របប​ក្រុង​ភ្នំពេញ​ចាប់​ខ្លួន​សកម្មជន​បក្ស​ប្រឆាំង​ម្នាក់ទៀត​នៅ​ក្នុង​ខេត្ត​កំពង់ចាម

ដោយ ហេង រស្មី
2019-09-05
អ៊ីម៉ែល
មតិ
Share
បោះពុម្ព
លោក ហ៊ុន សុគង់ មេឃុំ​បុស្សខ្នុរ ស្រុក​ចម្ការ​លើ ខេត្ត​កំពង់ចាម ខាង​គណបក្ស​សង្គ្រោះ​ជាតិ ដែល​ត្រូវ​អាជ្ញាធរ​ចាប់​ខ្លួន នៅ​ក្រុង​ប៉ោយប៉ែត នៅ​ព្រឹក​ថ្ងៃ​ទី៥ ខែ​កញ្ញា ឆ្នាំ២០១៩។
លោក ហ៊ុន សុគង់ មេឃុំ​បុស្សខ្នុរ ស្រុក​ចម្ការ​លើ ខេត្ត​កំពង់ចាម ខាង​គណបក្ស​សង្គ្រោះ​ជាតិ ដែល​ត្រូវ​អាជ្ញាធរ​ចាប់​ខ្លួន នៅ​ក្រុង​ប៉ោយប៉ែត នៅ​ព្រឹក​ថ្ងៃ​ទី៥ ខែ​កញ្ញា ឆ្នាំ២០១៩។
Provided photo

មន្ត្រី​សិទ្ធិមនុស្ស​និយាយ​ថា សកម្មជន​គណបក្ស​សង្គ្រោះ​ជាតិ​ម្នាក់ទៀត មកពី​ខេត្ត​កំពង់ចាម​ត្រូវ​អាជ្ញាធរ​របប​ក្រុងភ្នំពេញ​ចាប់ខ្លួន​ខណៈ​ពេល​ដែល​លោក​កំពុង​ប្រកប​មុខរបរ​ម៉ូតូឌុប​ក្នុង​ក្រុង​ប៉ោយប៉ែត ខេត្ត​បន្ទាយមានជ័យ។

អ្នក​សម្របសម្រួល​សមាគម ​អាដហុក (Adhoc) ខេត្ត​បន្ទាយមានជ័យ លោក ស៊ុំ ចន្ទគា បញ្ជាក់​ថា លោក ហ៊ុន សុគង់ មេឃុំ បុស្សខ្នុរ មក​ពី​ស្រុក​ចំការលើ ខេត្ត​កំពង់ចាម ត្រូវ​អាជ្ញាធរ​ចាប់ខ្លួន​ភ្លាមៗ​ នៅ​ក្រុង​ប៉ោយប៉ែត នៅ​ព្រឹក​ថ្ងៃ​ទី៥ កញ្ញា​នេះ​ដោយ​ពុំបាន​បង្ហាញ​ដីកា​ចាប់ខ្លួន​ពី​តុលាការ។ លោក​បាន​ហៅ​ការ​ចាប់ខ្លួន​នេះ​ថា ​ជា​ការ​បំបិទ​សិទ្ធិ​សេរីភាព​របស់​ប្រជាពលរដ្ឋ​ក្នុង​ការ​ចូលរួម​សកម្មភាព​នយោបាយ៖ «ទាក់ទង​នៃ​ការ​ចាប់​ហ្នឹង​របៀប​ទាក់ទង​របប​នយោបាយ​ណាមួយ​មិន​គួរ​មានការ​កើតឡើង​ទេ ដោយសារតែ​ក្នុង​រដ្ឋធម្មនុញ្ញ​បាន​លើកទឹកចិត្ត​ប្រជាពលរដ្ឋ​យ៉ាងសកម្ម​ក្នុង​ជីវភាព​នយោបាយ។ ​អ៊ីចឹង​ គាត់​មាន​សិទ្ធិ​គាំទ្រ គាត់​មាន​សិទ្ធិ​ឈរ​ឈ្មោះ​ឱ្យ​គេ​បោះឆ្នោត។ ប៉ុន្តែ​ប្រសិនបើ​គាត់​មក​រស់នៅ​ប៉ោយប៉ែត​ដោយសារតែ​ការ​លាក់ខ្លួន បញ្ហា​តាម​ចាប់​ស្អី​បញ្ហា​បញ្ចេញ​សារ​ដើម្បី​សេរីភាព​បញ្ចេញមតិ ឬ​ដោយសារ​អ្វីមួយ​ ខ្ញុំ​គិត​ថា​រាល់​ការអនុវត្ត​អ្វី​សុំ​ឱ្យ​គោរព​ច្បាប់​និង​ពិនិត្យមើល​ទាំងអស់​គ្នា»។

ស្នងការ​រង​ខេត្ត​បន្ទាយមានជ័យ​លោក សិទ្ធិ លោះ បញ្ជាក់​ថា លោក​មិន​បាន​ដឹង​ពី​ការ​ចាប់ខ្លួន​នេះ​ទេ​ ដោយសារតែ​លោក​កំពុង​ជាប់​បេសកកម្ម​នៅ​ក្រៅ​ខេត្ត៖ «ខ្ញុំ​ដូច​អត់​បាន​ទទួល​ព័ត៌មាន​ហ្នឹង​ទេ​បង មិន​ដឹង​ជា​ចាប់​រឿង​ស្អី ឬ​ហេតុការណ៍​យ៉ាងម៉េច​ ខ្ញុំ​អត់​ដឹង​ទេ ដោយសារ​ខ្ញុំ​ជាប់​បេសកកម្ម​សូម​អធ្យាស្រ័យ»

អ្នកស្រី ខាន់ សុគន្ធា ភរិយា​លោក ហ៊ុន សុគង់ មេឃុំ​បុស្សខ្នុរ ស្រុក​ចំការលើ ខេត្ត​កំពង់ចាម បញ្ជាក់​ថា ស្វាមី​អ្នកស្រី​មិន​បាន​ប្រព្រឹត្ត​បទឧក្រិដ្ឋ​អ្វី​ទេ។ អ្នកស្រី​បញ្ជាក់​ថា លោក ហ៊ុន សុគង់ បាន​ឈប់​ធ្វើ​សកម្មភាព​នយោបាយ​យូរហើយ ក្រោយពី​រំលាយ​គណបក្ស​សង្គ្រោះ​ជាតិ​រួចមក ហើយ​បាន​ចាក​ចេញពី​ខេត្ត​កំពង់ចាម​ទៅ​ប្រកបមុខរបរ​រត់​ម៉ូតូឌុប​នៅ​ក្រុង​ប៉ោយប៉ែត ខេត្ត​បន្ទាយមានជ័យ​ជាប់​ព្រំដែន​ខ្មែរ​ថៃ៖ «ខ្ញុំ​ថា​ចាប់​នេះ គិត​ថា​មាន​ភាព​អយុត្តិធម៌​សម្រាប់​គ្រួសារ​ខ្ញុំ ពីព្រោះ​អី​គាត់​អត់​មាន​ធ្វើ​អ្វី​ខុស​ ពី​ព្រោះ​គាត់​ទៅ​រក​ស៊ី​ជា​ធម្មតា​ ដើម្បី​ជួយ​ផ្តត់ផ្គង់​គ្រួសារ​សោះ​ អត់​មានអី​ទៅ​ដើរ​ធ្វើ​នយោបាយ​ទៅ​ប្រកាស​ប្រមូល​ផ្តុំ​ណា​ណី​អី​អត់​ទេ ពីព្រោះ​គាត់​ទៅ​នេះ​ទៅ​រក​ស៊ី​តើ គាត់​អត់​មាន​ធ្វើ​ស្អី​ផង។ ខ្ញុំ​គិត​ថា វា​អយុត្តិធម៌​សម្រាប់​ប្ដី​ខ្ញុំ»

ការ​ចាប់ខ្លួន​សកម្មជន​គណបក្ស​សង្គ្រោះ​ជាតិ​នៅ​ក្នុង​ខេត្ត​កំពង់ចាម​នេះ​ បាន​ធ្វើ​ឡើងជា​បន្តបន្ទាប់​ក្រោយពី​សកម្មជន​គណបក្ស​ប្រឆាំង​នៅ​ក្នុង​ខេត្ត​បី​នាក់ ត្រូវ​ចាប់ខ្លួន​ដោយ​របប​ក្រុងភ្នំពេញ​បន្ទាប់ពី​ប្រធាន​ស្តីទី​គណបក្ស​សង្គ្រោះជាតិ​លោក សម រង្ស៊ី ប្រកាស​វិល​ចូល​មាតុប្រទេស​វិញ​ ដើម្បី​ដឹកនាំ​កម្លាំង​ប្រជាពលរដ្ឋ​ចាប់ខ្លួន​លោក ហ៊ុន សែន។

គិត​ត្រឹម​ដើមខែ​កញ្ញា​នេះ មាន​មន្ត្រី​គណបក្សប្រឆាំង​ប្រមាណ ២០​នាក់​ហើយ ដែល​ត្រូវ​បាន​អាជ្ញាធរ​របប​ក្រុងភ្នំពេញ​ចាប់ខ្លួន ហើយ​ក៏​មាន​មន្ត្រី​បក្ស​ប្រឆាំង​ជា​ច្រើន​រូប​ទៀត​ដែរ ដែល​ត្រូវ​ជន​មិន​ស្គាល់​មុខ​លប​វាយដំ និង​គំរាម​ប្រើ​អំពើ​ហិង្សា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល