អ្នកឃ្លាំមើលថា លោក ហ៊ុន សែន កំពុងយកករណីដ្រូននៅព្រំដែនធ្វើនយោបាយប្រជាភិថុតិ
2023.06.30

ស្របពេលការបោះឆ្នោតជាតិកាន់តែខិតជិតមកដល់ លោកនាយករដ្ឋមន្ត្រី ហ៊ុន សែន ក៏ហាក់កាន់តែព្រួយបារម្ភខ្លាចប្រជាពលរដ្ឋមិនបោះឆ្នោតជូនគណបក្សរបស់លោកនៅពេលខាងមុខដែរ។ អ្នកឃ្លាំមើលលើកឡើងថា ការដែលមេដឹកនាំរដ្ឋាភិបាលឯកបក្សថ្លែងម្ដងហើយម្ដងទៀតអំពីការបញ្ជាកងទ័ពរាប់រយនាក់ឱ្យទៅរង់ចាំបាញ់កម្ទេចយន្តហោះគ្មានមនុស្សបើក ឬហៅថាដ្រូននៅតំបន់ព្រំដែនកម្ពុជាប្រទេសវៀតណាមថា ជាការសម្ដែងដើម្បីកេងចំណេញនយោបាយពីប្រជាពលរដ្ឋនៅមុនបោះឆ្នោតតែប៉ុណ្ណោះ។
អ្នកឃ្លាំមើលលើកឡើងថា បើទោះបីជាការបោះឆ្នោតជាតិខាងមុខនេះអវត្តមានគណបក្សប្រឆាំងចូលរួមប្រកួតប្រជែងក៏ដោយ ក៏លោក ហ៊ុន សែន នៅតែព្រួយបារម្ភខ្លាចពលរដ្ឋមិនបោះឆ្នោតជូនគណបក្សរបស់លោកដដែល។ ពួកគេយល់ឃើញថា បញ្ហាទាំងនេះហើយបានជាមេដឹកនាំផ្ដាច់ការរូបនេះ ប្រើល្បែងនយោបាយដដែលៗ ដោយបញ្ចេញកងទ័ពដ៏ច្រើនសន្ធឹកសន្ធាប់ទៅព្រំដែនកម្ពុជាវៀតណាម ដើម្បីបោកប្រាស់ប្រជាពលរដ្ឋ។
អ្នកវិភាគនយោបាយ លោក គឹម សុខ មានប្រសាសន៍ថា លោកមិនជឿថា មានដ្រូន(Drone)ហោះហើរចូលទឹកដីកម្ពុជានៅតំបន់ព្រំដែនជាប់ប្រទេសវៀតណាមនោះទេ។ លោកចាត់ទុកការដែលលោក ហ៊ុន សែន បញ្ជូនកងទ័ពជាច្រើននាក់ប្រដាប់ដោយអាវុធទំនើបៗរង់ចាំបាញ់កម្ទេចដ្រូននៅតំបន់ព្រំដែននោះ ថា ជាសារនយោបាយប្រជាភិថុតិដើម្បីបំភិតបំភ័យដល់ពលរដ្ឋឱ្យទៅបោះឆ្នោតជូនគណបក្សកាន់អំណាចតែប៉ុណ្ណោះ។
លោក គឹម សុខ៖ «អ្វីដែលលោក ហ៊ុន សែន បារម្ភគឺសន្លឹកឆ្នោតគូសខ្វែងចោលច្រើនលានសន្លឹកពេកធ្វើឱ្យគាត់អាម៉ាស់។ វាទៅជាការបោះឆ្នោតមួយដែលលោក ហ៊ុន សែន និងគណបក្សប្រជាជនកម្ពុជាប្រកួតជាមួយនឹងប្រជាពលរដ្ឋដែលខ្វែងសន្លឹកឆ្នោតចោល មានន័យថា ប្រកួតនឹងគណបក្សដែលមិនបានចូលរួមបោះឆ្នោត»។
ប្រតិកម្មរបស់អ្នកវិភាគនេះធ្វើឡើងបន្ទាប់ពីលោក ហ៊ុន សែន បានលើកឡើងម្ដងហើយម្ដងទៀតអំពីបញ្ហាដ្រូនហោះហើរចូលទឹកដីកម្ពុជា។ អតីតកម្មាភិបាលខ្មែរក្រហមរូបនេះមានប្រសាសន៍ក្នុងពិធីចុះជួបកម្មកររោងចក្រជិត២ម៉ឺននាក់នៅខេត្តកណ្ដាល នៅព្រឹកថ្ងៃទី២៩ មិថុនា ថា យប់មិញនេះលោកមិនសូវបានដេកនោះទេ ព្រោះរវល់រង់ចាំក្ដាប់សភាពការណ៍កងទ័ពនៅតំបន់ព្រំដែន បាញ់កម្ទេចដ្រូន។ លោក ហ៊ុន សែន ថែមទាំងអួតអាងទៀតថា លោកមិនអនុញ្ញាតឱ្យអ្នកណាឈ្លានពានទឹកដីកម្ពុជាបានឡើយ។
លោក ហ៊ុន សែន៖ «ក្រសួងការបរទេសក៏បានចេញសេចក្ដីថ្លែងការណ៍ហើយដែរ ហើយខ្ញុំក៏បានពិភាក្សាជាមួយឯកឧត្ដម ប្រាក់ សុខុន ថា បើសិនជាបន្តទៅទៀតយើងធ្វើលិខិតជូនអគ្គលេខាធិការអង្គការសហប្រជាជាតិតែម្ដង។ ឥឡូវក្រសួងការបរទេសចេញលិខិតមួយតង់ បើសិនមកទៀតយើងស្នើសុំទៅអគ្គលេខាធិការអង្គការសហប្រជាជាតិ ដើម្បីឱ្យក្នុងផ្នែកណាមួយជួយពិនិត្យមើលរដ្ឋអធិបតេយ្យមួយត្រូវគេបង្ហោះដ្រូនដោយគ្មានអត្តសញ្ញាណចូលមកក្នុងស្រុកយើង តើជាអំពើភេរវកម្មទេ។ ហើយយើងក៏គួរតែសរសេរទៅកាន់ប្រធានអាស៊ានផងដែរ ដើម្បីថា ប្រទេសយើងត្រូវញាំញីទៅដោយយន្តហោះគ្មានមនុស្សបើកដោយមិនដឹងអត្តសញ្ញាណ»។
បើទោះបីជាលោក ហ៊ុន សែន ហាក់ខំប្រឹងអួតថា លោកការពារជាតិបែបនេះក្ដី ក៏អំឡុងពេលការរាតត្បាតជំងឺកូវីដ១៩ មានកងទ័ពវៀតណាមជាច្រើននាក់បានមកបោះឆ្នោតចូលមកបោះតង់នៅតំបន់ព្រំដែនដែលមិនទាន់ឯកភាពគ្នានៅស្រុកកោះធំ ខេត្តកណ្ដាល តែលោក ហ៊ុន សែន មិនបានបញ្ចេញកងទ័ពទៅតតាំងជាមួយបរទេសដូចពេលនេះឡើយ។
នេះជាលើកទី៣ហើយ ដែលលោក ហ៊ុន សែន លើកយកបញ្ហាដ្រូននៅតំបន់ព្រំដែនកម្ពុជា វៀតណាម ប្រកាសក្នុងវេទិកាសាធារណៈដែលមានកម្មកររាប់ម៉ឺននាក់ចូលរួមស្ដាប់។ កាលពីថ្ងៃទី២៧ និងថ្ងៃទី២៨ មិថុនា លោក ហ៊ុន សែន ក៏បានបញ្ជាឱ្យបញ្ជូនកងទ័ពរាប់រយនាក់ និងអាវុធទំនើបៗជាច្រើនដើម ទៅដេករង់ចាំបាញ់ទម្លាក់ដ្រូននៅតំបន់ព្រំដែនវៀតណាមដែរ។
ទោះជាយ៉ាងណា ប្រធានក្រុមប្រឹក្សាឃ្លាំមើលកម្ពុជានៅប្រទេសន័រវែស (Norway) លោក ម៉ែន ណាត យល់ឃើញថា សកម្មភាពរបស់លោក ហ៊ុន សែន ជាបន្តបន្ទាប់មកនេះ ជាការកេងចំណេញនយោបាយ ពីប្រជាពលរដ្ឋ ដោយសារព្រួយបារម្ភខ្លាចពលរដ្ឋ មិនបោះឆ្នោតជូនគណបក្សប្រជាជនកម្ពុជា។ លោកបញ្ជាក់ថា បើទោះបីជាការបោះឆ្នោតខាងមុខនេះអវត្តមានគណបក្សប្រឆាំងចូលរួមប្រកួតប្រជែងក៏ដោយក៏ជាការព្រួយបារម្ភរបស់លោក ហ៊ុន សែន ដែរ ដោយសារលោកខ្លាចពលរដ្ឋទៅគូសសន្លឹកឆ្នោតខ្វែងចោលតាមការអំពាវនាវនាមរបស់ប្រធានស្ដីទីគណបក្សសង្គ្រោះជាតិ លោក សម រង្ស៊ី។
លោក ម៉ែន ណាត៖ «ចំណុចសំខាន់ជាងគេនឹងគឺគ្មានអីច្រើនទេ គាត់បំភ័យប្រជាពលរដ្ឋហ្នឹង។ ហើយប្រជាពលរដ្ឋត្រូវតែទៅបោះឆ្នោតហើយ កុំគូសខ្វែងចោលដូចដែលក្រុមគណបក្សប្រឆាំងអំពាវនាវធ្វើយុទ្ធនាការហ្នឹង។ បើមិនអ៊ីចឹងប្រយ័ត្នមានសង្គ្រាមប្រយ័ត្នមានអី គាត់បំភ័យតែអីចឹង ហើយគំនិតនឹងគឺជាគំនិតទុច្ចរិត ហើយគាត់ធ្វើយ៉ាងម៉េច ឱ្យតែបានជាប្រយោជន៍ផ្ទាល់ខ្លួនដល់គាត់និងក្រុមគ្រួសារគាត់តែប៉ុណ្ណឹងទេ»។
នេះមិនមែនជាលើកទីមួយទេដែលមេដឹកនាំរដ្ឋាភិបាលឯកបក្សរូបនេះ បានប្រើកម្លាំងកងទ័ពកំញើញដល់ពលរដ្ឋនៅមុនការបោះឆ្នោតជាតិនោះ។ កាលពីខែសីហា ឆ្នាំ២០១៧ ពោលគឺនៅមុនការបោះឆ្នោតជាតិឆ្នាំ២០១៨លោក ហ៊ុន សែន ក៏បានបញ្ជូនកងទ័ពរាប់រយនាក់ព្រមទាំងអាវុធទំនើបៗជាច្រើនដើមទៅព្រំដែនឡាវ (Lao)។ កាលនោះលោក ហ៊ុន សែន អះអាងថា ទាហានឡាវ បានចូលក្នុងទឹកដីខេត្តស្ទឹងត្រែង។
ចំណែកនៅមុនការបោះឆ្នោតជាតិឆ្នាំ២០០៨ និងឆ្នាំ២០១៣វិញ លោក ហ៊ុន សែន ក៏បានប្រើប្រាស់បញ្ហាជម្លោះព្រំដែនរវាងកម្ពុជា និងថៃ ស្ដីពីប្រាសាទព្រះវិហារ យ៉ាងមានប្រសិទ្ធភាពដែរ ដែលអ្នកវិភាគមើលឃើញថា បញ្ហាទាំងនេះសុទ្ធសឹងតែជាការសម្ដែងរបស់ហ៊ុន សែន ដើម្បីកេងចំណេញនយោបាយ។
លោក ហ៊ុន សែន ត្រូវបានលើកបន្តុបដោយរដ្ឋាភិបាលវៀតណាម ដូច្នេះអ្នកឃ្លាំមើល វាយតម្លៃថា លោក ហ៊ុន សែន មិនហ៊ានប្រឈមជាមួយវៀតណាមនោះឡើយ។ ដូច្នេះអ្វីដែលលោក ហ៊ុន សែន បញ្ជូនទ័ពទៅតំបន់ព្រំដែនជាប់ប្រទេសវៀតណាមនេះ ទំនងជាការត្រូវរ៉ូវគ្នាជាមួយវៀតណាមរួចជាមុនទៅហើយ។ អ្នកប្រើប្រាស់បណ្ដាញសង្គម ក៏បាននាំគ្នារិះគន់ និងចំអកឡកឡឺយព្រោងព្រាតចំពោះករណីនេះ ដែរ ប្រហែលជាពួកគេ បានដឹងថា លោក ហ៊ុន សែន កំពុងលេងល្បែងនយោបាយបោកប្រាស់នៅមុនការបោះឆ្នោតប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។