ពលរដ្ឋខ្មែរនៅកូរ៉េខាងត្បូងប្រមាណ៣ពាន់ ធ្វើមហាបាតុកម្មប្រឆាំង CLV ម្តងទៀត

ប្រជាពលរដ្ឋខ្មែរ​នៅ​ប្រទេស​កូរ៉េខាងត្បូង​ប្រមាណ​៣ពាន់នាក់ បាន​បន្ត​ប្រមូលផ្តុំ​គ្នា​ធ្វើ​មហាបាតុកម្ម​សាជាថ្មី​ទាមទារ​ឱ្យ​រដ្ឋាភិបាល​ក្រុងភ្នំពេញ​ដក​ខ្លួន​ចេញ​ពី​កិច្ចសហប្រតិបត្តិការ​តំបន់​​ត្រីកោណ​​អភិវឌ្ឍន៍​ជាមួយ​ឡាវ និង​វៀតណាម​ (CLV-DTA) ដើម្បី​ការពារ​ទឹកដី​ទុក​សម្រាប់​កូន​ខ្មែរ។ បាតុកម្មលើក​ទីពីរ​នេះ កើត​មាន​ឡើង​បន្ទាប់ពី​លោក ហ៊ុន សែន និង​លោក ហ៊ុន ម៉ាណែត មិន​ព្រម​ដក​ខ្លួន​ចេញ​ពីកិច្ចសហប្រតិបត្តិការ CVL តាម​សំណើ​​របស់​ពលរដ្ឋទូទៅ ប៉ុន្តែ​ដ្ឋាភិបាល​ត្រកូលហ៊ុន​បាន​បន្ត​បង្ក្រាប​លើ​អ្នក​រិះគន់​ទៅវិញ។

ក្រុមបាតុករខ្មែរ​នៅ​ប្រទេសកូរ៉េខាងត្បូង​ប្រមាណ​៣ពាន់​នាក់​បាន​នាំគ្នា​ស្រែក​ទាមទារ និង​លើក​បដា​អមដោយ​សំឡេង​សស្រែក​កង​រំពង​ពេញ​ទីលាន​ប្រជាធិបតេយ្យ​ជុងកាក់ នៅ​ក្នុង​ទីក្រុងសេអ៊ូល (Seoul) សាជា​ថ្មី នៅ​ថ្ងៃ​ទី០១ ខែកញ្ញា។

មិន​ខុស​ពី​បាតុកម្ម​លើក​មុន អ្នក​តវ៉ា​ឈរ​ក្រោម​កំដៅ​ថ្ងៃ ពួកគាត់​បង្ហាញ​ក្តី​បារម្ភ​ថា​កិច្ចសហប្រតិបត្តិការ​តំបន់​កោណ​អភិវឌ្ឍន៍ (CLV-DTA) នឹង​អាច​ធ្វើឱ្យ​កម្ពុជា​បាត់បង់​ទឹកដី​ទៅ​ប្រទេស​វៀតណាម ហើយ​អ្នក​ខ្លះ​ឡើង​សម្តែង​មតិ​ខឹង​សម្បារ លោក ហ៊ុន សែន និង​លោក ហ៊ុន ម៉ាណែត ដែល​ពួកគាត់​ថា​ដឹកនាំ​ប្រទេស​កាន់តែ​អន់ថយ បំបិទ​សិទ្ធិ​សេរីភាព​ពលរដ្ឋ ដើរ​ចាក​ឆ្ងាយ​ពី​គន្លង​ប្រជាធិបតេយ្យ​នាំឱ្យ​គ្រោះថ្នាក់​ដល់​ជាតិ និង​ផ្តល់​គំរូ​អាក្រក់​ដល់​ក្មេង​ជំនាន់​ក្រោយ។

