សាលាដំបូង​ខេត្ត​បន្ទាយមាន​ជ័យ​កោះ​ហៅ​សកម្មជន​បក្ស​ប្រឆាំង​ម្នាក់​ទៀត​ចូល​បំភ្លឺនៅ​ថ្ងៃ​ទី៤ ខែ​កក្កដា

2019-06-22
អ៊ីម៉ែល
មតិ
Share
បោះពុម្ព
លោក ខាន់ ឡៃ សកម្មជនបក្ស​ប្រឆាំង​ក្រុង​បោយប៉ែត ខេត្ត​បន្ទាយមានជ័យ។
លោក ខាន់ ឡៃ សកម្មជនបក្ស​ប្រឆាំង​ក្រុង​បោយប៉ែត ខេត្ត​បន្ទាយមានជ័យ។
រូប៖ ពលរដ្ឋ​ផ្ដល់​ឱ្យ

តំណាង​អយ្យការ​នៃ​សាលាដំបូង​ខេត្ត​បន្ទាយមានជ័យ កោះហៅ​សកម្មជន​គណបក្ស​សង្គ្រោះ​ជាតិ​នៅ​ក្រុង​ប៉ោយប៉ែត​ម្នាក់​ទៀត ឱ្យ​ចូល​បំភ្លឺ​តុលាការ​នៅ​ថ្ងៃ​ទី៤ ខែ​កក្កដា​ខាង​មុខ​ ដោយ​ចោទ​ប្រកាន់​ពី​បទ​ញុះញង់​ឱ្យ​ប្រព្រឹត្ត​បទ​ឧក្រិដ្ឋ​ជាអាទិ៍។ មន្ត្រី​សង្គមស៊ីវិល​ធ្វើ​ការងារ​ផ្នែក​ការពារ​សិទ្ធិ ចាត់​ទុក​ដីកា​កោះ​នេះ​ថា ជា​រឿង​នយោបាយ​ និង​ជា​ការ​អនុវត្ត​ច្បាប់​ស្ដង់ដារ​២។

សកម្មជន​គណបក្ស​សង្គ្រោះ​ជាតិ​សង្កាត់​បោយប៉ែត​ ក្រុង​ប៉ោយប៉ែត​ លោក​ ខាន់ ឡៃ​ ប្រាប់​អាស៊ីសេរី​នៅ​រសៀល​ថ្ងៃ​ទី២២ មិថុនា​ថា​ លោក​មាន​ការ​ភ្ញាក់​ផ្អើល​យ៉ាងខ្លាំង​ នៅ​ពេល​ដែល​មេ​ភូមិ​ចាន់គិរី​​បាន​ប្រគល់​ដីកា​​ឱ្យ​លោក​កាល​ពី​ព្រឹក​ថ្ងៃ​ដដែល​នេះ​ ព្រោះ​មិន​បាន​ធ្វើ​ខុស​ដូច​ការ​ចោទ​ប្រកាន់​របស់​តំណាង​​អយ្យកា​នៃ​សាលាដំបូងខេត្ត​បន្ទាយមានជ័យ​នោះ​ទេ។ ទោះ​ជា​យ៉ាង​ណា​សកម្មជន​បក្ស​ប្រឆាំង​រូប​នេះ អះអាង​ថា លោក​នឹង​ចូល​បំភ្លឺ​តុលាការ​តាម​ការ​កំណត់ ដើម្បី​ចង់​ដឹង​ជុំវិញ​ពីការចោទ​ប្រកាន់​នេះ៖ «តុលាការ​ដាក់​មក​ហ្នឹង​ គឺ​ប៉ូលិស​អ្នក​ប្ដឹងថា ​​ខ្ញុំ​ប្រព្រឹត្ត​បទ​ល្មើស​ជា​អាទិ៍​ គេ​ដាក់​មក​អីចឹង​ តែ​ខ្ញុំ​អត់​ដែល​ដឹង​ថា ​រឿង​អ្វី​ខ្ញុំ​អត់​យល់។ ខ្ញុំ​សង្ស័យ​ថា​ ចោទ​ប្រកាន់​ពាក់ព័ន្ធ​រឿង​នយោបាយ​ទេ​ ព្រោះ​ខ្ញុំ​ចូល​រួម​ហូប​នំបញ្ចុកក្នុង​កម្មវិធី​ឡើង​ផ្ទះ​បង្កក់​កូន​​​កន្លង​មក»

លោក​បន្ត​ថា ការ​កោះ​ហៅ​នេះ​​ដោយសារ​លោក​ចូល​រួម​ហូប​នំបញ្ចុក​ជា​មួយ​សកម្មជន​គណបក្ស​សង្គ្រោះ​ជាតិ​ចំនួន​ ៤លើក​នៅ​តាម​បណ្ដា​ស្រុក​ក្នុង​ខេត្ត​បន្ទាយមាន​ជ័យ​ ដែល​បាន​គាំទ្រ​លោក​ សម រង្ស៊ី​ វិល​ចូល​ស្រុក​វិញ​ កាល​ពី​ថ្ងៃ​ទី​៨ និង​ទី៩ ខែ​មិថុនា កន្លង​ទៅ។

អាស៊ីសេរី​មិន​អាច​ទាក់​ទង​តំណាង​អយ្យកា​នៃ​សាលា​ដំបូងខេត្ត​បន្ទាយមានជ័យ លោក សុក កែវបណ្ឌិត ដើម្បី​សុំ​អត្ថាធិប្បាយ​ជុំ​វិញ​បញ្ហា​នេះ​បាន​ទេ​នៅ​ថ្ងៃ​ទី២២ មិថុនា ដោយ​ទូរស័ព្ទ​ពុំ​មាន​អ្នក​ទទួល។

តំណាង​អយ្យកា​នៃ​សាលា​ដំបូង​ខេត្ត​បន្ទាយមានជ័យ លោក សុក កែវបណ្ឌិត ​នៅ​ថ្ងៃ​ទី៦ មិថុនា បាន​កោះ​ហៅ លោក ខាន់ ឡៃ អាយុ​ ៤៥ឆ្នាំ រស់​នៅ​ភូមិ​ចាន់គិរី ចូល​បំភ្លឺ​តុលាការ​នៅ​ព្រឹក​ថ្ងៃទី៤ ខែ​កក្កដាខាង​មុខ ដើម្បី​សាកសួរ​អំពី​ដំណើររឿង ​ពី​បទ​ញុះញង់ឱ្យ​ប្រព្រឹត្ត​បទ​ឧក្រិដ្ឋជាអាទិ៍ និង​ធ្វើ​ឱ្យ​បាន​ជំនឿលើ​សេចក្ដី​សម្រេច​របស់​តុលាការ។

មន្ត្រី​សម្របសម្រួល​សមាគម​ការពារ​សិទ្ធិ អាដហុក (Adhoc) ខេត្ត​បន្ទាយមានជ័យ លោក ស៊ុំ ច័ន្ទគា លើក​ឡើង​ថា មន្ត្រី​តុលាការ​អនុវត្ត​ច្បាប់​ស្ដង់ដារ២ ទៅលើ​បញ្ហា​នេះ​ដោយ​បាន​កោះ​ហៅ​តែ​មន្ត្រី​គណបក្ស​ប្រឆាំង​ទៅ​សាកសួរ​ដោយ​គ្រាន់តែ​ពួកគាត់​បាន​ចូល​រួម​ហូប​នំបញ្ចុក​​ ចំណែក​មន្ត្រី​គណក្ស​កាន់​អំណាច​​មាន​ពិធី​ហូប​នំបញ្ចុក​ដូច​គ្នា​ តែ​តុលាការ​មិន​បាន​ការ​កោះ​ហៅ​ទៅ​សាកសួរ​នោះ​ទេ។លោក​បន្ត​ថា ការ​ធ្វើ​បែប​នេះ​ បាន​ប៉ះពាល់​យ៉ាងខ្លាំង​ដល់​សិទ្ធិ​សេរី​ភាព​ក្នុង​ការ​ជួបជុំ​របស់​ពលរដ្ឋ និង​ជា​ការ​គំរាមកំហែង​ដល់​សកម្មជន​គណបក្ស​ប្រឆាំង​ឱ្យ​មាន​ការ​ភ័យ​ខ្លាច៖ «ប៉ុន្តែ​ការ​គាំទ្រ​ការ​អី​ទាំង​អស់​នឹង បើ​ប្រទេស​គោរព​ច្បាប់​ត្រឹម​ត្រូវ​មាន​សេរី​ភាព​ទាំង​អស់​គ្នា គឺ​វា​ថា​អត់​ត្រូវ​មាន​ការ​ចោទ​ប្រកាន់​ទេ ព្រោះ​ថា​វា​អត់​មាន​ធ្មេញ​សម្រាប់​ខាំ​ធ្វើ​ឱ្យ​ស្រកៀ​ត្រចៀក​ទេ ហើយ​គ្រាន់​តែ​ជា​សេរីភាព​បញ្ចេញ​មតិ​ទេ​ ព្រោះ​ប្រទេស​ប្រជាធិបេត្យ​គេ​អនុញ្ញាតិ​ឱ្យ​មនុស្ស​ថា​​មនុស្ស​និយាយ​ឱ្យ​បាន​ច្រើន​ ដើម្បី​ឱ្យ​មាន​ការ​កែ​ការ​អី​ឱ្យ​បាន​ច្រើន​ មិន​មែន​ចេះ​តែ​ឱ្យ​មនុស្ស​ធ្វើ​​អ្វី​តាម​តែ​អំពើ​ចិត្ត​ទៅ​ ហើយ​យើង​ចេះ​តែ​នាំ​ហៃអើ​រហូត​ទេ យើង​ត្រូវ​និយាយ​ត្រូវ​ថា​ទៅ​ដើម្បី​ឱ្យ​មនុស្ស​នឹង​ចេះ​កែ​ខ្លួន​កុំ​ចេះ​តែ​ធ្វើ​អាក្រក់​ៗ​បន្ត​ទៀត»

គិត​ត្រឹម​ថ្ងៃ​ទី២២ មិថុនា​ នៅ​ខេត្ត​បន្ទាយមានជ័យ​ មាន​សកម្មជន​គណបក្ស​សង្គ្រោះ​ជាតិ​ចំនួន​ ២នាក់​ហើយ ដែល​តុលាការ​កោះ​ហៅ​ទៅ​សាកសួរ​ក្រោម​បទ​ចោទ​ប្រកាន់​​តែ​មួយ​ រួម​មាន​ប្រធាន​គណបក្ស​សង្គ្រោះ​ជាតិ​ស្រុក​មង្គលបូរី​លោក​ ទូត វាសនា​ ត្រូវ​បាន​កោះ​ហៅ​ចូល​បំភ្លឺ​នៅ​ព្រឹក​ថ្ងៃ​ទី១០ កក្កដា និង​លោក ខាន់ ឡៃ ចូល​បំភ្លឺ​នៅ​ព្រឹក​ថ្ងៃ​ទី៤ ខែ​កក្កដា៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល