សកម្មជន​បក្ស​ប្រឆាំង​ម្នាក់ទៀត​ត្រូវ​ជន​មិន​ស្គាល់​មុខ​លួច​វាយ​បណ្ដាល​ឱ្យ​សន្លប់

ដោយ វ៉ែន សុមេធ
2019-12-06
អ៊ីម៉ែល
មតិ
Share
បោះពុម្ព
អ្នកស្រី ទេព ច័ន្ទសុខខែយ៉ា ជា​ចៅ​សង្កាត់​រង​ទី២ ជាប់​ឆ្នោត​នៅ​សង្កាត់​អូរឫស្សី​៤ របស់​គណបក្ស​សង្គ្រោះ​ជាតិ នៅ​ក្រុងភ្នំពេញ ត្រូវ​បាន​ជន​មិន​ស្គាល់​មុខ​លួច​វាយ​ប្រហារ​ពីក្រោយ​បណ្ដាល​ឱ្យ​សន្លប់ នៅ​ព្រឹក​ថ្ងៃ​ទី៦ ខែ​ធ្នូ ឆ្នាំ២០១៩។ រូប៖ ហ្វេសប៊ុក Morn Phalla
អ្នកស្រី ទេព ច័ន្ទសុខខែយ៉ា ជា​ចៅ​សង្កាត់​រង​ទី២ ជាប់​ឆ្នោត​នៅ​សង្កាត់​អូរឫស្សី​៤ របស់​គណបក្ស​សង្គ្រោះ​ជាតិ នៅ​ក្រុងភ្នំពេញ ត្រូវ​បាន​ជន​មិន​ស្គាល់​មុខ​លួច​វាយ​ប្រហារ​ពីក្រោយ​បណ្ដាល​ឱ្យ​សន្លប់ នៅ​ព្រឹក​ថ្ងៃ​ទី៦ ខែ​ធ្នូ ឆ្នាំ២០១៩។ រូប៖ ហ្វេសប៊ុក Morn Phalla
រូប៖ ហ្វេសប៊ុក Morn Phalla

សកម្មជន​គណបក្ស​សង្គ្រោះ​ជាតិ​នៅ​ក្រុងភ្នំពេញ​ម្នាក់ទៀត ត្រូវ​បាន​ជន​មិន​ស្គាល់​មុខ​លួច​វាយ ប្រហារ​ពីក្រោយ​បណ្ដាល​ឱ្យ​សន្លប់ នៅ​ព្រឹក​ថ្ងៃ​ទី​៦ ខែ​ធ្នូ​។ ជនរងគ្រោះ ចាត់​ទុក ករណី​នេះ​ជា​រឿង នយោបាយ មិនមែន​គំនុំ​បុគ្គល​នោះ​ទេ​។ ចំណែក​សមត្ថកិច្ច អះអាង​ថា កំពុង​ស្រាវជ្រាវ​រក​ជនល្មើស និង​បដិសេធ​ថា មិនមែន​ជា​រឿង​នយោបាយ​ឡើយ​។

សកម្មជន​បក្ស​ប្រឆាំង និង​ជា​ជនរងគ្រោះ​ឱ្យ​ដឹង​ថា ជន​មិន​ស្គាល់​មុខ​ពីរ​នាក់ បាន​ជិះ​ម៉ូតូ​លួច​វាយ អ្នកស្រី ជា​ចៅ​សង្កាត់រង​ទី​២​ជាប់ឆ្នោត​នៃ​សង្កាត់​អូរឫស្សី​៤ របស់​គណបក្ស​សង្គ្រោះ​ជាតិ បណ្ដាល​ឱ្យ​ដេក​ដួល​សន្លប់​មួយ​សន្ទុះ​។ ហេតុការណ៍​នេះ​កើតឡើង​នៅ​ព្រឹក​ថ្ងៃ​ទី​៦ ខែ​ធ្នូ ត្រង់​ចំណុច​កែង​ផ្លូវ​លេខ​១៦៤ ក្បែរ​សាលាសង្កាត់ អូរឫស្សី​៣ ស្ថិត​ក្នុង​ខណ្ឌ​៧​មករា រាជធានី​ភ្នំពេញ។

អ្នកស្រី ទេព ច័ន្ទសុខខែយ៉ា រៀបរាប់​ថា អំពើ​ហិង្សា​នេះ កើតឡើង​ពេល​អ្នកស្រី​ធ្វើដំណើរ ចេញ​ពី​ផ្ទះ ស្រាប់​តែ​មាន​ជន​មិន​ស្គាល់​មុខ​ពីរ​នាក់ ដោយ​ម្នាក់​ជា​អ្នក​បើក​ម៉ូតូ ហើយ​ម្នាក់ទៀត​ជា​អ្នក​ចុះ​មក​លួច​វាយ​អ្នកស្រី​ពីក្រោយ​ចំនួន​មួយ​ដៃ​ចំ​​គុម្ព​ត្រចៀក​​ខាង​​ស្តាំ​​បណ្ដាល​​ឱ្យ​​អ្នកស្រី​ដួល​សន្លប់ ហើយ​ជន សង្ស័យ​បាន​រត់ឡើង​ជិះ​ម៉ូតូ​គេច​ខ្លួន​បាត់៖ «ខ្ញុំ​ឈរ​និយាយ​មួយ​អ្នក​ស្គាល់​គ្នា​មិន​បាន​២​នាទី​ផង ស្រាប់តែ គេ​វាយ​ខ្ញុំ​មួយ​ដៃ​ដួល​ទៅ​ហើយ​មើល​មិន​ឃើញ​មុខ​ថា ជា​នរណា​ទេ​។ ខ្ញុំ​ខំប្រឹង​មើល​ថា នរណា​វាយ ខ្ញុំ​គឺ​ខ្ញុំ​មាឌ​ធំ​ពាក់​មុខ​សុវត្ថិភាព​ពណ៌​ខ្មៅ​អាយុ​ប្រហែល​ចន្លោះ​៤០ ទៅ ​៤៥​ឆ្នាំ​​ពាក់​ខោអាវ​ខ្មៅ​ទាំងអស់។ ពេល​វាយ​ខ្ញុំ​ដួល​ភ្លាម ​គឺ​ម្នាក់​ដែល​ខ្ញុំ​ស្គាល់​នឹង​បាន​និយាយ​ជាមួយ​នោះ បាន​ស្រែក​ថា ម៉េច​វាយ​គេ ចឹងៗ ធ្វើ​ឱ្យ​ម្នាក់​នោះ​រត់ឡើង​ជិះ​ម៉ូតូ​ទៅ​បាត់​ទៅ​។ ខ្ញុំ​បាន​តាំង​អារម្មណ៍​​ឡើង​អង្គុយ និង​មាន​ពលរដ្ឋ​ម្តុំ​នោះ មាន​ទាំង​អ្នក​ម៉ូតូឌុប​អី​មក​ចោមរោម​មើល និង​និយាយ​ថា អ្នក​វាយ​នោះ បាន​ដើរ​សំដៅ​មក​រក​គាត់​ប្រហែល​ជាង​ ១០​មែត្រ ហើយ​បាន​ដោះ​ខ្សែ​ក្រវ៉ាត់​ប្រុង​វាយ ប៉ុន្តែ​វាយ​ដៃ​វិញ»

សកម្មជន​បក្ស​ប្រឆាំង​រូប​នេះ ឱ្យ​ដឹង​ថា ក្រោយ​កើតហេតុ​ភ្លាមៗ​អ្នកស្រី បាន​ទៅ​ដាក់​បណ្ដឹង​នៅ ប៉ុស្តិ៍​នគរបាល​សង្កាត់​អូរឫស្សី​៣ ប៉ុន្តែ​ប៉ូលិស​ទីនោះ មិន​បាន​ជួយ​អន្តរាគមន៍​ភ្លាមៗ​នោះ​ទេ ដោយ​អ្នកស្រី ត្រូវ​រង់ចាំ​មួយសន្ទុះ ទើប​ប៉ូលិស​ចេញ​មក​សួរនាំ​និង​ធ្វើ​កំណត់ហេតុ​។ បន្ទាប់​មក​អ្នកស្រី​ក៏​បាន​នាំ​ប៉ូលិស​ទៅ​ពិនិត្យ​កន្លែង​កើត​ហេតុ និង​ឆែក​កាមេរ៉ា​សុវត្ថិភាព​នៅ​ម្តុំ​នោះ ប៉ុន្តែ​ប្រជាពលរដ្ឋ ដែល​ជា​ម្ចាស់​កាមេរ៉ា​សុវត្ថិភាព​មិន​អនុញ្ញាត​ឱ្យ​ឆែក​ទេ ដោយ​អះអាង​ថា កាមេរ៉ា​ខូច​។ ចំណែក​ពលរដ្ឋ​នៅ​កន្លែង​កើតហេតុ ក៏​គ្មាន​នរណា​ជួយ​ធ្វើ​សាក្សី​ឱ្យ​អ្នកស្រី​ដែរ ដោយ​ម្នាក់ៗ ​បារម្ភ​ពី​សុវត្ថិភាព​។ ជនរងគ្រោះ ចាត់​ទុក​ការ​លួច​វាយប្រហារ​នេះ គឺជា​រឿង​នយោបាយ៖ «ជា​រឿង​នយោបាយ មិនមែន​ទំនាស់​បុគ្គល​នោះ​ទេ ព្រោះ​ខ្ញុំ នៅតែ​លើ​ផ្ទះ​មិនដែល​មាន​ទំនាស់​ជាមួយ​អ្នកណា​ទេ។ របប​ក្រុងភ្នំពេញ​ដែល​ប្លន់​សន្លឹកឆ្នោត​ខ្ញុំ​ហើយ ត្រូវ​រក​យុត្តិធម៌​ឱ្យ​ឃើញ​ជូន​ខ្ញុំ​។ បើសិនជា​សមត្ថកិច្ច និង​អ្នកជិតខាង​នោះ ឱ្យ​បើក​កាមេរ៉ា នឹង​ឃើញ​មាន​សកម្មភាព​វាយ​ដុំ​នោះ​ទេ ប៉ុន្តែ​គេ​ថា កាមេរ៉ា​នោះ​ខូច​អស់ហើយ​។ ផ្ទះ​ក្បែ​នោះ​សុទ្ធ​តែ​កាមេរ៉ា»