ទន្ទឹមនឹងនេះ ក្រុម​បាតុករ​បាន​ស្រែក​ព្រមៗ​គ្នា​ថា​ពួកគាត់​មិន​ត្រូវការ​កិច្ចសហប្រតិបត្តិការ CLV នេះ​ទេ ហើយ​ទាមទារ​ឱ្យ​រដ្ឋាភិបាល​ឪពុក​និង​កូន​ដក​កម្ពុជា​ចេញ​ជាបន្ទាន់​ដើម្បី​ការពារ​បូរណភាព​ទឹកដី​ខ្មែរ​ឱ្យ​​នៅ​គង់វង្ស។

ពលករ​ខ្មែរ​ធ្វើការ​តំបន់​ក្វាងជូធំ នៅ​ប្រទេស​កូរ៉េខាងត្បូង លោកស្រី ស៊ុំ ណារ៉ាក់ ស្ថិត​ក្នុង​ចំណោម​បាតុករ​រាប់ពាន់​នាក់​ដែល​ចូលរួម​មហាបាតុកម្ម​បាន​ឡើង​សម្តែង​មតិ​ដោយ​រៀបរាប់​ថា លោកស្រី​មិន​ដែល​ធ្លាប់​ចូល​ការងារ​សង្គម​ពី​មុន​ទេ ប៉ុន្តែការឈឺចាប់​ដោយសារ​បញ្ហា​បាត់បង់​ទឹកដី និង​រឿង​អយុត្តិធម​ក្នុង​សង្គម​ទៀតនោះ បាន​ជំរុញ​ទឹកចិត្ត​លោកស្រី​ឱ្យ​ហ៊ាន​ចេញ​មុខ​តស៊ូមតិ​ជាមួយ​ពលរដ្ឋខ្មែរ​ផ្សេងទៀត​ ដោយ​មិន​ខ្លាច​ការគាប​សង្កត់​ពី​រដ្ឋាភិបាល​កម្ពុជា​ឡើយ។ លោកស្រី​បញ្ជាក់​ថា ការចេញ​ទាមទារ​ឲ្យ​រដ្ឋាភិបាល​ដក​ខេត្ត​ខ្មែរ​ទាំង​៤ចេញ​ពី​កិច្ចសហប្រតិបត្តិការ CLV នៅពេល​នេះ​ គឺ​ដើម្បី​កុំ​ឲ្យ​បាត់បង់​ទឹកដី​ទៅ​ប្រទេស​វៀតណាម​ហើយ​ពិបាក​ទាមទារ​នៅ​ថ្ងៃ​ក្រោយ​ទៀត។

លោកស្រី ស៊ុំ ណារ៉ាក់៖ «ខ្ញុំ​មាន​ការឈឺចាប់ ពីព្រោះ​ខ្ញុំ​ជា​ម្ចាស់​ប្រទេស ហេតុ​អ្វី​យើងចេញ​មុខ​ការពារ​ប្រទេស និយាយ​ពី​សង្គម​នៅ​ស្រុកខ្មែរ​មិន​បាន ប្រទេស​យើង​មាន​បញ្ហា ខ្ញុំ​នៅ​មាន​ដង្ហើម មាន​ជីវិត អ៊ីចឹង​ខ្ញុំ​ត្រូវតែ​ក្លាហាន​»។

ស្រដៀងគ្នានេះ​ពលករខ្មែរ​ម្នាក់​ទៀត លោក នាង លីសារ  ថ្លែងថា​បច្ចុប្បន្ន​កម្ពុជា​គ្មាន​ប្រជាធិបតេយ្យ​ទេ ក្រោម​អំណាច​គាប​សង្កត់​បិទសិទ្ធិ​សេរីភាព​ពលរដ្ឋខ្មែរ​ឥតស្រាកស្រាន្ត​ពី​សំណាក់​គ្រួសារ​ត្រកូលហ៊ុន។ ពលករ​រូបនេះ​ឱ្យដឹង​ថា​គោលបំណង​ដែល​ពួកលោក​បន្ត​ចូលរួម​បាតុកម្ម​នេះ ចង់​ផ្ញើសារ​ឱ្យ​រដ្ឋាភិបាល​ដក​ខ្លួនចេញ​ពី​​កិច្ចសហប្រតិបត្តិការ CLV តាម​សំណើ និង​ក្តី​កង្វល់​របស់​ពលរដ្ឋខ្មែរ។

លោក នាង លីសារ៖ «ប្រទេស​យើង​ប្រកាន់​លទ្ធិប្រជាធិបតេយ្យ​មែន​អត់ អ៊ីចឹង​ហេតុ​អ្វី​បាន​ជា​យើង​មិន​ហ៊ាន​សម្តែងមតិ ប៉ុន្តែ​ដោយសារ​រដ្ឋាភិបាល​យើង​កាន់​របប​អ្វីដឹង​អត់? គឺ​ផ្តាច់ការ​តែម្តង ខ្ញុំ​ហ៊ាន​និយាយ​អ៊ីចឹង ខ្ញុំ​ត្រូវតែ​ប្រឆាំង​ដើម្បី​ជាតិ​យើង​មែន​ទេ? ក្នុង​នាម​ជា​ខ្មែរ យើង​ឈឺ​ចាប់​ទេ មាន​មេដឹកនាំ​អ៊ីចឹងៗ យើង​ត្រូវតែ​ប្រឆាំង​ដាច់ខាត »។

ចំណែក​ពលរដ្ឋខ្មែរ​រស់​នៅ​ប្រទេសកូរ៉េ លោកស្រី ស យូណា រៀបរាប់​ថា​លោកស្រី​និង​ពលករខ្មែរ​ដទៃទៀត​ចូលរួម​បាតុកម្ម​នេះ​ចំណាយ​ថវិកា​ផ្ទាល់ខ្លួន ដោយសារ​ការឈឺចាប់​នឹង​រដ្ឋាភិបាល​ក្រុងភ្នំពេញ ជាពិសេស​ខ្លាច​កម្ពុជា​បាត់បង់​ដី​ ដើរ​ជាន់​ដាន​ប្រវត្តិសាស្ត្រ​ដូច​ទឹកដី​​កម្ពុជាក្រោម​​បាត់បង់​ទៅ​ប្រទេសវៀតណាម ​ធ្វើឱ្យ​ពលរដ្ឋខ្មែរ​នៅ​ទីនោះ​រស់​នៅ​រង​ទុក្ខវេទនា គ្មាន​សិទ្ធិ​ជា​ម្ចាស់ស្រុក​មកទល់​សព្វថ្ងៃ។ លោកស្រី​បញ្ជាក់​ជំហរ​ថា បើសិន​រដ្ឋាភិបាល​មិនព្រម​ដក​កម្ពុជាចេញ​ពី​កិច្ចសហប្រតិបត្តិការCLVនេះ​ទេ ពលរដ្ឋខ្មែរ​ជាពិសេស​យុវជន​នៅ​ប្រទេស​កូរ៉េ​នៅតែ​ប្តេជ្ញាចិត្ត​នាំគ្នា​ចេញ​ធ្វើ​បាតុកម្ម​ឱ្យ​បាន​ផុលផុស​បន្តទៀត​ដើម្បីដាក់​សម្ពាធ​ឱ្យ​រដ្ឋាភិបាល​ដក​ខ្លួន​ចេញ​ពីគម្រោង​មួយ​នេះ។

លោកស្រី ស យូណា៖ «បើសិន​ជា​យើង​ខ្មែរ​កណ្តាល​អត់​ប្រឹង​ពុះពារ យើង​នៅតែ​បណ្តោយ យើង​នៅតែ​សម្ងំ​យក​សុខ​រៀងៗ​ខ្លួន តើ​ប្រទេស​ជាតិ​យើង​រួច​ផុត​ពី​របប​នេះ​ទេ គឺ​អត់​ទេ ខ្ញុំ​ឃើញ​អ៊ីចឹង​វា​ឈឺចាប់​ពេក ពីព្រោះ​យើង​ត្រូវតែ​ក្រោក​ឈរ​ទាំងអស់​គ្នា​ណា​បងប្អូន សម្រាប់​នាង​ខ្ញុំ​អត់​ទៅ​ចោល​បងប្អូន​ទេ នាង​ខ្ញុំ​សន្យា​នៅ​តែ​ធ្វើ​ដើម្បី​ប្រទេស​ជាតិ បងប្អូន​ចូល​ទាំងអស់​គ្នា​ចំណាយ​ប្រាក់​ខ្លួនឯង​មែន​ទេ? មែន! អត់​មាន​អ្នក​ឧបត្ថម្ភ អត់​មាន​អ្នកណា​សូកប៉ាន់​ទេ​មែន​អត់? មែន! »។

មហាបាតុកម្ម​របស់​ពលរដ្ឋខ្មែរ​រស់​នៅ​និង​ធ្វើការ​នៅ​ប្រទេសកូរ៉េ​ខាងត្បូង​ជា​លើក​ទី២​នេះ កើត​មាន​ឡើង​បន្ទាប់ពី​រដ្ឋាភិបាល​លោក ហ៊ុន សែន និង​លោក ហ៊ុន ម៉ាណែត មិន​ព្រម​ដក​ខេត្ត​ខ្មែរ​ចំនួន​៤ចេញ​កិច្ចសហប្រតិបត្តិការ​តំបន់​ត្រីកោណ​អភិវឌ្ឍន៍(CLV-DTA) តាម​សំណើ​​ប្រជាពលរដ្ឋខ្មែរ​​ទាំង​​ក្នុង​​ប្រទេស និង​ក្រៅប្រទេស​នោះទេ។

ផ្ទុយទៅវិញ រដ្ឋាភិបាល​របស់​ត្រកូលហ៊ុន​បែរជា​បញ្ជា​ឲ្យ​សមត្ថកិច្ច​ចាប់​ខ្លួន ព្រមាន​បង្ក្រាប​បង្ហូរ​ឈាម និង​​ប្រើប្រាស់​​គុក​ច្រវ៉ាក់​ចំពោះ​ពលរដ្ឋ​ដែល​ហ៊ាន​ធ្វើបាតុកម្ម​នៅ​ទីក្រុង​ភ្នំពេញ និង​បញ្ចេញមតិ​រឿង​ទឹកដី​នេះ​ទៅវិញ។ ចំណែក​សាច់ញាតិ​របស់​សកម្មជន​នយោបាយ និង​មេបាតុកម្ម​នៅ​ក្រៅប្រទេស​មួយចំនួន​ត្រូវអាជ្ញាធរ​រដ្ឋាភិបាល​តាម​ធ្វើទុក្ខបុកម្នេញ គំរាមកំហែង​ដល់​សមាជិក​ក្រុម​គ្រួសារនៅ​ស្រុក​ខ្មែរ ហើយ​ធ្ងន់ធ្ងរ​ជាង​នេះ​រដ្ឋាភិបាល​ត្រកូល «ហ៊ុន» បាន​ចាប់ខ្លួន​​ធ្វើ​ជា​ចំណាប់ខ្មាំង​ដូច​ជា​ករណី​ប្អូនប្រុស​បង្កើត​លោក ហៃ វណ្ណា គឺ​លោក ហៃ វណ្ណនិត ជាដើម។

វិទ្យុអាស៊ីសេរី មិន​អាច​សុំ​ការឆ្លើយតប​ជុំវិញ​បញ្ហា​នេះ​ពី​ប្រធានអង្គភាព​អ្នកនាំពាក្យ​រដ្ឋាភិបាល លោក ប៉ែន បូណា បានទេ នៅ​ថ្ងៃ​ទី០១ ខែកញ្ញា។

ជុំវិញរឿងនេះ អ្នកវិភាគ​នយោបាយ លោក គឹម សុខ ថ្លែង​ទៅ​កាន់​ក្រុម​បាតុករនៅ​ប្រទេស​កូរ៉េ​តាម​ប្រព័ន្ធ​អនឡាញ (Online) ថា ពលរដ្ឋខ្មែរ​ធ្វើ​បាតុកម្ម​ទាមទារឱ្យ​រដ្ឋាភិបាល​កម្ពុជា​ដក​ខ្លួន​ចេញ​​ពី​​កិច្ចសហប្រតិបត្តិការ CLV គឺ​ជា​រឿង​ត្រឹមត្រូវ និង​ស្របតាម​ច្បាប់ ពីព្រោះ​​កិច្ចសហប្រតិបត្តិការ​នេះ​បង្ក​គ្រោះ​ថ្នាក់​ដល់​ជោគ​វាសនា​ប្រទេស​ជាតិ។ លោក គឹម សុខ ជំរុញ​ឱ្យ​ពលរដ្ឋខ្មែរ​នៅ​គ្រប់​មជ្ឈដ្ឋាន​បន្ត​រួម​សាមគ្គី​គ្នា តស៊ូ គិត​គូរ​បញ្ហា​ទឹកដី ទើប​ទទួល​បាន​ជោគជ័យ។

លោក គឹម សុខ៖ «កម្ពុជា​របស់​យើង​រង​ហានិភ័យ​ខ្ពស់​ហើយ បាត់បង់​នៅ​ថ្ងៃ​អនាគត​ហើយ ខ្ញុំ​បាន​និយាយ​ម្តង​ហើយ​ម្តងទៀត ពេល​នេះ​ទៅ​​ដល់​៥០ឆ្នាំ​ទេ បើយើង​មិន​ទាមទារ​ឱ្យ​រដ្ឋាភិបាល​ត្រកូល​ហ៊ុន​ដក​ទឹកដី​កម្ពុជា​ចេញ​ពី​គម្រោង​ត្រីកោណ​អភិវឌ្ឍន៍​​របស់​វៀតណាម ដកខ្លួន ដកខ្លួន »។

ស្របពេល​ចរន្ត​ធ្វើ​បាតុកម្ម​ប្រឆាំងកិច្ច​សហប្រតិបត្តិការ CVL នៅតែ​មាន​សន្ទុះខ្លាំង មេបក្ស​ប្រឆាំង និង​ជា​ប្រធាន​ស្តីទី​គណបក្ស​សង្គ្រោះជាតិ​លោក សម រង្ស៊ី ក៏​បាន​ផ្ញើ​សារ​ជា​វីដេអូ​នៅ​ហ្វេសប៊ុក​នៅ​ថ្ងៃ​ទី០១ ខែកញ្ញា​ដោយ​លោក​ថា​ប្រជាពលរដ្ឋខ្មែរ​នៅ​ក្រៅ​ប្រទេស​ដែល​មាន​សិទ្ធិសេរីភាព​សម្តែងមតិ​ពេញលេញ​ចេញ​ធ្វើ​បាតុកម្ម​នេះ ដើម្បី​ការពារ​ផលប្រយោជន៍​ជាតិ ទឹកដី ការពារ​អធិបតេយ្យភាពជាតិ។ លោក សម រង្ស៊ី ថា សំឡេង​យុវជន​ខ្មែរ​នៅ​ប្រទេស​កូរ៉េ​ខាងត្បូង​ចេញ​ធ្វើ​បាតុកម្ម​នៅ​ពេល​នេះ​គឺ​បង្ហាញ​ពី​ទឹកចិត្ត​ស្នេហា​ជាតិ និង​តំណាង​ឱ្យ​ទឹកចិត្ត​របស់​ពលរដ្ឋ​ខ្មែរ​ទូទៅ​ដែល​ចង់​ឱ្យ​កម្ពុជា​មាន​លទ្ធិប្រជាធិបតេយ្យ​ពិត​ប្រាកដ។

លោក សម រង្ស៊ី៖ «ក្មួយៗ​នៅ​ប្រទេស​កូរ៉េ​តែងតែ​បង្ហាញ​ទឹកចិត្ត​ដ៏​បរិសុទ្ធ ដ៏ឧត្តុង្គឧត្តម​ចំពោះ​ការស្រឡាញ់​ជាតិ និង​ស្រឡាញ់​យុត្តិធម៌ សូម​ក្មួយៗ​បន្ត​សកម្មភាព​ស្នេហាជាតិ​របស់​ក្មួយៗ ហើយ​សូមក្មួ​យៗ​នៅ​ប្រទេសកូរ៉េ​ដែល​តំណាង​ឱ្យ​ទឹកចិត្ត​របស់​ពលរដ្ឋខ្មែរ​ទាំងមូល គឺ​ក្មួយៗ​ហ្នឹង​ហើយ​ដែល​នាំ​មក​លទ្ធិប្រជាធិបតេយ្យ​មក​ប្រទេស​កម្ពុជា»។

ប្រជា​ពលរដ្ឋខ្មែរ​ទូទៅ ជាពិសេស​អ្នក​តវ៉ា​នៅ​ក្រៅ​ប្រទេស និង​ក្នុង​បណ្ដាញ​សង្គមបន្ត​រក្សា​ជំហរ​ទាមទារ​ឱ្យ​រដ្ឋាភិបាល​បញ្ឈប់​ការ​ដាក់​ខេត្ត​ខ្មែរ​ចំនួន៤​នៅ​ក្នុង​កិច្ចសហប្រតិបត្តិការ​តំបន់​ត្រីកោណ​អភិវឌ្ឍន៍​ជាមួយ​ប្រទេស​វៀតណាម​និង​ឡាវ​តទៅទៀត ពីព្រោះ​ពួកគាត់​មើលឃើញ​ថា មេដឹកនាំ​ក្រុងភ្នំពេញ​មិន​មាន​តម្លាភាព និង​អាច​ចាញ់​បោក​ការ​បោកបញ្ឆោត​របស់​វៀតណាម​ក្នុង​រឿង​ផែនការ CLV នេះ ដោយ​កម្ពុជា​អាច​បាត់បង់​ទឹកដី​របស់​ខ្លួន​ដូច​កម្ពុជាក្រោម​ដែរ។ ដូច្នេះ​ពួកគាត់​ថា ពលរដ្ឋខ្មែរ​ត្រូវ​ងើប​តវ៉ា​ប្រឆាំង CLV នេះ​ជាមុន ដើម្បី​កុំ​ឱ្យ​បាត់បង់​ទើប​សោកស្តាយ​ដូច​រឿង​រ៉ាវ​ប្រវត្តិសាស្រ្ត​ដែល​កើត​ឡើង​កន្លងមក​ទៀត។ ពួកគាត់​បន្ថែម​ថា បើសិន​រដ្ឋាភិបាល​ត្រកូលហ៊ុន​ចង់​ជៀស​ផុត​ពី​ការចោទ​ប្រកាន់​ពី​មហាជន​ថា កាត់​ទឹកដី​កម្ពុជា​សង​គុណវៀតណាម​នោះ រដ្ឋាភិបាល​​លោក ហ៊ុន ម៉ាណែត ត្រូវ​ងាក​មក​ស្តាប់មតិ​របស់​ប្រជាពលរដ្ឋ ដោយប្រកាស​ដក​ខ្លួន​ចេញ​​កិច្ចសហប្រតិបត្តិការ CLV ជា​បន្ទាន់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។