ប៉ូលិសសហព័ទ្ធអូស្ត្រាលី (AFP) គ្រោងជួបជាមួយប្រជាសហគមន៍ខ្មែររស់នៅទីក្រុងស៊ីដនី(Sydney)ជាថ្មីម្តងទៀត ដើម្បីផ្សព្វផ្សាយអំពីរបៀបនៃការជ្រៀតជ្រែកពីរដ្ឋបរទេស ព្រមទាំងស្តាប់ក្តីកង្វល់របស់សហគមន៍ខ្មែរ ពាក់ព័ន្ធនឹងការគំរាមកំហែង និងការជ្រៀតជ្រែកពីរដ្ឋាភិបាលកម្ពុជា។ កម្មវិធីជួបជុំនេះ នឹងរៀបចំធ្វើនៅថ្ងៃសៅរ៍ ទី៣ ខែសីហាខាងមុខ នៅវត្តខេមរង្សារាម។
តំណាងសហគមន៍ខ្មែរនៅទីក្រុងស៊ីដនី អំពាវនាវឲ្យពលរដ្ឋខ្មែរ ចូលរួមឲ្យបានច្រើន ដើម្បីស្តាប់ និងរាយការណ៍ទៅប៉ូលិសសហព័ន្ធអំពីករណីបក្ខពួករបស់លោក ហ៊ុន ម៉ាណែត ដែលតែងជិះយន្តហោះពីស្រុកខ្មែរមកធ្វើទុក្ខបុកម្នេញ យាយី និងបំភិតបំភ័យពលរដ្ឋខ្មែរនៅលើទឹកដីអូស្ត្រាលី ដើម្បីបំបិទសំឡេងរិះគន់លើរបបដឹកនាំរបស់លោក ឬអ្នកណាដែលលើកឡើងអំពីបញ្ហាប្រជាធិបតេយ្យ និងសិទ្ធិមនុស្ស។
កាលពីសប្តាហ៍មុន រដ្ឋមន្ត្រីក្រសួងមហាផ្ទៃ និងជារដ្ឋមន្ត្រីក្រសួងសន្តិសុខតាមអ៊ីនធឺណិតរបស់ប្រទេសអូស្ត្រាលី អ្នកស្រី ក្លៀ អូនៀល (Clare O’Neil ) ក៏បានជួបជាមួយតំណាងសហគមន៍ខ្មែរ នៅទីស្នាក់ការសមាគមខ្មែរក្នុងក្រុងមែលប៊ន (Melbourne)ដែរ ដើម្បីផ្តល់ព័ត៌មានអំពីការដាក់ចេញគោលនយោបាយថ្មីៗនិងមានប្រសិទ្ធភាពជាងមុន ក្នុងការទប់ស្កាត់ការជ្រៀតជ្រែកពីរដ្ឋបរទេស និងស្តាប់ក្តីបារម្ភរបស់សហគមន៍ខ្មែរជុំវិញការចូលមកជ្រៀតជ្រែកពីរដ្ឋាភិបាលកម្ពុជា។ អ្នកស្រី ក្លៀ អូនៀល បញ្ជាក់ថា ពលរដ្ឋខ្មែរនៅអូស្ត្រាលី មានសិទ្ធិពេញលេញក្នុងការបញ្ចេញមតិ និងតវ៉ា ។ អ្នកស្រី ព្រមានថា ប្រសិនបើជនណា ឬក្រុមណាចូលមកទឹកដីអូស្ត្រាលី ហើយបែរជាធ្វើសកម្មភាពគំរាមកំហែង ឬជ្រៀតជ្រែកលើពលរដ្ឋអូស្ត្រាលីនោះ នឹងរងការលុបចោលវីសា(Visa) ហើយបណ្តេញចេញពីអូស្ត្រាលីវិញភ្លាមៗតែម្តង។ នៅក្នុងជំនួបនោះ តំណាងសហគមន៍ខ្មែរ ក៏បានស្នើសុំឲ្យរដ្ឋមន្ត្រីក្រសួងមហាផ្ទៃអូស្ត្រាលី ជួយរៀបចំឲ្យមានកម្មវិធីជួបជុំរវាងប៉ូលិសសហព័ន្ធ និងប្រជាសហគមន៍ខ្មែរនៅតាមរដ្ឋផ្សេងៗទៀតផងដែរ។
បច្ចុប្បន្ននេះ ប្រទេសកម្ពុជា បានជាប់ឈ្មោះនៅក្នុងបញ្ជីតាមដានពីអាជ្ញាធរជំនាញអូស្ត្រាលី ដោយសារតែគណបក្សកាន់អំណាចរបស់លោក ហ៊ុន សែន បានពង្រីកបណ្ដាញរបស់ខ្លួន នៅលើទឹកដីប្រទេសអូស្ត្រាលីតាំងពីឆ្នាំ២០១៥ ក្នុងគោលដៅដើម្បីធ្វើទុក្ខបុកម្នេញ យាយី តាមដាន និងបំភិតបំភ័យដល់ពលរដ្ឋខ្លួននៅលើទឹកដីអូស្ត្រាលី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។