ពលរដ្ឋ​ខ្មែរ​នៅ​ក្រៅ​ប្រទេស​សង្ឃឹម​លើ​សម្ពាធ​អន្តរជាតិ​ជុំវិញ​​ដំណោះស្រាយ​នយោបាយ

ដោយ មួង ណារ៉េត
2019-07-19
អ៊ីម៉ែល
មតិ
Share
បោះពុម្ព
ថ្នាក់ដឹកនាំ​គណបក្ស​សង្គ្រោះជាតិ ចូលរួម​ជាមួយ​ពលរដ្ឋ​ខ្មែរអាមេរិកាំង​ចូលរួម​បាតុកម្ម​ទាមទារ​លទ្ធិប្រជាធិបតេយ្យ​ពិត​ប្រាកដ ក្រោយពី​រដ្ឋសភា​សហរដ្ឋអាមេរិក​អនុម័ត​ច្បាប់​ស្ដីពី​លទ្ធិ​ប្រជាធិបតេយ្យ​នៅ​កម្ពុជា ​ឆ្នាំ​២០១៩ នៅ​ថ្ងៃ​ទី១៧ កក្កដា។
ថ្នាក់ដឹកនាំ​គណបក្ស​សង្គ្រោះជាតិ ចូលរួម​ជាមួយ​ពលរដ្ឋ​ខ្មែរអាមេរិកាំង​ចូលរួម​បាតុកម្ម​ទាមទារ​លទ្ធិប្រជាធិបតេយ្យ​ពិត​ប្រាកដ ក្រោយពី​រដ្ឋសភា​សហរដ្ឋអាមេរិក​អនុម័ត​ច្បាប់​ស្ដីពី​លទ្ធិ​ប្រជាធិបតេយ្យ​នៅ​កម្ពុជា ​ឆ្នាំ​២០១៩ នៅ​ថ្ងៃ​ទី១៧ កក្កដា។
RFA/Sorn, Chanratha

បាតុករ​ខ្មែរ​នៅ​អាមេរិក និង​កាណាដា​អះអាង​ថា បាតុកម្ម​នៅ​វិមាន​ព្រឹទ្ធសភា​អាមេរិក កាលពី​ថ្ងៃ​ទី​១៧​កក្កដា ទទួល​បាន​ជោគជ័យ​ខ្លាំង ដោយមាន​ការ​គាំទ្រ ពី​មន្ត្រី​រដ្ឋសភា​អាមេរិក​ជា​ច្រើន​រូប។ តំណាងរាស្ត្រ អាមេរិក​ដែល បង្កើត​ច្បាប់​ដាក់ទណ្ឌកម្ម​លើ​របប​លោក ហ៊ុន សែន បាន​សំដែង​ការ​គាំទ្រ​ចំពោះ​បុព្វហេតុ​ទាមទារ លទ្ធិប្រជាធិបតេយ្យ​របស់​គណបក្សប្រឆាំង និង​ការ​វិល​ត្រឡប់​របស់​លោក សម រង្ស៊ី ដោយ​សុវត្ថិភាព​ទៅ​កម្ពុជា។

ប្រជាពលរដ្ឋ​ប្រមាណ​៥​រយ​នាក់ មកពី​ប្រទេស​កាណាដា និង​រដ្ឋ​មួយ​ចំនួន នៅ​សហរដ្ឋអាមេរិក បាន​មក​ចូលរួម​បាតុកម្ម កាលពី​ថ្ងៃ​ទី១៧ ខែ​កក្កដា នៅ​វិមាន​រដ្ឋសភា (Capitol Hill) ក្នុង​រដ្ឋធានី​វ៉ាស៊ីនតោន ដើម្បី​ទាមទារ​ឱ្យ​របប​ក្រុងភ្នំពេញ ស្ដារ​ប្រជាធិបតេយ្យ និង​ការ​គោរព​សិទ្ធិមនុស្ស​ឡើងវិញ​។ ពួកគេ ក៏បាន​ទាមទារ​ឱ្យ​ដោះលែង​លោក កឹម សុខា ប្រធាន​គណបក្ស​សង្គ្រោះ​ជាតិ និង​រៀបចំ​ការបោះឆ្នោត​មួយ​ដោយ​សេរី ត្រឹមត្រូវ និង​យុត្តិធម៌​ឡើងវិញ។

បន្ថែម​ពី​នេះ ក្រុម​អ្នកតវ៉ា ក៏បាន​ទទូច​ដល់​ព្រឹទ្ធសភា​អាមេរិក ពន្លឿន​ការ​អនុម័ត​សេចក្ដីព្រាងច្បាប់ ស្ដីពី​ប្រជាធិបតេយ្យ​កម្ពុជា ឆ្នាំ​២០១៩ (H.R 526) ដើម្បី​ដាក់ទណ្ឌកម្ម​មន្ត្រី​របប​លោក ហ៊ុន សែន​។ តំណាងរាស្ត្រ​អាមេរិក លោក ស្ទីវ ឆាបុត (Steve Chabot) ដែល​មាន​វត្តមាន នៅ​ទី​បាតុកម្ម​នោះ ក៏បាន​សំដែង​ការ​គាំទ្រ ចំពោះ​ដំណើរ​វិលត្រឡប់​ទៅ​កម្ពុជា​របស់​លោក សម រង្ស៊ី ដោយ​សុវត្ថិភាព និង​មានការ​បោះឆ្នោត​ដោយ​សេរី និង​យុត្តិធម៌​ដែរ៖ «ខ្ញុំ​មាន​កិត្តិយស​យ៉ាង​ក្រៃលែង ដែល​បាន​មក​ទីនេះ​ជាមួយ​លោក សម រង្ស៊ី ដែល​ជា​មិត្តភ័ក្ដិ​របស់ខ្ញុំ​។ យើង​គាំទ្រ​ដំណើរ​វិលត្រឡប់​ទៅ​កម្ពុជា​វិញ របស់​លោក សម រង្ស៊ី​។ យើង​ជួយ​ធ្វើ​យ៉ាងណា ឱ្យ​ដំណើរ​មាតុភូមិនិវត្តន៍​នោះ ប្រព្រឹត្ត​ទៅ​ដោយ​សុវត្ថិភាព​។ ប្រជាពលរដ្ឋ​ខ្មែរ ត្រូវ​មាន​សិទ្ធិ​សេរីភាព​ពេញលេញ​។ លោក ហ៊ុន សែន និង ក្រុម​អ្នកដឹកនាំ​ផ្ដាច់ការ​នៅ​កម្ពុជា បាន​លួច​ប្លន់​សេរីភាព​ជាច្រើន ពី​ប្រជាពលរដ្ឋ​ខ្មែរ ដែល​ទង្វើ​បែបនេះ ជា​អំពើ​ខុសច្បាប់ មិន​គួរ​ឱ្យ​កើតមាន​ទាល់តែសោះ និង គួរ​ឱ្យ​ខ្មាសអៀន​ណាស់​។ ខ្ញុំ​គាំទ្រ​អស់​ពី​ដួងចិត្ត ឱ្យ​កម្ពុជា​រៀបចំ​ការបោះឆ្នោត​មួយ ដោយ​សេរី ត្រឹមត្រូវ និង​យុត្តិធម៌។

អ្នកចូលរួម​តវ៉ា អះអាង​ថា ការ​តវ៉ា​នេះ គឺ​ចារ​ជា​ប្រវត្តិសាស្ត្រ ដោយមាន​មន្ត្រី​តំណាងរាស្ត្រ​អាមេរិក​ជាច្រើន​រូប ចុះ​ពី​រដ្ឋសភា​មក​ចាប់ដៃ និង​គាំទ្រ​ការ​តវ៉ា ដែល​នេះ​ជា​សារ​បញ្ជាក់​ថា ថ្ងៃ​បញ្ចប់​នៃ​របៀប​ដឹកនាំ​បែប​ផ្ដាច់ការ ដូច​សព្វថ្ងៃ​ក្រោម​ការដឹកនាំ​របស់​លោក ហ៊ុន សែន នឹង​ចូល​មកដល់​ក្នុង​ពេល​ឆាប់ៗ​ខាងមុខ​នេះ​ហើយ។

អ្នក​តវ៉ា​មកពី​រដ្ឋ​កាលីហ្វ័រញ៉ា ភាគ​ខាងជើង លោក សម វឌ្ឍនា ជឿជាក់​ថា សន្ទុះ​នៃ​ការ​គាំទ្រ​របស់​សហគមន៍​អន្តរជាតិ ចំពោះ​ការ​ក្រោកឈរ​ដើម្បី​ទាមទារ​ប្រជាធិបតេយ្យ​មកវិញ​នេះ ធ្វើ​ឱ្យ​អ្នក​និយម​ប្រជាធិបតេយ្យ កាន់​តែ​មាន​កម្លាំងចិត្ត និង របប​លោក ហ៊ុន សែន កាន់តែ​រង​សម្ពាធ​ធ្ងន់​បន្ថែម៖ «កម្លាំង​ប្រជារាស្ត្រ គឺជា​កម្លាំង​អាវុធ​ដ៏​ធំ​ជាង​គេ​បង្អស់​។ ជន​ផ្ដាច់ការ​ដូច​លោក ហ៊ុន សែន នឹង​ដួល​រលំ»

អ្នក​តវ៉ា​ម្នាក់ទៀត មកពី​ក្រុង​សាន់ហូស្ស៊េ រដ្ឋ​កាលីហ្វ័រញ៉ា​ខាងជើង​ដែរ គឺ​លោក ឡោ ឡៃសូ ឆ្លៀត​ឱកាស អំពាវនាវ​ដល់​ប្រជាពលរដ្ឋ​ខ្មែរ ដែល​និយម​ប្រជាធិបតេយ្យ​នៅ​គ្រប់ទិសទី ជាពិសេស​នៅ​ប្រទេស​កម្ពុជា ឱ្យ​ជឿជាក់​លើ​ការ​ប្តេជ្ញា​បន្ត​តស៊ូ​មតិ លើ​ឆាក​អន្តរជាតិ ដើម្បី​ធ្វើ​យ៉ាងណា​ទាមទារ​យក​សិទ្ធិមនុស្ស និង​ប្រជាធិបតេយ្យ ជូន​ប្រជាពលរដ្ឋ​ខ្មែរ​ទាំងអស់ មក​វិញ​ឱ្យ​បាន​។ លោក​ក៏​ឆ្លៀត​ផ្ញើ​សារ​ទៅ​លោក ហ៊ុន សែន ឱ្យ​ប្រញាប់​កែខ្លួន កុំ​ឱ្យ​យឺត​ពេល​ទាន់៖ «របប​ខ្មែរក្រហម​រលាយ​ហើយ​។ របប​លោក ហ៊ុន សែន ក៏​នឹង​រលាយ​ដែរ បើ​ដឹកនាំ​របៀប​នេះ​។ ខ្ញុំ​សុំ​ឱ្យ​លោក​កែ​មក​ផ្លូវ​ត្រូវ​វិញ បើ​ស្លាប់​ទៅ សុំ​ឱ្យ​គេ​ឱ្យ​តម្លៃ​ផង»

ចំណែក​លោក ស៊ុម ទិត្យា ដែល​ធ្វើដំណើរ​តាំងពី​រដ្ឋ​វ៉ាស៊ីនតោនស្តេត ដែល​មាន​ចម្ងាយ​ផ្លូវ​ជាង ៤​ពាន់​គីឡូម៉ែត្រ ថា ការ​តវ៉ា​នេះ ជោគជ័យ​ខ្លាំង ដោយ​អាច​ផ្ញើ​សារ​ដល់​មន្ត្រី​រដ្ឋសភា​អាមេរិក អំពី​ការ​ប្ដូរផ្ដាច់​របស់​ពល​រដ្ឋ​ខ្មែរ ដែល​និយម​ប្រជាធិបតេយ្យ ក្នុង​ការ​ចង់បាន​សេរីភាព និង​ប្រជាធិបតេយ្យ រួច​ផុត​ពី​ការដឹកនាំ​បែប​ផ្ដាច់ការ​របស់​លោក ហ៊ុន សែន។ លោក​ថា​ការ​តវ៉ា​នេះ ធ្វើឡើង​ដើម្បី​ជំរុញ​ឱ្យ​សមាជិកសភា​អាមេរិក បន្ត​ពន្លឿន​ការ​ធ្វើ​សេចក្ដី​ព្រៀង​ច្បាប់​បី​ទៀត និង​បញ្ជូន​ច្បាប់​ដែល​ទើប​អនុម័ត​រួច​នេះ ទៅ​ព្រឹទ្ធសភា និង​ប្រធានាធិបតី ដើម្បី​អនុវត្ត​ទណ្ឌកម្ម​លើ​លោក ហ៊ុន សែន និង​មន្ត្រី​របប​នេះ ឱ្យ​ឆាប់​តាម​ដែល​អាច​ធ្វើ​ទៅ​បាន៖ «ចុងក្រោយ​លោក ហ៊ុន សែន នឹង​បន្ទាន់​ឥរិយាបថ ដើម្បី​ផលប្រយោជន៍​ខ្មែរ​ទាំងមូល​។ សង្ឃឹមថា គាត់​នឹង​និយាយ​ជាមួយ​ខ្មែរ ដើម្បី​ផលប្រយោជន៍​របស់​កូនចៅ​យើង​ទៅ​អនាគត»