អ្នកស្រី ទេព ច័ន្ទសុខខែយ៉ា មាន​វ័យ​ ៥១ឆ្នាំ ជា​ស្ត្រី​មេម៉ាយ​កូន ​២​នាក់ និង​ជា​ចៅ​សង្កាត់រង​ទី​២ ជាប់​ឆ្នោត​នៅ​សង្កាត់​អូរឫស្សី​៤ របស់​គណបក្ស​សង្គ្រោះ​ជាតិ ដែល​មាន​ប្រជាប្រិយភាព និង​សកម្ម នា​ពេល​កន្លង​មក​។ សកម្មភាព​លេចធ្លោ​ជាងគេ​គឺ​អ្នកស្រី តែងតែ​ប្តឹង​ទៅ​អាជ្ញាធរ​ជាពិសេស​គណៈកម្មាធិការ​ជាតិ​រៀបចំ​ការបោះឆ្នោត​ឱ្យ​លុបឈ្មោះ​ជនជាតិ​វៀតណាម​ដែល​រស់នៅ​ក្នុង​សង្កាត់​អូរឫស្សី​៤ កុំ​ឱ្យ​មាន​សិទ្ធិ​បោះឆ្នោត​ដូច​ពលរដ្ឋ​ខ្មែរ។

នាយរង​ប៉ុស្តិ៍​នគរបាល​សង្កាត់​អូរឫស្សី​៣ លោក ញ៉ែម អំរិន្ទ ប្រាប់​អាស៊ីសេរី​ថា ក្រោយ​ទទួល​បាន ពាក្យ​បណ្ដឹង​ពី​ជនរងគ្រោះ អាជ្ញាធរ កំពុង​ស្រាវជ្រាវ​រក​ជន​ដៃដល់ ប៉ុន្តែ​មិន​មាន​តម្រុយ​នៅ​ឡើយ៖ «សមត្ថកិច្ច​កំពុង​តាមមើល​ភិនភាគ​មុខសញ្ញា​ដែល​ធ្វើ​សកម្មភាព​ដែរ ប៉ុន្តែ​អត់​ទាន់​ឃើញ​ទេ កំពុង​ព្យាយាម​រកមើល​កាមេរ៉ា​តាម​ផ្ទះ​ប្រជាពលរដ្ឋ​នៅ​ទីនោះ ប៉ុន្តែ​កាមេរ៉ា អត់​ចាប់​បាន​រូបភាព​។ បើ​បង​ចង់​ច្បាស់​ទៅ​សួរ​មេ​របស់ខ្ញុំ ព្រោះ​គាត់​ដឹង​ច្បាស់»

រីឯ​អ្នកនាំពាក្យ​អគ្គស្នងការ​នគរបាល​ជាតិ លោក ឆាយ គឹមឃឿន មាន​ប្រសាសន៍​ថា សមត្ថកិច្ច នឹង​ព្យាយាម​ចាត់វិធានការ​ទៅតាម​ច្បាប់ នៅ​ពេល​មាន​ករណី​ហិង្សា​លើ​រូបរាងកាយ​របស់​មនុស្ស មិន​ចំពោះតែ​ករណី​ហិង្សា​កើត​លើ​សកម្មជន​គណបក្ស​ស​ង្គ្រោះ​ជាតិ​នោះ​ឡើយ​។ លោក​បញ្ជាក់​ថា មក​ទល់​ពេល​នេះ​មិនទាន់​រក​ឃើញ​មុខសញ្ញា​ជន​ដៃដល់​នៅឡើយ​ទេ​៖ «ក្មួយ​អើយ​..​ឱ្យ​តែ​មាន​រឿង​កើត​ឡើង ឥឡូវនេះ ចេះតែ​លើកឡើង ហើយ​សមត្ថកិច្ច​មិនទាន់​ដឹង​រឿង​អី​ផង ចេះតែ​លើកឡើង​ថា ជា​រឿង​នយោបាយ។ មាន​មាត់​ចេះ តែ​លើក​ឡើង​ទៅ តែ​ពូ​មិន​ឯកភាព​ជាមួយ​ទេ ព្រោះ​មិនទាន់​រក​ឃើញ​ថា រឿង​អី​ផង»

អ្នកនាំពាក្យ​សមាគម​ អាដហុក (Adhoc) លោក ស៊ឹង សែនករុណា សម្ដែង​ការសោកស្តាយ និង​ព្រួយ​បារម្ភ ចំពោះ​អំពើហិង្សា​កើត​ឡើងលើ​សកម្មជន​បក្ស​ប្រឆាំង​ជា​បន្តបន្ទាប់ ព្រោះ​គ្រប់​ករណី​ទាំងអស់ គឺ​អាជ្ញាធរ ហាក់​មិន​បាន​ប្រឹងប្រែង​វែកមុខ​ជនល្មើស​យក​មក​ផ្ដន្ទាទោស​តាមច្បាប់​នោះ​ឡើយ​។ លោក​សង្កេត​ឃើញ​ថា អំពើ​ហិង្សា​នេះ គឺ​មាន​ការរៀបចំ​ជា​ប្រព័ន្ធ និង​មាន​គោលដៅ​ចំពោះ​តែ​សកម្មជន​បក្ស​ប្រឆាំង​។ មន្ត្រី​សិទ្ធិមនុស្ស​រូប​នេះ យល់​ថា ប្រសិន​អាជ្ញា​ធរមាន​ឆន្ទៈ​ពិតប្រាកដ​គឺ​មិន​ពិបាក​រក​ជន​ដៃ​ដល់​នោះ​ទេ ពីព្រោះ​ករណី​ហិង្សា​ទាំងអស់ កើតឡើង​នៅ​ពេល​ថ្ងៃ​ចំ​កណ្ដាល​ទីក្រុង៖ «បើសិនជា​គ្មាន​វិធានការ​ណាមួយ​ដែល​គួរ​ឱ្យ​ទុកចិត្ត​បាន​ថា សមត្ថកិច្ច​កម្ពុជា បាន​ខិតខំ​ប្រឹងប្រែង​អនុវត្ត​ឱ្យ​ត្រឹមត្រូវ​តាមច្បាប់​ទេ យើង​ជឿ​ថា នឹង​មិន​ជៀស​ផុត​ពី​ការ រិះគន់​និង​គេ​ចោទ​ប្រកាន់​ថា រដ្ឋាភិបាល​ហាក់​ដូចជា​បើកដៃ​ឱ្យ​ក្រុម​ទាំងអស់​នេះ បង្ក​ហិង្សា​មក​លើ​សកម្មជន​គណបក្ស​ជំទាស់ ប៉ុន្តែ​បើ​សមត្ថកិច្ច បាន​ប្រឹងប្រែង​ចាត់វិធានការ​ចាប់​ជន​ដៃដល់​មក ផ្ដន្ទាទោស​នោះ​គឺ​អាច​ធ្វើ​ឱ្យ​រដ្ឋាភិបាល​ទទួល​បាន​ការ​កោត​សរសើរ​ឡើងវិញ»

ករណី​ហិង្សា​លើ​អ្នកស្រី ទេព ច័ន្ទសុខខែយ៉ា នេះ គឺជា​ករណី​ទី​១៣​ ហើយ ដែល​ជន​ដៃដល់​បាន​​ប្រើ​​ហិង្សា​​វាយ​​សំពង​​សកម្មជន​​គណបក្ស​​ប្រឆាំង ហើយ​​គ្មាន​​សំណុំ​រឿង​​មួយ​​ណា​​ត្រូវ​​បាន​សមត្ថកិច្ច​​​បាន​​​រក​​ឃើញ​​ជន​​ប្រព្រឹត្ត​ ដើម្បី​​នាំ​ទៅ​​ផ្ដន្ទាទោស​​នៅ​ឡើយ​​ទេ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល