សកម្មជនគណបក្សប្រឆាំងនៅរាជធានីភ្នំពេញម្នាក់ទៀតហើយ ត្រូវបានជនមិនស្គាល់លួចវាយពីក្រោយបែកក្បាលបណ្ដាលឱ្យរងរបួសធ្ងន់ កាលពីល្ងាចថ្ងៃទី២១ ខែធ្នូ។ អ្នកវិភាគលើកឡើងថា ករណីវាយប្រហារសកម្មជនបក្សប្រឆាំង ប៉ុន្តែសមត្ថកិច្ចមិនទាន់ឃាត់ខ្លួនជនសង្ស័យជាច្រើនករណីកន្លងមក វាជាភាពអាម៉ាសរបស់រដ្ឋាភិបាលរបស់លោក ហ៊ុន សែន។
សកម្មជនគណបក្សសង្គ្រោះជាតិដែលរងការវាយប្រហារនេះ ជាអនុប្រធានគណៈកម្មាធិការប្រតិបត្តិ គណបក្សសង្គ្រោះជាតិ នៅខណ្ឌពោធិ៍សែនជ័យ ក្រុងភ្នំពេញ លោក ហេង ចាន់សុធី។ ប្រធានប្រតិបត្តិរបស់គណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ទាមទារទៅអាជ្ញាធរត្រូវតែវែកមុខរកជនដៃដល់ឱ្យយកមកដាក់ទោសទណ្ឌតាមផ្លូវច្បាប់។ លោកចោទប្រកាន់ថា អំពើហិង្សានេះជាការគំរាមកំហែង ផ្នែកនយោបាយដើម្បីបំបាក់ស្មារតីសកម្មជនគណបក្សសង្គ្រោះជាតិ៖ «ករណីហ្នឹងកើតឡើងដដែលៗ ខ្ញុំយល់ថា ជាការរៀបចំរបស់អាជ្ញាធររបបក្រុងភ្នំពេញដែលជាទូទៅកាត់ព្យាយាមបំភិតបំភ័យបំបាក់ស្មារតីគ្រប់ទម្រង់»។
លោក ម៉ន ផល្លា ឱ្យដឹងទៀតថា លោក ហេង ចាន់សុធី ត្រូវបានសមត្ថកិច្ចក្រុងភ្នំពេញចាប់ខ្លួនម្តងរួចហើយកាលពីមុនថ្ងៃ៩ វិច្ឆិកា កន្លងទៅ ដោយបានចោទប្រកាន់ថា បានចូលរួមសកម្មភាពផ្តួលរំលំរដ្ឋាភិបាល ប៉ុន្តែ ក្រោយរដ្ឋាភិបាលរងសម្ពាធពីសហគមន៍អន្តរជាតិ ក៏បានដោះលែងលោក ហេង ចានសុធី ឱ្យនៅក្រៅឃុំបណ្ដោះអាសន្នវិញ។
អាស៊ីសេរីមិនទាន់អាចសុំការបំភ្លឺករណីនេះ ពីអ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន បានទេ កាលពីយប់ទី២១ ខែធ្នូ ដោយទូរស័ព្ទចូលគ្មានអ្នកទទួល។ ប៉ុន្តែ រាល់ពេលមានករណីហិង្សាលើសកម្មជនគណបក្សសង្គ្រោះជាតិម្តងៗ មន្ត្រីនគរបាលជាន់ខ្ពស់រូបនេះតែងតែអះអាងថា សមត្ថកិច្ចនឹងព្យាយាមចាត់វិធានការទៅតាមច្បាប់ដើម្បីចាប់ជនល្មើសយកមកផ្ដន្ទាទោស។
សមាជិកក្រុមអ្នកវិភាគវ័យក្មេងលោក បុង ដែត យល់ថា នេះគឺជារឿងគួរឱ្យអាម៉ាសមួយដែលរដ្ឋាភិបាលត្រូវប្រឈម ព្រោះប្រមុខរដ្ឋាភិបាលតែងអួតអាងថា ប្រទេសកម្ពុជាសព្វថ្ងៃ មានសុខសុវត្ថិភាព និងស្ថិរភាព ប៉ុន្តែ បែរជាកើតមានករណីហិង្សាលើសកម្មជនគណបក្សប្រឆាំងជាបន្តបន្ទាប់ ហើយសមត្ថកិច្ចមិនដែលរកជនល្មើសយកមកផ្ដន្ទាទោសបានមួយករណីមួយសោះ។លោកយល់ថា ករណីនេះ នឹងធ្វើឱ្យមហាជនរិះគន់ថា នេះជារូបភាព កៀបសង្កត់លើសកម្មជនគណបក្សប្រឆាំងដោយអំពើឃោរឃៅ និងរំលោភសិទ្ធិមនុស្ស ដោយក្រុមណាមួយ៖ «យើងក្រឡេកមើលសកម្មជនដែលទទួលរងការវាយប្រហារនេះជាអំពើឃោរឃៅដែលកើតឡើងចំពោះសកម្មជន អ្នកនយោបាយដែលបានធ្វើការដើម្បីជាតិ ដើម្បីប្រជាពលរដ្ឋ»។
ករណីហិង្សាលើលោក ហេង ចាន់សុធី សកម្មជនគណបក្សសង្គ្រោះជាតិនេះ គឺជាករណីទី១៤ហើយ ដែលជនដៃដល់បានប្រើហិង្សាវាយសំពងសកម្មជនគណបក្សប្រឆាំង ហើយគ្មានសំណុំរឿងមួយណាត្រូវបានសមត្ថកិច្ចបានរកឃើញជនប្រព្រឹត្ត ដើម្បីនាំទៅផ្ដន្ទាទោសនោះទេ។
មន្ត្រីសង្គមស៊ីវិល សម្ដែងការសោកស្តាយ និងចាត់ទុកករណីហិង្សាកើតឡើងលើសកម្មជនបក្សប្រឆាំងជាបន្តបន្ទាប់នេះ ជាការរៀបចំជាប្រព័ន្ធដើម្បីធ្វើទុក្ខបុកម្នេញលើសកម្មជនគណបក្សសង្គ្រោះជាតិ៕
អនុប្រធានបក្សសង្គ្រោះជាតិអ្នកស្រី មូរ សុខហួរ ថាករណីវាយដំមន្ត្រីគណបក្សសង្គ្រោះជាតិនេះ អ្នកស្រីកំពុងរៀបចំធ្វើរបាយការណ៍ ដើម្បីដាក់ជូនទៅស្ថានទូតសហភាពអឺរ៉ុបប្រចាំនៅកម្ពុជា និងរដ្ឋាភិបាលប្រទេសប្រជាធិបតេយ្យ រួមទាំងស្ថាប័នសិទ្ធិមនុស្សអន្តរជាតិផង ដើម្បីឱ្យពួកគេដឹងអំពីការបន្តធ្វើទុក្ខបុកម្នេញលើសកម្មជនបក្សប្រឆាំង ឥតស្រាកស្រាន្តនេះ។
ក្នុងស្ថានភាពដ៏គ្រោះថ្នាក់ និងលំបាក ដែលសកម្មជននៅមូលដ្ឋានកំពុងប្រឈមនេះ អ្នកស្រី មូរ សុខហួរ កោតសរសើរនូវវីរភាព និងការតស៊ូរបស់សកម្មទាំងនោះ។ អ្នកស្រីបញ្ជាក់ថា គណបក្សសង្គ្រោះជាតិនឹងបន្តធ្វើអ្វីៗ គ្រប់យ៉ាងដើម្បីរកយុត្តិធម៌ជូនសកម្មជន និងប្រជាពលរដ្ឋខ្មែរទូទៅ ដែលរងគ្រោះដោយសារការរំលោភសិទ្ធិមនុស្សដ៏ធ្ងន់ធ្ងរនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។