ការ​តវ៉ា​លើក​នេះ មាន​ភាព​ប្លែក​ជា​រាល់ដង ព្រោះ​ធ្វើ​ចំ​ថ្ងៃ​ធ្វើការ ដែល​ខុស​ពី​លើក​មុនៗ ដែល​ធ្វើ​ចំ​តែ​ថ្ងៃ​គេ​អត់​ធ្វើការ។ ម្យ៉ាងទៀត លើក​នេះ មាន​វត្តមាន​ដ៏​កម្រ​របស់​ប្រធាន​ស្តីទី​គណបក្ស​សង្គ្រោះ​ជាតិ​លោក សម រង្ស៊ី ចូលរួម​បាតុកម្ម​នៅ​អាមេរិក៖ «ឃើញ​ថា​បងប្អូន​យើង​តស៊ូ និង​ស្រលាញ់​ជាតិ​ណាស់​។ នេះ​ជាម​ហា​គ្រួសារ​ខ្មែរ​តែមួយ​។ យើង​មក​ធ្វើបាតុកម្ម​នៅមុខ​វិមាន​រដ្ឋសភា​អាមេរិក​នេះ តំណាងរាស្ត្រ​សហរដ្ឋអាមេរិក​ចុះ​មក​ផ្ទាល់ មក​ជួប​ពលរដ្ឋ​ខ្មែរ​យើង​។ គេ​យកចិត្តទុកដាក់ គេ​ស្រលាញ់ និង​អាណិត​ខ្មែរ​។ គេ​ជួយ​ស្ដារ​ប្រជាធិបតេយ្យ​នៅ​កម្ពុជា​។ យើង​ដឹងគុណ​គេ»

ការ​តវ៉ា​របស់​ពលរដ្ឋ​ខ្មែរ នៅ​ក្រៅ​ប្រទេស​លើក​នេះ ធ្វើឡើង​ភ្លាមៗ ក្រោយ​រដ្ឋសភា​អាមេរិក អនុម័ត ដោយ​គ្មាន​ការជំទាស់​ពី​គណបក្ស​ទាំងពីរ​ក្នុង​រដ្ឋសភា ទៅ​លើ​ច្បាប់​ដើម្បី​ដាក់ទណ្ឌកម្ម​លោក ហ៊ុន សែន និង មន្ត្រី​របប​នេះ​។

