ប្រពន្ធ​លោក ម៉ៃ ហុងស្រៀង ខក​ចិត្ត​ដែល​សាលា​ឧទ្ធរណ៍​សម្រេច​មិន​ដោះលែង​ប្ដី

ដោយ សេក បណ្ឌិត
2019-12-12
អ៊ីម៉ែល
មតិ
Share
បោះពុម្ព
លោក ម៉ៃ ហុងស្រៀង និង​ភរិយា
លោក ម៉ៃ ហុងស្រៀង និង​ភរិយា
រូប៖ ហ្វេសប៊ុក​អ្នកស្រី គា ស៊ីសុគន្ធី

ចៅក្រម​សាលា​ឧទ្ធរណ៍​សម្រេច​មិន​ដោះលែង​សកម្មជន​បក្ស​ប្រឆាំង លោក ម៉ៃ ហុងស្រៀង ឲ្យ​នៅ​ក្រៅ​ឃុំ​បណ្ដោះ​អាសន្ន​ឡើយ នៅ​ថ្ងៃ​ទី​១២ ខែ​ធ្នូ។ មេធាវី​ភរិយា​របស់​លោក ម៉ៃ ហុងស្រៀង និង​អ្នក​ឃ្លាំមើល​សិទ្ធិ​មនុស្ស​ ខក​ចិត្ត​នឹង​ការ​សម្រេច​ក្ដី​បែប​នេះ។

មេធាវី​ការពារ​ក្ដី​ឲ្យ លោក ម៉ៃ ហុងស្រៀង គឺ លោក​មេធាវី កែត ឃី ប្រាប់​អាស៊ី​សេរី​ថា ក្នុង​សវនាការ​ជម្រះ​ក្ដី​​សាលា​ឧទ្ធរណ៍ មេធាវី​បាន​អះអាង​ថា កូន​ក្ដី​របស់​លោក នឹង​ចូលខ្លួន​គ្រប់​ពេល នៅ​ពេល​តុលាការ​កោះ​ហៅ ​បើ​ទោះ​ជា​កៀក​ពេល​នឹង​សវនាការ​យ៉ាង​ណា​ក៏​ដោយ។ ដោយ​ឡែក លោក​ថា តំណាង​មហា​អយ្យការ​ ក៏​​មិន​ជំទាស់​នឹង​ការ​ដោះ​លែង​ឲ្យ​ក្រៅ​ឃុំ​បណ្ដោះ​អាសន្ន ដោយ​ភ្ជាប់​លក្ខខណ្ឌ​ផ្សេងៗ នោះ​ដែរ។ តែ​ចៅក្រម​សំអាង​ថា ខ្លាច​ពិបាក​កោះ​ហៅ​មក​ជម្រះ​ក្ដី​វិញ ព្រោះ​កៀក​នឹង​ថ្ងៃ​ជម្រះ​ក្ដី​នៅ​ខែ​មករា​ខាង​មុខ​ទៅ​ហើយ។ តែ​ទោះ​យ៉ាង​ណា លោក​មេធាវី​ប្រាប់​ថា ចៅក្រម​សាលា​ឧទ្ធរណ៍ មិន​ទាន់​កំណត់​ថ្ងៃ​បើក​សវនាការ​ជម្រះ​ក្ដី​ឲ្យ​ប្រាកដ​ថា ថ្ងៃ​ណា​នៅ​ឡើយ​ទេ៖ «យើង​បាន​ធានា​អះអាង​ហើយ​ថា នៅ​ពេល​ណា​តុលាការ​ត្រូវ​ការ​គាត់ យើង​នឹង​នាំ​គាត់​ចូល​​មក​តុលាការ​គ្រប់​ពេល​វេលា​ យើង​ធានា​អះអាង​អ៊ីចឹង​នៅ​មុខ​តុលាការ​ ហើយ​ការ​សន្និដ្ឋាន​របស់​តំណាង​អយ្យការ​ក៏​ថា ឲ្យ​ដាក់​ស្ថិត​ក្រោម​ការ​ត្រួត​ពិនិត្យ​របស់​តុលាការ​ទៅ ហើយ​ដាក់​លក្ខខណ្ឌ​គាត់​ទៅ។ គាត់​ត្រូវ​ ត្រឹម​ណា ដើរ​ត្រឹម​ណា​អ៊ីចឹង​ទៅ ហើយ​យើង​ទទួល​យក បើ​តុលាការ​ដាក់​ត្រឹម​ណា ក៏​យើង​ទទួល​យក​ឲ្យ​តែ​​ធ្វើ​ម្ដេច​ឲ្យ​គាត់​បាន​នៅ​ក្រៅ​ឃុំ​ហ្នឹង»

ចៅក្រម​សាលា​ឧទ្ធរណ៍ ដែល​សម្រេច​មិន​ឲ្យ​លោក ម៉ៃ ហុងស្រៀង បាន​នៅ​ក្រៅ​ឃុំ គឺ​អ្នកស្រី ចៅក្រម ចាន់ ម៉ាឌីណា។ ការ​ប្រកាស​សាលដីកា​នេះ ជា​លទ្ធផល ​នៃ​សវនាការ​​​សុំ​នៅ​ក្រៅ​ឃុំ​បណ្ដោះ​អាសន្ន ដែល​បាន​ធ្វើ​កាល​ពី​ថ្ងៃ​ទី៩ ធ្នូ។ លោក ម៉ៃ ហុងស្រៀង គឺ​ជា​សកម្មជន​គណបក្ស​សង្គ្រោះ​ជាតិ​ប្រចាំ​ក្រុង​ព្រះសីហនុ ខេត្ត​ព្រះសីហនុ។ សកម្មជន​រូប​នេះ តែង​បង្ហោះ​សារ​រិះគន់​រដ្ឋាភិបាល​ក្រុង​ភ្នំពេញ​ជា​និច្ច ក្រោយ​ពេល​​តុលាការ​កំពូល​​​រំលាយ​គណបក្ស​ប្រឆាំង។ លោក ម៉ៃ ហុងស្រៀង ធ្លាប់​បាន​​ភៀស​ខ្លួន​ទៅ​ក្រៅ​ប្រទេស មួយ​រយៈ​ក្រោយ​ពេល​រំលាយ​គណបក្ស​សង្គ្រោះ​ជាតិ​។ ក្រោយ​​នៅ​ឆ្នាំ​២០១៨ លោក បាន​វិល​ត្រលប់​ចូល​ប្រទេស​កម្ពុជា​វិញ ហើយ​​បាន​សមត្ថកិច្ច​របស់​រដ្ឋាភិបាល​ក្រុង​ភ្នំពេញ បាន​​​ឡោមព័ទ្ធ និង​ដេញ​ចាប់​ខ្លួន ពី​ខេត្ត​ព្រះសីហនុ ដល់​​រាជធានី​ភ្នំពេញ កាល​ពី​ចុង​ខែ​កក្កដា។ ពេល​ចាប់​ខ្លួន​បាន​ភ្លាមៗ សមត្ថកិច្ច​បាន​ចោទ​ថា លោក ម៉ៃ ហុង​ស្រៀង ត្រឡប់​ពី​ប្រទេស​ថៃ ​ចូល​​​​ប្រទេស​​កម្ពុជា​វិញ ដើម្បី​កៀរគរ​សកម្មជន​ គាំទ្រ​ដំណើរ​មាតុភូមិ​និវត្តន៍​របស់ ​លោក សម រង្ស៊ី នៅ​ថ្ងៃ​ទី៩ ខែ​វិច្ឆិកា។

បន្ទាប់​មក​ ចៅក្រម​ស៊ើបសួរ​នៃ​សាលា​ដំបូង​រាជធានី​ភ្នំពេញ លោក រៀល សុភិន្ទ​ សម្រេច​ចោទ​ប្រកាន់​​ពី​បទ​ជេរ​ប្រមាថ​រដ្ឋាភិបាល​ក្រុង​ភ្នំពេញ និង​ញុះញង់​តាម​រយៈ​បណ្ដាញ​សង្គម​ហ្វេសប៊ុក ​​(facebook)។ ចៅក្រម​​​រូប​នេះ​ បាន​កាត់​ទោស​​​​លោក ម៉ៃ ហុងស្រៀង​​ ឱ្យ​ជាប់​ពន្ធនាគារ​ ១៨​ខែ តែ​លោក ម៉ៃ ហុងស្រៀង មិន​ពេញ​ចិត្ត​ នឹង​ការ​សម្រេច​ក្ដី​របស់​តុលាការ​ជាន់​ទាប​​ ទើប​បន្ត​ប្ដឹង​ឡើង​​ទៅ​តុលាការ​ជាន់​ខ្ពស់​ សុំ​នៅ​ក្រៅ​ឃុំ​បណ្ដោះ​អាសន្ន។ គណបក្ស​សង្គ្រោះ​ជាតិ និង​អ្នក​ឃ្លាំមើល​សិទ្ធិ​មនុស្ស​ សុទ្ធ​តែ​ហៅ​​ចំណាត់​ការ​លើ​លោក ម៉ៃ ហុងស្រៀង ថា ជា​ករណី​រំលោភ​សិទ្ធិ​​នយោបាយ។

ភរិយា​របស់ លោក ម៉ៃ ហុងស្រៀង​ អ្នកស្រី គា ស៊ីសុគន្ធី ខកចិត្ត​ខ្លាំង ចំពោះ​ការ​សម្រេច​ក្ដី​ បន្ត​ឃុំ​ខ្លួន​ស្វាមី​អ្នកស្រី​បន្ត​ទៀត​នេះ។ អ្នកស្រី​ប្រាប់​ថា អ្នកស្រី​បាន​ត្រឹម​​តែ​បន្ត​យំ​សោក​ជាមួយ​កូន​តូចៗ ៣នាក់ និង​ពង្រឹង​ស្មារតី​តស៊ូ​ត​ទៀត ព្រោះ​​​​​​តុលាការ ដែល​មាន​អំណាច ​​បាន​សម្រេច​ក្ដី​បែប​នេះ​ទៅ​ហើយ៖ «សោកស្ដាយ​ ឲ្យ​ព្រោះ​អ្វី​រំពឹង​​តុលាការ​នឹង​ដោះលែង​ឲ្យ​មាន​សេរីភាព ប៉ុន្តែ​ផ្ទុយ​ទៅ​វិញ គឺ​តុលាការ​សម្រេច​ថា មិន​ដោះលែង​គាត់​ទេ។ អ៊ីចឹង​ មាន​តែ​រង់ចាំ។ មិន​ដឹង​ថា ថ្ងៃ​ណា ពេល​ណា ដែល​គាត់​មាន​សេរីភាព​។ មាន​អ្វី​ទេ មាន​ត្រឹម​តែ​សោក​ស្ដាយ​ប៉ិន​ហ្នឹង។ ខ្ញុំ​អាក់​អន់​ចិត្ត​ដែរ ព្រោះ​អ្វី​សង្ឃឹម​ច្រើន​ថា តុលាការ​នឹង​ដោះលែង​គាត់​ឲ្យ​នៅ​ក្រៅ​ឃុំ តែ​ផ្ទុយ​ទៅ​វិញ គឺ​មិន​បាន​ដោះ​លែង​គាត់។ ខ្ញុំ​អាក់​អន់​ចិត្ត​ដែរ ប៉ុន្តែ​​មិន​ដឹង​ធ្វើ​ម្ដេច​ទេ ព្រោះ​នេះ​ជា​សេចក្ដី​សម្រេច​ចិត្ត​របស់​លោក​តុលាការ។ អ៊ីចឹង មាន​តែ​ការ​តាំង​ចិត្ត​រឹង​មាំ​ត​ទៅ​ទៀត។ កូន​សួរ​រហូត​ហ្នឹង ខ្ញុំ​ប្រាប់​ថា ប៉ា​ជិត​ចេញ​មក​វិញ​ហើយ តិច​ទៀត​ចេញ​មក​វិញ​ហើយ តែ​ដល់​ឥឡូវ​មិន​ដឹង​ប្រាប់​កូន​ថា ម្ដេច​ទៀត​ទេ ឥឡូវ»

ការ​សម្រេច​មិន​ឲ្យ​លោក ម៉ៃ ហុងស្រៀង នៅ​ក្រៅ​ឃុំ​នេះ គឺ​ធ្វើ​ឡើង ១ថ្ងៃ ក្រោយ​ពេល​លោក ហ៊ុន សែន បង្ហាញ​អាការៈ​ខឹង​សម្បារ​សហគមន៍​អឺរ៉ុប ចំពោះ​ការ​ព្រមាន​ដក​ប្រព័ន្ធ​អនុគ្រោះ​ពន្ធ EBA។ ថ្លែង​ក្នុង​ពិធី​ចែក​សញ្ញាប័ត្រ​ឲ្យ​និស្សិត​សាកល​វិទ្យាល័យ​ឯកជន នៅ​រាជ​ធានី​ភ្នំពេញ កាល​ពី ថ្ងៃ​ទី១១ ធ្នូ លោក ហ៊ុន សែន ថា លោក​មិន​ខ្វល់​នឹង​ការ​ដក​ប្រព័ន្ធ​អនុគ្រោះ​ពន្ធ EBA ឡើយ តែ​លោក​ព្រមាន​ថា បើ​សហគមន៍​អឺរ៉ុប ហ៊ាន​ដក​ប្រព័ន្ធ​អនុគ្រោះ​ពន្ធ គឺ​ស្មើ​នឹង​ការ​សម្លាប់​ក្រុម​អ្នក​និយម​ប្រជាធិបតេយ្យ ដែល​លោក ហ៊ុន សែន ចាត់​ទុក​ជា​ក្រុម​អ្នក​ប្រឆាំង​ផ្កាប់​មុខ ហើយ​លោក ក៏​ព្រមាន​​ទៅ​សហគមន៍​អឺរ៉ុប​ថា សំដី​របស់​អឺរ៉ុប ក៏​លែង​មាន​​ឥទ្ធិពល​លើ​រដ្ឋាភិបាល​ក្រុង​ភ្នំពេញ​ដែរ៖ «សមិទ្ធផល​ដែល​អ្នកតែង​ជួយ​ខ្ញុំ​ ក៏​ត្រូវ​និរាករណ៍​ចោល​ដែរ ទឹកមាត់​អ្នក​ឯង​ជាមួយ​ខ្ញុំ​ ក៏​នឹង​កាត់​បន្ថយ​ដែរ​ មាន​ន័យ​ថា បាន​រួម​ចំណែក​សម្លាប់​អា​ពួក​ប្រឆាំង​ផ្កាប់មុខ​ហ្មង»

មក​ដល់​ពេល​នេះ នៅ​មាន​សកម្មជន​បក្ស​ប្រឆាំង​ជាង​ ២០​នាក់​ទៀត កំពុង​ជាប់​ក្នុង​ពន្ធនាគារ ​មិន​ទាន់​ទទួល​បាន​ការ​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន​នៅ​ឡើយ​ទេ។ ក្នុង​ចំណោម​អ្នក​ទោស​នយោបាយ​អ្នក​ទោស​មនសិការ ប្រហែល ១០០នាក់ តុលាការ​បាន​ដោះលែង​ឲ្យ​នៅ​ក្រៅ​ឃុំ​បណ្ដោះ​អាសន្ន បាន​ ៧៦​នាក់​ហើយ ក្រោយ​លោក ហ៊ុន សែន បញ្ជា​ឲ្យ​ប្រញាប់​ដោះលែង​អ្នក​ទាំង​នោះ​ជា​បន្ទាន់ ​ដោយសារ​ ចាត់​ទុក​ថា អ្នក​ទោស​នយោបាយ​ទាំង​នោះ ចាញ់​បោក​ការ​បញ្ឆោត​របស់​ប្រធាន​ស្ដី​ទី​គណបក្ស​សង្គ្រោះ​ជាតិ លោក សម រង្ស៊ី។ តែ​ទោះ​បាន​ដោះលែង​ឲ្យ​នៅ​ក្រៅ​​ការ​ឃុំ​​ខ្លួន​​បណ្ដោះ​អាសន្ន​មែន តែ​លោក ហ៊ុន សែន បាន​បញ្ជា​​មិន​ឲ្យ​ទម្លាក់​បទ​ចោទ​ឡើយ ហើយ​អ្នក​ទាំង​ ៧៦​នាក់​នោះ ត្រូវ​បង្ហាញ​ខ្លួន​តាម​ការ​កោះហៅ​របស់​អាជ្ញាធរ និង​តុលាការ​ជា​និច្ច និង​ភ្ជាប់​លក្ខខណ្ឌ​តឹងរ៉ឹង​មួយ​ចំនួន​ទៀត។

ពាក់ព័ន្ធ​ការ​បន្ត​ឃុំ​ខ្លួន សកម្មជន​បក្ស​ប្រឆាំង លោក ម៉ៃ ហុងស្រៀង ​អ្នក​ឃ្លាំមើល​សិទ្ធិ​មនុស្ស​នៅ​កម្ពុជា ហៅ​ការ​សម្រេច​ក្ដី​របស់​សាលា​ឧទ្ធរណ៍​ថា មិន​ត្រឹម​ត្រូវ​ និង​មិន​សម​ហេតុផល។ ប្រធាន​ផ្នែក​​ឃ្លាំមើល​សិទ្ធិ​មនុស្ស​នៃ​សមាគម​អាដហុក លោក នី សុខា យល់​ថា ការ​បន្ត​ឃុំ​ខ្លួន លោក ម៉ៃ ហុង​ស្រៀង ដោយ​ប្រើ​ហេតុផល​កៀក​ថ្ងៃ​ជម្រះ​ក្ដី​បែប​នេះ ជា​រឿង​មិន​​សម​រម្យ។ លោក​បន្ត​ថា ចំណាត់​ការ​លើ​លោក ម៉ៃ ហុងស្រៀង ដោយសារ​ជម្លោះ​វិវាទ​នយោបាយ ដូច្នេះ​គួរ​មាន​ការ​បង្ហាញ​ឆន្ទៈ​​ដោះលែង​សកម្មជន​បក្ស​ប្រឆាំង​រូប​នេះ ដើម្បី​ឈាន​ដល់​ការ​ដោះស្រាយ​វិបត្តិ​នយោបាយ៖ «គិត​ថា ទាក់​ទង​ទៅ​នឹង​រឿង ​លោក ម៉ៃ ហុងស្រៀង​ ហ្នឹង​ដែរ យើង​ដឹង​ហើយ​ថា រឿង​នេះ មាន​លក្ខណៈ​ពាក់ព័ន្ធ​នឹង​ការ​​ជម្លោះ​នៃ​រឿង​នយោបាយ ដោយ​សារ​តែ​គាត់​ក៏​ជា​សកម្មជន​ម្នាក់​នៃ​គណបក្ស​ អតីត​គណបក្ស​នយោបាយ។ ដូច្នេះ​ហើយ ខ្ញុំ​គិត​ថា នៅ​ក្នុង​កាលៈទេសៈ​នេះ តុលាការ​គួរ​តែ​បង្ហាញ​​អំពី​ឆន្ទៈ ក្នុង​ការ​បន្ធូរ​បន្ថយ​ទាក់ទង​ទៅ​នឹង​ឲ្យ​គាត់​បាន​នៅ​ក្រៅ​ឃុំ​បណ្ដោះ​អាសន្ន​ ដើម្បី​បង្ហាញ​អំពី​ឆន្ទៈ​មួយ​ ក្នុង​ការ​បន្ធូរ​បន្ថយ ដើម្បី​ឈាន​ទៅ​រក​ការ​រក្សា​ឲ្យ​បាន​ ឬ​ក៏​ឈាន​ទៅ​រក​ការ​ដោះស្រាយ​នយោបាយ»

លោក មេធាវី កែត ឃី ប្រាប់​ថា នឹង​ពិភាក្សា​ជាមួយ​កូនក្ដី​លើ​នីតិវិធី​ច្បាប់​ត​ទៀត ប៉ុន្តែ​ទំនង​ជា​នឹង​មិន ​ទាន់​​​ប្ដឹង​ឡើង​តុលាការ​កំពូល​​ទេ គឺ​រង់ចាំ​សវនាការ​របស់​សាលា​ឧទ្ធរណ៍​សិន​។ លោក​បារម្ភ​ថា ការ​បន្ត​ឃុំ​ខ្លួន លោក ម៉ៃ ហុងស្រៀង នឹង​ធ្វើ​ឲ្យ​ស្ថានភាព​ជំងឺ​របស់​កូន​ក្ដី​លោក កាន់​តែ​រើ​ឡើង ដោយសារ​​ក្រោយ​ការ​ជាប់​ឃុំ​ច្រើន​ខែ លោក ម៉ៃ ហុងស្រៀង ចាប់​ផ្ដើម​មាន​ជំងឺ​កៀប​សរសៃ​ឆ្អឹង​ខ្នង ដោយសារ​ស្ថានភាព​ក្នុង​ពន្ធនាគារ​មាន​សភាព​ចង្អៀត​ណែន តម្រូវ​ឲ្យ​លោក ម៉ៃ ហុងស្រៀង បង្ខំ​ចិត្ត​​​ដេក​ផ្អៀង​រាល់​យប់ ក្នុង​រយៈ​ពេល​ច្រើន​ខែ​មក​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។



ព័ត៌មាន (0)
Share
គេហទំព័រ​ទាំងមូល