កម្ពុជា និងម៉ាឡេស៊ី ចុះ​​កិច្ច​ព្រមព្រៀង​លើ​​វិស័យ​​ពាណិជ្ជកម្ម ទេសចរណ៍ និង​​​​ពន្ធ​ដារ

ដោយ មាន ឫទ្ធិ
2019-09-04
អ៊ីម៉ែល
មតិ
Share
បោះពុម្ព
លោក មហាធា មហាម៉ាត់ នាយក​រដ្ឋមន្ត្រី​ម៉ាឡេស៊ី ក្នុង​​ដំណើរ​ទស្សនកិច្ច​ផ្លូវ​ការ​រយៈ​ពេល ៣ថ្ងៃ​នៅ​កម្ពុជា ​ចាប់​ពី​ថ្ងៃ​ទី២ ដល់​ថ្ងៃ​ទី៤ កញ្ញា។
លោក មហាធា មហាម៉ាត់ នាយក​រដ្ឋមន្ត្រី​ម៉ាឡេស៊ី ក្នុង​​ដំណើរ​ទស្សនកិច្ច​ផ្លូវ​ការ​រយៈ​ពេល ៣ថ្ងៃ​នៅ​កម្ពុជា ​ចាប់​ពី​ថ្ងៃ​ទី២ ដល់​ថ្ងៃ​ទី៤ កញ្ញា។
រូប៖ ហ្វេសប៊ុកក្រសួងអប់រំ យុវជន និង​កីឡា

ប្រមុខដឹកនាំកម្ពុជា និងម៉ាឡេស៊ី ចុះ​ហត្ថលេខា​លើ​កិច្ច​ព្រមព្រៀង​សំខាន់ៗ ពីរ ក្នុង​នោះ​មាន​អនុស្សរណៈ​យោគយល់​គ្នា​ពី​កិច្ច​សហប្រតិបត្តិការ​វិស័យ​ទេសចរណ៍ និង​កិច្ច​ព្រមព្រៀង​ស្តីពី​ការ​ចៀសវាង​យក​ពន្ធ​ត្រួត​គ្នា និង​ការ​ទប់​ស្កាត់​ការ​គេចវេះ​ពន្ធ​លើ​ប្រាក់​ចំណូល។

ពិធី​ចុះ​ហត្ថលេខា​នេះ ធ្វើ​ឡើង​ក្នុង​អំឡុង​ពេល​លោក មហាធា មហាម៉ាត់ នាយក​រដ្ឋមន្ត្រី​ម៉ាឡេស៊ី បំពេញ​ដំណើរ​ទស្សនកិច្ច​ផ្លូវ​ការ​រយៈ​ពេល ៣ថ្ងៃ​នៅ​កម្ពុជា​ចាប់​ពី​ថ្ងៃ​ទី២ ដល់​ថ្ងៃ​ទី៤ កញ្ញា។

សេចក្តីថ្លែងការណ៍​រួម​អំពី​ដំណើរ​ទស្សកិច្ច​ផ្លូវ​ការ​នេះ មេ​ដឹក​នាំ​ប្រទេស​ទាំង​ពីរ​គឺ កម្ពុជា និង​ម៉ាឡេស៊ី បាន​​ពិភាក្សា​​គ្នា​អំពី​ទំនាក់ទំនង​ទ្វេ​ភាគី រវាង​ប្រទេស​ទាំង​ពីរ​លើគ្រប់វិស័យ រួមមានពាណិជ្ជកម្ម និង​ការ​វិនិយោគ ការអភិវឌ្ឍ ឧស្សាហកម្ម​ហាឡាល (Halal) ការពារជាតិ និងសន្តិសុខ ទេសចរណ៍ កសិកម្ម និង​ការ​អប់រំ។ មេ​ដឹក​នាំ​ទាំង​ពីរ​ក៏​បាន​គូស​បញ្ជាក់​អំពី​សារៈ​​សំខាន់​​នៃ​​កិច្ច​​សហប្រតិបត្តិការ​សន្តិសុខ​រវាង​ប្រទេស​ទាំង​ពីរ ពិសេស ដើម្បី​រក្សា​សន្តិភាព និង​ស្ថិរភាព ដើម្បី​ទប់​ស្កាត់​​​បញ្ហា​​ប្រឈម​សន្តិសុខ និង​ការ​គំរាម​កំហែង​ក្នុង​តំបន់។ យ៉ាង​ណា​ក៏​ដោយ នៅមិនទាន់មានសេចក្តីរាយការណ៍ណាមួយ​ថា តើ​​នាយក​​រដ្ឋមន្ត្រី​​ម៉ាឡេស៊ី លោក មហាធា មហាម៉ាត់ បាន​លើក​ឡើង​ជាមួយ​លោក ហ៊ុន សែន អំពី​បញ្ហា​មន្ទិល​សង្ស័យ​កាន់​តែ​ខ្លាំង​ឡើង​ជុំវិញ​​រឿង​​លទ្ធភាព​​ដែល​​កម្ពុជា​អាច​​អនុញ្ញាត​ឲ្យ​មហាយក្ស​ចិន ដាក់​វត្តមាន​យោធា​របស់​ខ្លួន​នៅ​​លើ​​ទឹក​​ដី​​កម្ពុជា យ៉ាង​​ណា​​នោះ​​ទេ។ អាស៊ី​សេរី កំពុង​ទាក់ទង​ទៅ​ស្ថានទូត​ម៉ាឡេស៊ី​ប្រចាំ​ក្រុង​ភ្នំពេញ ដើម្បី​បញ្ជាក់​ពី​បញ្ហា​នេះ។

ថ្នាក់​ដឹក​នាំ​ទាំង​ពីរ​គ្រាន់​តែ​គូស​បញ្ជាក់​ថា បញ្ហា​សំខាន់ៗ មួយ​ចំនួន​ក្នុង​តំបន់ ដែល​ពួក​គេ​បាន​លើក​យក​មក​ជជែក​គ្នា រួម​មាន​បញ្ហា​នៅ​សមុទ្រ​ចិន​ខាង​ត្បូង បញ្ហា​​សន្តិសុខ​នាវាចរណ៍​នៅ​តំបន់​ច្រក​ម៉ាឡាកា បញ្ហា​នៅ​វិបត្តិ​ជន​ភៀស​ខ្លួន​រ៉ូហ៊ីងយ៉ា​នៅ​រដ្ឋ​រ៉ាក់ឃីន របស់​ប្រទេស​មីយ៉ាន់ម៉ា និង​បញ្ហា​ប្រទេស​ទីម័រ​ខាង​កើត សុំ​ចូល​ជា​សមាជិកភាព​នៃ​​សមាគម​​អាស៊ាន​​ជា​ដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល