទៅរកការគោរពសិទ្ធិមនុស្ស និងបើកលំហលទ្ធិប្រជាធិបតេយ្យឡើងវិញតាមការចង់បានរបស់ប្រជាពលរដ្ឋ៖«សម្រាប់ខ្ញុំបើសិនជាក្នុងករណីសារនេះបង្កប់នូវ ការងាកត្រឡប់មកការគោរពសិទ្ធិមនុស្សការងាកត្រឡប់មកនូវគោរពគោលការគោរពប្រជាធិបតេយ្យឡើងវិញគឺពិតជាពិសេសមិនគ្រាន់តែទទួលបានការអបអរសាទរពីរដ្ឋាភិបាលថ្មី របស់អាមេរិក ដែលដឹកនាំដោយលោក ចូ បៃឌិន (Joe Biden) ទេ គឺនឹងទទួលបានការសាទរពីពលរដ្ឋ ដែលបង្ហាញថា កម្ពុជានៅក្នុងរដ្ឋាភិបាលថ្មី របស់សហរដ្ឋអាមេរិកនេះ និងពិចារណាដើម្បីងាកត្រឡប់មកគន្លងលទ្ធិប្រជាធិបតេយ្យវិញ ធានាបាននូវទំនាក់ទំនងល្អជាមួយនឹងអាមេរិក។»
កាលពី ទី ១៦ ខែ វិច្ចិកា អ្នកតំណាងរាស្ត្រសហរដ្ឋអាមេរិកចំនួន ៨ រូប ក្នុងនោះមាន ៧ រូប មកពីគណបក្សប្រជាធិបតេយ្យរបស់លោក ប្រធានាធិបតីជាប់ឆ្នោតលោក ចូ បៃឌិន បានស្នើឱ្យរដ្ឋាភិបាលសហរដ្ឋអាមេរិកដាក់ទណ្ឌកម្មមន្ត្រីជាន់ខ្ពស់លោក ហ៊ុន សែន និងប្រព័ន្ធអនុគ្រោះពន្ធឡើងវិញ។
លិខិតរបស់អ្នកតំណាងរាស្ត្រទាំង ៨ រូប នោះ គឺទាមទារឱ្យរដ្ឋាភិបាលអាមេរិកដាក់ទណ្ឌកម្មលើមន្ត្រីជាន់ខ្ពស់នៃរបបលោក ហ៊ុន សែន ដោយសារការបន្តគំរាមកំហែង និងបង្ក្រាបសំឡេងប្រឆាំង និងសកម្មជនឥតឈប់ឈរ។ ពួកគាត់ ក៏ស្នើឲ្យពិនិត្យឡើងវិញ លើប្រព័ន្ធអនុគ្រោះពន្ធទូទៅ ឬ GSP ដោយសារតែបរិយាកាសកាន់តែអាក្រក់ ផ្នែកសេរីភាពសហជីព និងការងារ។
មេដឹកនាំរបបក្រុងភ្នំពេញ បានបែរខ្នងដាក់សហរដ្ឋអាមេរិក ហើយបែរជាមកចងសម្ព័ន្ធភាពចាក់ទឹកមិនលិចជាមួយប្រទេសចិនក្នុងរយៈពេលប៉ុន្មានឆ្នាំចុងក្រោយនេះ ដោយសារតែរដ្ឋាភិបាលលោកហ៊ុនសែន ចូលចិត្តជំនួយឥតចំណងភ្ជាក់និងការស្តារលទ្ធិប្រជាធិបតេយ្យឡើងវិញ ។អ្នកវិភាគនិយាយថា លោក ហ៊ុន សែន មិនមានបំណងវិលទៅរកចាប់ដៃគូ ជាមួយសហរដ្ឋអាមេរិកវិញនោះទេ ដោយសារតែលោក ហ៊ុន សែន ចាត់ទុកប្រទេសចិនជាខ្នងបង្អែកការពារអំណាចតវង្សតត្រកូលរបស់លោកទៅថ្ងៃអនាគត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។