តំណាងរាស្ត្រ​អាមេរិក​មួយ​រូប​ទៀត លោក អាឡាន់ ឡូវេនថល (Alan Lowenthal) ដែល​ចុះទៅ​ចាប់ដៃ​អ្នក​តវ៉ា និង​ថ្លែង​សារ​គាំទ្រ​ការ​តស៊ូ​មតិ​នេះ​ថា លោក​មាន​សេចក្តី​សោមនស្ស ក្នុង​ការ​ជួយ​គាំទ្រ​អ្នក​និយម​ប្រជាធិបតេយ្យ​ទាំងអស់ ដើម្បី​តស៊ូ​ប្រឆាំង​របប​ផ្ដាច់ការ និង​ស្តារ​ប្រជាធិបតេយ្យ​នៅ​កម្ពុជា​ឡើងវិញ។ លោក​បន្ត​ថា នៅ​កម្ពុជា​មិន​ទាន់​មាន​ការបោះឆ្នោត​ដោយ​សេរី ត្រឹមត្រូវ និង យុត្តិធម៌​នោះ​ទេ​។ ដូច្នេះ យើង​ទាមទារ​ដាច់ខាត ឱ្យ​មានការ​រៀបចំ​ការបោះឆ្នោត​មួយ ដែល​សេរី ត្រឹមត្រូវ និង​យុត្តិធម៌៖ «ច្បាប់​ដែល​ទើប​អនុម័ត​នេះ នឹង​មាន​អនុភាព​បង្កក​ទ្រព្យសម្បត្តិ​មន្ត្រី​របប​លោក ហ៊ុន សែន ដែល​មាននៅ​អាមេរិក​។ ជាង​នេះ​ទៅ​ទៀត យើង​កំពុង​សហការ​ជាមួយ​សហភាព​អឺរ៉ុប ដើម្បី​សើរើ​ឡើងវិញ​ប្រពន្ធ​ការ​អនុគ្រោះ​ពន្ធ ព្រោះ​របប​លោក ហ៊ុន សែន បរាជ័យ​ក្នុង​ការ​គោរព​សិទ្ធិមនុស្ស និង​ប្រជាធិបតេយ្យ។ យើងខ្ញុំ​សូម​គោរព​ពលរដ្ឋ​ខ្មែរ​ទាំងអស់ ដែល​ក្រោក​ឡើង តតាំង​នឹង​របប​ផ្ដាច់ការ​។ គោល​នយោបាយ​ការបរទេស​អាមេរិក ពិតជា​ជួយ​ជ្រោមជ្រែង​អ្នក​ស្រលាញ់​ប្រជាធិបតេយ្យ​។ យើង​នឹង​មិន​នៅ​ស្ងៀម​ជាដាច់ខាត ដរាបណា​លោក ហ៊ុន សែន នៅតែ​រំលោភ​សិទ្ធិមនុស្ស និង​បំផ្លាញ​ប្រជាធិបតេយ្យ​បែបនេះ​។ ខ្ញុំ​សង្ឃឹមថា កម្ពុជា​នឹង​មាន​ប្រជាធិបតេយ្យ​ឡើងវិញ​ឆាប់ៗ ហើយ​ខ្ញុំ​គាំទ្រ​មិត្ត​ខ្ញុំ​គឺ​លោក សម រង្ស៊ី ក្នុង​ការ​វិលត្រឡប់​ទៅ​កម្ពុជា​វិញ»

ការ​តវ៉ា​បាន​បញ្ចប់​ទៅ​ហើយ នៅ​ឡើយ​តែ​ដំណោះស្រាយ​នយោបាយ ដែល​កំពុង​ធ្វើ​ឱ្យ​របប​លោក ហ៊ុន សែន កំពុង​រង​សម្ពាធ​ជុំ​ទិស​ពី​សហគមន៍​អន្តរជាតិ ជាពិសេស​ពី​សហភាព​អឺរ៉ុប ដែល​នឹង​បិទ​បញ្ចប់​នីតិវិធី ៦ ខែ​ដំបូង ក្នុង​ការ​ត្រួតពិនិត្យ និង​វាយតម្លៃ​ស្ថានភាព​សិទ្ធិមនុស្ស​នៅ​កម្ពុជា នៅ​ថ្ងៃ​ទី ១២ ខែ​សីហា​ខាងមុខ។

មជ្ឈដ្ឋាន​ទូទៅ យល់ឃើញ​ថា ច្រកចេញ​ដែល​សមស្រប​បំផុត តែមួយគត់ ដើម្បី​អាច​បញ្ចៀស​ទណ្ឌកម្ម​ទាំងនេះ​បាន គឺ​របប​លោក ហ៊ុន សែន ត្រូវ​ស្ដារ​សិទ្ធិមនុស្ស និង​ប្រជាធិបតេយ្យ​ឡើងវិញ​ឱ្យ​ឆាប់​តាម​ដែល​អាច​ធ្វើ​ទៅ​បាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល